#غاده
#الجزء_الرابع
قصص اطفال جديدة - قصص اطفال جديده - قصص عربيه - قصص اطفال قصيرة -قصص اطفال قصيره - قصص اطفال عربية - قصص اطفال بالعربي - روايه رومانسيه - قصص رومانسية - روايات رومانسية - حدوتة قبل النوم - قصص اطفال مكتوبة - قصص واقعية - حدوتة اطفال - قصص اطفال مكتوبه - قصص الاطفال مكتوبة
قامت لمياء و اقتربت من غاده هامسه
بابا دا وحش ...انا مش بحبه
لا يا لمياء عيب ...دا بابا برده 😔
دخلت غاده غرفتها تحدث نفسها
انا عملت ايه فى دنيتى يا رب ؟؟ انا طول عمرى فى حالى و عمرى ما عملت مشكله مع حد ...ليه بيحصلى كدا ؟؟
حتى جوزى اللى المفروض يقف جنبى و لو حتى بالكلام عمره ما نصفنى و على طول يقطمنى بالرغم انى بفضله عن نفسي
ياما قمت جعانه عشان الاكل مكنش بيبقى مكفى و اقوله انى شبعانه عشان ياكل هو و يشبع
ياما كنت احوش قرش على قرش عشان اجيب له هديه عشان اشوف الفرحه فى عينه و استخسر فى نفسي و هو و لا عمره رد أو جاب لى حاجه
حتى لبسه انا بشتريه من مرتبى ، و هو من يوم ما اتجوزته عمره ما فكر فيا و لا جيت فى خياله انه يجيب لى حتى طرحه
بس ارجع و اقول انا الغلطانه ...انا اللى بدى و بس ...انا الطرف المعطى و هو المستقبل هو اللى بياخد و خلاص
كنت فاكره انى ام اعمل كدا هيحبنى ، بس الظاهر انى غلطانه ...انا عمرى ما شفت نظره حب فى عينه
عمره ما طبطب عليا و لا حس بيا
حتى فى علاقته الخاصه بيا كانت اسوء ما تكون و كل ده بقول اصبر هو أبو اولادى و مليش غيره
اصبر عشان مخدش لقب مطلقه و الناس تشمت فيا
اصبر يمكن يحبنى فى يوم من الايام و من كتر معاملتى الكويسه له يحس بيا و يقدر اللى بعمله و يحبنى
انا مكنتش عاوزه حاجه من الدنيا إلا أن حد يحبنى ...
و لما جالى عبداللطيف قلت ربنا عوضنى و خصوصا أنه كان واضح عليه الهدوء و التدين
قلت خلاص يا غاده يمكن ده عوضك فى الدنيا و دا اللى هيصونك لانه عارف ربنا و هتعيشي معاه بقية عمرك سعيده
لكن للاسف قابل كل عطائى بجحود و افتكر أن ده حق مكتسب و المفروض عليا انى اقدم كل شئ و هو لا
حتى لما جيت أولد ولادى سابنى فى المرتين و مشي و مدفعش جنيه فى اى ولاده و لا عبرنى و اخد باله منى زى اى زوج
اااااه يا رب ...انا تعبانه اوى بس أجبن من انى اخد اى قرار يغير حياتى
انا بالرغم من ده كله و من اللى عامله فيا ده الا ان فى قلبى معزه له لأنه أول راجل يلمسنى ...اول حد يكون قريب منى كدا
انا عمرى ما عرفت الحب الا من بعيد لبعيد
نامت غاده و دموعها على خدها و عبداللطيف نائم على الأريكة كالعاده ويغط فى سبات عميق
فى اليوم التالى قامت غاده محمله بالهم ارتدت ملابسها القديمه استعدادا ليوم طويل
استقبلها الزملاء بالهمز و اللمز
توجهت إلى غرفة التحقيق
سألها المحقق عن سبب سبها لزميلها ، شرحت له سر انفعالها و أنه طلب منها أخذ رشوه
استدعى المحقق الاستاذ وليد و تم مواجهته بغاده أنكر تماما أنه عرض عليها رشوه و أنها هى من سبته بدون سبب لانه طلب منها الهدوء و عدم التدخل فى شئون الاداره
استدعى المحقق الاستاذ حمدى و باقى الزملاء و الكل اجمع ان غاده هى المخطئه و هى من بدأت بالسب
انتهى التحقيق بلفت نظر غاده و خصم ثلاث ايام من المرتب
عادت غاده إلى مكتبها وضعت رأسها بين أوراقها و انكفئت لتمضى ما بقى من وقت
انقضى الوقت و رجعت غاده لبيتها ، فتحت الباب و كان عبداللطيف منهمك فى الحديث مع أحد الأشخاص حتى أنه لم يلحظ دخولها
سمعت حديث غريب من عبداللطيف
ايوا يا خالد ...شوف لى حكايه التأشيرة دى بس و شوف هتتكلف كام و قولى اصلى سألت عليها فى مكتب هنا و قالوا 2000 جنيه اكيد عندكم ارخص
لم تصدق غاده ما سمعت ...
عن اى تأشيره يتحدث زوجها ؟
اغلق عبداللطيف الخط و تفاجأ بوجود غاده أمامه
ايه اللى سمعته ده ؟؟ تأشيرة ايه اللى عاوز تعملها ؟؟
انتى بتتصنتى عليا ؟؟
اتصنت ايه ؟؟ فهمنى تأشيرة ايه دى ؟؟
تأشيرة سفر هتكون تأشيرة بطاطس يعنى ؟
هو انت هتسافر ؟؟؟
ايوا عندك مانع ؟؟
من امتى الكلام ده ؟؟
من امتى و الا ما امتاش ؟ ملكيش فيه
مليش فيه ازاى ؟ انا مش موافقه على السفر ده
مش برأيك يا حبيبتى دى حاجه تخصنى
لا انا مراتك و شريكة حياتك و ليا حق عليك و بعدين ازاى تاخد قرار مصيري زى ده من غير ما تاخد رايى
و انتى لكى رأى اصلا ؟؟
امال انا مليش ؟
بصى يا غاده انا راجل حر و كلامى من راسي مش مستنى موافقه من سيادتك
بالله عليك يا عبداللطيف متسافرش و تسبنى انا محتجاك و مش هقدر اعيش من غيرك
بطلى الكلام الفاضى ده ...مستقبل عيالنا اهم ...انت مش عاوزه يكون عندنا بيت اكبر من ده ؟؟
لا مش عاوزه ...احنا نعيش هنا و ناكل ملح احسن ما تبعد عننا و نفضل هنا لوحدنا من غيرك
بطلى كلام الهبل والأفلام اللى بتقوليه ده
طب يعنى السفريه دى تستاهل انك تسبنا و تمشي ؟؟ العقد بكام يعنى ؟
لا مفيش قيمه محدده
ازاى يعنى ؟؟
يعنى الراجل صاحب المزرعه هيدينى نسبه من الأرباح ؟؟
ارباح ايه ؟ هى المزرعه دى بتجيب ارباح اصلا ؟؟
لا مزرعه تحت الانشاء
نعم ؟؟؟ يعنى لسه قدامها وقت طويل على ما يكون فى إنتاج ؟؟
و ماله كل حاجه تاخد وقتها
طب و هيديك مرتب لغاية ما تنتج ؟؟
هيدينى اكل و شرب
طب و احنا ؟؟
انتوا مالكم
احنا هنصرف منين ؟؟
ما انتى بتشتغلى
يعنى ايه ؟ يعنى اتحرم منك انا و عيالك و كمان مفيش فلوس ؟؟ انا مش موافقه على السفريه دى
توافقى متوافقيش غصب عنك هسافر مش هاخد اذن منك
قصص اطفال جديدة - قصص اطفال جديده - قصص عربيه - قصص اطفال قصيرة -قصص اطفال قصيره - قصص اطفال عربية - قصص اطفال بالعربي - روايه رومانسيه - قصص رومانسية - روايات رومانسية - حدوتة قبل النوم - قصص اطفال مكتوبة - قصص واقعية - حدوتة اطفال - قصص اطفال مكتوبه - قصص الاطفال مكتوبة
يتبع
#دجيهان_عادل
#قصص_وحكايات_د_جيهان_عادل.
فضلا غير مسموح نقل أو نسخ القصه إلا بعد اذن الكاتب و الا سيعرض للمسائله القانونيه ..
تعليقات
إرسال تعليق