#القبيحه
#الجزء_الخامس_عشر
بعد العلقه الحلوه اللى اخدوها الاتنين طلعوا يجروا و هما بيعرجوا من العض اللى عضيتهولهم
هما خرجوا و انا حسيت بسعاده ملهاش وصف لاول مره اخد حقى و ادافع عن نفسي ...مفكرتش لما ماما تيجى ايه هيحصل..... و الا هتعمل فيا ايه ..مخفتش انها تطردنى ...معرفش ايه اللى قوانى كدا
لا اعرف ...تلا 🥺🥺...
ناديت عليها
ارجعى يا تلا ... انا خلاص اتعلمت الدرس و عرفت انك صح
افتكرت الكتاب اللى انا حضرتها منه قمت بسرعه و نزلت تحت السرير
فتحت الكرتونه و لقيت الكتاب
فتحته بسرعه بس للاسف ملقتش اثر للتعويذه
ازاى كدا ؟؟ دى كانت هنا
يعنى مش هعرف اوصلك يا تلا ؟
فكرت انى ادخل على النت يمكن الاقى اى معلومه توصلنى ليها
فتحت التليفون و بحثت لكن معرفتش اوصل لأى حاجه
و فجأه لقيت رساله طلعالى على الشاشه من عمرو
فتحت الرساله لقيته كاتب لى
مساء الخير
مساء النور
معلش انا داخل اكلمك دلوقتى بس لقيتك منوره و قلت افرحك و اقولك انى بعت الفساتين
صحيح ؟؟ طيب الحمد لله
ايوا صحيح و رحت اديت لعلاء باقى حقه كمان
متشكره اوى يا بشمهندس
العفو تحت امرك ...هتيجى بكرا ؟؟
باذن الله جايه
طيب تصبحى على خير
و انت من اهل الخير
قفلت مع عمرو و حسيت أن قلبى بيرفرف جوه صدرى ...احساس عمرى ما حسيته قبل كدا
كبرت صوره البروفايل بتاعته
انا اول مره أركز فى ملامح وشه دايما ببقى حاطه وشي فى الارض
عمرو لونه خمرى ، شعره ناعم جدا ، عنده دقن خفيفه مرسومه ، عيونه عسليه
فتحت بقية صوره اللى على بروفايله و شفته مع أصحابه على البحر و فى الكليه و بملابس التخرج ، شفت صور ليه فى عربيه ...هو عنده عربيه ؟؟؟
شفت صوره مع بنات حلوه اوى شعر طويل و سايح و لبس اخر شياكه و مكياج ايه و مستوى ايه
اول ما شفت صوره مع البنات اتخنقت اوى و قلت لنفسي
انتى اتجننتى يا اميمه ؟؟ بقى عمرو هيسسب البنات دى كلها و يبص لك انتى ؟؟ فوقى انتى بتحلمى حلم مش بتاعك و هتفوقى على كابوس فاهمه يعنى ايه كابوس
انا مش عاوزاه يحبنى كفايه انا احبه
و تحبيه ليه ؟؟ آخرة الحب ده ايه ؟
الحب هو الحياه
و مش من حقك الحب ده و لا الحياه دى
انتى ليه دايما مكسره مقاديفى
لا انا بواجههك بالحقيقه المره اللى عاوزه تنسيها أو بتعملى نفسك مش واخده بالك منها ...انتى وحشه يا اميمه عارفه يعنى ايه وحشه
اصلك من زمان مشوفتيش نفسك فى المرايه ....بسيطه هاتى كاميرا الموبيل و شوفى نفسك
لا مش عاوزه
لا لازم تتفرجى على ملامحك علشان تفوقى لروحك
ضغطت على زرار الكاميرا و ايدى بتترعش
ظهرت صورتى قدامى
وشي مليان حبوب و اثار حبوب... عنيا سنانى ....مفيش حاجه حلوه زى البنات اللى شفتها معاه
مفيش غير أن صوتى حلو و اللى يسمعه مش ممكن يقول إن الصوت ده بالشكل ده ابدا.
قفلت الكاميرا بسرعه و قلبى جواه الم شديد
اتكورت على سريري و دموعى منشفتش من على خدى لحد ما رحت فى النوم
لما نمت حلمت بتلا مره تانيه و هى برده لسه فى محبسها
كنت واقفه بعيد و مذهوله ...المره اللى فاتت مأخدتش بالى من شكل المكان
المره دى اخدت بالى أننا فى حته زى كهف فى حضن جبل ..و مشاعل من نار منوره المكان
كنت واقفه بعيد و لقيت تلا بتنادى عليا
تعالى يا اميمه
قربت من القفص الدهبى
اوعى تلمسي القفص لتنبهى الحراس بوجودك هنا
حراس مين ؟؟ و انتى محبوسه هنا ليه ؟
هقولك بعدين ...المهم.. انا لقيتك حزينه و مقدرتش اشوفك بالشكل ده و اسكت ...انا عاوزه اقولك على حاجه... الجمال يا اميمه جمال الروح ياما فى بنات جميله بس روحها مش حلوه ...انا قلت لك قبل كدا لازم تؤمنى بعقلك و تصدقى قلبك
قلبى ؟؟؟ هو انا ليا قلب ؟
انتى قلبك من دهب ...لازم تحبى نفسك علشان الناس تحبك ..احساسك بذاتك بيعكس نظره الناس ليكى اوعدينى انك هتحبى نفسك
مقدرش اوعدك ...أنا بكره نفسي
طاقة الكره هتضرك انتى الاول و هتستفذ طاقتك ...اوعدينى يا اميمه
انا ...انا
و صحيت من النوم و انا حاسه انى مكنتش فى حلم ...دا حقيقه
بس كلام تلا معايا ريح قلبى و خلانى أشعر بالرضا شويه
قمت صليت زى كل يوم و دخلت المطبخ عملت فطار و شاى بلبن و عديت على الصبايا الحلوين و هما قاعدين فى الصاله مكتومين و مش قادرين ينطقوا
بعد شويه نزلت وديت الفساتين لعمرو و اخدت بقيه حسابى و اخدت خيوط جديده علشان اعمل تصاميم تانيه
عديت على محلات الملابس و الطرح و اشتريت طرحتين و فستان و جزمه جديده بكعب مرتفع شويه ...
عمرى ما لبست جزمه بكعب كنت دايما البس جزم دعاء أو سناء بكعب واطى و متاكل كمان من كتر المشي
اشتريت كتابين علشان اتسلى بيهم
و كمان عديت على محل كباب و كفته و اشتريت نص مشكل و عيش و سلطات لانى عارفه انى هرجع مش هلاقى اكل فى البيت
روحت البيت و انا شايله الاكياس و فرحانه اوى
دخلت ...سمعت صوت وليد و هو بيكح فى اوضته ...عرفت انهم رجعوا
سناء و دعاء كانوا لسه مرجعوش من الكليه يعنى بنسبة تسعين فى الميه ماما متعرفش عن العلقه حاجه
ماما كانت بتعمل اكل فى المطبخ و انا دخلت بشويش على اوضتى و قفلت على نفسي
لبست الفستان الجديد و عليه الجزمه اللى بكعب ...الفستان كان له كورنيش كبير ملون قعدت الف بيه و انا لابسه الجزمه لدرجة انى دخت و كنت هقع من طولى
كان نفسي اشوف شكلى و انا لابسه الفستان و الجزمه
خرجت تليفونى و صورت نفسي كام صوره سيلفى
لاحظت أن جسمى جميل اوى و متناسق جدا و شكلى فى الفستان كويس زى ما يكون راسمنى
افتكرت كلمه تلا انى لازم احب نفسي عشان الناس تحبنى
غيرت هدومى و قعدت اكلت و شبعت و لسه قايمه عشان اروح اغسل ايدى سمعت باب الشقه بيتفتح و سمعت صوت دعاء و سناء
استنيت شويه و سمعتهم و هما بيحكوا لماما انى ضربتهم و أنهم راحوا الكليه بالعافيه لأنهم مش قادرين يمشوا من العضه
ماما جن جنونها و بقت تستحلف
بس لما تيجى مقصوفة الرقبه دى ...و دينى لاوريها
بعد ما كنت هخرج تراجعت تراجع تكتيكى علشان افكر انا هعمل ايه دلوقتى 🤔
يتبع ..
#دجيهان_عادل
#قصص_وحكايات_د_جيهان_عادل.
فضلا غير مسموح نقل أو نسخ القصه إلا بعد اذن الكاتب ...
تعليقات
إرسال تعليق