أنس
الجزء الحادى عشر و الاخير
قصص اطفال - قصص الاطفال - قصص أطفال - قصص للأطفال - قصص الأطفال - حواديت اطفال - حواديت للاطفال - حكايات اطفال - حكايات للاطفال - حكايات الاطفال - حكايات أطفال - حواديت ديزني - كتب اطفال- قصص رومانسية قصيرة - قصة رومانسية قصيرة - قصص حب رومانسية قصيرة - روايات - قصص اطفال بالانجليزي
بعد اسبوع من نجاحى عرفت انهم قبضوا على المجرمين اللى عملوا فيا كدا و كان لازم اروح عشان اتعرف عليهم 😔😔
اهلى لما عرفوا خافوا و قالوا بلاش تروحى و لا تيجى ما صدقنا الناس نسيت لكن انس صمم انى لازم اروح و اتعرف عليهم و اخد حقى
و بالفعل رحت معاه و كان اصعب موقف مر بحياتى لما وكيل النيابه عمل لهم عرض و حطهم فى وسط طابور طويل و قالى اللى تعرفيه منهم طلعيه
و بالفعل دخلت اوضه كبيره و لقيتهم مرصوصين ...
قلبى كان بيدق جامد
حسيت ان روحى بتتسحب
احساس رهيب كأنى رجعت لنفس المشهد مره تانيه
الدنيا بقت تلف من حواليا
و حسيت انى هقع
ريقى نشف
و لقيت جسمى كله بيوجعنى
كل حته بتألمنى
وكيل النيابه طبطب على كتفى و قالى لازم تشدى حيلك عشان تجيبي حقك من اللى ظلموكى و اعتدوا عليكى
مريت على طابور العرض و كان اول واحد لمحته خليفه شاورت عليه
قام الظابط شاور له يطلع بره الصف
و شاورت على التانى و التالت و الرابع
كلهم كانوا موجودين
جالى حاله هياج شديده لما افتكرت اللى عملوه فيا ....انا اصلا منستش
كنت عاوزه اقطع من لحمهم زى ما عملوا معايا
كنت اتمنى احرقهم زى ما حرقونى
كنت اتمنى انتقم منهم ابشع انتقام
مقدرتش امسك نفسي و بقيت الطش فيهم كلهم و هما واقفين و حاطين اديهم ورا ضهرهم و مبيتحركوش زى الأصنام
بقيت اصرخ و انا بضربهم معرفش ازاى ...لحد ما اغمى عليا من شدة الانفعال
فقت لقيت انس جنبى واخدنى فى حضنه و بيطبطب عليا
برافو عليكى يا شهد ...اللى عملتيه انهارده بطوله و هو اول خطوه لشفاء روحك تماما
بس انا تعبت اوى يا انس لما شفتهم
معلش دا طبيعى ...الم فى الاول و بعد كدا راحه كأنك بتعملى عمليه جراحيه ...فى الاول بتتعبى شويه و بعد كدا بترتاحى تماما
ربنا يخليك ليا يا أنس انا مش عارفه من غيرك كنت عملت ايه ؟؟
متقوليش كدا يا شهد ...انا دايما معاكى و عمرى ما اسيبك ابدا
بعد الموضوع ده بشهر حسيت بشويه تعب فى الرحم و طبعا مقدرتش اطلب من اهلى انهم يودونى للدكتور لان علاقتنا ساءت جدا و بقيت عايشه معاهم فى البيت من غير اى كلام تقريبا
انس اخدنى ودانى لطبيب امراض نسا و كانت المفاجأة
الدكتور قال بعد عمل الاشعه و التحاليل أن عندى ورم خبيث فى الرحم عافاكم الله
و أنه لازم نعمل عمليه استئصال للرحم لو العلاج الكيماوى منفعش
و طبعا بالشكل ده مش هعرف اخلف
لما الدكتور قالى كدا الدنيا اسودت فى وشى حسيت أن الحياه إدتنى ضهرها لتانى مره
ذنبه ايه انس ياخد واحده زيى و كمان ممكن متخلفش ؟؟؟؟
يااااا .....منتهى الالم حسيته فى اللحظه دى
و بالرغم من دعم أنس ليا الا انى فعلا انهرت المره دى و فكرت فى الانتحار اكتر من مره لكن انس مكنش سايبنى و لا دقيقه و خاصة انى مقلتش لأى حد حتى اهلى و هو طبعا مقالش لحد من أهله
و بدأت اقفل على نفسي و اعتزل الدنيا كلها و اهلى محسوش و لا سألوا ايه اللى بيحصل
عشت فى الالم و المرض لوحدى ...لا ...كان معايا انس مبيسبنيش ...يمكن هو اللى صبرنى على الحياه
و مع سوء حالتى النفسيه و اشتداد الالم عليا انس قعد من الشغل عشر ايام
بقى طول النهار يكلمنى و طول الليل يقيم الليل و يقرأ قران و يدعيلى أن ربنا يشفينى لاذان الفجر ...ينزل يصلى فى المسجد و يرجع ينام شويه و بعد كدا يفضل معايا على التليفون
بعد العشر ايام رحنا نعيد كشف ملقناش الورم ....اه و الله الورم اختفى كأنه مكنش موجود
الدكتور بقى هيتجنن و كشف بالاجهزه اللى عنده ملقاش اى حاجه
مكنتش مصدقه نفسي
انس سجد فى الارض و فضل يعيط و يحمد ربنا و يشكر فضله
بعدها قام و اخدنى فى حضنه و دعالى أن ربنا يحفظنى له
المجرمين اتحكم عليهم بالاعدام و كان يوم من أسعد أيام حياتى
و انهارده كمان من أسعد أيام حياتى ..انهارده فرحى على أنس حب حياتى ... عمرى كله اللى لو طلب عنيا اقدمهم له و انا فى منتهى الفرح
أنس وهبنى الحب اللى كان السبب فى انى عايشه لحد دلوقتى
اللى اقدر اقوله ربنا يرزق كل بنت بقلب يحبها ...صدقونى دا أعظم رزق فى الحياه ❤️❤️❤️❤️❤️❤️❤️❤️❤️❤️
عقبال كل البنات 😘😍😍
تمت 🌷🌷
🌿🌿 انا عاوزه اقول بس كلمه ...الدنيا دار ابتلاء و ليست دار جزاء ...لكن مع ذلك مش لازم نفقد الأمل ...ربنا سبحانه و تعالى وعدنا فى القرآن و قال إن مع العسر يسر مقالش بعد العسر يسر .... لا ...اليسر موجود فى حال وجود العسر
ربنا سبحانه و تعالى لا يكلف نفسا إلا وسعها و مدام ابتلاك بشئ يبقى اكيد هو العالم انك تقدر تتحمله ...
اؤمن جدا أن كل امر ربنا كتبه لنا خير يمكن احنا منعرفش فى لحظتها ليه بيحصل لنا كدا بس بعدين بنتأكد أن ده كان الصالح لينا ..
اللهم ارزقنا الرضا و الايمان بقضائك
اللهم اجعل اى ابتلاء فى ميزان حسناتنا و اختم لنا بخير يا رب العالمين 🌿🌿
ارجو أن القصه تكون نالت إعجابكم
لو عجبتكم القصه ارجو الدعاء لوالدى رحمة الله عليه و سائر موتى المسلمين بالرحمه و المغفره
قصص اطفال - قصص الاطفال - قصص أطفال - قصص للأطفال - قصص الأطفال - حواديت اطفال - حواديت للاطفال - حكايات اطفال - حكايات للاطفال - حكايات الاطفال - حكايات أطفال - حواديت ديزني - كتب اطفال- قصص رومانسية قصيرة - قصة رومانسية قصيرة - قصص حب رومانسية قصيرة - روايات - قصص اطفال بالانجليزي
#دجيهان_عادل
#قصص_وحكايات_د_جيهان_عادل.
فضلا غير مسموح نقل أو نسخ القصه إلا بعد اذن الكاتب و الا سيعرض للمسائله القانونيه ..
تعليقات
إرسال تعليق