حكايات دكتور نسا
الجزء الثالث
قصص اطفال - قصص الاطفال - قصص أطفال - قصص للأطفال - قصص الأطفال - حواديت اطفال - حواديت للاطفال - حكايات اطفال - حكايات للاطفال - حكايات الاطفال - حكايات أطفال - حواديت ديزني - كتب اطفال- قصص رومانسية قصيرة - قصة رومانسية قصيرة - قصص حب رومانسية قصيرة - روايات - قصص اطفال بالانجليزي
الحاله جاهزه يا دكتور
طيب انا جاى يا عبير
اهلا يا مدام وفاء
اهلا يا دكتور
خير ان شاء الله
انا بقالى سنتين مباخدش وسيله حمل و لسه محملتش ...و كنت جيت لحضرتك من سنه و طلبت منى اشعه
فكرينى حضرتك كدا
طلبت اشعه بالصبغه
طب و عملتيها ؟؟
لا صراحه خفت
طب و ليه ؟؟؟
سمعت انها مؤلمه جدا ، اختى بتقول عملتها و كذا واحده سألتهم قالوا نفس الكلام
انتى ممكن تعمليها ببنج لو متخوفه اوى كدا ...حضرتك عندك اولاد صح ؟
ايوا عندى اتنين و نفسي اخلف بنت
طيب اعمليها و لو محصلش حمل يبقى لازم الزوج يعمل تحليل عشان نعرف الدنيا رايحه لفين
حاضر يا دكتور هعملها و ربنا يستر
دى كانت حكايه مدام وفاء
و بالفعل اتشجعت و راحت عملت الاشعه
هى الاشعه دى مؤلمه شويه فعلا لأنهم بيحقنوا الأنابيب بماده و بعد كدا بيحصل تصوير للرحم و الأنابيب
ساعات بتكون انبوبه مقفوله بنقطة دم و الماده دى بتدخل تسلكها
الماده دى بتبقى عامله زى مية النار فى تأثيرها و عشان كدا فى ستات كتير بيفضلوا أنهم يتبنجوا و هما بيعملوها
مدام وفاء كانت أربعين سنه و بالفعل حملت فى الشهر اللى عملت فيه الاشعه
لما اتصلت عليا و قالت لى انها حامل كنت سايق عربيتى و الله وقفت العربيه من فرحتى و فرحت جدا لانها كانت نفسها تخلف مره تانيه و كانت فاقده الامل و كانت قايلالى انها تابعت مع اكتر من دكتور قبل ما تجيلى
طبعا مشيتها على ادويه و فيتامينات و اسبرين طول فتره الحمل نظرا لسنها
لما وصلت للشهر الرابع جت علشان تعرف جنس الجنين و كان عندها امل كبير اوى انها تطلع بنت
انهارده يا دكتور هتقولى انا حامل فى بنت و الا ولد صح ؟؟
صح يا مدام وفاء
يا رب يا دكتور تطلع بنت ...البنت هى اللى بتشيل اهلها و هى اللى بتحمل همهم
كل ما افتكر يا دكتور انى ممكن اكبر كدا فى السن و ملاقيش ليا بنت تخدمنى أو يكون قلبها عليا ادعى ربنا أنه يرزقنى بيها
انا دعيت كتير اوى يا دكتور و شفت رؤيا جميله قبل ما احمل ...
شفت أن فى حمامتين بيض طايرين فى السما وواحده منهم نزلت و كان نفسي اخدها راحت اختى مدت أيدها و حطتها فى حضنى و اخدتها فى حضنى و انا مش مصدقه نفسي و بقيت اقول لامى معقول معقول يا ماما ربنا هيدهالى معقول ؟؟؟
و عشان كدا عندى امل كبير انها تطلع بنت
هنشوف يا مدام وفاء ...السونار هيقولنا إن كان حلمك صح و الا غلط ...
اتفضلى الممرضه تجهزك للسونار
لو طلعت بنت يا دكتور لك الحلاوه
يا ستى حلاوتى انك تقومى بالسلامه
الله يسلمك و يسلم عمرك يا رب
و طلعت مدام وفاء و اول ما حطيت السونار على بطنها لقيت الجنين ولد
حاولت ابص مره تانيه يمكن اكون غلطان لكن كان واضح جدا
قوليلى يا مدام وفاء هى الحمامه اللى شوفتيها كانت دكر و الا نتايه ؟
لا معرفش يا دكتور .. ليه ؟؟ هو انا حامل فى ايه ؟؟
انتى حامل فى ولد يا مدام وفاء
لا يا دكتور ...طب اتأكد تانى بالله عليك
و الله اول ما حطيت السونار ظهر بس قلت اتاكد مره تانيه بس فعلا هو ولد
لا يا دكتور متقولش كدا ...طب اتأكد تانى ...دى اخر فرصه ليا للحمل انا خلاص سنى كبر و مش هعرف احمل تانى و كان نفسي فى بنت زى ما قلت لك
بنت ولد كله رزق من ربنا و ملناش نعترض
مش بعترض و الله ...بس دى كانت امنيه ..البنت حبيبه امها و سندها و كان نفسي اخلف بنات ...انا يا دكتور لما بشوف بنات اخواتى قلبى بيهفهف عليهم
البنات غير الولاد خالص تحس بحنيتهم و تحس انهم حبوبين كدا ...فعلا المؤنسات الغاليات زى ما قال الرسول عليه الصلاة والسلام
عليه الصلاة و السلام بس لازم نرضى و منزعلش من هبة ربنا لينا
لا مقدرش ازعل ...الحمد لله طبعا هو انا كنت طايله اصلا انى احمل ...انا كنت فقدت الامل اصلا و فعلا الخلفه دى هبه من الرحمن ملناش أننا نعترض الحمد لله على نعمه
الست وفاء طبعا كانت راضيه بس هى كانت بتتمنى بنت تشيلها فى كبرها لأنها على حد قولها إن حتى لو مرات ابنها طلعت بنت حلال و خدمتها مش هتكون زى بنتها ..لان مرات الابن بتعتبر أن خدمه الحما فضل منها أما خدمة بنتها واجب عليها و أن بنتها عمرها ما هتزهق منها
المهم خلصت شهور حمل مدام وفاء على خير و جه يوم الولاده
طبعا هى كانت والده آخر ولاده لها قيصريه و من فتره طويله طلبت منى انى اسيبها لحد ما تولد طبيعى
لا طبعا مقدرش اعمل كدا
ليه يا دكتور ؟؟
لان الطلق ممكن يفتح جرح القيصريه كدا بقا هتتعرضى للخياطه من فوق و تحت و تتعرضى للخطر
يا دكتور الخياطه دى بقالها سنين و سنين و زمانها لمت خلاص
مقدرش اجازف يا مدام وفاء ...الموضوع ده فيه خطر عليكى
خلاص يا دكتور زى ما تشوف
خلاص فوتى اسبوعين فى التاسع و تعالى عشان اولدك
حاضر يا دكتور
و بالفعل جت لى بعد اسبوعين من دخولها الشهر التاسع هى و اختها ووالدتها و زوجها و اولادها و دخلتها اوضه العمليات
اول ما دكتور التخدير أداها الحقنه فى ضهرها بدأ جهاز القلب يصفر بصوت عالى جدا
مكنتش لسه فتحت ولا عملت اى حاجه
الجهاز بقى يزيد ضرباته و صوته ارتفع بصيت لدكتور التخدير أنه يتصرف
راح حقنها فى الكانولا بشويه حقن كدا
بعد شويه الصوت نزل و رجع النبض طبيعى
ابتديت افتح طبقات البطن و لاحظت أن فتح القيصريه اللى قبل كدا وحش جدا و مكنش كويس و عرفت أنه عمل صديد
اول ما فتحت صوت الجهاز على مره تانيه
و مكنش قدامى الا انى اكمل بسرعه
و فعلا خرج ابنها للنور
لما جيت اقفل الجرح لاحظت أن فى دم زياده شويه ...خفت ليحصلها نزيف اديتها حقنه للنزيف و قفلت الجرح
لما فاقت فى اوضتها و شالت ابنها بين اديها كانت فرحانه اوى و الفرحه مش سايعاها
الحمد لله ابنها كان عنده صفره خفيفه و اتعالج و خرجت بالسلامه
سبحان الله يمكن الخير انها تخلف ولد و هى متعرفش ...اللى انا متاكد منه أن هبه الله لأى انسان بتبقى الخير له
بعض الأحيان فى بنات بتبقى جاحده على اهاليها و بيكون الولد احن منها
مش لازم تكون البنت هى اللى بتخدم امها انا اعرف اولاد تحت رجلين اهاليهم و بارين بيهم جدا
يعنى البر لا يقتصر على بنت بس أو ولد بس ...فى اولاد حلال كتير اوى
ربنا يرزقنا بر اولادنا يا رب
يتبع
قصص اطفال - قصص الاطفال - قصص أطفال - قصص للأطفال - قصص الأطفال - حواديت اطفال - حواديت للاطفال - حكايات اطفال - حكايات للاطفال - حكايات الاطفال - حكايات أطفال - حواديت ديزني - كتب اطفال- قصص رومانسية قصيرة - قصة رومانسية قصيرة - قصص حب رومانسية قصيرة - روايات - قصص اطفال بالانجليزي
#دجيهان_عادل
#قصص_وحكايات_د_جيهان_عادل.
فضلا غير مسموح نقل أو نسخ القصه إلا بعد اذن الكاتب و الا سيعرض للمسائله القانونيه ..
جميل ورائع ما تكتبين
ردحذف