#مطمون
#الجزء_الثالث
اندرو نادى عليا يا ماما
اندرو مين يا بت ؟؟
اندرو صاحبى
و هو فين سي اندرو دا كمان ؟
قاعد قدامى اهو على السرير ...انتى مش شايفاه ؟
شايفه مين يا بنت المخبوله ؟؟ هو انتى هتجبيه من بره ؟؟! ما اكيد مخبوله زى اللى جابك
يلا يا اختى تعالى عشان تاكلى سلقت لك بيضه بره
حاضر يا ماما جايه وراكى
خرجت ماما من الاوضه و بصيت لاندرو و قلت له
هو ازاى ماما بتقول انها مش شايفاك ؟؟
لانها مش شايفانى فعلا
و ليه كدا ؟
لان محدش يقدر يشوفنى الا انتى
و ليه محدش يقدر يشوفك الا انا ؟؟
لانى صديقك انتى و بس
معرفش ليه اقتنعت باجابته دى ... بالعكس فرحت من جوايا أن ليا صديق بتاعى انا لوحدى
طيب تعالى كل معايا يا اندرو
لا مش عاوز
مش انت صديقى ؟؟ يبقى تاكل معايا
اندرو هز راسه و مشي ورايا
طلعت لقيت امى حاطه بيضه و حته جبنه و رغيف و تمر علشان هى عارفه انى بحبه اوى
خد يا اندرو بيض
لا مش باكل بيض
طب خد جبنه
مش باكل جبنه
طب خد تمر ..دا حلو اوى
لا لا ...تمر لا ..ابعديه عنى
ليه دا مسكر و جميل
بقولك ابعدى . .مش عاوز اشوفه
خلاص انا اسفه مكنش قصدى
خلاص محصلش حاجه
طب كل معايا بقا
قلت لك مباكلش الاكل ده
امال بتاكل ايه ؟
باكل عضم ...عندك عضم ؟؟
ايوه كنت شايفه ماما مجمعاه فى حله فى المطبخ عشان ترميه فى كيس الزباله
طب هاتيه
هتاكله ازاى ده ؟؟
ملكيش دعوه هاتيه من غير ما امك تاخد بالها
حاضر
دخلت المطبخ لقيت ماما واقفه بتغسل الاطباق و لقيتها مجمعه العضم ، اخدت منه عضمتين من غير ما تشوفنى
و طلعت اديتهم لاندرو و اللى كان مبسوط اوى بيهم
خلصت فطارى و دخلت لعبت مع اندرو
ماما كانت مستغربه انى مبلعبش حواليها زى كل يوم و أن ربنا هادينى
بس الحقيقه بقا انى كنت بلعب مع صديقى العاب كتير هو علمهالى ، و كنت مبسوطه اوى لدرجه انى نسيت الاكل و الشرب
مرت الايام و الحال نفس الحال ...بابا بيتخانق مع ماما على اى حاجه ..و انا فى ملكوت لوحدى و بلعب مع اندرو
و فى يوم من الايام كنت قاعده بلعب كعادتى ...اندرو قالى تعالى نلعب لعبه حلوه
لعبة ايه ؟؟
ايه رأيك نخبى اى حاجه من البيت و نخليهم يدوروا عليها
نخبى ايه يعنى ؟؟
شوفى انتى حاجه مهمه تهم ابوكى أو امك و احنا نخبيها و نخليهم يدوروا عليها
مفيش اهم من الورق اللى فى درج مكتب بابا ...انا دايما اسمعه بيحذر امى انها تقرب من الدرج ده و أن فيه ورق مهم اوى لدرجه انه جاب كالون و قفله
حلو ...يبقى هو ده اللى نخبيه
لا ..لا اخاف
خايفه من ايه بس ؟؟
بابا لو عرف هيموتنى
و ايه هيعرفه ؟؟؟ احنا بنلعب ...روحى هاتى الورق اللى بتقولى عليه خلينا نضحك شويه و احنا شايفينهم بيدورا عليه
بقولك قافل عليه بالمفتاح
سهله ...تعالى ورينى الدرج و انا افتحه انا
تعالى ....اهو الدرج ...مش هتعرف تفتحه
اندرو بص للدرج اوى و فجأه لقيته اتفتح لوحده معرفش ازاى
هو ده الورق يا اندرو
طب هاتيه و يلا على اوضتك
الورق كان كتير اوى و محطوط فى دوسيه اخضر اخدته و رحت وراه على اوضتى
خد يا اندرو الورق اهو
شاطره يا شيماء برافو عليكى
هنخبيه فين بقا ؟؟
لا انا هقولك على فكره احلى
فكرة ايه ؟؟؟
بصى انا هعمل ايه ؟؟
ايه دا ؟ انت معاك كبريت ليه ؟؟ ماما قالت لى الصغيرين مينفعش يمسكوا الكبريت
تعالى بس ...هوريكى حاجه حلوه اوى
اندرو قعد على الأرض و حط الورق قصاده و كومه فى شكل هرمى بعد ما خرجه من الدوسيه و ولع عود الكبريت
و لاول مره اخد بالى من لون عينه
لون عينه احمر جدا مش اسود زى بتاعنا كدا ...معرفش ليه فى اللحظه دى خفت منه اوى مع انى بقالى أسابيع بلعب معاه
يمكن بسبب انى شفت لمعه شريره أوى فى عنيه و اخدت بالى من لونهم
انت هتعمل ايه ؟؟
زى ما انتى شايفه
اندرو حط عود الكبريت المولع تحت الهرم اللى عمله من الورق ...النار مسكت فيه فى لحظه
بتحرق الورق ليه بس ؟؟؟ بابا هيموتنى
لا ملكيش دعوه انا هودى بقايا الورق ده فى اوضه امك و هو هيفتكرها أن هى اللى حرقت الورق ...احنا هنضحك ضحك
انا كنت مذهوله ...و مش قادره انطق و فعلا اندرو شال بقايا الورق و حطهم فى الدوسيه الاخضر و راح رماهم فى ارضيه الاوضه بتاعه ماما
بعدها اندرو اختفى فجأه مع أنه فى كل مره كان بيلعب معايا فيها كان بيقولى أنه ماشي ماعدا فى اليوم ده
ابويا لما جه من الشغل و دخل الاوضه و شاف الورق جن جنونه و انا كنت قاعده فى اوضتى مرعوبه و انا سمعاه بيتخانق مع ماما و بيتهمها أن هى اللى حرقت ورقه و أنه ممكن يتحبس بسبب عملتها السودا دى
امى أنكرت انها شافت الورق أو عملت فيه كدا
ازاى يعنى مش انتى ؟؟ و هى العيله الصغيره هتعرف تفتح الدرج ازاى ؟؟
بقولك مش انا ...عاوز تصدق صدق مش عاوز انت حر
حر .. منك لله انا هتحبس بسببك
يارب تتحبس يا رب و اخلص منك
بتدعى عليا يا بنت الكلب يا واطيه يا اللى اويك فى بيتى ؟؟......طب روحى و انتى طالق
لللللووولللى دا يوم ابيض انهارده انى خلصت منك
بقا كدا ؟؟ طب يلا غورى من بيتى ملكيش مكان هنا
لا يا حبيبي ...انا حاضنه انت اللى تغور
حاضنه ؟؟ هو انا هسيب لك بنتى ؟؟
ملكيش بنات عندى
الف بركه يا اخويا ..يلا اشبع بيها ...اخيرا هخلص منك و من قرفك
يلا غورى
ماشيه ...ماشيه من جنتك اشبع بيها
امى اخدت بعضها و مشيت بالجلابيه اللى عليها و بدأ فصل جديد فى حياتى 😔
يتبع
#دجيهان_عادل
#قصص_وحكايات_د_جيهان_عادل.
فضلا غير مسموح نقل أو نسخ القصه إلا بعد اذن الكاتب و الا سيعرض للمسائله القانونيه ..
تعليقات
إرسال تعليق