#القبيحه
#الجزء_الثالث_عشر
قربت منهم حطيت الفلوس و الاكل كانت ريحته هتموتنى لدرجة انى حسيت انهم سمعوا صوت بطنى و هى بتكركر ..بس محدش فيهم قالى حتى اقعدى كلى
و جريت على اوضتى اترميت على سريري و انا بعيط
كان عندك حق يا تلا ...كان عندك حق
قعدت طول اليوم ده استناها و مجتش
مبقتش عارفه انام ...لاول مره فى حياتى احس ان حاجه عزيزه عليا اوى راحت منى
اخيرا قرب الفجر نمت و حلمت بيها
حلمت انها محبوسه فى قفص من دهب و قاعده فى ركن من أركانه حاطه وشها بين رجليها و قاعده حزينه
بصيت على رجليها لقيتها متقيده بقيد دهبى ...ناديت عليها رفعت راسها و بصت لى بعيون مليانه دموع و قالت لى
خلى بالك من نفسك يا اميمه ...متزعليش على اى حد حتى و لو كان انا ...متخافيش غير من اللى خالقك
فتحت عينى و كلمتها بترن فى ودنى و لقيت اذان الفجر بيقول الله اكبر
قمت قعدت على سريري و انا محتاره ايه القفص اللى تلا فيه دا ؟؟ و هى محبوسه بالشكل ده ليه ؟؟ و مين حابسها كدا ؟؟
حزنت اوى عليها و حسيت انى السبب فى حبستها دى معرفش ازاى
بس كلمتها فضلت تتردد جوه عقلى انى مخفش من حد الا ربى
قمت اتوضيت و صليت الصبح و طلعت الماكينه و حطيت فيها الخيط
و لقيت تلا سايبالى معاها المجلات اللى فيها التصاميم و المقاسات
عملت الفساتين اللى طلبهم منى عمرو فى اقل من ساعه واحده و كمان عملت لنفسي فستان اخترت تصميمه بنفسي و كان اجمل من الفستان الاول
طبقت فساتين عمرو و حطيتهم فى شنطتى و حطيت فستانى فى الدولاب ويدوب لسه بجيب المصحف اقرا فيه لقيت امى بتنادى زى كل يوم
قومى يا زفته الساعه بقت سابعه
و لاول مره فى حياتى ارد عليها و لقتنى بقولها
انا مش همشي دلوقتى لسه قدامى شويه
امى مصدقتش انى رديت عليها و فتحت باب الاوضه عليا
اومال هتمشي امتى يا معدوله ؟؟
همشي الساعه تسعه ( رديت و انا حاطه عينى فى المصحف من غير ما ابص لها )
و شغل ايه ده اللى بيبدأ من تسعه ؟؟ انا عارفه انك مش هتعمرى ..بس اعملى حسابك لو طردوكى زى الشغل اللى قبله مترجعيش البيت
متخافيش مش هيطردونى
و جايبه الثقه دى كلها منين يا اختى ؟؟
من عند ربنا
و الله طلع لك لسان و بقيتى تعرفى تردى
انا ليا لسان من زمان
انتى يا بت مترديش عليا كدا الكلمه بكلمتها انتى فاهمه ؟؟
حاضر
هو انتى فاكره انك عشان جبتيلى المتين ملطوش انك بتصرفى علينا و هتعملى نفسك واحده علينا و الا ايه ؟؟ لا فوقى دا انا اقطم رقبتك على صدرك
و طلعت امى بعد ما قالت الكلمتين دول و من غير ما ارفع عينى و لا ابص لها خالص
و سمعتها من بره و هى متنرفزه و عماله تتكلم عليا مع دعاء و سناء و يشتموا فيا
الساعه جت تمانيه و نص قمت جبت فستانى الجديد و لبسته و حسيت انى شكلى حلو اوى
لبست الطرحه بس كانت قديمه اوى قلت مش مهم و لبست عليها النقاب و خرجت
اول ما شافونى بالفستان جالهم ذهول و لقيتهم كلهم بيبصولى من فوق لتحت
مريت عليهم من غير ما اكلمهم ولا كلمه و خرجت من الباب
و سمعت دعاء بتقول
هى جابت الفستان ده منين ؟؟
ردت سناء انتوا مش ملاحظين انها مبقتش تعرج زى الاول ؟؟
ايوا صحيح فعلا انا اخدت بالى ...هو ايه اللى بيحصل
ردت ماما لما ترجع نشوف حكايتها ايه دى
نزلت على السلم جرى و كان جوه قلبى شعورين
شعور انى فرحانه انى لاول مره اغيظهم بالشكل ده و خليتهم ياكلوا فى روحهم بكل ادب و من غير ما اغلط
و شعور تانى بالخوف ..كنت حاسه أنهم هيفتحوا الباب و يجروا ورايا ع السلم و ياخدوا الفستان منى
بس الحمد لله ده محصلش و بقيت ماشيه فى الشارع فرحانه و حاسه ان الناس بتبص على فستانى
وصلت عند عمرو على الساعه تسعه و اول ما شافنى رحب بيا جدا
اهلا انسه اميمه
اهلا بيك استاذ عمرو
جبتى الشغل ؟؟
ايوا معايا اهو ...اتفضل
و اتفضلى انتى يا ستى ٦٠٠ جنيه اهم
ايه دا ؟ هو الفساتين اتباعت ؟
قولى اتخطفت مش اتباعت ...دا فى زبونه طلبت منى اربع حتت من الفستان ده لوحده
طب الحمد لله
قوليلى بقا تقدرى تعملى كام فستان فى اليوم
اللى تقول عليه
خلاص انا عاوز دسته الوان مختلفه
تمام بكرا يكونوا عندك باذن الله
طيب انا جهزت لك الخيوط اهى
تمام كدا
انتى فطرتى ؟
صراحه لا
يبقا خلاص لازم نفطر سوا عشان يكون عيش و ملح ؟؟
و انا موافقه
واد يا على ..روح هات لنا سندوتشات فول و طعميه وبطاطس و بتنجان من المطعم
حاضر يا بشمهندس فريره
ايه دا ؟ انت مهندس ؟؟
ايوا يا ستى انا مهندس معماري
طب و ايه اللى مقعدك هنا ؟ انا اسفه يعنى
لا متتأسفيش و لا حاجه بس انا حكايتى طويله اوى و مش عاوز ادوشك بيها بس اكيد هيجى اليوم و احكيهالك باذن الله
و انا هستناها ممكن اطلب منك طلب
اتفضلى طبعا
ممكن تساعدنى انى اشترى موبيل فى حدود الفلوس اللى معايا دى
ايوا طبعا بس ليه عاوزه موبيل ب ٦٠٠ جنيه ما تستنى كام يوم و تجيبي موبيل كويس
كويس ازاى ؟؟
يعنى الفلوس اللى معاكى دى يدوب تجيب محمول بزارير للكلام بس
طب منا عاوزاه للكلام بس
لا قصدى مش هتعرفى تدخلى عليه على النت
النت ؟؟
ايوا النت ..مالك يا بنتى انتى متعرفيش النت و الا ايه ؟
انا اسمع عنه بس عمرى ما دخلت و لا اعرف حتى بيدخلوله ازاى
يااا ...معقول ؟؟؟ تعالى انا هوريلك على موبيلى
بصى دا اسمه جوجل تقدرى تدورى فيه على اى معلومه فى الدنيا
معقول ؟؟ اى حاجه ؟؟ يعنى لو عاوزه كتاب الاقيه ؟؟
كتاب واحد ؟؟ قولى كتب
الله
و ممكن تشغلى اغانى و قران و اى برنامج عاوزه تشوفيه ...ممكن تقري فيه عن الموضه و الملابس و كل حاجه تتخيليها
الله ...دا كنز
امال انتى مش عايشه فى الدنيا و الا ايه ؟
ايوا مش عايشه
انا اسف مش قصدى ازعلك
لا ابدا انا مش زعلانه و لا حاجه لان دى الحقيقه ...خلاص انا هستنى لما نبيع الفساتين الجديده و نجيب موبيل زى بتاعك ده
و ليه نستنى انا ممكن اجيبهولك دلوقتى
هو انت مش قلت لى استنى
ههههههههه انتى غلبانه اوى ..بصى انا فى جنبى هنا واحد صاحبى فاتح محل موبيلات هنروح له و ندفع له خمسميه جنيه مقدم و لما باقى الفساتين تتباع هروح اديله الباقى
يا ريت
احلى فطار لاحلى بشمهندس فى الدنيا
شكرا يا على روح بقا هات لنا اتنين شاى نحبس بيهم
هناكل و هاخدك لعلاء صاحبى نشترى الموبيل و الخط و نشحنه و نعمل لك عليه باقه عشان تقدرى تدخلى ع النت
الف شكر ليك يا استاذ عمرو
لا شكر على واجب ...و بعدين بلاش استاذ بقا و خليها عمرو على طول و انا هقولك يا ميمو ماشي ؟؟
ميمو ؟؟؟هههههه اول مره حد يدلعنى
طيب الحمد لله أن كان ليا السبق ده
يتبع ..
#دجيهان_عادل
#قصص_وحكايات_د_جيهان_عادل.
فضلا غير مسموح نقل أو نسخ القصه إلا بعد اذن الكاتب ...
ردحذفشااابوه يا دكتور