#ابو_رجل_مسلوخه
#الجزء_السابع_عشر
طب كملى حكايه ابو رجل مسلوخه بقا على ما امك ترجع
حاضر يا سعد ...الحكايه بدأت لما طلعت انام فوق السطح
اه صحيح يا اسامه ..انت ايه طلعك تنام فوق السطح؟؟
معرفش ...بس فى حاجه جوايا كانت بتقولى اطلع انام فوق
طب كمل
اول يوم طلعت فوق كنت نايم على القش و عينى غفلت فى النوم سمعت صوت خرفشه افتكرته تعبان فتحت عينى لقيت راجل طويل اوى لابس اسود فى اسود و لابس زعبوط فوق دماغه و مدينى ضهره
انا اول ما شفته زى ما يكون اتشليت مطرحى و مكنتش قادر انطق
بس الراجل لما اتلفت لى لقيت وشه طيب و بيبتسم لى
معرفش حسيت أن ابتسامته دى طمنتنى و حسيت انى مش خايف منه
انت مين ؟؟ و عاوز منى ايه ؟؟
انا عمك أمين
أمين مين ؟؟ انا معرفش حد اسمه أمين
انا اللى بيقولوا عنه ابورجل مسلوخه
انت ابو رجل مسلوخه ؟؟؟؟
ايوه ...مش كنت عاوز تشوفنى ؟؟ ادينى جيت لك اهو
لا مكنتش عاوز اشوفك و لا حاجه بس هما دايما يخوفونا منك انك بتاكل العيال الصغيره و كنت عاوز اعرف شكلك ايه بس
بذمتك دا شكل حد يأكل العيال الصغيره ؟؟
انا معرفش ...سعد اخويا هو اللى قالى كدا
كل الناس فاكرانى وحش شرير و مليش قلب
صراحه دى الحكايات اللى سمعناها ...انت صحيح ظهرت لامى و هى صغيره ؟؟
ايوه صحيح بس كنت عاوز أهديها لأن اهلها كانوا سايبنها لوحدها و مكنش فى البيت غيرها ...بس هى زى كل الناس افتكرتنى بخوفها و قعدت تصرخ ...عارف يا اسامه انا ظهرت لك ليه ؟
ليه ؟
علشان كنت بترد على اخوك و تقوله مدام امك كانت لوحدها ليه ابو رجل مسلوخه مكلهاش ؟؟
ايوه صح و هو قالى معرفش
انا حسيت انك انت الوحيد اللى ممكن تفهمنى و تقدر تسمع حكايتى
هو انت لك حكايه ؟؟
ايوه ليا ...بس بس
بس ايه ؟؟
اخوك طالع ع السلم ...هاختفى انا ....اوعى تقوله حاجه عنى او انك كنت بتكلمنى
ااااه افتكرت ....يوم ما طلعت لك و سألتك و انت قلت مكنش فيه حد ؟؟
ايوه يا سعد و كنت متغاظ منك اوى و زعلان انك طلعت فى الوقت ده بالذات لانى كان نفسي اسمع حكايه ابو رجل مسلوخه
طب و بعدين ...كمل يا اسامه انت شوقتنى اعرف الحكايه
بقيت كل يوم اطلع يمكن ابو رجل مسلوخه يظهر ...بس برده مظهرش
لحد ما ناديت عليه
عم أمين ...يا عم أمين
و فجأه لقيته قدامى و على وشه ابتسامه كبيره
انت نادتنى باسمى ؟؟ ياااا بقالى كتير اوى مسمعتش حد بينادينى بالاسم ده
هما ليه بينادوك بابو رجل مسلوخه
صحيح ؟
علشان انا رجليا الاتنين مسلوخين فعلا
مسلوخين ازاى ؟؟
خايف اوريهم لك تخاف منى
لا مش هخاف انا قلبى جامد
و رفع ابو رجل مسلوخه العبايه اللى لابسها و شفت رجله مسلوخه لدرجة أن العضم ظاهر منها و الجلد و اللحم متآكل من عليها ...شكل رجله وحش جدا
ابو رجل مسلوخه لما شافنى ببص لرجله بخوف راح مغطيها بسرعه و قالى
انت اللى طلبت
عارف ....بس كنت عاوز اعرف حكايتك
حكايتى يا ابنى طويله من سنين كتيره
احب اسمعها
انا كنت راجل فلاح و كنت شاب من احسن الشباب ...الكل كان بيحلف باخلاقى و باجتهادى فى شغلى ...
حبيت بنت اسمها بهيه و كانت اسم على مسمى بهيه و هى بهيه عيون سود زى الليل ، شعر اسود طويل ، خدود زى التفاح
كانت اجمل بنت فى بلدنا
كل شباب البلد اتقدمولها و دا خلى ابوها يطلب لها مهر غالى
مهر غالى ازاى ؟؟
ابوها كان عنده طاحونه كان وارثها عن ابوه و كانت الطاحونه دى واقفه لأن كل اللى كان يشتغل فيها كان يقول فيها عفاريت و سمعنا إن كذا واحد اتقتل فيها
الطاحونه سمعتها ساءت اوى و اتقفلت من زمن بعيد و كانت ستات البلد تروح بلد جنبنا عشان تطحن الغله و الدره اللى بيخبزوا بيها
استمر الحال ده سنين و حاول ابو بهيه يفتح الطاحونه و يشتغل فيها بنفسه بس كان يلاقي النار تولع لوحدها و تطفى لوحدها و مفيش اى ست تقدر تقرب منها
ابو بهيه راح لشيخ ..الشيخ قاله أن الطاحونه دى اول شغل لها كان بدم زفر
دم زفر ازاى يا عم الشيخ ؟
يعنى فى حد ادبح فيها
و مين اللى دبحه ؟؟ و حد مين ده ؟؟
جدك اللى دبحه
و مكنش له أهل اللى ادبح ده ؟؟
كان راجل غلبان عقله على اده
طب و جدى دبحه ليه ؟؟
عشان هما قالوله كدا ... و ان بكدا الطاحونه هتشتغل و رزقها هيزيد
طب و بعدين يا عم الشيخ ؟؟
لازم واحد قلبه جرئ يبات فيها ليله بحالها
بس كدا ؟؟ طب ما دى سهله
لا طبعا مش سهله اللى هيبات فى الطاحونه احتمال كبير ميخرجش منها مره تانيه
انت بتقول ايه يا عم الشيخ ؟؟
زى ما بقولك يا ابو بهيه
ابو بهيه مصدقش كلام الشيخ و طلب من واحد من رجالته يبات فيها ليله
تانى يوم راح فتح عليه لاقاها ميت و مبرق عنيه زى ما يكون شاف حاجه خوفته
ابو بهيه فقد الأمل فى الطاحونه و تشغيلها
و لما ابتدى الخطاب يهلوا على بنته كان شرطه الوحيد أن اللى يبات فى الطاحونه ليله بحالها و يقفل عليه بايده من بعد المغرب لحد طلوع الشمس هيجوزه بنته
شباب كتير اتقدموا بالرغم أن اهلهم كانوا مش موافقينهم لانهم عارفين حكايه الطاحونه كويس
اول جدع دخل الطاحونه و قفل عليه ابو بهيه الباب
جه تانى يوم لقاه مقتول و متخلع عنيه الاتنين
الناس لما عرفت الحكايه خافت و بقت تتكلم فى كل حته
جه شاب تانى اسمه حمزه كان طول بعرض و طلب ايد بهيه
ابوها طلب مهرها و هو أنه ينام ليله فى الطاحونه و فعلا الجدع نام
تانى يوم لقوا جثته من غير رقبه خالص
البلد كلها هاجت و اتهمت الراجل أنه بيعرض عيالها للموت عشان طاحونته
الراجل قالهم انا مضربتش حد على ايده و مقولتش لحد أنه يجى ...دا مهر بنتى و اللى قادر عليه يتقدم و هو المسؤل عن نفسه
كل ده كنت اسمع عنه و مكنش ليا اى دعوه بيه لانى مكنتش لسه شفت بهيه
بس لما شفتها عرفت ليه الشباب هيموت عليها بالطريقه دى و عرفت اد ايه تستاهل أن الواحد يموت عشانها
اول ما شفتها كأنى شفت ملاك مش بشر
حبها دخل قلبى زى ما يكون اتولدت بيه
مبقتش افكر الا فيها و ازاى افوز بيها
كل اللى حواليا قالوا لى لأ بس انا صممت و رحت لابو بهيه اطلب أيدها
يتبع ..
#دجيهان_عادل
#قصص_وحكايات_د_جيهان_عادل.
فضلا غير مسموح نقل أو نسخ القصه إلا بعد اذن الكاتب و الا سيعرض نفسه للمسائله القانونيه ..
تعليقات
إرسال تعليق