#القبيحه
#الجزء_السادس_عشر
استنيت شويه و سمعتهم و هما بيحكوا لماما انى ضربتهم و أنهم راحوا الكليه بالعافيه لأنهم مش قادرين يمشوا من العضه
ماما جن جنونها و بقت تستحلف
بس لما تيجى مقصوفة الرقبه دى ...و دينى لاوريها
بعد ما كنت هخرج تراجعت تراجع تكتيكى علشان افكر انا هعمل ايه دلوقتى 🤔
كان فاضل معايا من بقيه حق الفساتين ٣٠٠ جنيه
استنيت لما دعاء و سناء دخلوا اوضهم يغيروا و طلعت لماما فى الصاله
بسم الله الرحمن الرحيم انتى هنا يا مخفيه من امتى ؟
جيت من شويه
شويه ازاى و انا قاعده هنا من ساعتين مشوفتكيش و انتى بتدخلى يعنى ؟؟
دخلت و قلت لك سلام عليكم و انتى رديتى السلام
نعم نعم ...انا يا بت شفتك و رديت السلام عليكى ؟؟
ايوا انتى مش فاكره و الا ايه ؟؟
و الله ما حصل انتى هتتبلى عليا و الا ايه ؟
و اتبلى عليكى ليه هو السلام راخر فيه مشكله ؟ طب اقولك بأمارة ما قلتيلى ممعكيش فلوس يا زفته اكمل بيها علاج وليد ؟ و قلت لك حاضر هدخل ارتاح شويه على ما تخلصى اللى بتعمليه و اجيب لك التلتمية جنيه اللى اخدتهم من المديره انهارده .....و أدى يا ستى الفلوس اهيه عاوزه حاجه تانى
امى حالها ذهول و هى بتاخد الفلوس من ايدى بقت تحاول تفتكر امتى حصل الكلام ده
انا بقا انتهزت الفرصه و دخلت على اوضتى و قفلت الباب عليا
سمعت سناء و دعاء طلعوا لها فى الصاله
مالك يا ماما قاعده كدا ليه ؟
الزفته اختكم
هى جت ؟؟؟
ايوا جت و بتقول انى كلمتها و دا محصلش ...مش فاكره أن ده حصل خالص
هى هتسوق الهبل علينا و الا ايه ؟؟ انتى لازم يا ماما تحاسبيها على العض اللى عضتهولنا ده و البهدله اللى اتبهدلناها
اسكتى يا دعاء دلوقتى ...انا مش مركزه فى اللى بتقوليه
يا ماما دى بتستهبل ...و اكيد و لا كلمتك و لا حاجه ...قومى يا ماما شوفى حكاية البت دى ايه و احنا هنيجى معاكى
و قامت ماما معاهم و دخلوا التلاته عليا و هما حاطين اديهم فى وسطهم
انتى ايه حكايتك يا بت انتى ؟ هو مفيش حد قادرك و الا ايه ؟؟
عاوزه ايه يا دعاء
كلمينى انا ...انتى بتضربى اخواتك ليه و تعضيهم ؟؟ و جايه تضحكى عليا ليه و تقولى انى شفتك ...انطقى يا زفته
انا مش زفته
لا زفته و ستين زفته كمان
و لما انا زفته بتاخدى منى فلوس ليه ؟؟؟ بتستحلوا تعبى ليه ؟؟ و بنتك نفسها بتقولك يمكن انا حراميه و الا شحاته ...فلوس مش عارفين مصدرها و مع ذلك بتاخدوها برده و بتصرفوها عادى
اخرصى يا بنت الكلب يا قليلة الادب
امى نزلت على وشي بالقلم لدرجة انى حسيت أن جلد وشى ولع منه
بصيت لها و عنيا فيها دموع
طول عمرك ظالمه ...على طول تستقوى عليا انا بس و متقدريش على اى حد منهم ...كل ده عشان ايه ؟؟ عشان ربنا خلقنى مش حلوه زيك و زيهم ؟؟
طب و انا ذنبى ايه ؟؟؟ انتى بتعترضى على المخلوق و الا الخالق ؟
انا لو بأيدي كنت خليت نفسي اجمل بنت فى الدنيا
اخرصى يا سودا يا ام كدش ..كان يوم اسود يوم ما خلفتك ...انتى عملى الاسود فى الدنيا دى
انا فعلا عملكم الاسود اللى عملتوه ...غلطتك اللى حاولتى تنزليها و معرفتيش
اخرصى يا كلبه غلطة ايه اللى تقصديها ؟؟
انتى عارفه كويس انا بتكلم على ايه
هنا سناء و دعاء بصوا لماما بتعجب و لقيتها ارتبكت جدا و حاولت تغطى على ارتباكها ده بأنها تضرب فيا باديها الاتنين
اخرصى قطع لسانك اطلعى بره ...بره من بيتى
مش طالعه ...مفيش قوه هتخرجنى من هنا و ابعدى عنى بقا و معنتيش تمدى ايدك عليا تانى
امى سكتت خالص و خدت بعضها و طلعت من الاوضه......دعاء و سناء لسه واقفين حاطين أيديهم فى وسطهم و مذهولين ...نادوا على ماما
ماما انتى هتسبيها ؟؟ احنا لازم ندور فى اوضتها و نشوف مخبيه ايه ؟
بصيت لهم بغضب و رحت ماسكاهم من دراعاتهم الاتنين و قلت لهم بره ....متدخلوش هنا تانى ...لو عتبتوا الاوضه دى هكسر رجلكم
زقيتهم خرجتهم و رزعت الباب وراهم
و سمعتهم من بره بيكلموا ماما
انتى سايباها ازاى يا ماما ؟؟ و غلطة ايه اللى بتتكلم عنها دى ؟
اسكتوا و يلا على اوضتكم دى بتخرف
و لما هى بتخرف سكتى لها ليه ؟؟ مرمتيهاش بره ليه ؟؟؟
اسكتوا بقااااا انا هسيب لكم الدنيا و امشى عشان ترتاحوا
امى لبست جلابيتها و خرجت من البيت بسرعه زى ما يكون بتهرب من مواجهتهم
انا بقى جت فى دماغى كل الأفكار الشريره اللى ممكن تيجى لواحده مقهوره زيى
قعدت اعيط كتير اوى و القلم اللى ادتهولى زى ما يكون صحى الشيطان اللى جوايا ... قررت انى انتقم منهم جميعا ...
الناس دى عمرهم ما حبونى و لا هيحبونى ...... بيتمنوا موتى انا مش هبقى على حد بعد كدا
انا كدا كدا حياتى مدمره هيحصل ايه اكتر من كدا ؟؟
لازم اخليهم يدفعوا تمن العذاب اللى عذبهولى ده ...لازم اقهرهم زى ما قهرونى
الشعره اللى ما بين الطيبه و القسوه خلاص اتقطعت و لازم اخد حقى منهم و من الدنيا كلها
نزلت على ركبى و شديت الكرتونه اللى فيها الكتب و طلعت الكتب
و قعدت ادور على اى تعويذه احضر منها عفريت يكون خادم ليا ينفذ لى كل طلباتى
و اقدر من خلاله انتقم منهم واحد واحد
قريت كتير بس مفهمتش اى حاجه
كلها طلاسم و رموز مش مفهومه كلها حاجات محتاجه فك شفره ...
الكتب دى اكيد لها مفتاح يحلها و يفك شفراتها
طب اجيب المفتاح ده منين ؟؟؟
افتكرت ساعتها النت و دخلت بسرعه عليه
و بحثت عن كتب لفك رموز التعاويذ لقيت موقع بيبع الكتب دى و الدفع عند الاستلام
الكتاب كان سعره خمسمية جنيه ..قلت و ماله بس المهم احقق اللى انا عاوزاه و افهم الكتب اللى معايا دى بتتكلم عن ايه
و فعلا طلبت الكتاب و قفلت النت
و نمت على سريرى و انا بحضر فى دماغى طرق الانتقام اللى هنتقمها من كل اللى ظلمونى
نمت و حلمت بتلا وشها اسود و متقيده بس المره دى من رقبتها و اديها و رجليها و شكلها تعبان جدا و مخنوق
ليه كدا يا اميمه ؟؟ ليه تعملى كدا ؟؟
اسكتى يا تلا انتى متعرفيش حاجه
لا انا عارفه كل حاجه بس باللى هتعمليه ده هتعقدى الدنيا مش هتحليها
مش عاوزه احل حاجه انا عاوزه انتقم منهم كلهم
بس انتى مش كدا
لا انا بقيت كدا دلوقتى انا بقيت شيطان فى الشكل و الأخلاق كمان
لا مش انتى اللى تبقى كدا ...و بعدين انتى كدا بتأذينى انا
بأذيكى ازاى ؟؟ انا عملت لك ايه ؟؟ انا عمرى ما اذيكى يا تلا ...انتى الوحيده اللى حنيتى عليا فى الدنيا دى
ليه كشفتى السر اللى قلتهولك يا اميمه ؟؟ انتى عاهدتينى و خالفتى العهد ...انتى كدا اذتينى
لا ..لا مكنش قصدى هما اللى اجبرونى انى اتكلم ...انا اسفه يا تلا انا مستعده اعمل اى حاجه فى الدنيا و اخلصك ...انا لا يمكن اكون سبب فى اذيتك ابدا
خلاص يا اميمه ..طريقك بقى غير طريقى
تلا ...تلا متسبنيش يا تلا
تلا اختفت فى الحلم و الدنيا اسودت حواليا و مبقتش شايفه اى حاجه
فوقت و انا حاسه بالألم الشديد و الحسره و مش عارفه اعمل ايه و اتصرف ازاى 😔
يتبع ..
#دجيهان_عادل
#قصص_وحكايات_د_جيهان_عادل.
فضلا غير مسموح نقل أو نسخ القصه إلا بعد اذن الكاتب ...
فين بقية القصه
ردحذف