حكايات دكتور نسا
الجزء السادس
قصص اطفال - قصص الاطفال - قصص أطفال - قصص للأطفال - قصص الأطفال - حواديت اطفال - حواديت للاطفال - حكايات اطفال - حكايات للاطفال - حكايات الاطفال - حكايات أطفال - حواديت ديزني - كتب اطفال- قصص رومانسية قصيرة - قصة رومانسية قصيرة - قصص حب رومانسية قصيرة - روايات - قصص اطفال بالانجليزي
عاوز احكيلكم النهارده قصة مدام منى ... واللى اثرت فيا كتير اوى
لان للاسف الست دى كانت حكايتها صعبه شويه
الست دى كانت جارتنا أو من نفس بلدنا و كنت اعرفها هى و جوزها بحكم أننا من بلد واحده
فى يوم لقيت اختى جايه تقولى
عارف عبدالحميد ابو عارف ؟؟
ايوا ماله ؟؟
بيقولوا هيتجوز على مراته و فعلا لقوا له عروسه
بس اللى اعرفه ان عبدالحميد ده متجوز من كتير اوى و مراته ست كويسه جدا
ايوه ...مراته منى كانت زميلتى... دى مفيش زيها و لا فى ادبها و لا فى نضافتها و لا فى كرمها
طب و عاوز يتجوز عليها ليه بقا بعد كل اللى قلتيه ده ؟
عشان الخلفه ...الكل عمال يزن على دماغه و يتحايلوا عليه خصوصا امه عشان تشوف له حته عيل قبل ما تموت
طب و ايه إللى سكته الفتره الطويله دى ؟
هو بيحبها و كان عنده امل انها تخلف تانى
و هى محملتش خالص ؟؟
هى حملت مره و بيقولوا الرحم انفجر و من ساعتها و هى محملتش تانى
انفجر و الا اتشال ؟؟
و الله يا حازم منا عارفه ..بس اللى اعرفه انها حملت مره واحده بس و من بعدها محملتش تانى ابدا
طب لو تعرفى تجبيها اكشف عليها هاتيها يمكن ربنا يرزقها بالذريه الصالحه
و الله يا حازم معرفش هترضى و الا ايه ؟
بس هروح لها يمكن ربنا يجعل على ايدك البشرى
و فعلا أسماء اختى راحت للست منى و قعدت معاها
ازيك يا منى
الله يسلمك يا اسماء
يعنى و لا حد عاد بيشوفك ؟؟ مكنتش عشره يا بت و مدرسه واحده لا... و تخته واحده كمان
معلش يا اسماء انتى عارفه المشغوليات و البيت هنا طلباته مبتخلصش
عارفه و عارفه أن حماتك شديده شويه
و الله يا اسماء انا بتعامل معاها انها امى و عشان كدا مبزعلش منها
امك ؟ هى امك ترضى أن جوز بنتها يتجوز عليها ؟؟
حقها يا اسماء ...هو استنى كتير و من حقه يشوف له حتة عيل برده و ابقى واحده انانيه لو قلت ميتجوزش ...انا من زمان بتحايل عليه و هو مش راضى
انتى مفيش حد زيك يا منى و لو لف الدنيا مش هيلاقى ضافرك
بس مش قادره اديله اكتر حاجه بيتمناها فى حياته
يا بت يا هبله هو انتى اللى بتدى ؟؟ دا رزق من ربنا و لو ربنا كاتبه هيرزقه و لو ربنا مأردش و الله لو اتجوز مية واحده مش هيخلف
اهو احنا بنحاول يمكن ربنا يرزقه باللى يتمناه ...عبدالحميد طيب و يستاهل كل خير
و انتى كمان طيبه و تستاهلى كل خير ...بقولك ايه
نعم
ايه رايك تيجى لحازم اخويا يكشف عليكى يمكن ربنا يجعل فى ايده الشفا
معدش له لزوم يا اسماء ... خلاص عبدالحميد شاف عروسه و كتب كتابه الخميس الجاى
طب و ماله لما تجربى ؟ انتى هتخسري ايه بس ؟؟
اجرب ليه و انا عارفه اللى فيها ؟؟ انتى فاكره انى مرحتش لدكاتره ؟؟ انا رحت لدكاتره كتير اوى هنا و فى القاهره و الكل قالى أن الحمل صعب اوى لأن الرحم لما انفجر و اتخيط بقا احتمالية أنه يشيل طفل صعبه شويه
و لا صعبه و لا حاجه ...مفيش حاجه صعبه لو لربنا أراد....... و ربنا أمرنا اننا نسعى
و نعم بالله ....تصدقى يا اسماء انى الايام دى تعبانه اوى و حاسه بكل اعراض الحمل ..مع انى متأكده أنه مش حمل و لا حاجه ..انا بقول يمكن عشان حالتى النفسيه و جواز جوزى عليا انا حاسه بكدا
يا حبيبتى متعيطيش ..و الله ربنا هيكرمك و هيرزقك من فضله
يا رب يا اسماء يا رب
طب مدام بتقولى عندك اعراض حمل ما تجيبي اختبار حمل و الا تعالى اكشفى زى ما قلت لك عند حازم اخويا
ههههههههه انتى برده مصدقه أنه حمل ؟؟
يا ستى مش هتخسرى حاجه دا اختبار هتجبيه بخمسه جنيه من الصيدليه
حاضر يا اسماء هروح اجيب واحد بكرا و اعمله مع انى عارفه اللى فيها
و بالفعل مدام منى راحت جابت اختبار حمل و لكن مرضيتش تعمله
كانت عارفه و متأكده أن اللى هى حاسه بيه ده نفسي
مدام منى رمت الاختبار فى الدرج و كل ما يقرب الخميس كان قلبها بيتقطع
لحد يوم الخميس الصبح قامت من سريرها لقت نفسها دايخه اوى وقعت على الأرض و جالها اغماء
جوزها شالها و فوقها
مالك يا منى ؟؟
معرفش يا عبدالحميد بقالى كام يوم دايخه و نفسي غمه عليا اوى
لتكونى حامل يا منى ؟
انت هتقول زى اسماء ؟ دى خلتنى اجيب اختبار حمل كمان
طب و عملتيه ؟؟
لا مرمى فى الدرج اهو
طب قومى اعمليه ..قومى يا منى
خايفه يا عبدالحميد ...خايفه يكون ادى نفسي امل و ميطلعش حمل
خلى املك كبير فى ربنا يا منى ...انا بحبك يا منى و نفسي اخلف منك انتى و مش عاوز اتجوز غيرك
و بالفعل قامت منى و عملت اختبار الحمل و طلعت شرطتين فى الاختبار
منى و عبدالحميد الفرحه مكنوش مصدقين نفسهم و الدنيا مكنتش سايعاهم
بعد 18 سنه ربنا رزقها بالحمل
عبدالحميد نزل السلم جرى و هو بيهلل
يا اما ...خلاص يا اما انا مش متجوز على مراتى خلاص يا اما
انت اتهبلت يا عبدالحميد ؟؟ هو كلام عيال يا ابنى ؟
ايوا انا عيل ...انا عيل يا اما ...منى حامل حامل
حامل ؟؟ الف بركه يا عبدالحميد ...بس الجوازه يا ابنى ؟
مفيش جوازه خلاص ...ربنا هيرزقنى من منى و دا اللى كنت بتمناه يا اما
طب و الشبكه اللى جبناها و المصاريف الله صرفناها ؟؟
مش مهم يا اما ...سبيلهم كل حاجه ...هما عارفين انى كنت عاوز اتجوز عشان اخلف و بس و انا كنت مفهمها هى و اهلها الكلام ده و مدام ربنا رزقني يبقى لزومه ايه الجواز بقا ؟
خلاص يا ابنى هشيع لهم مع أن الموضوع محرج اوى ...دول زمانهم عزموا الناس
معلش يا اما ....
بعدها لقيت عبدالحميد و منى جايين لى العياده علشان يتابعوا معايا الحمل
و حكت لى منى على اللى حصل و أن أسماء اختى كانت السبب انها تجيب اختبار الحمل و تخليها تجرب تعمله
طبعا كشفت عليها و اديتها الادويه اللازمه و مثبت للحمل لانى كنت شايف أن الرحم كانت حالته صعبه شويه
طبعا حالتها كانت تطلب انها تنام على ضهرها التسع شهور و متتحركش الا للحمام و بس
و فعلا التزمت مدام منى بالتعليمات و مر سبع شهور من الحمل
و كان كل ما شهر يعدى كانت تجيلى و هى فرحانه انها خلاص قربت تولد و تشيل ابنها بين اديها و زى ما يكون كل شهر بيعدى عليها كأنها مرحله صعبه عدت منها و حمدت ربنا انها مرت على خير
لحد ما فى يوم قامت على مغص شديد بقت تتلوى و كانت فى اخر الشهر السابع
جوزها جابها و جالى ...كشفت عليها لقيت أن الرحم انفجر للاسف
و للاسف الطفل توفى
و للاسف خلاص من الصعب اوى أن رحمها يقدر يشيل طفل تانى
مدام منى مشافتش ابنها و لا شالته بين اديها لأنها كانت لسه طالعه من القيصريه و حالتها لا تسمح
جوزها اخد الطفل و دفنه من غير ما تشوفه
مش قادر انسي منظرها لما فاقت و ملقتش ابنها و بقت تعيط فى حضن زوجها و هو يعيط معاها
يا الله ....منظر صعب اوى ...ساعات كنت اتمنى انى مبقاش فى التخصص ده علشان الحاجات اللى بشوفها دى
الطب بيعجز قدام بعض الحالات و ميقدرش يقدم اى حاجه تسعدها للاسف
لكن ارجع اقول كله بقدر و الخلفه رزق و هبه يهبها لمن يشاء و لازم نرضى بما قسمه الله لنا .
يتبع
قصص اطفال - قصص الاطفال - قصص أطفال - قصص للأطفال - قصص الأطفال - حواديت اطفال - حواديت للاطفال - حكايات اطفال - حكايات للاطفال - حكايات الاطفال - حكايات أطفال - حواديت ديزني - كتب اطفال- قصص رومانسية قصيرة - قصة رومانسية قصيرة - قصص حب رومانسية قصيرة - روايات - قصص اطفال بالانجليزي
#دجيهان_عادل
#قصص_وحكايات_د_جيهان_عادل.
فضلا غير مسموح نقل أو نسخ القصه إلا بعد اذن الكاتب و الا سيعرض للمسائله القانونيه ..
تعليقات
إرسال تعليق