#القبيحه
#الجزء_السابع
سمعت الكلام و استغربت إذا كان مش اخواتى اللى عملوا الاكل يبقى مين ؟؟؟
دخلت على اوضتى و انا بطنى بتتقطع من الجوع و لقيت المفاجاه التانيه 😳..
ايه دا ؟؟ الكتاب اللى كنت هموت و اشتريه ايه جابه هنا ؟؟؟؟
ازاى ؟؟؟ انا مش مصدقه عنيا
مين اللى بيعمل كدا ؟؟
ردوا عليا
ريحونى
انا
مين انتى ؟؟
انا تلا
تلا مين ؟ و ايه جابك هنا ؟؟
انتى اللى طلبتى مساعدتى
انا ؟؟؟ محصلش
لا حصل
انا معرفكيش اصلا هطلب مساعدتك ازاى ؟؟
مش فاكره الكتاب اللى تحت السرير ؟؟؟
قصدك كتاب السحر ؟؟
ايوه
بس انا معملتش حاجه غير انى قريت كام سطر فيه
اهو الكام سطر اللى بتقولى عليهم دول حضرونى عندك و بقيت المساعده بتاعتك
يعنى ايه ؟ زى مصباح علاء الدين كدا ؟؟
لا لا مش اوى كدا انا مجرد جنيه صغيره مش زى الجنى اللى طلع لعلاء الدين
صغيره اد ايه يعنى ؟؟؟ ممكن اشوفك ؟
ايوه طبعا ممكن
طب عاوزه اشوفك
غمضى عينك و قولى بسم الله الخالق البارئ المصور
حاضر ....بسم الله الخالق البارئ المصور
افتحى عينك
فتحت عينى لقيت جنيه صغيره طايره قدام عينى شبه تنه و رنه اللى بتيجى فى الكرتون ، طولها قد القلم الرصاص، شعرها اصفر و مفرود على ضهرها
شبه عروسه اسمها باربى كنت بحبها اوى و كانت عند دعاء اختى
لما شفتها جالى ذهول و قلت لها
ياااا انتى صغيره اوى مكنتش فاكراكى بالحجم ده
امال كنتى فاكرانى ازاى ؟؟
كنت فاكراكى طويله و عريضه و شكلك يخوف
طب و طلبتى تشوفينى ليه و انتى كنتى فاكره ان شكلى يخوف ؟؟
يعنى هيكون اوحش من شكلى ؟؟ مظنش طبعا
هو انتى وحشه يا اميمه ؟؟؟
ايوه طبعا
مين اللى قالك كدا ؟؟
كلهم بيقولوا عليا و انا كمان شايفه كدا ......شايفه لونى؟ ، شايفه عيونى عامله ازاى؟ ، شايفه شعرى؟؟ ، شايفه رجلى اللى بعرج بيها ؟
رجلك دى لو كانت اتعالجت كان زمانك بتمشي عادى جدا زينا كلنا
ههههه هو انتى بتمشي زينا ؟؟؟
ايوا طبعا لو حابه امشي همشي
برجليكى الصغيره دى ؟؟
ايوه مستغربه ليه ؟ تحبى اوريكى
ايوا يا ريت
الجنيه نزلت على التربيزه و بدأت تمشي برجليها الرقيقه عليها
مشيت بسرعه لدرجة أنها اختل توازنها و كانت هتقع من على حرف التربيزه و لحقت نفسها بسرعه وطارت فى الهوى
قعدت اضحك عليها و هى كمان قعدت تضحك
تصدقى يا تلا انى بقالى سنين مضحكتش كدا ؟
طيب الحمد لله انى خليتك تضحكى
انا كمان بقالى فتره كبيره متكلمتش مع حد زيك كدا
طب ايه رايك لو فرحتك اكتر ؟؟
ياريت ...نفسي افرح اوى
طيب اقعدى على سريرك و مددى رجلك
هتعملى ايه ؟
دى مفاجأه
مفاجأه ازاى يعنى ؟؟
انتى اسئلتك كتير اوى كدا ليه ؟؟؟ اسكتى و انتى هتشوفى دلوقتى .
حاضر
تلا كانت طايره قدام عينى بجناحاتها الدهبيه و فى أيدها عصايه دهبيه صغيره اوى قد عود الكبريت
ادينى قعدت اهو ...هتعملى ايه بقا ؟؟
غمضى عينك يا اميمه
تانى ؟؟؟
ايوه تانى و قولى بسم الله العظيم الاعظم خالق الكون ..الذى يقول للشيء كن فيكون
حاضر يا ستى اما اشوف اخرتها معاكى
بسم الله العظيم الاعظم خالق الكون الذى يقول للشيء كن فيكون
سمعت تلا بتزن زى النحله وحسيت أن فى حاجه بتخربش فى رجلى خربشه خفيفه اوى زى ما يكون مبرد ضوافر ....احساس لذيذ كأن حد بيزغزغنى فى رجلى
بعد خمس دقايق لقيت تلا بتقولى افتحى عينك يا اميمه
فتحت عينى و بصيت على رجلى لقيت الجرح اللى كان سايب أثر فى الجلد ملوش اى اثر
ايه دا ؟؟ انتى شلتى اثر الجرح ازاى ؟
مش الجرح بس قومى دوسي على رجليكى كدا ؟؟
قمت ادوس على رجليا لقيت رجليا سليمه
انا مش مصدقه نفسي ..انتى عملتى ايه ؟
عملنا لك عمليه
عمليه ايه دى ؟؟
عمليه زى دكتور العظام ما بيعملها
و هو انتى تقدرى تعملى عمليه ؟؟
انا معملتش العمليه لوحدى انا ليا مساعدينى برده
الله ....انا فرحانه اوى مبقتش أعرج برجلى و بقيت بمشي عادى زى كل الناس ..انا اقدر اتنطط كمان
بالراحه يا اميمه بالراحه انا سعيده انى خليتك فرحانه كدا
انا فعلا فرحانه اوى .... و مش عارفه اشكرك ازاى ؟؟
متشكرنيش و لا حاجه ...لا شكر على واجب
بقولك ايه يا تلا ... انتى اللى كنتى جايبالى الاكل صح ؟؟
ايوه صح
طب انا جعانه اوى عمرى ما حسيت انى جعانه بالشكل ده
ما انتى اللى اتشطرتى و رحتى اديتى الاكل لاخواتك البنات
معلش هما كانوا جعانين برده و كان نفسي يأكلوا معايا
طيب خلاص يا حنينه متزعليش بقا لو نمتى من غير عشا
لا مش زعلانه دى فرحتى انهارده متتقدرش بتمن
انتى جميله اوى يا اميمه
انا ؟؟؟ انا جميله ؟؟؟؟ انتى ازاى شايفانى ؟ اكيد نظرك ضعيف اوى
ههههههههه نظرى احسن من نظرك ...انتى مش جميله و بس انتى فى منتهى الجمال كمان و عشان طيبتك دى اطلعى بره فى الصاله هتلاقى طلبك
هتجبيلى اكل ؟؟؟
ايوا صعبتى عليا ...اطلعى هتلاقى صينيه زى الصينيه اللى ودتيها لاخواتك
معقوله ؟؟؟
و طلعت جبت الصينيه و كان عليها فرخه كبيره محمره و طبق رز عملاق و طبق ملوخيه كبير و معلقه من فضه
اكلت و عرفت اخواتى كانوا مستغربين من الطعم ليه
فعلا الاكل طعمه مختلف اوى حاجه كدا و لا فى الخيال
تلا قعدت قدامى تتفرج عليا و انا باكل زى المفجوعه
تعالى كلى يا تلا
لا سبقتك و اكلت مع مامتى
ايه دا انتى عندك ام ؟؟؟
ايوا طبعا امال مخلوقه شيطانى ؟؟
طب احكيلى عن امك يا تلا
امى يا ستى اسمها كهرمانه ... جنيه من الجن الاحمر ...
امى ....
طبعا عاوزين تعرفوا حكايه كهرمانه ام تلا ايه ؟؟ استنونى هحيهالكم فى الجزء الجاى باذن الله تعالى
يتبع ..
#دجيهان_عادل
#قصص_وحكايات_د_جيهان_عادل.
فضلا غير مسموح نقل أو نسخ القصه إلا بعد اذن الكاتب ...
تعليقات
إرسال تعليق