#القبيحه
#الجزء_الثامن
طب احكيلى عن امك يا تلا
امى يا ستى اسمها كهرمانه ... جنيه من الجن الاحمر ...
امى زى اى ام عندكم بتحب عيالها و تخاف عليهم اوى
هى كل الامهات بتحب عيالها يا تلا ؟؟
ايوه طبعا
امال انا امى مبتحبنيش ليه ؟؟
امك دى غريبه بس ربنا يهديها
يا رب ...انتى عندك كام اخ و اخت يا تلا ؟
عندى ١٢٠ اخ و اخت
ياااا ١٢٠ مره واحده دا تلاقيكى مش حافظه اساميهم
لا طبعا انا عارفاهم و عارفه اسمائهم كويس اوى
طب كملى حكاية امك كهرمانه
عاوزه تعرفى عنها ايه ؟؟
عاوزه اعرف شكلها و طباعها و كل حاجه عنها
بصى يا اميمه احنا نقدر نتشكل فى اى شكل احنا عاوزينه و طباعنا مختلفه شويه عنكم بس احنا برده عائلات زيكم و عندنا المهندسين و الدكاتره و كل حرفه زى عندكم بالظبط كمان احنا مكلفين زيكم بالظبط بالعباده و فى مننا الصالح و فى مننا الطالح
ايه دا ؟ يعنى انتى ممكن تخلى شكلك حاجه تانيه غير اللى انا شايفاها دى ؟؟
ايوا طبعا
طب ممكن اطلب منك طلب
قولى يا اميمه لو فى استطاعتى هعملهولك و لو مقدرش هقولك
انتى تعرفى الامير اللى فى قصة سندريلا ؟؟
ايوه اعرفه
طب تقدرى تتشكلى فى شكله و ترقصى معايا زى سندريلا ما رقصت معاه ؟؟؟
ههههههههه يعنى لما تحبى انى اتشكلك متلاقيش غير انى اتشكل فى صورة راجل ؟ و بعدين الأمير ده خيال مش حقيقه و القصه كلها خيال فى خيال
منا عارفه بس مش ممكن الاقى فرصه زى دى ابدا ...مين هيبص لى و الا حتى يفكر فيا ...كنت عاوز احس بشعور اى بنت و هى حاطه أيدها فى ايد حبيبها
طلبك صعب شويه مش هقدر احققهولك انا اسفه .
لا متتأسفيش و لا حاجه انا عارفه بختى كويس ...كملى حكايه امك و اخواتك
لا اكمل ايه بقا الصبح طلع و هتلاقى والدتك داخله كمان شويه و هتنادى عليكى
اه صحيح دا الصبح جه بسرعه بس لسه الساعه سته ايه هيجيب ماما دلوقتى من المستشفى ؟؟
هنا سمعت صوت باب الشقه بيتفتح و سمعت ماما و هى بتنادى
يا زفته يا اللى اسمك اميمه ...قومى يا وش الفقر
تلا ...دى جت بصحيح ...هروح لها حالا
روحى يا اميمه بس متخليش حد يهينك
معرفش اعمل كدا
لا لازم تعرفى من هنا ورايح لو عاوزه الناس تحترمك و أولهم اهلك يبقى لازم انتى تحترمى نفسك و تحبيها
طيب هروح اشوفها عاوزه ايه
اجى معاكى ؟؟
لا احسن يشوفوكى
لا متخافيش محدش يقدر يشوفنى غيرك
طب تعالى
ايوه يا ما.. ما
لسه صاحيه يا زفته ؟؟ نموسيتك كحلى يا اختى ...كنت عاوزاكى تسندى اخوكى معايا و انتى زى البغله كدا ...مش قادره ادخله جوه لوحدى
لا يا ماما مش عاوزها تسندنى مش كفايه وشها الفقر اللى عمل فيا كدا ....ياريتك خليتى السواق يدخلنى لحد السرير جوه و لا انى اصطبح بوش البومه دى
تلا كانت طايره قدامى اتغاظت من كلام وليد و شاورت لى انى ارد عليه
الاول اترددت و هزيت لها راسي بالرفض لكن هى مسكتتش و بقت تلف حوالين منى زى النحله ..اتشجعت و رديت عليه
ليه يا وليد هو انا كنت عملت لك ايه ؟؟ قولى كدا انا ليه السبب أن الزايده تلتهب عندك ؟؟
الحقى يا ماما دى بترد كمان ....و الله نملتنا طلع لها لسان
انا ليا لسان من زمان بس بستغرب من اى حد فيكم يخيب و الا يجراله حاجه يقوم ماسحها فيا انا
اخرسي يا قعر الكنكه عاوزه تنرفزى اخوكى و هو لسه خارج من عمليه ؟؟ يلا يا اختى غورى على شغلك و لما ترجعى ليا تصرف تانى معاكى
اول ما ماما زعقت فيا قلبى اترعش و اخدت بعضى و دخلت لبست بسرعه
تلا جت ورايا و قالت لى برافوا عليكى انتى كدا حطيتى رجلك على اول الطريق الصحيح
اسكتى يا تلا انا قلت اهرب من وشها احسن تقوم تضربنى انتى مش شفتى كانت بتبص لى بغيظ ازاى ؟؟
و لا يهمك كل شي فى أوله صعب بس بعد كدا الموضوع هيبقى سهل ...اهم شي انك متسبيش حقك ابدا
ربنا يستر
طب هتروحى فين دلوقتى ؟؟
هروح اى مكان بس المهم انى أخرج
و ليه مقولتيش لهم انك مشتغلتيش ؟
مقدرش يا تلا مقدرش
ما تيلا يا مصيبه يا اللى جوه قاعده تبرطمى تقولى ايه ؟؟
حاضر يا ماما خارجه اهو
خرجت للشارع و تلا مش سايباتى طايره فوق كتفى
ارجعى انتى يا تلا و نبقى نتقابل فى البيت
لا مش هسيبك انا جايه معاكى
هتيجى معايا فين بس ..إذا كان انا نفسي مش عارفه انا رايحه فين ؟
هروح معاكى فى اى مكان
يا ستى ارجعى للناس يشوفونى بكلم الهوا يقولوا عليا مجنونه
ههههههههه احلى مجنونه دى و الا ايه ؟
ههههههه ...تصدقى يا تلا أن ماما ووليد مأخدوش بالهم انى مبقتش أعرج ؟؟
ايوا طبعا لأنهم مكنوش بيبصولك خالص
ايوا صح عندك حق
متزعليش يا اميمه بكرا كلهم يجروا وراكى و يتمنوا أنهم يكلموكى
ههههههه بتضحكينى يا تلا ...يعجبنى فيكى انك متفائله زياده عن اللزوم
طب تعالى كدا يا اميمه شوفى المحل ده
ايه دا ؟؟ دا محل خيوط
ايوه منا عارفه
و انا هعمل ايه بمحل الخيوط ؟؟ قصدك أسأل فيه عن شغل ؟؟
لا قصدى تدخلى تشترى منه خيوط
ههههههههه اولا انا مبعرفش اعمل اى حاجه بالخيوط و لا اعرف الكروشيه و لا التريكو
ثانيا انا ممعييش و لاجنيه فى جيبي
مين قالك كدا ؟؟ مدى ايدك فى جيبك
مديت ايدى فى جيبي لقيت ورقه بمية جنيه
ايه داااااااااا مية جنيه مره واحده ؟؟ دا انا ممكن اشترى بيها كتب كتير اوى
لا ...الفلوس دى مش بتاعه كتب
امال فلوس ايه دى ؟؟
دى فلوس تشترى بيها خيوط و بعدين الكتب ملكيش دعوه بيها انا هجيب لك اللى انتى عاوزاه
طب ما زى ما حطيتى الفلوس فى جيبي كان ممكن تجيبي لى الخيوط و خلاص
لا انا ليا غرض انك تشترى الخيوط بنفسك
غرض ايه دا ؟؟
هتعرفى بعدين ...يلا ادخلى
يا ستى هدخل اعمل ايه ؟؟ ما قلت لك مليش فى الحاجات دى
اشترى بس و انا عندى ليكى مفاجأه حلوه
حاضر لما نشوف
دخلت المحل لقيت شاب فى التلاتينات قاعد على مكتب و حواليه رفوف مليانه اشكال و الوان من الخيوط
سلام عليكم
و عليكم السلام ....
يتبع ..
#دجيهان_عادل
#قصص_وحكايات_د_جيهان_عادل.
فضلا غير مسموح نقل أو نسخ القصه إلا بعد اذن الكاتب ...
تعليقات
إرسال تعليق