مطمون الجزء التاسع و الاخير

مطمون

الجزء التاسع و الاخير

طبعا مكنتش احلم أن ده يكون حالى و لا ده يكون عفشى بس اعمل ايه منا برده كان نفسي اتخلص من تحكمات قسمت اللى مررت حياتى و كرهتنى فى نفسي 

بقيت اقول لنفسي مش ممكن هلاقى اللى كنت بلاقيه عندها و اكيد عصام هيحن عليا و يعوضنى عن كل اللى شفته فى حياتى .

بعد الفرح بكام يوم حلمت حلم غريب اوي 

وصحيت مفزوعه وبصووت 

لا لا ...ابعد عنى 

شيماء شيماء اصحى ..مالك ؟؟ 

حلمت بحلم وحش اوى يا عصام 

حلمتى بايه ؟؟؟ 

فيران  و تعابين و حفر  وكلاب شكلها وحش اوى كمان شفت كأنى فى علاقه مع حد شكله شبه الفراعنه بس جسم انسان 

مش دى نفس الكوابيس اللى كنتى بتشوفيها قبل كدا ؟؟

لا انا كنت بشوف تعابين اكتر لكن اللى شبه الفراعنه ده اول مره اشوفه

طب متقلقيش نامى دلوقتى و بكرا

 هتكونى كويسه باذن الله

 ‏

انا خايفه يا عصام اوى ...انت متتخيلش انا  كنت حاسه بأيه ؟؟ شئ بشع لما الواحده تحس أن حد بيلمسها بطريقه قذره اوى كدا

 

معلش يا شوشو ...اهدى بس و انا جنبك اهو 

مرت الايام ..حياتى كانت فى بيت عصام زى حياة اى واحده عايشه فى بيت عيله شويه فرح و كتير زعل و لوى بوز 

بس وجود عصام كان مخفف عليا كتير ، 

بعد فتره حملت و ده من فضل ربنا عليا كنت فرحانه بالحمل ده اوى و خايفه عليه خاصه انى كنت دايما اشوف انى هفقده فى الحلم و كنت على طول اقوم معيطه و جسمى بيترعش 

 فى الفتره دى اخو جوزى اتجوز و بعد الجواز سمعت من حماتى أن سلفتى الجديده دى ملبوسه و انها بيغمى عليها و جسمها بيتشنج و تقول كلام بلغات مختلفه 

المهم حماتى اقترحت على سلفى أنهم يجيبوا شيخ في البيت علشان يشوف حكايتها ايه و يقرا عليها عندنا 

وهو بيقرا انا مبقتش عارفه مالي 

صداع تنميل تقل مش عارفه في ايه 

مشيت بعيد بحجه انى اروح اعمل الشاي 

ورجعت لقتها نايمه وهو بيحاول يكلمها 

ساعتها كنت مركزه جدا 

شوفت حاجه سودا بنفس الهدوم وعيون حمرا 

وبتبصلي انا    ... وقامت مره واحده 

انا كنت حامل ساعتها فى أواخر حملى خفت و لقيت نفسي بصوت وأعيط

لحد ما سلوى سلفتى فاقت وانا قطعت الجلسه بس محدش شاف الي شوفته 

ولا هي اتحركت من مكانها اصلا انا بس الي شوفت 

بعدها ابتديت اهتم اكتر وابحث واشوف واقرا عن الجن والمس 

لحد ما ولدت 

تقريبا بعد كام يوم من الولاده ابتديت اتكتف واسخن وانا نايمه وشلل مش حاسه بحاجه غير بنار بتحرقني ف مكان نومي 

استغفر واتشاهد بس مش عارفه لحد ما تفك 

وانام غصب عني 

حصلتلي كتير خصوصا ان جوزي كان دخل  الجيش وانا بنام لوحدي مع بنتي ف اوضتي  مره احس اني بتسحب من على السرير مره احس اني مرفوعه نصي الي تحت بس

قررت اشغل الرقيه 

للاسف مكملتش الفون فصل و مبقتش اطيق اسمعها بعد كدا

كان شعر جسمي كله يقف و اترعش 

خطر ف دماغي اغمض عيني واسال عن اسم الكيان ده ايه اللى معذبنى ليل نهار و مش مهنينى على حياتى و لا مفرحنى ببنتى

لحد ما سمعت اسم ف وداني غريب 

سمعت اسم ( مطمون🥺🥺 )

لحد دلوقتي بحلم احلام غريبه وبشوف خيالات و زى ما يكون من ساعه ما سالت و عرفت اسمه بقا مفروض عليا بشكل أكبر و زى ما يكون بقى واقع و حقيقه فى حياتى

دايما كنت احاول اتخيل شكل الكائن ده و احاول اشوف شكله ف عيني 

بس كنت دايما بشوف الخيال الاسود وواقف بعيد بيراقب بس 

ممكن اكون قاعده لوحدي بتفرج ع رعب و الاقى ولعه تفرقع ع رجلي وحصلت قريب اوى 

 الموضوع ده أثر على العباده عندى ......

 ‏انا مش بعرف اصلي انا مسلمه بس لما اتوضي واقف ع السجاده دماغي توجعني وضهري يألمنى جدا

واسرح مش عارفه اكمل الصلاه 

القران بصدع منه 

جسمي كله بيوجعني جدا شعري بيقع بطريقه غريبه 

المشاكل كترت و الدنيا ساءت اكتر و اكتر 

كتير كانت بتحصل مشاكل بينى وبين حماتي من غير اي سبب 

والعيشه بقت زي الزفت و الوضع تفاقم و حماتى حلفت انى مقعدش فى البيت لا انا و لا بنتى و حكمت على جوزى يسبنى و طبعا هو ميقدرش يرفض لها طلب و كمان زهق منى و من تقلباتى المستمرة

النهايه انى اتطلقت طبعا واخدت كل حقوقي حتي بنتي 

حاولت ارجع لامى علشان جوزها يساعدنى فى اللى حاسه بيه ده و أن فى حاجه مش طبيعيه بتحصل جوز امي اتخانق معاها وحلف اني مش داخله البيت وكل مااروح لامي انام ف الشارع 

ابويا  كمان اتوفي 

وطبعا مرات ابويا بتكرهني 

ولحد دلوقتي حياتي متدمره 

اعمل ايه 

انا مش عارفه  اعيش ولا حتي اموت

صحيح انا بقف قدام المرايه كتير 

انا بحب اقف كل شويه قدام اي مرايه 

ببقا مش راضيه عن شكلي ودايما بطلع العيوب الي فيا وساعات بكلم نفسي 

بصراحه بكلم نفسي كتيييير كاني بحكي لحد سامعني وشايفني بالساعات

ومعقده نفسيا بس مش لاقيه نهايه للى اسمه مطمون ده 

مطمون بقا جزء بشع من حياتى ، جزء حقير مش قادره اتخلص منه و لا عارفه اقاومه 

مطمون دمرنى و دمر حياتى و لولا بنتى كنت انتحرت من زمان .

🌷🌷 تمت 🌷🌷

انا عاوزه اقول كلمه ...القصه معظم أحداثها حقيقيه و البطله بالفعل تايهه و مش لاقيه حل 

بنسمع كتير عن الجن العاشق و الله اعلم بالكلام ده صحيح و الا لا لكن اللى اعرفه و اللى هى اعترفت بيه فى اخر جزء ( الجزء ده نقلت كلامها دون تاليف منى ) انها مسلمه اسما و أنها مبتحاولش تقاوم اللى هى حاسه بيه ده ...

و يمكن ده اللى موصلها الوضع ده 

يقول رب العزه 

وَمَنْ أَعْرَضَ عَن ذِكْرِي فَإِنَّ لَهُ مَعِيشَةً ضَنكًا وَنَحْشُرُهُ يَوْمَ الْقِيَامَةِ أَعْمَىٰ

ربنا يعافى كل مبتلى و يشفى كل مريض يارب

اذا عجبتكم القصه ارجو الدعاء لوالدى بالرحمه والمغفره و سائر موتى المسلمين

#دجيهان_عادل

#قصص_وحكايات_د_جيهان_عادل.

فضلا غير مسموح نقل أو نسخ القصه إلا بعد اذن الكاتب و الا سيعرض للمسائله القانونيه ..