حكايات دكتور نسا
الجزء الثانى
قصص اطفال - قصص الاطفال - قصص أطفال - قصص للأطفال - قصص الأطفال - حواديت اطفال - حواديت للاطفال - حكايات اطفال - حكايات للاطفال - حكايات الاطفال - حكايات أطفال - حواديت ديزني - كتب اطفال- قصص رومانسية قصيرة - قصة رومانسية قصيرة - قصص حب رومانسية قصيرة - روايات - قصص اطفال بالانجليزي
اول ما حطيت السونار على بطنها سألتها
انتى عندك كام بنت يا مدام هناء ؟؟
اربعه يا دكتور
طيب لو قلت لك أن الخامسه جايه هتعملى ايه ؟؟؟
بنت ؟؟ هعمل ايه يعنى ؟؟ كله خير يا دكتور ...الحمد لله على اللى ربنا يدهولى
طب انتى فى بطنك ولد يا ستى
صحيح ؟؟؟ صحيح يا دكتور ؟
اه و الله صحيح وواضح جدا قدامى اهو
الحمد لله يا رب ...الحمد لله ربنا يسعدك يا دكتور و يفرح قلبك زى ما فرحتنى ...انا مش عارفه اقول ايه و الا اعمل ايه ؟؟
ههههههههه بالراحه بس .. استنى بس لما اكمل كشف
حاضر ...حاضر يا دكتور
الف مبروك يا ماما
الله يبارك فيكى يا سميه ....هيكون عندك اخ يا سميه ...هيكون سندكم .. هو اللى هيقف معاكم ...دا اللى هيشلنا لما نكبر ...دا اللى هيكون عكازنا ...دا ابوكى هيفرح اوى بالخبر ده ....احمدك يا رب و اشكر فضلك ...احمدك يا رب
طيب اتفضلى يا مدام هناء علشان اكتب لك شويه ادويه و فيتامينات و بعدين نكشف على سميه
كشفت عليهم و كتبت لكل واحده منهم روشته خاصه بيها و اديتهم التعليمات و أنهم لازم يتابعوا معايا كل شهر مرتين
الممرضه عملت لهم كروت متابعه و بقوا يترددوا على العياده كل 15 يوم
لما الست هناء وصلت للشهر الثامن لاحظت أن ضغطها ارتفع شويه و طبعا دا غلط جدا على الحامل
ايه يا مدام هناء مين اللى مزعلك ؟؟
لا مفيش حاجه مزعلانى يا دكتور
امال مال ضغطك عالى ليه ؟؟
ابدا و الله دا حتى انا مستنيه بفارغ الصبر عشان اشوف ابنى و افرح بيه ، مش مصدقه انى هشيله بين أديا
باذن الله هتشيليه و تفرحى بيه
يا رب يا دكتور يارب
طيب انا لازم اكتب لك على دوا للضغط علشان ننزله لانه لو منزلش لا قدر الله ممكن يعمل تسمم حمل و يبقى لازم اولدك بدرى و دا طبعا مش كويس
ربنا يسترها يا دكتور ... انت قلقتنى كدا ....يعنى ابنى ممكن يجراله حاجه ؟؟
باذن الله مفيش حاجه بس انتى انتظمى على الدوا اللى هكتبه لكى دا و عاوز اشوفك بعد تلات ايام عشان اتابع معاكى الضغط و أتأكد أن كل شي تمام
حاضر يا دكتور ربنا يستر
و مشيت الست هناء و جابت الدوا و مشيت عليه فتره
لما جت لى لقيت ضغطها نزل ،
الحمد لله ضغطك نزل شويه ، عاوزك تداومى على العلاج و متسبهوش لحد الولاده
باذن الله يا دكتور ...انا من ساعة ما عرفت أن ضغطى عالى و ابنى ممكن يجراله حاجه مبنامش
لا ليه بس ؟؟ انتى ضغطك بدأ يظبط و احنا كدا ماشيين كويس اوى ...سبيها على الله
و نعم بالله
الست دى كان فاضل على ميعاد ولادتها حوالى شهر و لقيتها قطعت فجاه و مجتش و المفروض انها كانت تيجى تتابع فى اخر شهر اكتر من مره لكنها لما مجتش قلت خلاص دى حريه شخصيه و هى حره يمكن راحت لدكتور تانى
بعد حوالى شهرين لقيت سميه بنتها داخله تكشف عندى
اهلا ازيك يا مدام سميه
الله يسلمك يا دكتور حازم
ازيك و ازاى صحتك
الحمد لله انا جايه عشان أولد مع حضرتك
تمام ...و ماما عامله ايه ؟
ماما ماتت يا دكتور
ماتت ؟؟؟ لا حول و لا قوه الا بالله.... انا لله وانا اليه راجعون ......البقاء لله
و نعم بالله ...احنا اسفين يا دكتور ظنينا فيك السوء
مش فاهم ... ليه ايه اللى حصل ؟
لما أديت لماما دوا الضغط و مشيت عليه شويه ضغطها اتظبط زى ما انت عارف
ماما كانت قلقانه برده و خافت من تسمم الحمل اللى قلت لها عليه قالت تروح تسأل دكتور تانى عشان تتأكد لأنها كانت حريصه اوى على الحمل ده و كانت خايفه عليه جدا
و بالفعل رحنا لدكتوره ساميه ابو النجا ووريناها العلاج اللى حضرتك كاتبه مسكت الروشته و رمتها فى الارض و قالت هو حازم ده بيفهم حاجه ؟ كاتب لك دوا ضغط ليه و انتى ضغطك مظبوط جدا ...لا لا متاخديش الدوا ده
و بالفعل صدقناها و قلنا على حضرتك انك غلطان و مفيش كام يوم لقينا ماما تعبت جدا و ضغطها ارتفع جدا و جالها تسمم حمل زى ما قلت و دخلت فى غيبوبه
طبعا ولدوها و جه اخويا على وش الدنيا بس للاسف مشفتوش ...ملحقتش تشوفه و لا تفرح بيه ...ملحقتش تحضنه زى ما كانت بتتمنى
لا حول و لا قوه الا بالله ...معلش يا مدام سميه متعيطيش بس ...الزعل مش كويس عشانك
تخيل يا دكتور امى تكون مستنيه الولد طول عمرها ، و تموت قبل ما تشوفه
معلش دا عمرها ، ربنا يرحمها يا رب و يغفر لها
يا رب يا دكتور
و انتى خلى بالك من نفسك ...ربنا يقومك بالسلامه
يا رب ...تسلم يا دكتور
و بالفعل ولدتها بعد يومين و افتكرت و بنتها بين أديا والدتها الله يرحمها و تذكرت كلماتها و هى بتتمنى انها تحضن ابنها اللى استنته سنين و سنين و للاسف معرفتش و لا حست بيه
و للاسف طفل زى ده طلع يتيم الأم هيطلع للدنيا الله اعلم ايه اللى هيحصله ، و مين اللى هيراعيه
الحكايه دى فضلت مأثره فيا فتره كبيره اوى
اد ايه الحياه دى مش مستاهله
ممكن فى لحظه الحياه تنتهى
ممكن تقرب من حلمك و فى نفس الوقت متوصلش
الحياه دى ملهاش كتالوج ...
مفيش حاجه ثابته و لا حاجه معروفه
اى حد فينا معرض أن يحصل له اى حاجه فى اى وقت
حاجه مكنتش تخطر على باله ،
و لكن كله بمشيئه الله و قدره و لازم نرضى بنصيبنا و اى شئ يصيبنا لان اكيد دا الخير لينا
يتبع
قصص اطفال - قصص الاطفال - قصص أطفال - قصص للأطفال - قصص الأطفال - حواديت اطفال - حواديت للاطفال - حكايات اطفال - حكايات للاطفال - حكايات الاطفال - حكايات أطفال - حواديت ديزني - كتب اطفال- قصص رومانسية قصيرة - قصة رومانسية قصيرة - قصص حب رومانسية قصيرة - روايات - قصص اطفال بالانجليزي
#دجيهان_عادل
#قصص_وحكايات_د_جيهان_عادل.
فضلا غير مسموح نقل أو نسخ القصه إلا بعد اذن الكاتب و الا سيعرض للمسائله القانونيه ..
تعليقات
إرسال تعليق