حكايات دكتور نسا
الجزء الرابع
قصص اطفال - قصص الاطفال - قصص أطفال - قصص للأطفال - قصص الأطفال - حواديت اطفال - حواديت للاطفال - حكايات اطفال - حكايات للاطفال - حكايات الاطفال - حكايات أطفال - حواديت ديزني - كتب اطفال- قصص رومانسية قصيرة - قصة رومانسية قصيرة - قصص حب رومانسية قصيرة - روايات - قصص اطفال بالانجليزي
انهارده هحكيلكم حكايه مدام سناء
مدام سناء من بلد جنب البلد اللى فيها عيادتى
و كانت متابعه معايا فى حملها الاول و ربنا رزقها ببنت زى القمر
بعد الولاده كتبت لها وسيلة حمل تمشي عليها و هى بترضع
لكن فوجئت أن مدام سناء جايالى بعد حوالى سنه و هى حامل فى الشهر السابع
اول ما قعدت فكرتنى بنفسها
اهلا يا مدام سناء
اهلا بيك يا دكتور ...حضرتك فاكرنى ؟؟
حضرتك اللى مولدنى فى بنتى الاولى
ايوا طبعا فاكرك
انا يا دكتور مشيت شويه على وسيلة الحمل بس ربنا أراد و حملت
اكيد كنتى بتلخبطى فى المواعيد انا نبهت عليكى أن حبوب منع الحمل اللى بتتاخد مع الرضاعه بتبقى ضعيفه لأن فيها هرمون واحد و اللخبطه فى المواعيد ممكن يحصل حمل بسهوله
عارفه و انا مش زعلانه انى حملت كدا على طول بالعكس دا انا فرحت أن بنتى هيكون لها اخ او اخت ، اهلى و اهل جوزى اللى زعلوا و قالوا مكنش وقته و كنتى صبرتى بس دى اراده ربنا
و نعم بالله
كنت بتمنى أن ربنا يرزقنى بولد عشان يكون عندى ولد و بنت و يبقى كدا كفايه و مش عاوزه حاجه من الدنيا
رحت لدكتوره عندنا فى البلد و انا فى الشهر الخامس و قالت لى انى حامل فى بنت
بدأت أفكر في اسمها واكلم بنتي الرضيعه عن أختها اللى جايه ..وفي يوم صحيت من النوم ولقيت بايدي على طول ذراعي مكتوب اسم محمد وكأنه بدم أحمر أو أقرب الي حنه وبشكل واضح تماما لو كان فيه موبايل بكاميرا وقتها كنت صورتها ...روحت لأمي سألتها إيه ده؟ اتعجبت وقالت سبحان الله يمكن يا بنتى انتى قريبه لربنا ..سكت وانا واحده أقل من العادي ..ممكن ربنا فعلا يكون باعتلي رساله وبيحبني..وابتدا الأهل يجوا علشان يشوفوا ذراعي ويتعجبوا و هما بيقولوا سبحان الله..
وبعدها بكام يوم بدأت الكلمه تتلاشى جزءا بجزء ..واختفت
و انا دلوقتى فى الشهر السابع وعندي الم رهيب في ضلوعي الم مبيخلنيش انام ...قلت اجى لحضرتك علشان تكشف عليا و تشوف لى سبب الألم ده ايه ؟
طيب اتفضلى الممرضه تحضرك للسونار
و طلعت مدام سناء على السرير و حضرتها الممرضه اول ما حطيت السونار على بطنها اكتشفت أن اللى فى بطنها ولد مش بنت
بس لاحظت أن الولد ده مش طبيعى
طلبت من الممرضه تحضر لى جهاز الاشعه رباعية الأبعاد علشان اتاكد من اللى انا شايفه قدامى
الست كانت قلقانه لما لقتنى هكشف عليها بالجهاز التانى
هو فى حاجه يا دكتور ؟؟ البنت فيها حاجه ؟؟
اولا هى مش بنت ...دى ولد وواضح جدا أنه ولد
معقول ؟؟ الف حمد و شكر ليك يا رب ...دا انا عماله اقول لبنتى هيجيلك اخت ...لا خلاص بقا اعدل و اقولها هيجيلك اخ و اختار له اسم كمان
باذن الله يا مدام ...اتفضلى نكشف بالجهاز التانى
لما ابتديت اكشف عليها بالجهاز التانى و كان طبعا موضح اكتر اتاكدت من اللى كنت شاكك فيه
انتهيت من الكشف و بدات مدام سناء تسألنى كأى حامل
انا هولد امتى يا دكتور ؟؟ و طبيعى و الا قيصرى ؟؟
و كان لازم اقولها الحقيقه
للاسف يا مدام الجنين مش طبيعى
يعني ايه مش فاهمه ؟؟
حضرتك بتشتكي من ضلوعك ؟
ايوا..
الطفل عنده استسقاء في المخ أدى لتضخم حجم الرأس بشكل كبير وهي ضاغطه على ضلوعك مسببه الألم فهي دلوقتى في حجم الكره بدل من ان تكون في حجم البرتقاله مثلا
اه وبعدين يا دكتور
وكمان عنده شلل في النصف السفلي بالجسم والرأس تقريبا مابيتحركوش ومع كل يوم بيكبر رأسه حجمها بيكبر وبتضغط اكتر
ايه السبب يا دكتور ؟ و ايه الحل؟
للاسف حالته متأخرة ....عليكي متابعة حركته ولو توقفت لمدة ثلاث ايام تعالي لأنه هيكون في الغالب توفى وننزله ..او انه يكمل لحد ميعاد الولاده ونشوف محتاج ايه ونعمله وده على ما أعتقد احتمال ضعيف لأنه حالته متأخرة
خرجت مدام سناء و هى مذهوله بس مينفعش انى كنت اكدب عليها أو حتى اجمل لها الحقيقه
هى اكيد بتفكر انها دلوقتى بانتظار موت ابنها ...يا الله ...احساس اكيد صعب
طبعا مدام سناء مجتش تانى الا فى أول أسبوع من الشهر التاسع
انا جايه علشان تولدنى يا دكتور
انتى كنتى فين دا كله ؟؟ و متابعتيش معايا ليه ؟
انا لما طلعت من عندك مكنتش مصدقه نفسي و قلت يمكن حضرتك غلطت
روحت لاهلى و حكيت لهم على اللى قلتهولى
اهلى نصحونى انى اروح لدكتور كبير علشان يأكد لى أو ينفى كلام حضرتك
و رحت و قالى نفس الكلام ولكن قال لي إنه من الممكن اننا ننزل الجنين لأن وجوده مسبب لى الم وهيسبب الم اكثر مع الشهور اللى جايه ولأنه كده كده ميت على حد قوله . ..يبقى صحتي وسلامتي اهم ..بدال يعني ما يبقى من كله ..قلتله طيب و ابنى هيحصل له ايه ؟ ..قال هيموت لأننا هنشفط الميه اللي جوه رأسه عشان نقدر نسحبها وتولدي طبيعي زي ولادتك الأولى بدال ما نفتح بطنك
قلت له مش حرام يا دكتور ؟؟
قال لا احنا بنضحي بيه لصحتك وهو شبه منتهي ..رجعت من عنده متلخبطه لأنه كان على علم ودين كبير ...ولكن أزاى اموت ابنى بايدى ؟؟ ازاى ؟ انا هسلمها لله و اتحمل الالم و لا انى اموت ابنى بايدى
واستسلمت للأمر وكنت بستنى كل يوم ...لا كل ساعه ولحظه حركته عشان اطمن عليه وفعلا كل ما كان بيكبر جوه احشائى كانت ضلوعي وكأنها بتتكسر جوايا من قوة الألم
مكنتش بقدر و لا اقعد و لا انام
دا كله و كان عندى امل ان يخيب الله الظنون .. و يطلع كلامكم غلط
و لما وصلت التاسع حضرتك كنت قايلى إن الراس كبيره و مش هتنزل الحوض يعنى لازم أولد قيصرى فأنا جيت دلوقتى عشان تولدنى
حاضر يا مدام سناء هكشف عليكى دلوقتى عشان اطمن على الوضع ... و بكرا الصبح تجيلى باذن الله و تكونى صايمه قبلها 8 ساعات
باذن الله يا دكتور
تانى يوم جت مدام سناء و اخدت البنج النصفى و بدأت افتح بطنها و احاول اخراج الجنين و للاسف مكنتش قادر أخرج رأسه من تحت ضلوعها لأنها كانت كبيره جدا تحت الضلوع...
ابتديت استدعى دكاتره تانين معايا بالمركز و اتكلم معاهم فجاه لقيت الحاله جالها هبوط و بدأ تنفسها يتأثر ...قمنا بتزويدها بسرعه بالاكسجين
وبعد عدة محاولات ومساعدات قدرنا اخيرا نخرجه والحمد لله
بصيت له .. سبحان الله مااجمله ..لكن لاحظت بظهره فتحه طوليه بالعمود الفقري
امه كمان شافت الفتحه دى و صرخت ايه الفتحه دى يا دكتور ؟
لو سمحتى يا مدام غمضى عينك و اسكتى ...
واحده من الممرضات الواقفين حطت أيدها على عنين الحاله علشان متشوفش و هى برده عماله تسال
طيب هو كويس يا دكتور ؟؟؟
كله خير
ونعم بالله كله خير ..بس عاوزه اطمن عليه
خرجت من غرفة العمليات والطفل فورا ذهب للحضانه ..الحاله حرجه ..رجعت الام البيت و كان لازم الطفل يتجهز تانى يوم لعمليه كبيره بالمخ و الاب راح و اتفق مع الدكتور اللي هيقوم بالعمليه خامس يوم الولاده و لكن يشاء الله أن الطفل يتوفى قبل ما يدخل العمليه و ربنا يرحمه من التعرض لعمليه زى دى
الام كان عندها رضا عجيب و لما سألتها قالت
الحمد لله يا دكتور انى تممت رسالتي اللى ربنا امرنى بيها ورحمه ورحمني من وجعه والمه وخوفي من اي لحظة يموت فيها بين حضني ..فعلا ربنا أحن علينا من الكل وله حكمه في كل شئ الحمد لله دائمآ وأبدا على رحمته بعباده الضعفاء .
يتبع
قصص اطفال - قصص الاطفال - قصص أطفال - قصص للأطفال - قصص الأطفال - حواديت اطفال - حواديت للاطفال - حكايات اطفال - حكايات للاطفال - حكايات الاطفال - حكايات أطفال - حواديت ديزني - كتب اطفال- قصص رومانسية قصيرة - قصة رومانسية قصيرة - قصص حب رومانسية قصيرة - روايات - قصص اطفال بالانجليزي
#دجيهان_عادل
#قصص_وحكايات_د_جيهان_عادل.
فضلا غير مسموح نقل أو نسخ القصه إلا بعد اذن الكاتب و الا سيعرض للمسائله القانونيه ..
تعليقات
إرسال تعليق