#ابو_رجل_مسلوخه
#الجزء_السادس_عشر
امى راحت ركبت جنب عمى و خدت اسامه على رجلها
و انا دخلت اجيب الجدى ...ببص لقيته ميت
جريت على امى
الحقى يا اما الجدى مات 😳😳
انت بتقول ايه يا سعد ؟؟
تعالى شوفى بنفسك يا اما
امى نزلت من العربيه هى و عمى هشام جرى و دخلت لقت الجدى مقلوب على جنبه
امى قعدت تقلب فى الجدى شمال و يمين و تلطم على وشها :
يا مورك يا نرجس... يا بختك الاسود يا نرجس
قومى يا ام سعد ميصحش كدا
اعمل ايه يا عمى ؟؟ دا انا بعت حلقى عشان الجدى ده
ربنا يعوض عليكى
هنا ابويا صحى و جه يشوف اللى حصل
اول ما شاف الجدى مات ضحك على امى و قالها
شاطره يا نرجس ...قلت لك هتندمى و مسمعتيش الكلام
بتشمت فيا يا عبدالحميد ؟؟؟
ايوا شمتان يا نرجس و تستاهلى كل اللى يجرالك عشان تبقى تسمعى الكلام مره تانيه
طب ايه رايك انى هروح برده
روحى يا اختى ...الهى تروحى ما ترجعى يا بعيده
عاجبك كلام اخوك يا عمى ؟؟
معلش يا ام سعد
لا خلاص ...يلا بينا يا عمى
هتروحى فين بس من غير الجدى ؟
اكيد الشيخ بهلول عنده الحل ..انا مش هسيب ابنى لما يموت قدام عينى
روحى يا نرجس ضيعى باقى حق الحلق زى الشاطره
دا اللى تاعبك يا عبدالحميد ؟؟ دا بدل ما تقول اجى معاكم ؟
اجى معاكم و اسيب شغلى ؟؟ انتى اتهبلتى و الا ايه ؟؟ طب انتى وليه مخك طاقق امشي وراكى فى جنانك ليه ؟
خلاص مش عاوزه منك حاجه ...يلا يا سعد يلا يا اسامه
يلا يا اختى المركب اللى تودى
ماشي يا عبدالحميد
امى خدتنا فى اديها و خرجت على برا و عمى اتكلم كلمتين مع ابويا و خرج وراها
بعد حوالى ساعه
وصلنا يا ام سعد
كتر خيرك يا عمى
تحبى استناكم ؟؟
لا احنا منعرفش هندخل للشيخ امتى ...اتكل انت على الله علشان تشوف اكل عيشك
طب مش عاوزين فلوس ؟؟
لا الله يخليك مستوره الحمد لله
ماشي يا ام سعد خلى بالكم من نفسكم
باذن الله
رحنا على دار الشيخ و زى ما اسامه وصفلى بالظبط لقيت
امى راحت للراجل اللى بيدخل الناس للشيخ و قالت له على حكايه الجدى و الراجل قالها
و جايه ليه مدام مجبتيش طلبات الشيخ معاكى ؟؟
و الله جبتها بس زى ما قلت لك أنه مات
طب يبقى خلاص الشيخ هيعملك ايه يعنى ؟؟
بالله عليك ادخل أسأله يمكن عنده تصريف تانى ...ابنى فى خطر و هو اللى قايلى كدا بذات نفسه
يا ست متضيعيش وقتى ووقت الشيخ
بالله عليك تدخل تكلمه و تشوف هيقولك ايه ؟؟ لو قال امشي همشي
انتى وليه زنانه اوى
معلش انا جايلاك من بعيد و جايبه عربيه مخصوص عشان اجى هنا
طب هاتى حلاوتى الاول عشان ادخله
ادخل بس و انا اديك عنيا حاضر
لا عنيكى هعمل بيهم ايه ؟؟ ايدك على ريال
يا لهوى ريال بحاله ؟؟ ليه !؟
خلاص انتى حره و يلا من هنا مش فاضيين لك
طب خد شلن اهو ...معلش انا زى اختك
هاتى ...منتوش اد العلاج جايين تتعالجوا ليه ؟؟
امى و هى عماله تتكلم مع الراجل لقيت اسامه بيبص فى السما و عنيه متشعلقه فيها
مالك يا اسامه بتبص لفوق كدا ليه ؟؟
انت عارف يا سعد أن احنا لما بنموت روحنا بتطلع لربنا فوق فى السما ؟؟
ايوا عارف ...شيخ الجامع كان بيقول كدا فى خطبة الجمعه
طب تعرف أننا هنلاقى هناك تفاح احلى من اللى ادتهولنا ازهار ؟؟
اكيد طبعا
انا لما اخد تفاح فى الجنه هبقى اسيب لك منه ...مش هاكله كله زى تفاح ازهار
انت بتقول كدا ليه يا اسامه ؟
انا حلمت بازهار امبارح يا سعد
حلمت بازهار ازاى ؟؟ قالت لك ايه يعنى ؟
مقالتش... بس كانت قاعده لابسه ابيض فى ابيض و كأنها قاعده فى جنينه و حواليها شجر فاكهه كتير اوى ..و قاعده تضحك بصوت عالى و لما لمحتنى و انا ببص عليها راحت مشاورالى و هى ماسكه تفاحه حلوه اوى فى أيدها
يا بختك يا اسامه ...و كلتها ؟؟
لا ملحقتش لقيت امك بتصحينى من النوم
خير ان شاء الله
طب انت عارف انى شفت ابو رجل مسلوخه اللى امك كانت بتحكيلنا عنه ؟؟
شفته ازاى ؟؟؟ مقولتيش يعنى الحكايه دى قبل كدا
لانه وصانى انى مقولش لحد
طب و بتقول ليه دلوقتى ؟؟
ما هو جانى تانى و قالى لو عاوز تقول لسعد حكايتى قوله
صحيح ؟؟ هو يعرفنى يا اسامه ؟؟
ايوه يعرفك و يعرف كل واحد فى البلد دى كويس
طب ايه حكايته يا اسامه ؟؟
هنا امى لقيتها رجعت
تعرف يا سعد تفضل هنا مع اخوك و متتنقلوش من هنا ؟؟
ايوه يا اما ...بس انتى رايحه فين ؟
الشيخ هيبعتنى لواحد فى البلد هنا اجيب منه جدى بدل اللى مات عشان اخوك
طب ما نيجى معاكى يا اما
لا دا بعيد فى اخر البلد و همشي كتير اوى ...اخوك مش هيقدر يمشي دا كله
خلاص يا اما هنستناكى
اوعى يا سعد ترحوا هنا و الا هنا و الا تمشوا مع حد
حاضر يا اما متخافيش
خدوا انا جبت لكم طعميه سخنه اهيه و عيش كيزان زى ما طلبتوا ...افطروا و خليكوا قاعدين مكانكم متتحركوش
حاضر يا اما
امى مشيت و انا قعدت الهط فى الطعميه السخنه و العيش الطرى الجميل
ما تاكل يا اسامه
لا مش عاوز
مش عاوز ازاى. ؟ دا الطعميه ريحتها تهبل
مش عاوز يا سعد ...سبنى براحتى
طب كملى حكايه ابو رجل مسلوخه بقا على ما امك ترجع
حاضر يا سعد ...الحكايه بتبدأ ب ....
يتبع ..
#دجيهان_عادل
#قصص_وحكايات_د_جيهان_عادل.
فضلا غير مسموح نقل أو نسخ القصه إلا بعد اذن الكاتب و الا سيعرض نفسه للمسائله القانونيه ..
تعليقات
إرسال تعليق