مطمون الجزء السابع

مطمون

الجزء السابع

دايما مخنوقه و حاسه انك شايله جبل على صدرك و كتافك ؟؟ 

ايوا بس عادى يعنى 

لا مش عادى ...طب اخر سؤال و اتمنى تجاوبى عليه بصراحه و بدون كسوف انا زى ابوكى برده 

سؤال ايه ؟؟ 

بتحسي أن حد بيضايقك ؟؟

بيضايقنى ازاى مش فاهمه ؟؟

يعنى بيلمسك ؟ بيحط ايده عليكى ؟ بيحبك يعنى ؟؟ 

لا ايه الكلام ده ؟؟ مفيش الكلام اللى بتقوله ده 

خلاص خلاص متزعليش انا بتأكد من حاجه بس 

لا مفيش اى حاجه من اللى بتقول عليها دى و مفيش حاجه بتحصلى الا الكواببس بس 

ما اهو انتى يا شيماء كدا معاكى جن و تقريبا عاشق كمان و مش من انهارده دا من زمان 

جن ايه اللى بتقول عليه ؟ جبت الكلام ده منين ؟؟ 

امك قالت لى انك من و انتى صغيره كنتى بتلعبى مع حد و كنتى بتحكيلها عليه ، بصى مش عاوزك تقلقى انا هعالجك 

هاتى يا ام احمد الزعفران  و الورق و البخور من الدرج اللى جوه 

حاضر يا اخويا 

و قامت امى تجيب الحاجات اللى قالها عليها جوزها و انا قاعده مش مقتنعه بأى حاجه الراجل ده بيقولها بس قلت اما اشوف اخرتها معاه هتكون ايه 

امى جت و هى متحمسه اوى و حاسه ان جوزها هيفتح عكا و حطت الحاجه قدامه و هو شاور لها تولع على منقد الفحم 

و ابتدأ يجيب ورق ابيض مش متسطر طويل كدا و يكتب جواه رموز و ايات و حاجات غريبه كدا و يحط بخور ريحته وحشه كنت هرجع كل اللى أكلته من ريحته 

بعد ما خلص طبق اربع ورقات بطريقه غريبه كدا و اداهم لامى فى أيدها 

خدى يا ام احمد الورقه دى بنتك تشيلها حجاب معاها ميفارقهاش و لا و هى نايمه و لا و هى صاحيه لا ليل و لا نهار ... دا هيبقى الحرز بتاعها عشان مفيش حاجه تقرب لها مره تانيه 

حاضر يا اخويا

و التلات ورقات دول كل ورقه تبليها فى الميه ليله بحالها و تصحى بعد الفجر تشرب و تستحمى منها ...هما تلات ليالى و هتبقى زى الفل و الكلب ده هيبعد عنها خالص 

حاضر ...حاضر يا اخويا ...كتر الف خيرك

هقوم بقا عشان ارتاح احسن شغلها تعبنى اوى ...إللى عليها شديد بس بعون الله هنطلعه برده

و قام عم شكرى و امى لقيتها جايبه الورق و بتقولى 

خدى يا شوشو علقى الورقه دى في هدومك الداخليه زى ما عمك قال

ايه الهبل ده يا ماما ورقة ايه و هدوم ايه ؟؟ انا مش هعلق و لا هعمل حاجه من اللى جوزك قال عليها دى 

ليه كدا يا شيماء ؟ هتكسفينى مع الحج ليه بس ؟

اكسفك ايه بس ؟ اللى بيعمله دا دجل يا ماما و ملوش اى اساس من الصحه 

دجل ايه بس ؟ الحج شكرى ياما عالج ناس قدامى و بعدين مش انتى اللى بتتكلمى كدا اكيد اللى عليكى هو اللى عاوز يمنعك من العلاج 

هو مين اللى معايا ؟؟؟ بقولك ايه انا مش مقتنعه بالكلام ده خالص و مش عاملاه 

يعنى الراجل تعب نفسه و اشتغل و فى الاخر تقولى مش عامله ؟؟ لا كدا ميصحش و لما يسألنى و يقولى بنتك عملت البرنامج ارد أقوله ايه ؟؟

قوليله لا معملتش و مش مقتنعه بأى كلمه انت قلتها لها نهائى 

لا يا شيماء مقدرش أقوله كدا ...انتى كدا عاوزه تخربى عليا 

و اخرب عليكى ليه يعنى ؟؟ عشان مش مصدقه النصب ده 

امى لوت بوزها و لقتها زعلت كدا 

هنا الباب خبط ..امى قامت تفتح لقت ابويا

 

سلام عليكم 

و عليكم السلام

فين شيماء 

شيماء جوه 

طب ناديهالى من فضلك 

تعالى يا شيماء كلمى ابوكى 

نطيت من مكانى و قلبى وقع فى رجليا 

ايوا ..ايوا يا بابا 

بابا ؟؟ انتى خليتى فيها بابا ؟؟ ايه يا بت اللى جابك هنا ؟؟ هى مش دى اللى رمتك قبل كدا ؟؟ بقالى يومين بلف عليكى و اخر مكان كنت اتوقع الاقيكى فيه هنا 

ليه يا ابو شيماء هى جايه بيت غريب و الا ايه ؟؟ 

ايوا طبعا بيت غريب ...بقولك ايه كلامى مع بنتى انا موجهتش لكى كلام 

لا بس انت فى بيتى و تحترم نفسك و تحترم حرمه البيت اللى واقف على بابه

شفتى يا بنت الكلب عرضتينى لايه ؟؟

 يلا ..دا انا هقطع خبرك فى البيت 

 ‏

ابويا شدنى زى المعزه من ودنى و جرجرنى على السلم و انا عماله اعيط ، شاور لاول تاكسي معدى زى ما يكون خايف أن امى تجرى وراه أو يحصل حاجه و ميعرفش يرجعنى ...مع أن امى متحركتش و لا حتى حاولت تنفدنى من ايده و زى ما يكون ما صدقت أنه اخدنى 

وصلنا البيت و دموعى منشفتش من على وشي قابلتنى مراته و هى قاعدة على الكنبه حاطه رجل على رجل و ملغمطه وشها بكيلو بوهيه كعادتها و لابسه قميص مفتح من كل مكان باظظ منه جسمها 

اهلا اهلا بست الحسن و الجمال ياك تكونى ارتحتى عند الجماعه اللى كنتى عندهم ؟؟ و حسيتى انك بقيتى ست ؟ 

خلاص يا قسمت ملوش لازمه الكلام ده ... انا بهدلتها فى السكه 

نعم نعم بهدلتها دا ايه ؟؟ البت دى عاوزه علقه موت عشان متكررش اللى عملته ده تانى ....بقا انا تسبنى موحوله باخواتها كدا و تروح تتسرمح عند المحروسه امها ؟؟

 

انا هعمل لك كل اللى انتى عاوزاه بس متزعليش نفسك 

ورينى هتعمل فيها ايه ؟؟ ادينى مستنيه اهو 

ابويا عشان ميزعلش مراته دخل جاب خرطوم الحمام و جه نزل عليا بيه فى كل حته فى جسمى و هى بقت تضحك و تقول تستاهلى عشان تتربى و متسبيش بيت ابوكى تانى ...ايه مش هنعرف نربيكى و الا ايه ؟؟ و الا عاوزه تجيبى لنا العار

ابويا خلص ضرب و قعد جنبها على الكنبه و هو بيلهث ...خلاص ضربتهالك ...راضيه يا قسمت ؟؟ 

يعنى ....مع أن الضرب كان طرى شويه .....يلا يا اختى قومى دلوقتى اقلبى لى الشقه كلها عاوزاها بتبرق و بعد كدا اشوف هعمل فيكى ايه تانى 😏

يتبع 

#دجيهان_عادل

#قصص_وحكايات_د_جيهان_عادل.

فضلا غير مسموح نقل أو نسخ القصه إلا بعد اذن الكاتب و الا سيعرض للمسائله القانونيه ..