حكايات دكتور نسا
الجزء الاول
قصص اطفال - قصص الاطفال - قصص أطفال - قصص للأطفال - قصص الأطفال - حواديت اطفال - حواديت للاطفال - حكايات اطفال - حكايات للاطفال - حكايات الاطفال - حكايات أطفال - حواديت ديزني - كتب اطفال- قصص رومانسية قصيرة - قصة رومانسية قصيرة - قصص حب رومانسية قصيرة - روايات - قصص اطفال بالانجليزي
انا الدكتور حازم ابو المجد طبيب امراض نسا حبيت احكيلكم عن حكايات كتير بتقابلنا
حكايات غريبه و عجيبه محدش يتخيلها
انا نفسي مكنتش مصدق انى فى يوم من الايام ممكن اقابل أو اصادف الكم ده من الحكايات
كل حاله لها حكايه و فى حكايات أعجب من العجب
كل حكايه بخرج منها أن لله فى خلقه شؤون
حكايات عن ستات عملت حقن مجهرى مره و اتنين و تلاته بآلاف الجنيهات و كلها فشلت و يشاء الله انها تحمل من غير حول لها و لا قوه و تخلف
حكايات عن ستات حملت عن طريق الحقن المجهري و طلع الطفل مشوه و بعد كدا ربنا رزقها طبيعى باطفال سلام
فعلا الخلفه دى هبه من الرحمن ، يهبها لمن يشاء
كمان بصادف فى العياده ستات بتيجى مرعوبه انها تكون حامل فى بنت
بتبقى خايفه جدا من زوجها و متعرفش أن دى هبه يتمناها غيرها
و زى ما فى ستات بتتمنى الولد فى برده بيتمنوا البنت و كله بمشيئه الله
انا اسف معرفتكوش بنفسي ، انا حازم 35 سنه نشأت فى اسره متوسطة الحال بإحدى قرى محافظه القليوبيه ، ابويا كان محفظ قران يمكن هو اللى حفظ معظم أبناء البلد القران الكريم
عندى خمس اخوات ، والدى علمنا كلنا و ربانا على الأخلاق و الحلال
دخلنى الأزهر و لله الحمد حفظت القرآن الكريم
لما وصلت لثانويه عامه كنت مجتهد جدا و فى حالى عمرى ما كان ليا مغامرات و لا اعرف حاجه فى الدنيا غير كتابى و دروسي
حصلت على مجموع عالى ، و نظرا لظروفنا قلت لوالدى انى مش هدخل كليه الطب و هدخل اى كليه عاديه
لكن والدى رفض و أصر انى ادخل و قالى كلمه مش هنساها
انا عاوزك يا حازم تكون دكتور و اوعى يا ابنى تيجى على غلبان ...مهنتك دى من اسمى المهن و لكن لازم تكون انسان ، الفقير اللى مش معاه تمن الكشف ساعده و اوعى تيجى عليه
كلام ابويا اتحفر جوه نفسي ، و عاهدته انى انفذ وصيته
لما دخلت كلية الطب كنت مغترب ..ساكن فى المدينه الجامعيه
كنت بحاول اشتغل اى حاجه علشان اساعد فى المصاريف مع والدى
كنت ساعات اشتغل فى صيدليه بالساعه ، و ساعات اشتغل اى حاجه خفيفه جنب الدراسه لأن دراسة الطب مش سهله طبعا زى ما حضراتكم عارفين
اتخرجت من كليه الطب و المفروض انى كنت اتخصص و كنت حابب اوى انى اتخصص انف و اذن و حنجره
تخصص النسا و الولاده ده كان من ابعد التخصصات عن تفكيرى بل كان من رابع المستحيلات انى ادخله
و يشاء ربنا أن صديق ليا يكتب لى التخصص ده و يتقبل ..حاولت انى اغيره و للاسف معرفتش
لكن ارجع و اقول كله بقدر
اللى شفته فى المجال ده مكنتش اتخيل انى اشوفه زى ما قلت لكم
و لما دخلت المجال حبيته جدا
لحظه خروج طفل من رحم أمه دى من أعظم اللحظات اللى ممكن تشوفها أو تشعر بيها ...سبحان من خلص روح عن روح فعلا
صرخة الطفل و خروجه للدنيا دى لحظه فريده فى حيات الإنسان ، بل من أعظم لحظات حياته
تعلق الطفل بأمه عن طريق الحبل السري و قطع الحبل ده لحظه برده فريده بعد تعلقه و ارتباطه بيها تسع شهور كاملين
و عشان كل اللى حكيته لكم ده قررت احكيلكم بعض الحكايات العجيبه اللى قابلتها فى حياتى و اللى هتندهشوا جدا لما تسمعوها
انا عندى قصص كتير بس هبدا لكم بقصه مدام هناء اللى جتلى العياده مع بنتها سميه و الاتنين كانوا حوامل
اه و الله متستغربوش الست كانت تقريبا فى الاربعين و بنتها فى العشرين
و كانت خلفتها كلها بنات و كانت بتتمنى من ربنا يرزقها بالولد
و بالفعل حملت بعد ما بنتها اتجوزت و جم الاتنين علشان يتابعوا الحمل سوا
مساء الخير يا دكتور
مساء النور يا فندم اتفضلوا...خير يا فندم
احنا جايين نتابع الحمل انا و بنتى عند حضرتك ، انا فى نهايه الشهر الرابع و بنتى فى الشهر التالت
اسم حضرتك و سنك ؟
أسمى هناء ابراهيم و سنى 40 سنه
بتعانى من اى أمراض يا مدام هناء ؟
لا بس ساعات الضغط بيعلى عليا شويه
تمام ...اتفضلى لما افحصك
ممكن يا دكتور تقولى على نوع الجنين ؟؟
ايوه طبعا انتى فى نهايه الشهر الرابع
طب و بنتى ؟
لا بنتك لسه فى التالت مش هيظهر دلوقتى ...الشهر الجاى باذن الله هنعرف
يا رب يا دكتور يكون فى بطنى ولد ...دا اللى بتمناه من الدنيا ...انا بقالى 22 سنه متجوزه و بتمنى الولد ده و نفسي افرح جوزى لانى دايما شايفاه حزين و عارفه أن دى الحاجه الوحيده اللى هتفرحه
يا ستى ولد بنت كله رزق ربنا
طبعا كله رزق ربنا بس انا حملت فى السن المتأخر ده على أمل أن ربنا يدينى ولد ، و حاسه كدا أن ربنا هيدينى اللى بتمناه لانى دعيت كتير اوى اوى فوق ما تتخيل
باذن الله خير ...اتفضلى اطلعى على السرير نعمل لك سونار
و طلعت مدام هناء و هى مضطربه و عماله تدعى و تقرا قران فى سرها
و بنتها واقفه مترقبه زى ما يكون هى كمان بتتمنى يكون لها اخ صغير
اول ما حطيت السونار على بطنها سألتها
انتى عندك كام بنت يا مدام هناء ؟؟
اربعه يا دكتور
طيب انتى فى بطنك ........
يتبع
قصص اطفال - قصص الاطفال - قصص أطفال - قصص للأطفال - قصص الأطفال - حواديت اطفال - حواديت للاطفال - حكايات اطفال - حكايات للاطفال - حكايات الاطفال - حكايات أطفال - حواديت ديزني - كتب اطفال- قصص رومانسية قصيرة - قصة رومانسية قصيرة - قصص حب رومانسية قصيرة - روايات - قصص اطفال بالانجليزي
#دجيهان_عادل
#قصص_وحكايات_د_جيهان_عادل.
فضلا غير مسموح نقل أو نسخ القصه إلا بعد اذن الكاتب و الا سيعرض للمسائله القانونيه ..
تعليقات
إرسال تعليق