#القبيحه
#الجزء_التاسع
دخلت المحل لقيت شاب فى التلاتينات قاعد على مكتب و حواليه رفوف مليانه اشكال و الوان من الخيوط
سلام عليكم
و عليكم السلام
ممكن من فضلك اشترى خيوط ؟؟
ههههه ايوا طبعا ...امال انا فاتح المحل ده ليه ؟
انا قصدى ..يعنى ؟؟ قصدى
مالك يا انسه ؟؟....طب عاوزه لون ايه و انا اساعدك انا ؟؟
مش عارفه
مش عارفه ازاى يعنى ؟؟ مش انتى اللى عاوزه الخيوط دى و الا حد تانى ؟؟
ايوه انا ...بس مش عارفه انا عاوزه اى لون
طيب اتفضلى هفرجك على شويه الوان كدا هيعجبوكى أن شاء الله
بصى دى خيوط تركى حلوه جدا تقدرى تعملى منها فساتين قطن متحررش فى الصيف ، زى ما انتى شايفه الخيط فى لمعه و خفيف مش سميك اوى
ايوا ...فعلا حلو اوى
و فيه منه كل الالوان فى الچنچاه و فى البنى و الاحمر و الاخضر و الابيض ؟....
ايه ؟؟ اجيب ايه يا تلا ؟ و اجيب كام شلة خيط ؟؟
هاتى اللى تجبيه
بتقولى حاجه يا انسه ؟؟
لا مبقولش ...طيب هات ده ، و ده ، وده من فضلك
فى عندى اصواف كمان لو عاوزه تعملى كوفيات أو مفارش أو اى حاجه
و الله انا ما عارفه هعمل ايه من أصله 😏
نعم
لا ...مفيش حاجه بكلم نفسي
ههههههههه كلنا بنكلم نفسنا ساعات
طب من فضلك هات ده و ده و ده ...كدا الحساب كام ؟
خلى عنك خالص
يعنى ايه ؟؟
يعنى متدفعيش
لا مينفعش انا اخدت حاجه و لازم ادفع تمنها
هههههه انتى شكلك اول مره تشترى من حد ؟؟
صراحه ايوا ...انا اول مره اتعامل مع حد و اشترى منه
طيب احنا لما نيجى نبيع لحد بنقوله الكلمه دى كنوع من العزومه كدا ...نوع من الحميميه فى التعامل
اه ...و المفروض ارد اقول ايه ؟؟
ههههههههه مفروض تردى تقولى الله يخليك
طيب الله يخليك ...قولى بقا الحساب كام ؟
معقوله فى حد زيك كدا فى زمننا ده ؟؟
زى ازاى مش فاهمه ؟؟
لا ابدا متخديش فى بالك ... انا أسمى عمرو ممكن اعرف اسمك ؟؟
لا مش ممكن
متخافيش انا راجل محترم مش بعاكس و الله
انا أسمى اميمه
عاشت الاسامي يا ست اميمه
عاشت ازاى ؟؟
ههههههههه لا لا انتى مش ممكن
الحساب كام من فضلك
انتى زعلتى انا اسف و الله مش قصدى ازعلك انا بضحك معاكى
لا مزعلش بس عاوزه امشي
الحساب ١٣٠جنيه
١٣٠ جنيه ؟؟ انا مش معايا الا مية جنيه بس ..طب رجعلى كام شلة خيط و خلى الحساب مية بس
لا عيب عليكى ...ابقى فوتى عليا التلاتين جنيه فى اى وقت و خلاص
لا ما هو مش هينفع
يا ستى هينفع أن شاء الله انا واثق فيكى و عارف انك حد كويس
واثق فيا ازاى و انت حتى متعرفش شكلى ايه ؟
دا احساس بقا
اصل ....
طب اقولك على حاجه ؟؟ انا ممكن اشترى منك اى حاجه تنتجيها انا عندى محل جنب ده بعرض فيه الحاجات الهاند ميد و بتجيب فلوس حلوه اوى هاخد انا التلت و انتى التلتين ايه رايك ؟؟
تلت ايه ؟ و تلتين ايه ؟؟انا ...
هنا تلا خبطت على كتفى و قالت لى وافقى ...رحت هزه دماغى زى الهبله اللى مش فاهمه اى حاجه و قلت له موافقه
الراجل حطلى الخيوط كلها فى كيس كبير و قالى
و شلة الخيط دى هديه منى لكى يا ست اميمه
هديه بمناسبه ايه ؟؟
بمناسبه أن ده اول تعامل بينا و هيكون بيننا شغل باذن الله
متشكره ....سلام عليكم
و عليكم السلام و رحمة الله و بركاته
خرجت و انا بتكعبل فى هدومى و جسمى كله بيترعش ...اول مره اكلم راجل بالقرب ده ...اول مره حد يقولى يا انسه ....اول مره حد يضحك معايا ..بس عشان هو مش شايفنى اكيد لانى لابسه النقاب ده
اول حد يدينى هديه ...صحيح انا مش عارفه هعمل بيها ايه بس اهى هديه و خلاص....
شعور عجيب كنت حاسه بيه ...كنت عماله اردد جوه نفسي كل الكلام اللى اتقال و نبرة صوته و هو بيقول يا انسه ...مفيش حد زيك ...ياااا احساس اول مره أحسه فى حياتى ..بس شعور جميل اوى ..يااا لو كان شايفنى كمان و هو بيقول الكلام ده كانت فرحتى كملت ...انا
اييييه ...مالك سرحانه فى ايه ؟؟
مفيش ...مفيش يا تلا الخيوط اهى زى ما قلتى ...هتعملى بيها ايه ؟؟
لا مش انا اللى هعمل انتى اللى هتعملى
منا قلت لك انى مبعرفش اعمل حاجه
و انا كمان قلت لك انى محضرالك مفاجأه فى البيت ...يلا بينا علشان نشوفها
لا مقدرش اروح دلوقتى ...دا يدوب الضهر لسه مأذن
طب و ماله ؟ ايه المانع انك تروحى دلوقتى ؟؟
امى و اخواتى عارفين انى فى الشغل هرجع اقولهم ايه بس ؟؟
قوليلهم انك ملقتيش شغل
لا ازاى ؟؟ منا قلت قبل كدا انى اشتغلت فى مستشفى
طب خلاص قوليلهم انك سبتى الشغل
يا خبر دى كانت ماما طردتنى من البيت
و تطردك ليه ؟؟؟ انتى لكى حق فى البيت زيك زيهم و بعدين انتى برده هتشتغلى و هتدخلى قرش كويس
هشتغل فين بس؟ ما انتى شايفه
يا ستى سيبي الموضوع ده عليا انا ...يلا بينا
و روحت البيت و الحمد لله لما رجعت لقيت ماما كانت نزلت السوق و اخواتى كانوا فى كلياتهم ووليد نايم جوه
دخلت اتسحب على طراطيف صوابعى و دخلت اوضتى بسرعه و قفلت على نفسي
ايه يا بنتى ؟ انتى بتسرقى ؟؟
اكتر و الله يا تلا ...انتى متعرفيش انا مرعوبه ازاى ؟؟
لا متترعبيش و لا حاجه
استنى استنى بنتك دى ايه 😒؟؟ انتى عندك كام سنه ؟؟
تدينى كام سنه ؟؟
حوالى ١٥ سنه و انا كدا مجاملاكى كمان
ههههههههه انا عمرى ١١٠ سنه
ايه ؟؟ بتهزرى ؟؟
لا و الله ما بهزر
هو فى كدا ؟؟ دا احنا عندنا اللى قدك مبيقدروش يمشوا
لا احنا أعمارنا طويله مش زى عندكم ..احنا معمرين
سبحان الله
قومى يلا عشان تشوفى المفاجاه اللى انا محضرهالك
مفاجاه ايه بقا ؟
بصى على التربيزه كدا
ايه دا اللى متغطى ده ؟؟ جبتيلى اكل زى امبارح 😋😋؟؟
لا يا مفجوعه ...انتى همك على بطنك ..دى حاجه احسن من الاكل بكتير
يبقى اكيد كتب
لا برده مش كتب
اوعى تكونى محضرالى مفاجأه زى فيلم الفانوس السحرى و تكونى محضرالى فلوس و تشرطى عليا اصرفهم فى تلات ايام ؟؟
اسكتى يا هبله 🤣 فلوس ايه 😂
امال ايه دا ؟؟
روحى شيلى الغطا بنفسك و انتى هتعرفى
حاضر ....ايه دا 😒😏؟؟؟ ماكينه ؟؟ هعمل بيها ايه دى ؟
دى ماكينه تريكو سحريه
سحريه ازاى 🤔🤔 ؟؟
انا هقولك ...الماكينه دى يا ستى ...
يتبع ..
#دجيهان_عادل
#قصص_وحكايات_د_جيهان_عادل.
فضلا غير مسموح نقل أو نسخ القصه إلا بعد اذن الكاتب ...
تعليقات
إرسال تعليق