#مطمون
#الجزء_السادس
بس انا كنت حاسه بحرقان شديد فى رجلى مكان ما التعبان ضربنى
رفعت طرف جلابيتى لقيت علامه كبيره على رجلى زرقا و مدممه زى ما يكون ضربة كرباج ، امى اول ما شافتها قالت
يا لهوى ....الحقنى يا حج شكرى 😳
ايه يا ماما مش كنتى بتقولى أن الحج مبيحبش الازعاج ؟؟
ايوا بس هو الوحيد اللى هيعرف يساعدك فى اللى حاصل معاكى ده
يساعدنى ازاى يا ماما ؟
دلوقتى تشوفى ...يا حج شكرى يا حج
يا ماما تلاقيه نايم
لا دا مبينامش إلا بعد الفجر ما يأذن
خير يا ام احمد فى ايه ؟؟
الحقنى يا حج ...شيماء كانت بتحلم بتعبان و ضربها على رجلها قامت لقت رجلها وارمه و جايبه دم
دى اول مره تحلمى بالتعبان ده يا شيماء ؟؟
لا كل يوم تقريبا بحلم بيه ..بس انهارده كان غضبان اوى معرفش ليه ؟
انا عارف ليه ؟؟ عشان جيتى هنا
و ليه يغضب انى اجى عند امى ؟؟
لا هو غضبان عشان عارفنى و عارف انى هكشفه ...انا اصلا عرفتك من اول ما شفتك
عرفت ايه يا حج ؟؟ قلقتنى على البت
متقلقيش يا ام احمد خير باذن الله ناموا دلوقتى و بكرا نشوف حل للى معاها ده
هو مين اللى معايا ؟؟
متشغليش بالك انتى بس ...انا هحل لك الموضوع
اسمعى كلام عمك يا شوشو ...عمك له فى الحاجات دى
حاجات ايه مش فاهمه
نامى بس دلوقتى ...نامى جنبها يا ام احمد متسبيهاش و بكرا هنتكلم
حاضر يا حج عينى
خرج الحج شكرى و انا مش فاهمه اى حاجه من اللى قالها ...هو مين اللى معايا ؟؟ و ايه الكلام الغريب اللى بيقوله ده
ماما هو الحج قصده ايه بالكلام اللى قاله ؟؟؟
قصده أن معاكى بسم الله الرحمن الرحيم عفريت
و هو عرف ازاى بقا ؟؟ هو دجال و الا ايه ؟
اسكتى يا شوشو دجال ايه بس ؟ الحج شكرى يعرف ربنا و مبيعملش اى حاجه حرام ابدا
ايوا برده عاوزه اعرف هو عرف ازاى أن معايا عفريت ؟
من اللى حصلك
يا سلام ...هى اى واحده تحلم بتعبان تكون معاها عفريت ؟
بسم الله الرحمن الرحيم اسكتى بقا يا شيماء ليحضروا فى المكان
و انتى خايفه ليه ؟؟ مش بتقولى جوزك بيفهم فى الحاجات دى ؟
اسكتى بقا و غمضى عينك و بكرا هتفهمى كل حاجه
امى نامت جنبى زى ما الحج قالها و غمضت عينى بس مكنتش عارفه انام من الكلام اللى سمعته ...لحد ما غفلت و لاول مره انام من غير ما احلم بكابوس ...زى ما يكون نوم امى جنبى منع أن حد يقرب لى
تانى يوم صحينا.... و امى طبعا عملت الفطار و حطيته للحج و قعد ياكل لوحده كالعاده و كوبايه الشاى جنبه
بعدها قام و قال لامى عاوزه حاجه اجيبهالك يا ام احمد و انا جاى ؟؟
خيرك موجود يا حج انا هعملك انهارده صنيه الكوارع اللى طلبتها منى و جنبها شوية رز ابيض
هتعملى كوارع بس ؟؟
عاوز ايه تانى ؟؟ اؤمرنى
اعملى جنبها كدا صنيه رقاق عشان خاطر شيماء
عنيا يا حج ...انت تؤمر و انا انفذ
طيب سلام عليكم
و عليكم السلام ورحمه الله وبركاته
الحج خرج و امى شاورت لى عشان نقعد نفطر
هو مش قال إنه هيفهمنى انا عندى ايه ؟
ايوا طبعا بس اصبرى على رزقك ...مش عنده شغل ؟
الا صحيح يا اما ...هو الحج بيشتغل ايه ؟؟
بيشتغل كاتب فى محطة الميه
كاتب ؟؟؟ امال بتقولى جايب لك كل اللى عاوزاه ازاى ؟؟
ما هو عنده املاك بتجيب له فلوس
اااه ...و مدام عنده املاك ايه يخليه يشتغل شغلانه زى دى ؟؟
و ماله يا بنتى ...مش حاجه للزمن ..حد يلاقى شغل حكومه و يقوله لا ؟؟
طب و حكاية العفاريت دى ايه نظامها ؟؟
لا دى حاجه كدا بيعملها لله ...يعنى بيساعد بيها الناس المحتاجه
و بياخد فلوس على كدا ؟؟
لا هو مبيطلبش حاجه لنفسه ...هو بيشتغل للناس و يجيب الطلبات اللازمه مبيدفعوش غير حق الحاجه دى
ااه ...و بيعمل لهم ايه بقا ؟؟
يعنى لو واحده مطلقه و عاوزه ترجع لجوزها بيعملها حاجه بالمحبه ، واحده ملبوسه بيساعدها ...بيعمل خير بس ملوش فى الشر
اممممم ماشي يا اما
طب كلى يا بنتى عشان نقوم نعمل الكوارع لعمك
حاضر
قمت جهزت الاكل مع امى ...و لقيت الحج راجع بعد الضهر على طول و جايب فى ايده سباطه موز
تعالى يا ام احمد خدى الموز ده دخليه المطبخ
تسلم ايدك يا حج
الغدا جاهز ؟؟
طبعا جاهز ثوانى أفرغ على ما تغير هدومك
امى حطت صينيه الكوارع... الحج اكلها كلها مخلاش فيها فتفوته و أكل نص صينيه الرقاق
و دخل بعدها ينام شويه
ايه يا ماما يعنى الحج متكلمش ؟
يووو ...يا بنتى هو انتى فاكره انى اقدر أسأله أو اخليه يتكلم ؟؟
امال ايه ؟؟
لا هو يتكلم بمزاجه
يا سلام
اه امال انتى فاكره ايه ؟؟ يلا يلا عشان تاكلى
هو مسبش لكى كوارع ليه يا ماما ؟؟
هو عارف انى مبحبهاش و انى عاملاها عشانه
اممم طيب يا ماما
بعد المغرب الحج قام و نادى على امى تحضر له حتتين فحم مولعين و تعمله فنجان قهوه ساده
لقيت امى جايبه الشيشه و القهوه و الحج قاعد يكركر فيها
تعالى يا شيماء جنبى هنا
قومى شوفى عمك هيقولك ايه يا شوشو؟؟
قوليلى بقا يا شيماء بكل صراحه و من غير كسوف كدا علشان اعرف اساعدك
اقولك ايه ؟
هسألك شويه اسئله و تجاوبى بصراحه
ماشى
بتشوفى خيالات و انتى قاعده لوحدك ؟؟
لا مبشوفش
خالص ؟؟ عمرك ما شفتى خيال فى الضلمه ؟؟
لا
لا ازاى يا شوشو مش كنتى بتقوليلى انك بتلعبى مع عيل ادك مش فاكره اسمه ايه كدا ؟
لا دا لعب عيال يا ماما ...خيال يعنى
طيب يا شوشو ...بتصحى تلاقى خرابيش على جسمك ؟؟
ساعات بس بقول انى انا اللى مخربشه نفسي
طيب ضهرك وجعك و رقبتك بكتافك كدا ؟
ايوه علشان طول اليوم مرات ابويا مش رحمانى شغل
شعرك بيقع ؟؟
ايوا لانى بغسله بصابون عادى مش شامبو
بتحلمى بحد بيجرى وراكى ؟؟
ايوا ساعات
دايما مخنوقه و حاسه انك شايله جبل على صدرك و كتافك ؟؟
ايوا بس عادى يعنى
لا مش عادى ...طب اخر سؤال و اتمنى تجاوبى عليه بصراحه و بدون كسوف انا زى ابوكى برده
سؤال ايه ؟؟
يتبع
#دجيهان_عادل
#قصص_وحكايات_د_جيهان_عادل.
فضلا غير مسموح نقل أو نسخ القصه إلا بعد اذن الكاتب و الا سيعرض للمسائله القانونيه ..
تعليقات
إرسال تعليق