#القبيحه
#الجزء_العاشر
روحى شيلى الغطا بنفسك و انتى هتعرفى
حاضر ....ايه دا 😒😏؟؟؟ ماكينه ؟؟ هعمل بيها ايه دى ؟
دى ماكينه تريكو سحريه
سحريه ازاى 🤔🤔 ؟؟
انا هقولك ...الماكينه دى يا ستى زى اى ماكينه تريكو عاديه جدا بس الفرق انها سريعه جدا ...يعنى انا هعلمك عليها بتشتغل ازاى و انتى بمجرد ما تحطى الخيط و تضغطى عليها هتعملك اللى نفسك فيه فى دقايق معدوده
بجد ؟؟ طب انا نفسي فى فستان جديد انا عمرى ما لبست فستان جديد ابدا
لازم الاول تقيسي طولك و تحددى مقاسك علشان الماكينه تعمل لك الفستان
طب اقيس ازاى انا مش معايا مازوره ...مالك بتبصيلى كدا ليه ؟
المازوره اهى يا ست اميمه و انا هوريكى ازاى بيقيسوا الفستان
ايوه ورينى
وورتنى الجنيه تلا مقاس الفستان بيكون ازاى و حددت مقاسي بالظبط و طلبت منى اختار لون خيط يتعمل منه الفستان
و لاول مره فى حياتى احدد اللون اللى انا حاباه و عاوزه البسه ..انا طول عمرى مليش اى اختيار لانى بلبس لبس اخواتى القديم
اخترت اللون و مكنتش متخيله الفستان هيكون شكله ازاى
لقيت تلا جبت لى كتالوج فيه تصاميم فساتين كتير اوى و لاول مره برده اختار التصميم اللى انا حاباه و كان نفسي البسه من زمان
تلا قالت لى احط الخيط فى الماكينه و اشغلها ازاى بعد ما اقول بسم الله
بسم الله
الماكينه فى خلال خمس دقايق كانت عملت احلى فستان شفته فى حياتى
مسكت الفستان و انا مش مصدقه نفسي
معقوله دا فستانى انا ؟؟؟ معقوله انا هلبس ده ؟؟؟
تلا قالت لى البسي يا اميمه ورينى الفستان عليكى عامل ازاى ؟؟
لا هتكسف
تتكسفى ليه ؟؟
لازم تخرجى من الاوضه الاول
ههههههههه طيب هودى وشي الناحيه التانيه و يلا ورينى اميمه الحلوه
حاضر
تلا ودت وشها الناحيه التانيه و انا لبست الفستان
الفستان كان مظبوط عليا جدا جدا لدرجة انى كنت حاسه أنه ضيق لانى طبعا واخده على أن فساتينى تبقى واسعه عليا
هو الفستان حلو مع انى مش شايفه نفسي بس مجسم شويه
و لا مجسم و لا حاجه دا مظبوط جدا عليكى و بعدين انا هخليكى تشوفى نفسك
و فى لحظه واحده لقيت مرايه كبيره بحجم الإنسان واقفه على الحيطه و لقيت صورتى فيها
لا لا يا تلا شيلى المرايه دى
ليه يا اميمه ؟؟ الفستان مش عاجبك ؟؟
لا مش الفستان ...انا مبحبش اشوف نفسي فى المرايه
و ليه مبتحبيش تشوفى نفسك ؟؟
ما انتى عارفه
طب بصى على الفستان و متبصيش على حاجه تانيه
هو شكله جميل اوى بس مش قادره ابص اكتر من كدا ...لو سمحتى شيلى المرايه
حاضر يا ستى
و فى لحظه كانت تلا شالت المرايه و لقيتها بتبص لى بنظره كلها زعل
انتى زعلانه منى يا تلا ؟؟
لا زعلانه عليكى يا اميمه
ليه بتقولى كدا ؟
انتى ازاى عاوزه الناس تتقبلك و تحبك و انتى نفسك مش متقبله نفسك و لا بتحبيها
ما انتى شايفه قدامك شكلى عامل ازاى ؟
ماله شكلك ؟؟ فى زيك كتير على فكره ..فى ناس كتير قدرت تغير واقعها و تحوله لصالحها
و ازاى هعمل كدا ؟
لازم تغيرى دا ( و شاورت تلا على دماغى )
و لازم تؤمنى بدا ( و شاورت تلا على قلبى )
و قلبى و عقلى اللى عاوزانى اغيرهم دول اغيرهم ازاى ؟؟
انا هساعدك
ياريت يا تلا
طيب اقعدى اعملى كل الخيوط دى علشان نوديها لعمرو بكرا
عمرو ؟؟؟ ااه عمرو 😍
مالك يا اميمه ؟
لا مفيش قصدى أنه له تلاتين جنيه عندنا و عاوزين ندهمله
اه بحسب ...طب يلا ابدأى شغل بسرعه عشان هحضرلك أكلة سمك حلوه دلوقتى
يا جمالوووو اموت فى السمك انا ...بس هعمل ايه انا لا عارفه مقاسات و لا موديلات
بصى احنا هنعمل فساتين اطفال دى الطلب عليها بيبقى أكبر و بالنسبه للمقاسات و الموديلات مفيش اى مشكله الحاجات دى موجوده فى مجلات خياطه و اقدر اجيبهالك فى لحظه
مش عارفه اشكرك ازاى يا تلا ...
عيب عليكى متشكرنيش احنا اخوات
تلا جابت لى المجلات و اخترنا تلات فساتين بمقاساتهم و ظبطت الماكينه و خلال ربع ساعه كان التلات فساتين جاهزين و شكلهم و لا الجاهز
الله حلوين اوى اوى ...عاوزين نغلفهم بقا بطريقه حلوه
سيبي الموضوع ده عليا انا
و فى لحظه واحده كانت التلات فساتين متغلفين و كأنهم من احسن مصنع
يلا يا اميمه خبى الفساتين و الماكينه تحت السرير علشان محدش يعرف
حاضر ...خبيتهم اهو ..فين بقا السمك اللى قلتيلى عليه ؟
انتى مبتنسيش ابدا 😂
لا الاكل مقدرش أنساه ابدا
طب اتفضلى يا ستى سمكايه مشويه مع سلطة طحينه و عيش مفقع
انتى كمان عارفه العيش المفقع ؟؟
امال انتى اللى عارفاه لوحدك و الا ايه ؟
طب مش كنتى تجيبي سمك اكتر عشان أدى لاخواتى ؟؟؟ مالك بتبصيلى كدا ليه ؟ هو انا قلت حاجه غلط ؟؟
كلى يا اميمه و انتى ساكته هما هياكلوا فراخ انهارده و محدش فيهم فكر فيكى
معلش بس هما اخواتى برده
طيب يا حنينه كلى بسرعه
و ليه بسرعه ؟؟
كل حاجه تسألى فيها كدا ؟ كلى بسرعه و خلاص
حاضر باكل اهووو
خلصت اكلى و يدوب بلم الورقه لقيت ماما بتقول
هى المخفيه دى جت امتى ؟؟ بت يا دااابه يا قعر الكنكه خدى هناااااا
شفتى بقا كنت بقولك كلى بسرعه ليه ؟؟
ايوا عرفت يا تلا ...يا خبر انا كنت هخرج لها بالفستان الجديد
طب و ماله
لا لا مقدرش أخرج بيه انا هغيره بسرعه
غيرت فستانى فى لحظه واحده و رميته على السرير و طلعت جرى على وابل من الشتيمه و الدعاوى عليا
ايوا ..ايوا انا جيت اهو
كنتى فين دا كله يا اختى ؟ بتعملى ايه جوه
ردت دعاء يمكن بتتذوق يا ماما ههههههههه
لا و انتى الصادقه دى تلاقيها بتتزفت مش تتذوق
عندك حق يا سناء ههههههههه الشكل ده مش ممكن يبان عليه ابدا اى نضافه
كلامهم ليا كان بينزل على قلبى يقطعه مع انها مكنتش اول مره يقولولى كلام زى ده ...بس كلام تلا ليا خلانى احس بقباحة كلامهم اوى و أن اللى بيقولوه ده جارح اوى
اسكتوا يا بنات لما اشوف المعدوله جت من الشغل بدرى ليه ؟؟؟
انا ...انا
انتى ايه انطقى
اصلى سبت الشغل ده
يا ادى المصيبه سبتى الشغل ليه ؟؟؟ اكيد عملتى كارثه ما انتى دهوله و كنت متاكده انك مش هتنفعى فى شغل ابدا
منا هدور على شغل تانى
ابقى قابلينى لو لقيتى ...انتى واحده فاشله عارفه يعنى ايه فاشله
فى اللحظه دى دعاء كانت قامت تروح المطبخ و هى بتضحك عليا قامت لمحت الفستان و هو على السرير دخلت جرى جابته
الحقى يا ماما ...شوفى بنتك جايبه ايه ؟؟؟
ايه دا يا بت جايباه منين ده ؟؟
اشتريته باليومين اللى اشتغلتهم
ليه هو انتى اخدتى فلوس اد ايه ؟ الفستان شكله غالى اوى
المشرفه ادتنى فلوس زياده علشان شافت فستانى مقطوع و قالت لى اشترى فستان
يا ادى المصيبه ...بقا بدل ما تجبيلى الفلوس تروحى تشترى فستان ؟؟ الفستان دا لازم يرجع حالا و تجيبي فلوسه
لا مش هينفع ارجعه
لا يا ماما مترجعهوش دا عاجبنى اوى و عاوزه اروح بيه الجامعه
خلاص يا بت يا دعاء خديه أدبا ليها عشان بعد كدا ما تبقاش تتصرف من دماغها 😒
يتبع ..
#دجيهان_عادل
#قصص_وحكايات_د_جيهان_عادل.
فضلا غير مسموح نقل أو نسخ القصه إلا بعد اذن الكاتب ...
تعليقات
إرسال تعليق