#مطمون
#الجزء_الخامس
فكرت انى لازم اهرب من اللى انا فيه ده بأى طريقه حتى لو اروح فى اى مكان محدش يعرفنى فيه علشان بس استريح من القرف اللى انا شايفاه ده
بس كنت أجبن من كدا ...لحد ما جاتلى فكره
ليه مروحش لماما؟؟ اى نعم هى سابتنى زمان بس اكيد هتكون احن عليا من مرات ابويا
انا لازم اصحى من بدرى و اروح لها قبل ما الكل يصحى
و فعلا اخدت بعضى و رحت لامى طبعا مكنتش فاكره البيت اوى و قعدت الف كتير لحد ما وصلت
قابلتنى زى ما يكون واحده غريبه ، و كانت فاكره انى جايه زياره و ماشيه
بس لما حكيت لها على اللى قسمت بتعمله فيا و انى زهقت خلاص و مش قادره اتحمل و انى مش عاوزه اعيش معاها تانى
لقيت وشها اتغير و اتلجلجت فى الكلام
يعنى ..انتى عاوزه تقعدى معايا ؟؟
ايوه يا اما ...هو فى مشكله و الا ايه ؟؟
لا ابدا بس انتى عارفه يا بنتى أن البيت مش بيتى مقدرش اقول مين يقعد و مين يمشي
يعنى ايه ؟؟ امشي يا اما ؟؟
لا مقولتش كدا بس لازم نستأذن من عمك شكرى الاول ...انتى يا بنتى مترضليش بخراب بيتى
لا طبعا يا اما مرضاش ...انا مش هحرجك مع عم شكرى و هقوم اروح بيت ابويا
متزعليش منى يا شيماء يا بنتى ، و الله غصب عنى
اه منا عارفه
طب اقعدى اتغدى معانا ...دا عمك شكرى جايب لى فرختين و عامله جنبهم طاجن باميه يستاهل بوقك
لا مش جعانه همشي انا عشان متأخرش على مرات ابويا
طب يا بنتى استنى اشربى حاجه ....اهو عمك شكرى وصل الحمد لله
السلام عليكم ورحمه الله وبركاته
و عليكم السلام يا حج
مين المحروسه ؟؟
دى شيماء بنتى يا حج
ازيك يا شيماء يا بنتى
الله يسلمك يا عمى
مالكم واقفين كدا ليه ؟؟
شيماء يا حج زهقت من معامله المخفيه قسمت معذبها و مطلعه روحها
لا حول ولا قوه الا بالله ..و ابوكى فين من الكلام ده يا بنتى
ابوها مبيعملش حاجه ...زى قلته ...فالح بس كان يتشطر عليا انا
و بعدين معاكى يا ام احمد ...عيب كدا ...قلنا مية مره منجيبش سيرة الناس علشان ميجوش ياخدوا من حسناتنا يوم القيامه
استغفر الله العظيم ...معلش يا حج نسيت
طب و انتى هتعملى ايه يا شيماء يا بنتى ؟
مش هعمل حاجه يا عمى ...هروح
شيماء كانت عاوزه تقعد معانا يومين يا حج بس انا قلت لها لازم استأذن منك الاول ...دى الأصول برده
شيماء و ام شيماء على عيننا و راسنا ، دا بيتها و انا هنا زى والدها
كتر خيرك يا حج ...و الله دا العشم برده ...خلاص يا شيماء اقعدى بقا مدام عمك قال يبقى خلاص
لا يا ماما انا مش عاوزه اضايقكم
لا تضايقنا ايه بس ؟؟ ...اقولك ارتاحيلك يومين و لو عاوزه بعد كدا تروحى لابوكى روحى
هزيت راسي بالموافقه لانى فعلا كنت عاوزه ارتاح شويه من قسمت و طلباتها اللى مبتخلصش
و لسه هقعد على الكرسي لقيت امى بتقولى
يلا يا حبيبتى على المطبخ عشان نسخن الاكل لعمك
حاضر يا ماما
و دخلت مع امى المطبخ ..بس طبعا احساسي مكنش زى احساس قسمت ...
مع قسمت بحس انى خدامه بلا اجره لكن دى امى يعنى الاحساس ده مش موجود
حطينا الغدا على التربيزه و لقيت امى واقفه مقعدتش
استغربت اوى ...هى ليه متقعدش
شاورت لى بايدها انى استنى
حج شكرى ...يااا حج الغدا جاهز
الحج شكرى خرج لابس الجلابيه البيضا و على دماغه الطاقيه البيضا و قعد على السفره
امى جت جنبه بسرعه تخدم عليه و مقعدتش برده
انا دا كله واقفه من بعيد و بتفرج و اخر ما زهقت قعدت على كرسي الانتريه اشوف اللى بيحصل
الحج شكرى شمر أكمام الجلابيه و حط الفوطه على صدره و مسك دقنه الصغيره و هو بيبص للاكل و قال
الاكل ريحته حلوه اوى تسلم ايدك يا ام احمد
تسلملى يا حبيبي
احمم احم
لا مؤاخذه يا ابو احمد
خدى بالك البت قاعده
حاضر يا اخويا
امى فسخت فرخه من الفرختين المحطوطين قدامه نصين و حطتها كلها قدامه
الحج رفع سلطانية الشوربه على بوقه و بقا يشفط منها بصوت مقزز اوى لحد ما نزلها فاضيه ...و راح ماسح شنبه من بقايا الشوربه
الف هنا يا حج
الله يهنيكى يا ام على
الحج بدأ يأكل فى الفراخ و تقريبا كدا كان بياكلها بعضمها لانى مكنتش بشوف عضم بيطلع من بوقه
امى حطت قدامه طبق رز كبير و طبق باميه يكفى عيله و هو فى مسافه خمس دقايق كان مخلص دا كله
و بقى شنبه الكبير ملوث ببقايا الاكل
الحج خلص اكل و لقيت امى جابت له عود كبريت يسلك سنانه
بعدها لقيته بيرفع ايده و يقول
اللهم دمها نعمه و احفظها من الزوال
و قام الحج عشان يغسل ايده و لقيت امى بتشاورلى و بتنادى على اخواتى
يلا يا شيماء يلا يا احمد ...يا على ..تعالوا يا اولاد عشان تأكلوا
كنت حاسه انى بتفرج على فيلم قديم من بتوع سي السيد و الست امينه ...ليه امى تكون عامله كدا ؟ مع أن قسمت واخده حقها تالت و متلت و ابويا ميقدرش يخالف لها كلمه
الدنيا دى غريبه اوى ... امى كانت دايما تتخانق مع ابويا على حاجات هايفه و دلوقتى بتقبل بحاجات غريبه انها تعملها
انا شفتها اول ما دخل قلعته الجزمه و جابت له شبشب بس مجاش فى دماغى أن كل معاملاتها معاه بالشكل ده
قطع تفكيرى صوت امى و هى بتقولى
ما تاكلى يا شوشو .. مبتاكليش ليه ؟؟
هو انتى مبتكليش مع عم شكرى يا اما ؟؟
لا ... اكل معاه ازاى يا بنتى ؟؟ الحج له هيبته برده
و مال الهيبه و مال أكلك معاه مش فاهمه ؟
بصى يا شيماء ...لما الحج جه اتقدملى بعد ما ابوكى طلقنى بالتلاته و رمانى قالى قبل الجواز انا ليا قوانينى الخاصه اللى لو وافقتى يبقى لازم توافقى عليها ....انا و قوانينى واحد
اه و قالك بقا متكليش معاه ؟؟
ايوه دا كان واحد من قوانينه و فى مقابل ده بيوفرلى كل اللى اطلبه من أكل و شرب و لبس مش زى ابوكى
اه و بعدين ؟؟
و لا قابلين الحج شكرى مفيش منه ..انتى يمكن مستغربه اللى بيحصل بس بكرا تتعودى على نظامه
نظامه اللى هو ايه بقا ؟؟
يعنى هو ميحبش الدوشه ابدا و العيال عارفه كدا ...و عشان كدا بننام كلنا انا و العيال فى اوضه واحده عشان نوفر له الهدوء
ايه دا ؟؟ يعنى انتى مش بتنامى جنبه ؟؟
لا طبعا ...ازاى يعنى انام جنبه
بس دى عبوديه مش جواز
بطلى الكلام الكبير ده ...انتى عامله زى ابوكى بتتفلسفى فى الفاضيه و المليانه ...الجواز يا بنتى مش حب و حاجات زى الافلام اللى بتتفرجى عليها دى ، الجواز خد و هات ...الراجل بيوفر للست اللى هى عاوزه و تشاور عليه و الست برده مفروض تنفذ كل طلبات الراجل اللى يطلبها منها
بس انتى مكنتيش بتعملى كدا مع بابا
ابوكى دا ايه ؟؟ هو انتى هتقارنى الحج بعباس ؟؟؟ ابوكى كان بيجيب لنا فرخه كل شهر ..دا غير انه قليل الحيله ضعيف الشخصيه ...استغفر الله العظيم ياربى هتخلينى اقول كلام ملوش لازمه
تعالى بقا شوفى الحج و شوفى الحاجات اللى شاريهالى ...مش مخلينى عاوزه حاجه من دهب لهدوم لاكل لشرب و كافة شئ
طب و فين كرامتك يا ماما ؟؟
كرامتي ؟؟؟ كرامتي راحت لما ابوكى رمانى على طول دراعه و لا كأنى فرده جزمه قديمه ، كرامتى راحت لما رحت عند اهلى و اتذليت و اترميت زى الكلبه... الصغير يتحكم فيا قبل الكبير ، و كلهم بيبصولى كأنى شتمه أو عار دخل حياتهم
انتى فاكره انى مأخدتكيش عشان اربى ابوكى زى ما فهمك ؟؟ لا يا بنتى ...الحقيقه انى مكنتش هلاقى اصرف عليكى و لا هم رضيوا انى اخدك و لا حتى أنزل اشتغل و اصرف عليكى ...
كانوا دايما يقولولى انتى مطلقه و مفيش مطلقه تطلع و تدخل كدا على مزاجها
و طبعا كان بيتقدملى اللى اكبر منى بعشرين و تلاتين سنه ، و اللى متجوز و عاوز يتجوز تانى و اللى واللى ...
لحد ما جالى الحج و لقيته اكتر حد مناسب ليا ...اى نعم طبعه صعب شويه لكن أنا خلاص اتعودت عليه و اقلمت نفسي على طبعه ده
فهمت يا ماما ...انا اسفه
لا يا حبيبتى متتأسفيش ..يلا كلى كلى عشان نعمل عصير و فشار بعد الاكل
امى قالت الكلام ده و قعدت افكر أن ساعات الإنسان يرضى بحاجه هو مكنش يرضى بيها فى وقت من الأوقات ، و أن مفيش حاجه ثابته ، اللى ترفضه انهارده ممكن اوى تقبله بكرا لأن ببساطه معندكش حل تانى
دخلت بعد السهره عشان انام انا ووالدتى و اخواتى امى فضت لى سرير لوحدى عشان اخواتى ميضيقونيش ...مع انى مكنتش متضايقه لانى متعوده على كدا
امى نامت مع اخواتى على سرير وانا نمت على السرير المقابل
حطيت دماغى على المخده و كنت فاكره انى هنام اول ما اغمض عنيا
بس منمتش و بقيت اتقلب شمال و يمين و قلت اكيد عشان مغيره مكانى مش عارفه انام
لحد قرب الفجر عينى غفلت و شفته
شفت التعبان الكبير اللى بشوفه على طول بس المره دى كان غضبان جدا و عنيه حمرا اوى و بتطلع نار
التعبان هجم عليا و بقى جسمه كله فوق جسمى و كنت حاسه بتقله الرهيب على جسمى لدرجة انى كنت حاسه ان عضمى هيتكسر وانى متكتفه فى السرير و مش قادره اتحرك
حاولت اصرخ بس مقدرتش و لا طلع صوتى و كنت حاسه بتعب شديد اوى اوى
التعبان قرب وشه من وشي وكان باين عليه الغضب الشديد
قلبى كان هيقف من الخوف و بقيت اقرا كل السور الصغيره اللى حافظاها علشان ينصرف عنى
بعد دقايق بدأ يبعد و هو على نفس حاله الغضب اللى كان عليها و فجاه و هو بيتحرك و ماشي راح ضارب رجلى بديله ، حسيت لحظتها أن رجلى وقفت أو اتشلت
قمت اصرخ من النوم
امى قامت جرى لأنها طبعا اول مره تشوفنى كدا
فى ايه فى ايه ؟
التعبان ضربنى فى رجلى ...التعباااان
تعبان ايه دا ؟؟ انتى اكيد بتحلمى ...مفيش تعابين يا بنتى
بس انا كنت حاسه بحرقان شديد فى رجلى مكان ما التعبان ضربنى
رفعت طرف جلابيتى لقيت علامه كبيره على رجلى زرقا و مدممه زى ما يكون ضربة كرباج ، امى اول ما شافتها قالت
يا لهوى ....الحقنى يا حج شكرى 😳
يتبع
#دجيهان_عادل
#قصص_وحكايات_د_جيهان_عادل.
فضلا غير مسموح نقل أو نسخ القصه إلا بعد اذن الكاتب و الا سيعرض للمسائله القانونيه ..
تعليقات
إرسال تعليق