أنس
الجزء التاسع
قصص اطفال - قصص الاطفال - قصص أطفال - قصص للأطفال - قصص الأطفال - حواديت اطفال - حواديت للاطفال - حكايات اطفال - حكايات للاطفال - حكايات الاطفال - حكايات أطفال - حواديت ديزني - كتب اطفال- قصص رومانسية قصيرة - قصة رومانسية قصيرة - قصص حب رومانسية قصيرة - روايات - قصص اطفال بالانجليزي
و صحيت و انا بصرخ و لقيت ابويا دخل على صوت الصريخ فوقنى بسرعه و اخدنى فى حضنه ...اهدى يا بنتى أهدى يا شهد ...انتى بتحلمى .
تانى يوم لقيت جدتى جايه من بدرى ، جدتى دى بحبها اوى و ياما روحت قعدت عندها فى البلد و كنت بستمتع بجو الريف الهادى
كنت احبها اوى و هى بتحكيلى حكايات جدتها زمان عن النداهه و ابورجل مسلوخه و بالرغم أن جدتى متعلمه و من عيله لكن برده كان لها مفاهيم خاصه كدا أو تفكير قديم شويه
جدتى اول ما دخلت عليا اخدتنى فى حضنها
حبيبتى يا شهد حمدالله على سلامتك يا بنتى ....تعالى فى حضن تيته حبيبتك
ياااا كنت محتاجه الحضن ده اوى .... من لحظة ما فوقت كنت محتاجه حد يحضنى كدا ...اخبى نفسي جواه
الحضن طبطبه على الروح من جوه ...حنيه ملهاش زى ...بيعبر عن إلى جوانا من غير اى كلام
دموعى بقت تنزل و هى كمان بقت تعيط على عياطى
متعيطيش يا شهد
انا تعبانه اوى يا تيته ...انا حصل لى اللى عمره ما تخيلته فى حياتى ...يا ريتنى مت كان احسن لى من العار اللى انا فيه ده دلوقتى..... انا خلاص مبقاش ليا مستقبل ..انا انتهيت و سيرتى بقت على كل لسان ...فقدت دراستى و خطيبي ..فقدت حياتى كلها ...ياريتنى مت ياريتهم موتونى احسن
خلصتى كلامك ؟؟
الكلام اللى جوايا مبيخلصش يا تيته و لا اقدر اعبر عنه
انتى محمله نفسك فوق طاقتها ليه يا بنتى ؟؟ انتى ضحيه...مجنى عليها مش جانى
لا....... المجتمع هيحطنى فى خانه الجانى ...هيساوينى بيه و يعاملنى معاملته
و انتى ليه تسمحى لهم يعاملوكى معامله الجانى ؟؟؟ و بعدين نظرتهم دى حاجه تخصهم هما وبس متخصكيش انتى
ازاى بتقولى كدا يا تيته نظرتهم ليا هى اللى ممكن ترفعنى لسابع سما أو تنزلنى سابع ارض
انتى غلطانه يا شهد ...إرضاء الناس كلها غايه لا تدرك انتى مش عارفه قصه جحا و ابنه و الحمار ؟
ايوه عارفاها
شوفتى لما جحا جرب كل حاجه مره يركب هو و ابنه و مره لوحده و مره يركب ابنه و مره يسيب الحمار بدون ركوب و فى الاخر شال الحمار هو و ابنه و الناس معجبهاش
انك ترضى كل الناس دا أمر مرهق ليكى و مش هتوصليله مهما عملتى
يعنى ايه يا تيته ؟؟
يعنى تركزى فى دراستك و مستقبلك احسن من الكلام الفاضى اللى شاغله بيه نفسك دا
دراستى ؟؟؟ هو انا هيكون ليا عين ارجع كليتى ؟؟
و ليه مترجعيڜ ؟؟ ما احنا قلنا بقا أن كلام الناس مش هيهمنا و لازم نركز على مستقبلنا
مش هعرف يا تيته
لا هتعرفى ...انتى شخصيتك قويه زى جدتك صفيه ...مش انا يا بت شخصيتى قويه ؟؟
انتى اجمل شخصيه فى الدنيا يا تيته
يا بت يا بكاشه ...اما انا اجمل شخصيه انس خطيبك يبقى ايه بس ؟؟
انس ؟؟ ما خلاص يا تيته انس سابنى
سابك ازاى ؟؟
انا عذراه اى حد مكانه هيعمل كدا ...دا حقه
يعنى انس فسخ الخطوبه ؟؟
لا معرفش
امال بتقولى كدا ليه ؟
لانه مسألش عليا و لا جه مع بابا ياخدنى من المستشفى ...هيكون ايه السبب غير كدا
طب استنى يا شهد و بلاش ظنك السيئ دا ....يا منير ....يا منير
بتنادى على بابا ليه يا تيته؟
ابنى و حره فيه يا بت ...استنى بس
ايوه يا ماما
هو انس خطيب شهد فسخ الخطوبه ؟؟!
لا يا ماما
امال مجاش معاكم ليه و انتوا بتجيبوا شهد ؟؟
لانه ميعرفش يا ماما
ازاى ميعرفش ؟؟
هو صراحه كان بيسال عليها كل يوم بس الدكتور كان مانع الزياره و هو عارف كدا كويس ..فلما الدكتور اتصل بيا مرضتش أقوله عشان اعافيه من الحرج
حرج ؟؟؟ حرج ايه كفالله الشر ؟
يا ماما ما انتى عارفه
اسكت يا واد انت لتلاقى العكاز ده نازل على دماغك و تاخد لك علقه من بتوع زمان
مااااما
و لا ماما و لا بابا ...من امتى بنعمل نفسنا قضاه و نصدر الحكم كمان...ما يمكن الجدع لسه عاوزها
انا اتصلت عليه انهارده و طلبت منه يجى هو و والدته علشان ارجع له شبكته و الحاجه اللى جابها
انت قلت له كدا ؟؟
لا ..انا قلت له أننا جبنا شهد و منتظرينك انت و الوالده بعد العصر باذن الله ...و لما يجى هكون مجهز له حاجته كلها ...هو مش ذنبه حاجه
و بنتك مش ذنبها حاجه ...انا عرفت البنت واصله للى هى فيه ده ليه دلوقتى ؟؟ لأنها مش لاقيه الدعم من اقرب الناس ليها ...لا و انا اللى بطلب منها تواجه ....تواجه ازاى و ابوها بالعقليه المتخلفه دى ؟
مااااما
ماما ايه بس ؟؟ انت خليت فيها ماما ؟؟ انا اللى هقعد مع انس و والدته و اشوف هيقولوا ايه ؟
منا كنت هعمل كدا يا ماما
اه باماره انك هتحضر له الشبكه صح ؟؟ اسكت انت ملكش دعوه بالموضوع ده و خلى مراتك الحلوه اللى جوه دى اللى من اول ما دخلت ضاربه بوز تعملى فنجان قهوه ساده
قهوة ايه يا ماما ؟؟ فاطمه بتحضر الفطار
لا يا اخويا وفر فطارك انا بصلى الفجر و أفطر ... أجرى اعمل اللى قلت لك عليه
حاضر يا ماما
بابا خرج ...كنت حزينه اوى من كلامه و تيته صفيه لاحظت نظرة الحزن دى فى عنيا راحت مبتسمه ليا و قالت
متسمعيش كلام الواد منير ده ....انا معرفتش اربى ...بس اوعدك هربهولك من اول و جديد
كلام تيته ضحكنى بالرغم انى حزينه و خصوصا أن لها طريقه كوميديه كدا و هى بتبص لى بعنيها العسليه من تحت نضارتها .
بعد العصر جرس الباب رن و قلبى وقع معاه ...كنت حاسه ان نهايتى قربت ...
اللحظه اللى انس هياخد شبكته و يمشي هكون فعلا انتهيت فيها ...بس دا حقه برده 😔
اول ما اختى فتحت الباب ......
يتبع
قصص اطفال - قصص الاطفال - قصص أطفال - قصص للأطفال - قصص الأطفال - حواديت اطفال - حواديت للاطفال - حكايات اطفال - حكايات للاطفال - حكايات الاطفال - حكايات أطفال - حواديت ديزني - كتب اطفال- قصص رومانسية قصيرة - قصة رومانسية قصيرة - قصص حب رومانسية قصيرة - روايات - قصص اطفال بالانجليزي
#دجيهان_عادل
#قصص_وحكايات_د_جيهان_عادل.
فضلا غير مسموح نقل أو نسخ القصه إلا بعد اذن الكاتب و الا سيعرض للمسائله القانونيه ..
تعليقات
إرسال تعليق