#غاده
#الجزء_الثالث
على صوت غاده ووليد و لم يجد وليد الا مهاجمه غاده بكل حده
اجتمع الزملاء حولهم فى محاوله لإنهاء الموضوع
بدأ الاستاذ حمدى بالتدخل و الانحياز الكامل لوليد دون الاستماع الى غاده و كأنه كان على اتفاق مع وليد ...
قرر حمدى تقديم مذكره و تحويل غاده للتحقيق بتهمه التعدى بالسب و القذف على زميل لها بالمكتب
عادت غاده إلى منزلها تشعر بصداع رهيب و ينتابها ذهول مما حدث
راحت تحدث نفسها
انا المجنى عليها كيف يتم التحقيق معى ؟؟
ايحاكم الجانى أم المجنى عليه ؟؟
بمجرد دخولها من الباب وجدت عبداللطيف يجلس بكرشه السمين على الأريكة كالعاده
جلست غاده فى الاريكه المقابله لعله يلحظ انها حزينه و يسألها عن ما انتابها من هم
و لكنه كالعاده لم يشعر بها ، واضعا جل تركيزه بالتلفاز و متابعه الاخبار
جلست غادة تنظر إليه فى حسره ثم قامت لتدخل غرفتها
ايه ؟؟ مفيش غدا و الا ايه ؟؟
انا تعبانه يا عبداللطيف
و ايه اللى تاعبك يا اختى ؟؟ دا حتى شغلكم مش متعب و قاعدين على مكاتب طول النهار
و انت اللى شغلك متعب اوى ؟؟
اه طبعا انا مهندس زراعى طول النهار الف على العمال لما رجليا بتدوب و الجزمه مبتقعدش شهرين على بعض
نعم ؟؟ هى ايه اللى مبتقعدش شهرين ؟ دى الجزمه اللى انت لابسها دى من تلات سنين
تلات سنين مين ؟؟ دى مكملتش سنتين ...انتى هطلعى سمعه عليها و الا ايه ؟؟
سمعه ؟؟؟خلاص يا عبداللطيف
خلاص ايه ؟ تعالى هنا ...فين الغدا يا ست هانم ...انا جعان و عصافير بطنى بتزقزق
قلت لك تعبانه و عندى مشكله كبيره
مشكله ايه أن شاء الله منا عارفك مبتريحيش
انا ؟؟
انصرفت غاده من وجه عبداللطيف و كانت تنتظره قدومه خلفها ليسألها ما هى مشكلتها و لكن هيهات هيهات ...لم يتحرك له ساكن و عاد إلى اريكته و تلفازه دون أدنى تفكير بزوجته
خرجت غاده بعد دقائق لتجده يغط فى نوم عميق و صوته شخيره يغطى على صوت التلفاز
دلفت غاده للمطبخ لاعداد الطعام لأطفالها الذين على وشك الحضور
طبخت البسله و اللحم و الارز
حضر الأبناء و جلسوا جميعا على السفره
اخذ عبد اللطيف فى الاكل بنهم شديد دون الالتفات لغاده بأنها لا تضع شيئ بفمها
ماما انتى مبتكليش ليه ؟؟
مليش نفس يا احمد
ايه اللى سادد نفسك يا ست غاده ؟؟
مفيش يا عبداللطيف
مفيش ايه ؟ دا انت ضاربالنا البوز الخشب من اول ما جيتى ...قولى حصل ايه ؟
مفيش ..المدير حولنى للتحقيق
حولك للتحقيق ليه ؟؟
عشان شتمت واحد زميلى
و بتشتمى زميلك ليه ؟ و انتى مالك و مال زميلك اصلا ؟؟ و تتكلمى معاه من الاول ليه ؟؟
هو انا كنت بتدلع معاه ؟ دا واحد مرتشي و جاى يعرض عليا رشوه
و تسمحيله يعرض و الا ميعرضش ليه من الاول ؟؟ هو انا مش قلت تروحى شغلك و متكلميش حد ؟؟
هو ايه اللى مكلمش حد ؟ يعنى لو حد جه يكلمنى أقوله لا عشان جوزى مش عاوزنى اتكلم
اه طبعا ...الست المحترمه متتكلمش مع الرجاله
انت بتقول ايه ؟؟ بقولك مرتشي و جاى يعرض رشوه انتى فاكرنى كنت بتساير معاه ؟؟ بقولك شتمته و اتحولت للتحقيق
و تحويلك للتحقيق طبعا هيعمل خصم من مرتبك
دا كل اللى همك ؟؟
اه طبعا دا كل اللى هاممنى ...هو البيت ده مش ماشي بنظام و لازم الفلوس تتسدد كل شهر ؟؟ هنعمل ايه يا هانم لو نقصت الفلوس ؟ هجيب لك منين طلباتك و طلبات العيال ؟
طلبات ايه ؟ انت اصلا بتدينى اللى ميكفيش ربع مصاريفنا
و الله دى مقدرتى و دا مرتبى اعملك ايه يعنى ؟؟ انا بديلك اللى باخده اعمل ايه تانى ؟
لا طبعا انت مبتدنيش كل اللى بتاخده و بتخلى لنفسك جزء كبير
مش بصرف على امى و اختى ؟
امك ماشي ..اختك ليه ؟ اختك متجوزه و عايشه عيشه احسن مننا
عشان جوزها ابن كلب متجوز عليها و ممكن يسبها فى اى لحظه و لازم ءامن مستقبلها ..بديها تحوش لها قرش فى البوسته ينفعها لو مال بيها الزمن
طب و اولادك دول ؟ مش تعمل حاجه لمستقبلهم برده ؟؟
ما انتى اهو ...امال انتى امهم ليه ؟
عندك حق منا اللى بجيب لهم كل حاجه و مش محملاك اى حاجه
دا واجبك ...امال انا سايبك تشتغلى ليه ؟
يعنى عشان بشتغل تدفعنى ؟؟
اه طبعا ...امال خروجك من البيت ده مش له تمن ؟؟
انا زهقت من حمل المسؤوليه ...كله عليا ..انا اللى المفروض اوفر قسط الشقه و انا اللى المفروض اوفر مصاريف العيال و كسوتهم و دروسهم و كتبهم و انت مش حاسس بحاجه خالص
و الله انا بديلك مرتب اول كل شهر تتصرفى فيه زى ما تحبى
مرتب ؟؟ انت عارف كويس اوى أنه مبيكفيش عشر ايام على بعض
مليش فيه ...دى مسؤليتك انتى ...ست البيت الشاطره تدبر شؤنها و شؤون بيتها
ادبر اكتر من كدا ايه ؟؟ انا بقالى سنين مجبتش لنفسي لبس و بروح شغلى باللبس القديم ده ...بوفر و اعمل الصابون فى البيت من الزيت القديم ..بوفر و اعمل القرص و الكيكه و الحاجات الحلوه فى البيت عشان مشتريش من بره
و ايه يعنى ؟ اي ست بتعمل كدا ...انتى مش عجبه يعنى بين الستات
تصدق عندك حق ...انا فعلا مليش لازمه و مبعملش حاجه و كله زى بعضه عندك
بقولك ايه ...انا مش ناقص نكد ...كل شويه تضربيلى البوز ؟؟ انا قرفت منك
قام عبداللطيف بعد أن التهم طبق الارز وطبق البسله و اللحم و دخل إلى الشرفه ليشعل سيجاره
نظر الاولاد إلى امهم و التى كانت تبكى فى صمت
قام احمد بتقبيل والدته
متزعليش يا ماما
قامت لمياء و اقتربت من غاده هامسه
بابا دا وحش ...انا مش بحبه
لا يا لمياء عيب ...دا بابا برده 😔
يتبع
#دجيهان_عادل
#قصص_وحكايات_د_جيهان_عادل.
فضلا غير مسموح نقل أو نسخ القصه إلا بعد اذن الكاتب و الا سيعرض للمسائله القانونيه ..
تعليقات
إرسال تعليق