#القبيحه
#الجزء_السادس
رحت شاده الكرتونه و انا بترعش لقيت الكرتونه مقفوله باللزق زى ما انا حاطاه بالظبط و مفيش اى حاجه فيها مقروضه
قلت يمكن دخل فيها من اى حته
طب افتح كدا احسن ياكلى الورق
اول ما فتحت الكرتونه طلع منها نور رهيب قفلت عينى من شدته
ايه دااااا ؟؟؟ 😳
ايه الكتاب اللى مطلع نور ده ؟؟؟
دا كتاب غلافه جلد و شكله قديم اوى و مرسوم عليه من بره نقوش شكلها عجيب و مقفول بكلبس شكله غريب اوى مشفتش زيه قبل كدا
حاجه غريبه اوى ...انا حطيت الكتاب ده قبل كدا فى الكرتونه و مكنش خارج منه النور ده
هفتحه اشوف ايه اللى مطلع النور
يااااااا ...دا الكلام نفسه منور ...طالع منه نور زى ما يكون مشع إشعاع ذاتى
الله ...ايه الريحه الحلوه دى اللى طالعه من الكتاب ؟؟
لما اقرا المكتوب كدا
إنه من سليمان وأنه بسم الله الرحمن الرحيم ألا تعلوا عليّ بقوة الرحمن ملك الإنس والجان ...بقوه الخالق الجبار خالق الليل و النهار.. الآن تحضر في المكان عروسه من عرايس الجان..... تحضر تلا من ارض الفلا .. تؤنس وحدتي و تقلل لوعتى و تداوى جراحى ... تحضر امنه مطمئنه بحق الكاف و النون و بحق من قال للشيئ كن فيكون
العجل العجل الساعه الساعه الواحه الواحه آمييييين
ايه دا ؟؟ ايه الكلام الغريب ده ؟
يا خبر 😳 النور اللى كان طالع من الكلام اتطفى ...يا خبر هو ايه اللى حصل ؟
ياريتنى ما قريته بينى نيلت الدنيا
انا خايفه اوى انا هقفل الكتاب و انام كفايه اللى هيحصلى بكرا مش عارفه اخلص من حكايه ماما دى ازاى ؟ ربنا يسترها بقا .
حطيت راسي ع المخده و رحت فى نوم عميق صحيت على صوت خبط على الباب
يلا يا قعر الكنكه عشان تلحقى تغسلى وشك مع أنه مش هيفرق كتير 😏
حاضر قايمه اهو
يا رب استر يارب استر
يا ماما يا ماما الحقينى
ايه دا ؟ دا وليد اخويا ...هو ماله بيزعق كدا ليه ؟؟
الحقينى يا ماما جنبى بيتقطع
يا حبيبي يا ابنى مالك ؟
معرفش كنت نايم و فجاه حسيت ان سكاكين فى جنبى بتقطعه ...هموت يا ماما الحقينى
طب هروح اعملك حاجه سخنه بسرعه تشربها
ماما دخلت على المطبخ جرى و عملت نعناع لوليد
استنيت لما شربه و كنت سمعاه عمال يعيط من الالم
ماما راحت على اوضتها قلت اكيد راحت تلبس هدومها و هتنزل معايا و امرى هيتكشف
لقيتها من جوه بتقولى روحى انتى يا وش النحس على شغلك مش هقدر اسيب اخوكى و اجى معاكى ...
فرحت و نزلت بسرعه و قلت اروح ادور يمكن الاقى فعلا اى حاجه اشتغلها
لفيت كتير اوى و برده مفيش فايده
قلت خلاص اروح اقعد جنب المسجد يمكن حد يدينى فلوس و اشترى كتاب جديد
قعدت جنب المسجد و محدش عبرنى
استنيت كتير اوى و الدنيا ابتدت تليل
لقيت ست كبيره جت قعدت جنبى و قالت لى
انتى قاعده كدا ليه ؟؟
مفيش
قوليلى انا زى امك
اصلى بدور على شغل مش لاقيه ..و لما تعبت قولت ارتاح هنا شويه
طب قومى روحى يا حبيبتى الدنيا بقت ليل
منا خايفه اروح امى مش هتسبنى اكيد هتبهدلنى
متخفيش امك ملهيه فى حالها
ايه ؟ امى ملهيه فى ايه ؟؟؟ و عرفتى ازاى ؟
متخديش فى بالك و يلا قومى
قمت و انا مستغربه لكلامها ووقفت قدام الراجل اللى بيبيع الكتب القديمه و كنت هموت و عاوزه اخد كتاب حلو اوى اسمه حياه ...قلبت فى صفحاته و لقيته بيتكلم عن روايه حلوه اوى و لما سألت الراجل على تمنه قالى بتلاته جنيه
طبعا سبته على الأرض و مشيت
روحت البيت و لسه داخله لقيت دعاء بتقول
اهى وش الفقر جت اهيه
بصيت لها و متكلمتش و روحت على اوضتى
بس هى مسبتنيش و لقيتها ماشيه ورايا و بتقول
اول يوم ليكى فى الشغل اخوكى يتعب و تجيله الزايده ...و يروح يعمل عمليه ربنا يستر و الواد ميجرلوش حاجه
ردت سناء ...اهى ماما بايته معاه و ربنا يستر يا دعاء انا عارفه المصايب دى بتتحدف علينا منين ؟؟
يعنى ما انتيش عارفه ؟؟؟
و قعدوا يضحكوا
دخلت اوضتى من غير ما اولع النور و قعدت على سريري اعيط
طب هما ليه بيتهموا فيا اى حاجه وحشه بتحصلهم ؟
طب و انا كنت عملت ايه لوليد اصلا ؟؟ و الا حتى شفته فين ؟
و ايه الارتباط بين شغلى و بين مرضه ؟
طب فى الحقيقه انا مشتغلتش و لا حاجه ...يبقى انا عملت فيه كدا ازاى بقا ؟؟
قعدت اكلم ربنا و استسلمت لقدرى و قلت لنفسي خلاص بقا يا اميمه قومى اتوضى و صلى لربنا يزيح عنك الغمه
خرجت رحت الحمام و اتوضيت و كنت حاسه بالجوع الشديد
اتسحبت بالراحه و رحت على المطبخ علشان اكل البواقى زى كل يوم
بس ملقتش اى اكل فى المطبخ ...اكيد ماما مطبختش لأنها راحت مع وليد المستشفى ... طب اخواتى اكلوا ايه ؟
هدخل اصلى و انام جعانه بقا و امرى لله
دخلت الاوضه و فتحت النور لقيت حاجه عجيبه جدا ...
ايه اللى انا شايفاه بعنيا دا ؟؟؟؟
انا اكيد بحلم
اكيد دى مش حقيقه
ايه الاكل ده ؟ مين جابه هنا ؟؟؟ يمكن حد من اخواتى حن عليا و جاب لى الاكل ده؟؟
بس دى فرخه كامله و رز و ملوخيه ...معقول هيحطولى دا كله لوحدى ؟؟
طب يمكن هيجوا يأكلوا معايا اخيرا ؟؟
طب انا مش همد ايدى على الاكل وهصلى عقبال ما يجوا
صليت ودعيت ربنا كتير ، كنت فرحانه ان اخواتى عملولى المفاجاه دى
يمكن بيخافوا يعملوا كدا قدام ماما لتزعق لهم ...و استغلوا فرصه انها مش هنا و طبخوا الاكل ده و جابوه ناكله سوا
اخيرا يا رب عرفوا انى اختهم و بحبهم و عمرى ما تمنيت لهم إلا الخير ؟
مر اكتر من ربع ساعه و محدش فيهم دخل
قلت خلاص اروح انا فى اوضتهم بالصينيه و ناكل كلنا سوا و خلاص
شلت الصينيه و رحت خبطت على الاوضه
عاوزه ايه ؟؟ روحى من هنا مش ناقصينك
انا جبت لكم الاكل عشان ناكل كلنا سوا
سمعتهم من جوا بيقولوا اكل ؟؟؟ و اتنطروا من على سرايرهم
سناء فتحت الباب بسرعه و من غير ما تبص لى شهقت لما شافت الصينيه و شدتها من ايدى بسرعه و قفلت الباب فى وشي
وقفت مذهوله هو فى ايه ؟ منين عملولى الاكل و منين اخدوه كدا و قفلوا الباب ؟؟
سمعتهم من جوه عمالين ياكلوا و يقولوا
الله الاكل ده لذيذ اوى ...الذ اكل أكلنا فى حياتنا ..دا مش اكل عادى ده دا اكيد شيف اللى عامله....بس يا ترى جابته منين البت دى ؟
اكيد جابته من الشغل و هى جايه
سمعت الكلام و استغربت إذا كان مش اخواتى اللى عملوا الاكل يبقى مين ؟؟؟
دخلت على اوضتى و انا بطنى بتتقطع من الجوع و لقيت المفاجاه التانيه 😳.....
يتبع ..
#دجيهان_عادل
#قصص_وحكايات_د_جيهان_عادل.
فضلا غير مسموح نقل أو نسخ القصه إلا بعد اذن الكاتب ...
تعليقات
إرسال تعليق