#مطمون
#الجزء_الرابع
الف بركه يا اخويا ..يلا اشبع بيها ...اخيرا هخلص منك و من قرفك
يلا غورى
ماشيه ...ماشيه من جنتك اشبع بيها
امى اخدت بعضها و مشيت بالجلابيه اللى عليها و بدأ فصل جديد فى حياتى 😔
طبعا انا معرفش التفاصيل اوى بس اللى عرفته بعد كدا أنهم خلاص مكنش ينفع أنهم يرجعوا لبعض لأنها كانت الطلقه النالته و أن امى سابتنى مع ابويا و كانت فاكره انها كدا بتأدبه بيا
بس ابويا مهموش و راح دور على واحده تانيه بحجه انها تربينى و تاخد بالها منه و من طلباته
و فى خلال شهر كان ابويا اتجوز واحده تانيه غير امى
و كانت ست شديده و قاسيه ورتنى العذاب الوان
امى هى كمان اتجوزت راجل تانى و خلفت منه عيلين و تقريبا نسيتنى خالص
اما مرات ابويا كانت دايما حاطانى فى دماغها و بقت تحرض ابويا عليا اول ما يدخل البيت و متهداش الا لو قام ضربنى
و لو مضربنيش كانت تخلى ليلته طين و تبيته على كنبة الصاله
بقيت اشتغل خدامه لها و لأولادها اللى خلفتهم من ابويا
و يا ويلى لو اتأخرت عليها أو جبت لها طلب مش على مزاجها كانت تقلب الدنيا عليا و تسمعنى أقذر الفاظ
طبعا كلكم دلوقتى بتسألوا امال فين اندرو ؟؟
انا كمان معرفش فين اندرو ؟؟
من يوم حادثة حرق الورق و انا مشفتوش
و طبعا ابويا ساعتها مصدقش أن امى معملتش كدا ،
فكرت كتير انى احكيله بس هو عمره ما كان هيصدقنى ، كمان كنت خايفه منه اوى ليضربنى
اللى عرفته بعد كدا أن ابويا عرف يتصرف فى الورق اللى اتحرق و طلع بداله بمعجزه
و حمدت ربنا ساعتها أنه متحبسش بسببي
اندرو مبقاش يظهر لى لكن كان بيحصلى حاجات غريبه
زى انى اكون قاعده و الاقى فكره جت فى دماغى أن حد هيزورنا انهارده و فعلا الاقى حد يزورنا ...حد يقولى فى دماغى على حاجه و فعلا تحصل بعدها
احلامى كان معظمها كوابيس و حاجات بشعه جدا
مره احلم انى ماشيه وسط مقابر ، و مره فى مذبله ، و مره كأنى بغرق فى بحر و مش عارفه اطلع
كنت احلم بتعبان كبير اسود بيلف حواليا و بيعصرنى و الحلم ده من اكتر الاحلام اللى كانت بتتكرر معايا يمكن بشكل شبه يومى
و كل يوم كنت أقوم معيطه منه
ياما ابويا كان يصحى على صريخى و انا نايمه و يجى جرى يصحينى
و فى مره جه ابويا يصحينى لما سمعنى بصرخ و طبعا مراته قسمت جت وراه
قومى يا شيماء ...قومى يا بنتى انتى بتحلمى
تعبان ..التعبان هيموتنى .. التعبان
مفيش تعبان يا شيماء ...دا حلم يا حبيبتى
ايووووووه تمثيلية كل يوم اهى 😏
تمثيلية ايه بس يا قسمت انتى مش شايفه البنت مرعوبه ازاى ؟؟
مرعوبه ؟؟؟ دا كهن بنات اسألنى انا ...ياما عملنا الحركات دى عشان نصعب على اهالينا ...أو تلاقيها بتعمل كدا عشان تدارى على خبيتها فى المدرسه و الدرجات اللى زى الزفت اللى بتجيبها
ما انتى محمله عليها يا قسمت و مبتخليهاش تمسك كتاب برده
نعم نعم نعم ....نعم يا ادلعدى ؟؟ مش عاجبك يا اخويا هات لى خدامه و ريح الست هانم بنتك
يا ستى انا مقلتش حاجه ...هو انا قلت لك أنه مش عاجبني ؟
امال بتقول ايه يا سي عباس ؟؟ بقولك ايه البت دى تقعد من المدرسه هى كدا كدا مش نافعه، و ساقطه لها سنتين ... بناقص بقا مرواحها و الدخله و الخارجه اللى خايلانا بيها دى
ازاى يعنى متروحش المدرسه؟؟
زى الناس يا عنيا ...انا محتاجاها تساعدنى فى تربيه اخواتها
بس دى فاضلها أقل من سنه و تاخد الاعداديه يا قسمت
مليش فيه يا روحى ...يا انا يا المدرسه ..و انت حر بقا
أهدى يا قسمت ...اوعدك تاخد الاعداديه و اقعدها على طول
و انا فى بيت ابويا لما تقعدها ابقى تعالى خدنى و شوف بقا مين هيخدمك و يخدم عيالك يا شملول
قسمت قالت كدا و خرجت جرى من الاوضه و ابويا وراها و هو بينادى عليها
مفيش خمس دقايق و لقيت الباب بيترزع و لقيت اخواتى الصغيرين بيعيطوا عاوزين امهم
فكرونى بنفسي لما امى مشيت و سابتنى و اد ايه كنت حاسه بالحزن الشديد و الخوف
طبطبت على اخواتى و بصيت على ابويا لقيته قاعد حزين و حاطط ايده على خده
عكس الصوره اللى شفته بيها بعد ما امى سابته و مشيت كان ساعتها بيسب و يلعن اليوم اللى شافها فيه
لكن قسمت كانت بالنسبه لابويا شيى مختلف
حبها كان باين فى عنيه عكس امى ، مكنش يقدر يكسر لها كلمه و لا كان بيتخانق معاها زى ما كان بيتخانق مع امى
متزعلش يا بابا ..انا مش هروح المدرسه تانى عشان طنط متزعلش
ازاى يا شيماء يا بنتى ؟؟ هو ده ينفع ؟؟
يا بابا تالته اعدادى اصلا مبيرحوش المدرسه ممكن ابقى اروح فى الامتحانات و خلاص
طب و الدروس ؟؟ ما هى هتعمل مشكله عليها
خلاص يا بابا مش هاخد دروس و ربنا يسترها
طب و هتذاكرى ازاى ؟؟
هذاكر بعد ما هى تنام و خلاص
بس ...
خلاص يا بابا ...انت روح هاتها بكرا عشان خاطر اخواتى بس
انتى شايفه كدا يا شيماء ؟؟
مفيش غير كدا يا بابا
حاضر يا بنتى هروح
و راح بابا جاب قسمت و رجعها البيت بعد ما وعدها انى هكون فى خدمتها على طول و انى مش هروح غير اسبوع الامتحانات بس و مش هحسسها انى فى مدرسه اصلا
و رجعت قسمت بجبروت اكبر و تسلط أعنف ...كأنها ملكت البسيطه
بقت تتفنن انها تذلنى و تتعبنى و متريحنيش ابدا ، كانت تتجنن لو لقتنى قاعده استريح لحظه و تخلق لى شغل من تحت الارض
كانت تخلينى امسح البيت فى اليوم مرتين و اغسل هدوم اخواتى على الغساله العاديه و ارجع اغسل هدومها على أيدى لأنها كانت تقول هدومى متتحطش فى الغساله مع هدومكم
كنت انزل السوق اجيب الطلبات و ارجع اقف اعمل الاكل و اغسل الاطباق و هى هانم قاعده تبرد فى ضوافرها
كنت اخر اليوم مبقدرش احط ضهرى على السرير من كتر الالم اللى حاسه بيه
تعبت ...تعبت اوى و خصوصا انى لا برتاح بالنهار مع شغل البيت و لا برتاح بالليل مع الكوابيس المزعجه
فكرت انى لازم اهرب من اللى انا فيه ده بأى طريقه حتى لو اروح فى اى مكان محدش يعرفنى فيه علشان بس استريح من القرف اللى انا شايفاه ده
بس كنت أجبن من كدا ...لحد ما جاتلى فكره
ليه مروحش ......؟؟
يتبع
#دجيهان_عادل
#قصص_وحكايات_د_جيهان_عادل.
فضلا غير مسموح نقل أو نسخ القصه إلا بعد اذن الكاتب و الا سيعرض للمسائله القانونيه ..
تعليقات
إرسال تعليق