حكايات دكتور نسا
الجزء الخامس
قصص اطفال - قصص الاطفال - قصص أطفال - قصص للأطفال - قصص الأطفال - حواديت اطفال - حواديت للاطفال - حكايات اطفال - حكايات للاطفال - حكايات الاطفال - حكايات أطفال - حواديت ديزني - كتب اطفال- قصص رومانسية قصيرة - قصة رومانسية قصيرة - قصص حب رومانسية قصيرة - روايات - قصص اطفال بالانجليزي
انهارده هحكيلكم حكايه مدام هنا. ....و اللى لولا ستر ربنا كانت ماتت هى و طفلها و كنت أنا دخلت فى مشكله كبيره جدا لا يعلمها الا الله
مدام هنا جت لى زى اى واحده حامل تتابع الحمل
اتفضلى يا مدام هنا
مرسيه يا دكتور
خير ان شاء الله
انا جبت اختبار حمل و ظهر لى شرطتين و عرفت انى حامل
الف مبروك
الله يبارك فيك ...كنت عاوزه اتابع الحمل مع حضرتك
انتى خلفتى قبل كدا ؟؟
ايوا انا والده تلات مرات
طبيعى و الا قيصرى ؟؟
اول ولاده قيصرى و التانيه و التالته طبيعى
ازاى طبيعى بعد القيصرى دا خطر جدا الكلام ده
و الله يا دكتور ربنا سترها وولدت طبيعى
بس انا لو ولدتك هولدك قيصرى انا مقدرش اجازف بحاجه زى كدا
ليه يا دكتور ؟؟ منا بقولك انى والده طبيعى مرتين بعد القيصرى
يا مدام هنا الطلق ممكن يفتح الجرح و ساعتها هيعمل لك نزيف و هتتخيطى من فوق و من تحت
سبها على الله ...مش هيحصل حاجه أن شاء الله
و نعم بالله بس انا بقولك لو عاوزه تولدى طبيعى يبقى تروحى لدكتور غيرى ...انا مش هجازف بحياتك
لما يجى وقتها نبقى نشوف يا دكتور
وقتها زى ما قلت لك هتولدى قيصرى
باذن الله يا دكتور احنا فين و الولاده فين
و بالفعل تابعت مدام هناء معايا طول اشهر الحمل و بقيت اكتب لها على الادويه و الفيتامينات المطلوبه و لما وصلت الثامن كتبت لها على حقن الرئه علشان الجنين تكتمل رئتيه عشان كنت عامل حسابى انى هولدها فى اول التاسع
و جت لى اول التاسع و كشفت عليها
بصى اللى انا شايفه من السونار أننا ممكن نستنى اسبوع و تولدى علشان نوصل لوزن كويس للجنين و كمان تكون الرئه اكتملت
تمام يا دكتور
متتأخريش يا مدام هنا عشان ميجلكيش طلق
لا مش هتأخر باذن الله
قبل ما تيجى اتصلى بعبير حددى معاها الميعاد و تصومى قبل ميعاد العمليه ب8 ساعات
حاضر يا دكتور
و مشيت مدام هنا و غابت و طبعا انا من الحالات اللى عندى نسيتها
فوجئت بيها جت لى بعد تلات اسابيع و انا كنت داخل قيصريه و هى فيها الطلق
ايه دا انتى لسه مولدتيش ؟؟
لا يا دكتور
لا ليه يا مدام هنا احنا مش كنا متفقين على الولاده من اسبوعين ؟
صراحه يا دكتور انا مش عاوزه أولد قيصرى ...انا استنيت لما جالى الطلق و جيت أولد طبيعى
انتى ازاى تعملى كدا ؟؟
مش هيحصل حاجه أن شاء الله يا دكتور
كشفت عليها و سبتها لما الرحم يفتح و دخلت عشان اعمل قيصريه للحاله اللى معايا
دكتور التخدير خدر الحاله و استنى لما خلصت شغل معاها و فوقها و خلص شغله
عاوز حاجه يا حازم
لا متشكر يا دكتور احمد
طيب سلام عليكم
الحق يا دكتور الحاله اللى هتولد طبيعى تعبانه اوى و بتصرخ جامد و بتقول بطنى بتتقطع
طب بسرعه يا عبير جهزيها اعملها سونار
حاضر يا دكتور
سلام يا حازم
هتصل بيك بكره باذن الله عشان فى قيصريه
تمام ...
سبت دكتور احمد ينزل و جريت على الحاله
اول ما حطيت السونار على بطنها لقيت الرحم انفجر و الطفل خرج بره الرحم
جريت على الشباك بسرعه
دكتور احمد ...يا احمد
ايوا يا حازم
اطلع بسرعه
طلع احمد بسرعه و طلبت منه يخدر الحاله فورا
اول ما احمد أداها البنج فتحت بسرعه انا و المساعد بتاعى
لو كنت استنيت دقيقه واحده كانت الحاله دى ماتت هى و ابنها
لولا ستر ربنا عليا و عليها مكنتش عارف ايه ممكن يحصل
و لولا ستر ربنا و دكتور التخدير موجود كانت ماتت بكل تأكيد
طبعا الحمد لله انقذت الست و ابنها و قفلت جرح العمليه
بعدها احمد بص لى و ضحك و قالى
اه يا ابن المحظوظه ...الست كانت هتموت
لسه ليها عمر يا احمد ...و سبحان الله دا توفيق ربنا فى الاول و الاخر
و نعم بالله ...طب عاوزنى فى حاجه تانى و الا أمشى انا بقا ؟
لا توكل على الله
مفيش حاله مستخبيه كدا و الا كدا ؟
ههههههههه لا خلاص مفيش
يا رب ما تنادى عليا تانى اول ما اوصل باب العربيه 🤭😂
لا متخافش خلاص 🤣
🌷🌷🌷🌷
حمدالله على السلامه يا مدام هنا
الله يسلمك يا دكتور
انتى ربنا كتب لك عمر جديد انتى و ابنك
الحمد لله يا دكتور ...متشكره اوى
الشكر لله وحده ...احنا مجرد أدوات و أسباب بس
الحمد لله ....و برده كتر خيرك يا دكتور اللى عملته معايا عمرى ما هنساه و هفضل ادعيلك طول عمرى
الله يكرمك يارب دا شغلى بس ابقى اسمعى الكلام بقا
حاضر يا دكتور ....توبه من دى النوبه😁
يتبع
قصص اطفال - قصص الاطفال - قصص أطفال - قصص للأطفال - قصص الأطفال - حواديت اطفال - حواديت للاطفال - حكايات اطفال - حكايات للاطفال - حكايات الاطفال - حكايات أطفال - حواديت ديزني - كتب اطفال- قصص رومانسية قصيرة - قصة رومانسية قصيرة - قصص حب رومانسية قصيرة - روايات - قصص اطفال بالانجليزي
#دجيهان_عادل
#قصص_وحكايات_د_جيهان_عادل.
فضلا غير مسموح نقل أو نسخ القصه إلا بعد اذن الكاتب و الا سيعرض للمسائله القانونيه ..
تعليقات
إرسال تعليق