#القبيحه
#الجزء_الرابع_عشر
لا شكر على واجب ...و بعدين بلاش استاذ بقا و خليها عمرو على طول و انا هقولك يا ميمو ماشي ؟؟
ميمو ؟؟؟هههههه اول مره حد يدلعنى
طيب الحمد لله أن كان ليا السبق ده
الشااااااى
اشربى الشاى بقا و يلا على علاء
حاضر
دخلنا المحل و عمرو كلم صاحبه على تليفون ليا ...الراجل متأخرش و جاب لى تشكيله كبيره بس انا مبفهمش فيهم قلت له
انا عاوزه تليفون زى تليفون استاذ عمرو
علاء جاب لى تليفون زى بتاع عمرو بالظبط و نفس اللون
عمرو طلب منه أنه يحط خط و يشحنه ليا
رجعنا على المحل و عمرو عرفنى ازاى افتحه و عملى ايميل على الفيس و بعت لى طلب صداقه و قبله و عرفنى أن الفيس ده ممكن ادخل فيه فى مجموعات و اكلم ناس و اصادقهم كمان
كمان نزل لى الواتس و قالى أنه هيبقى مهم فى شغلى بعد كدا
عمرو كمان ورالى ادخل لجوجل ازاى ...و ازاى اعمل بحث على اى حاجه عاوزاها
شكرت عمرو و اخدت الموبيل و انا طايره من الفرحه حاسه انى اتفتح لى نافذه على العالم اقدر اروح بيها لاى حته فى الدنيا و اتفرج على الناس و اكلمهم منها
بقيت ماشيه احلم بالناس اللى هتكلم معاهم و اللى مش هيخافوا من شكلى لأنهم ميعرفونيش
قبل ما اوصل البيت قفلت الموبيل و حطيته فى هدومى و حطيت الخيوط فى شنطتى علشان محدش ياخد باله منها
اول ما دخلت من باب البيت كانوا كلهم مستنينى حتى وليد كان قاعد فى الصاله و ساند ضهره بمخدات
دخلت من غير ما انطق بس لقيت ماما بتنادى عليا
تعالى هنا يا زفته
نعم
انتى ايه حكايتك بقا ؟؟
حكايه ايه ؟؟
تعالى وريلى الشنطه اللى معاكى دى فيها ايه ؟؟
ليه ؟ عاوزه تشوفيها ليه ؟؟
عشان اعرف مخبيه علينا ايه ؟
انا مش مخبيه عليكم حاجه
امال الفستان ده جايباه منين ؟؟؟
جبته من مديره الحضانه
ازاى بقا ؟؟ قوليلى كدا
حكيت لها انى يتيمه و معنديش حاجه ألبسها و هى ادتنى فلوس رحت اشتريته من نفس المحل اللى اشتريت منه الفستان الاولانى
يعنى رايحه تشحتى زى ما قلت
لا يا دعاء انا مبشحتش المديره ادتنى سلفه
انتى يا بت ايه ؟ مبتفهميش ؟ مش قلت لك اى فلوس تاخديها تجبيهالى ؟
انا كنت محتاجه الفستان ده علشان شكلى قدام الناس فى الشغل
يا حلاوتك يا اختى شكلك ايه يا ام شكل انتى ؟؟ هو انتى يا بت مبتبصيش فى المرايه ؟؟
لا مببصش
احسن جتك القرف فى شكلك
ماما انا عاوزه الفستان ده ...الفستان التانى اتحرق و نفسي البس فستان زى ده فى الجامعه
عينى يا حبيبتى روحى يا زفته اقلعى الفستان و هاتيه لاختك عشان تغسله مطرح ما لبستيه
و البس ايه لما اديلها فستانى ؟؟
طول عمرك يا اختى بتلبسي فساتينها انتى هتتجددى عليهم و الا ايه ؟
اه فساتينها المقطوعه الدايبه اللى هى نفسها مكنتش ترضى تلبسهم تانى
انتى مالك اتجبرتى كدا ليه يا بت ؟؟؟ كل ده عشان اشتغلتى ؟؟
هنا نطق وليد و قال
لو مش هتدى الفستان لدعاء يا ماما يبقى لا هى و لا دعاء الفستان ده يتقطع حالا
لا يا وليد انا عاوزه اروح بيه الجامعه
دا اللى قدرك عليه ربنا يا وليد ؟؟ محدش هياخد الفستان منى و لا هيتقطع زى ما بتقول
الله الله دا فعلا بقت بجحه يا ماما و بقت ترد الكلمه بكلمتها
امى سخنت من كلام وليد و سناء و دعاء بردوا مسكتوش راحت قالت و الله لاربيكى يا بنت الكلب
و دخلت جابت خرطوم الحمام و نزلت فوقى ضرب
الخرطوم لسعنى ...لقيت نفسي بصرخ و اقولها مهما تضربى مفيش حاجه من حاجتى حد هياخدها ..دا حقى انا
هنا قام وليد هو كمان و حاول يضربنى
ماما مأخدتش بالها و هى نازله فيا ضرب قامت أيدها جت فى جرح وليد
وليد صرخ و الجرح اتفتح و الدم بقا نازل زى الشلال
ماما و اخواتى البنات بقوا يصرخوا و انا دخلت على الاوضه جرى و قفلت على نفسي
سمعت امى بتقول لدعاء تنزل بسرعه توقف تاكسي على ما تلبس
و فعلا كلهم راحوا المستشفى و سابونى وسط توعدات ليا بالسواد و أنهم هيورونى اللى عمرى ما شفته فى حياتى
قلت لنفسي هيورونى ايه اكتر من اللى انا شايفاه ؟؟ هيكون فى سواد ايه اكتر من كدا ؟
دخلت المطبخ لقيت ماما عامله فراخ و محمراها و جنبها حله مكرونه تقريبا كدا كانوا لسه هيتغدوا
قمت ماسكه الفرخه وكلاها كلها و اكلت نص حله المكرونه و جنبهم طبق السلطه المعتبر... و عملت لى كوبايه شاى متينه و دخلت طلعت الماكينه
و عملت دسته الفساتين اللى عمرو طلبهم منى
و يدوب طبقتهم و حطيتهم فى الشنطه سمعت باب الشقه بيتفتح
و لقيت دعاء و سناء بس اللى داخلين و سمعتهم بيقولوا أن وليد دخل عمليات تانى و ماما هتقعد بيه و لولا الامتحانات كانوا قعدوا معاهم
بعد دقايق سمعت سناء بتصرخ
فين الاكل اللى كان هنا ؟؟؟
دخلت دعاء بسرعه و بصت لقت عضم الفرخه محطوط فى الطبق و متغطى بطبق تانى و لقت المكرونه شويه كدا ميجوش طبق و السلطه اتنسفت
اكيد المفجوعه اللى اكلتهم
اكيد ...هو فى غيرها فى البيت
دعاء و سناء دخلوا عليا الاوضه و انا نايمه و ماسكه كتاب حياه اللى كانت جايبهولى تلا الله يمسيها بالخير و حاطه رجل على رجل
انتى يا زفته اللى اكلتى الاكل ؟؟
كنت جعانه و اكلت
جعانه ايه يا مفجوعه انتى اكلتى اكلنا
ما انتوا ياما اكلتوا اكلى مفيهاش حاجه بقا لما اعملها مره
انتى فعلا بقيتى بجحه و قليلة الادب
من بعض ما عندكم
لاااا انتى عاوزه تتربى
و انتوا اللى هتربونى ؟؟
ايوا طبعا
الاتنين هجموا عليا و شدونى من شعرى ...هما كانوا دايما يضربونى و مكنتش بدافع عن نفسي ابدا كنت دايما احط اديا قدام وشي علشان الضرب ميجيش عليه لكن المره دى لقيت نفسي فيا قوه معرفش جت منين
اول ما لقيتهم مسكوا شعرى قمت جايباهم الاتنين من شعرهم و مطقشاهم فى بعض زى البيض ...
وقعوا الاتنين فوق بعض قمت نازله عليهم عضه كل واحده فيهم عضه فى مكان مقدرش اقول عليه 😂
راحوا الاتنين طلعوا يجروا زى الغنم قدامى و بقوا يصرخوا زى الجرو الصغير اللى فقد امه 😂
يتبع ..
#دجيهان_عادل
#قصص_وحكايات_د_جيهان_عادل.
فضلا غير مسموح نقل أو نسخ القصه إلا بعد اذن الكاتب ...
تعليقات
إرسال تعليق