غاده الجزء الثاني

#غاده

#الجزء_الثانى

ايه يا ست هانم اتاخرتى كدا ليه ؟؟ بقالى ساعتين قاعد مستنى الغدا 

نظرت غاده إلى عبداللطيف نظرة اسي دون أن تنطق بكلمه ...نهضت متثاقله إلى حجرتها لتبدل ملابسها ...و من ثم الذهاب للمطبخ لاعداد الغذاء

عاد أطفالها إلى المنزل و هى منهمره فى عمل المكرونه و قطع الدجاج المائله

غاده لديها طفلين  احمد عشر سنوات و لمياء ثمان سنوات 

وضعت غاده الطعام على الطاوله ...نظر عبداللطيف إلى الطعام بازدراء

ايه دا ؟؟ هو كل يوم مكرونه و بانيه ؟؟ 

احمد ربنا 

منا حامده بس انا زهقت ...فين المحشي فين الخضار ؟ 

ملحقتش اعمل 

و انتى من امتى فاضيالنا ....انتى كل يوم مبتلحقيش تعملى لنا الاكل زى بنى ادمين ربنا..... هو انتى الوحيده اللى بتشتغلى و الا ايه ؟؟؟ نص ستات البلد بيشتغلوا و عارفين ينظموا بيوتهم كويس ....دا  انا حاسس انى متجوز واحد صاحبى 

واحد صاحبك ؟؟ 

ايوه مش شايفه منظرك عامل ازاى ؟؟ دا شكل واحده ست ؟؟ ايه اللى انتى لابساه ده و ايه شعرك ده ؟؟ و الا الجلابيه اللى انتى لابساها دى 

مالها ؟؟ 

بقالك بتلبسي فيها من عشر سنين 

هات لى غيرها و انا ألبسها 

يا اختى الدولاب عندك هيقع من كتر الهدوم جوه

هو فين اللى هيقع ده ؟؟ انت اشتريت لى ايه من اول ما اتجوزتك ؟؟؟ قولى كدا ؟

و اشتريلك ليه ؟؟ ما انتى بتشتغلى و على قلبك اد كدا 

خلاص ....اسكت بقا و ملكش دعوه بيا 

ايه اسكت دى ؟؟ انتى يا هانم اهلك معلمكويش تكلمى جوزك ازاى ؟؟

 

لا علمونى و لولا اهلى علمونى و ربونى كويس مكنتش هبقى على ذمتك دلوقتى

 

الله الله ...دا ايه النغمه الجديده دى 

و لا جديده و لا قديمه سبنى فى حالى من فضلك 

قامت غاده إلى حجرتها تحتبس بعينها دمعه فقد ضاقت عليها الدنيا و لا تجد مناص 

تلتفت حولها يمينا و يسارا و لا تجد من تلقى برأسها على كتفه ليربط عليها و يخرجها مما هى فيه 

دخل ابنائها عليها 

متزعليش يا ماما  انتى عارفه بابا 

مش زعلانه يا اولاد ...مفيش حاجه 

طب مش هتاكلى ؟؟ 

لا انا شبعانه 

لا هنجيب الاكل هنا و هتاكلى معانا 

لا و الله مش جعانه ...كلوا انتوا 

لا هروح اجيب لك الاكل و هتاكلى معانا 

بعد دقيقه احضر احمد الطبق و به قطعتين من الدجاج 

ايه دا يا احمد فين باقى الاكل ؟؟ 

بابا اكل الاكل كله يا ماما مفضلش الا دول 

اكل الاكل ؟؟ طيب ....كلوا انتوا يا حبايبي عشان نذاكر شويه بعد الغدا 

حاضر يا ماما 

نظرت غاده إلى بواقى الطعام التى خلفها زوجها فلطالما يأكل اى طعام حتى و لو أنه غير جائع ...دائما ما يستخسر أن يترك اى شئ بالطبق و كلمته المشهوره 

اصل انتوا مجعتوش 

جلست غاده تستذكر لأولادها دروسهم بكل جد فهى تحلم أن تحقق حلمها فى أبنائها و تتمنى أن يعوضها الله فيهم عن كل ما رأت بحياتها 

ينتهى يوم غاده كأى سيده مصريه فى المطبخ غسيل الاطباق والاكواب و اعداد بعض الاشياء لطعام الغداء لليوم التالى

عادت غاده من مطبخها لتجد زوجها كالعاده نائم على الأريكة فى الصاله و يغط فى نوم عميق 

دخلت غرفتها انكمشت على نفسها ، اخذت وضع الجنين فى بطن أمه ...تساقطت دموعها إلى أن نامت 

استيقظت فى الصباح ليتكرر يومها 

ذهبت إلى عملها انكبت على اوراقها ...الجميع ينظر لها و يزم شفاه ، و يتغامزون عليها مع ضحكات مكتومه

اقترب الاستاذ وليد من مكتبها 

استاذه غاده 

نعم يا استاذ وليد 

مالك  قفشه كدا ليه ؟؟ 

ايه قفشه دى ؟؟ احنا هنهزر ؟؟ 

يا ستى بالراحه ...انتى حاده ليه كدا ؟؟

 

انا كدا ....و دا طبعى 

انا غرضى اساعدك بس ...مش فى دماغى اى حاجه تانيه 

و تساعدنى ازاى مش فاهمه ؟؟ 

يعنى ...انا شايف أن المدير حطك فى دماغه و كنت عاوز اريحك و اخليه يبعد عنك و يسيبك زى باقى الزملاء كدا براحتهم

و ازاى بقا هتعمل كدا ؟؟ 

اولا لازم تهدى نفسك فى التعامل معاه و تبطلى تقوليله دا بيشتغل و ده مبيشتغلش لان ده شغله طبعا و مش هيسمح حد يتدخل فيه 

ها ....و بعدين ؟؟ 

و بعدين تفتحى مخك

افتح مخى ازاى ؟؟؟ 

يعنى انتى فى ايدك كنز ممكن تطلعى منه اد مرتبك عشر مرات و عشرين مره كمان

اه ....ازاى بقا ؟؟ 

التصاريح اللى انتى عماله تمضى عليها ببلاش دى لها زبونها و فى اللى ممكن يدفع من جنيه لعشر آلاف فى التصريح الواحد 

انت بتقول ايه ؟؟؟ انت عاوزنى ارتشي ؟؟؟ 

لا ماسمهاش رشوه دى تساهيل ...بتسهلى على الناس المحتاجه ..و دا شغلك 

شغلى انا بعمله من غير ما حد يدفع حاجه 

ايوه بس فى شغل كتير برده انتى بترفضيه

برفض المخالف أو غير المطابق مبفتريش على حد يعنى 

ما هم هما دول الناس الغلابه اللى محتاجين مساعدتك و انك تزقيلهم التصاريح وفى المقابل هيدفعوا اى مبلغ تقولى عليه 

انت ازاى تكلمنى في الكلام الفارغ ده ؟؟ انت اتجننت 

وطى صوتك يا مدام غاده انا غرضى مصلحتك 

مصلحة ايه و زفت ايه ؟؟ انت انسان مرتشي و متعرفش ربنا 

على صوت غاده ووليد و لم يجد وليد الا مهاجمه غاده بكل حده 

اجتمع الزملاء حولهم فى محاوله لإنهاء الموضوع 

بدأ الاستاذ حمدى بالتدخل و الانحياز الكامل لوليد دون الاستماع  الى غاده  و كأنه كان على اتفاق مع وليد ...

قرر حمدى تقديم مذكره و  تحويل غاده للتحقيق بتهمه التعدى بالسب و القذف على زميل لها بالمكتب 

يتبع 

#دجيهان_عادل

#قصص_وحكايات_د_جيهان_عادل.

فضلا غير مسموح نقل أو نسخ القصه إلا بعد اذن الكاتب و الا سيعرض للمسائله القانونيه ..