#القبيحه
#الجزء_الثانى_عشر
خرجت من المحل و انا بتلفت حواليا ...انتى فين يا تلا ؟؟؟سبتينى ليه اول ما دخلت المحل ؟؟؟
بتتلفتى على مين ؟؟
عليكى ...كنتى فين يا تلا ؟ ازاى تسبينى كدا و تمشي ؟؟
كنت هقعد اعمل ايه ؟؟
يعنى عشان تبقى جنبى لو احتجت لك و الا حاجه ؟؟
لا انتى هايله و مش محتاجه لمساعده
انا فرحانه اوى يا تلا ...اول مره فى حياتى امسك متين جنيه بحالهم
انتى طيبه و تستاهلي كل خير ...بس قوليلى بقا هتعملى بيهم ايه ؟؟
و دا اسمه كلام ؟ هديهم لماما طبعا
نعم نعم نعم تدى ايه لماما ؟؟
هديها المتين و اقولها هجيب لك الباقى بعد كام يوم
انتى اكيد اتجننتى صح ؟؟
اتجننت ليه يعنى ؟؟ ما هى دى الطريقه الوحيده اللى هتخلى ماما و اخواتى يعاملونى كويس
مين اللى ضحك عليكى و قالك كدا ؟
انا اللى بقول ...ما هى ماما لما تلاقينى بديها الفلوس الكتير دى هتفرح و تعاملنى على الاقل كويس
غلط اللى بتقوليه ده ...عمر الفلوس ما هتخليهم يعاملوكى كويس
لا صح
طب هقولك لو فلوسك خلصت هيعاملوكى كويس برده ؟؟
مش عارفه
لا عارفه الفلوس ممكن يكون تأثيرها زى المسكن بس مش دوا فعال
مسكن مسكن انا عاوزه كدا
طب اقولك على حاجه ؟
قولى
تعالى نروح نتفرج على المحلات يمكن حاجه تعجبك و تشتريها
لا يا تلا انا عاوزه أدى لماما الفلوس كلها لأنها محتاجاها عشان الهدوم اللى اتحرقت
و الله انتى غريبه جدا
معلش يا تلا سبينى براحتى
و هتقولى لامك على الفلوس دى ايه يا ناصحه؟؟
هقولها اشتغلت فى حضانه و صاحبتها اديتنى اجرتى مقدم لما صعبت عليها
انتى حره يا اميمه بس انا مش موافقه على اللى بتعمليه ده
طب يلا يا تلا عشان نلحق نروح و نعمل الفساتين اللى طلبها عمرو
يلا بينا
روحت البيت بسرعه عشان الحق أدى لماما الفلوس و اشوف الفرحه فى عينيها
دخلت لقيتها قاعده و الظاهر اخواتى كانوا لسه راجعين من كلياتهم لأنهم كانوا قاعدين بالاسدالات السودا بتاعه ماما
انتى ايه اللى رجعك دلوقتى يا قعر الكنكه؟
خلصت شغل يا ماما
شغل ايه دا يا اختى اللى خلص؟ دا الضهر مبقلوش ساعه مأدن
اصلى اشتغلت فى حضانه و الشغل فيها بينتهى الساعه ١٢
بركه ...ياك تعمرى فيها بس
هنا نطقت سناء و قالت
و ازاى شغلوكى فى الحضانه دى ؟ مش خايفين العيال تتسرع ههههههههه
عندك حق يا سناء ...اكيد مورتلهومش وشها النحس
ايوه فعلا مشفوش شكلى
و هيدوكى كام على كدا ؟؟ و الا متفقتيش برده زى الشغلانه اللى فاتت
لا اتفقت و مديره الحضانه ادتنى جزء مقدم
صحيح ؟؟ طب هاتى ...ادتك كام ؟؟
اديتنى دول
مديت ايدى جوه جيبي و طلعت الفلوس من غير ما ابص فيهم و حطيتهم فى ايد ماما
نتشتهم بسرعه و وشها فرحان و فجأه كشرت و لقيتها بتزعق و تقول
تلاته جنيه ؟؟؟ واخده تلاته جنيه و فرحانه اوى ؟؟ مش بقولك انتى دهوله ..الله يخربيتك يا شيخه على يخربيت اليوم اللى شفتك فيه
لا لا كان معايا فلوس تانيه
فلوس كام يعنى ؟؟
كان معايا متين جنيه كمان
متين جنيه هههههه الحقى يا ماما بين بنتك اشتغلت حراميه و الا شحاته متين جنيه فى اربع ساعات ؟؟ بتشتغلى ايه يا دابه ؟؟
انا عرفت يا دعاء اكيد المديره بتخوف بيها العيال
ههههههههه عندك حق يا سناء
اسكتوا يا بنات لما اشوف الخيبه دى ودت الفلوس فين ؟؟
وديتى الفلوس فين يا داهيه اتحدفت عليا
مش عارفه كانوا فى جيبي ده
طب دورى فى الشنطه اللى معاكى دى و الا هاتى ادور انا
لا لا هدخل ادور جوه
غورى قبر يلمك
دخلت الاوضه و انا هتجنن الفلوس كانت لسه معايا و شفتها قبل ما ادخل من باب الشقه
تلا كانت نايمه على سريري و حاطه رجل على رجل
انتى يا تلا اللى عملتى كدا ؟
ايوه انا
و ليه عملتى كدا ؟؟
علشان تعرفى أن اللى كنتى هتعمليه غلط ...انا وريتك الحقيقه بعنيكى
من فضلك يا تلا هاتى الفلوس و متدخليش فى حياتى بالشكل ده
بقا كدا ؟؟؟ انا بتدخل فى حياتك ؟؟ انا كان غرضى مصلحتك مش اكتر بس خلاص مدام انتى مضايقه منى انا اسفه يا بنت الحلال ...انا معدش ليا دعوه بيكى نهائى و لا هتشوفى وشي ابدا ...فلوسك اهى
لا انا مقصدش كدا
عارفه انك متقصديش بس انا كنت عاوزه أعلمك الحياه ماشيه ازاى و الحمد لله انى حطيت رجلك على اول الطريق ...كملى لوحدك بقا ..المكنه هديه منى مش هسحبها بس خلاص انا معدش ليا وجود فى حياتك مره تانيه
استنى يا تلا ....يا تلا ...يا ت...
و اختفت تلا و حسيت أن الدنيا اسودت فى عينى تانى ...ايه اللى خلانى اقولها كدا و هى غرضها مصلحتى ؟؟
انا عمرى ما شفت منها حاجه وحشه
ليه بنيجى على الناس اللى بتحبنا و تدعمنا و نبقى زى العمى منعرفش قيمتهم الا اما يختفوا من حياتنا ؟؟
ارجعى يا تلا انا محتاجاكى ....طب مين هيتكلم معايا فى وحدتى دى ؟ مين هيجيب لى المجلات اللى فيها التصاميم ؟؟ مين هيجيب لى الكتب اللى هقراها ؟؟ مين هيجيب لى اكل ؟؟ انا جعانه يا تلا ...
قعدت جنب الشباك و مش مصدقه انى مش هشوفها تانى و قعدت اقول لنفسي اكيد مش ههون عليها و اكيد بتهزر معايا و هترجع دلوقتى
استنيت ساعتين و هى مجتش ...
كنت حاسه بجوع شديد اوى و سمعتهم بيتغدوا بره فى الصاله
قلت فرصه كويسه انى أدى لماما الفلوس يمكن تقولى اقعد اكل معاهم
طلعت من الاوضه و لقيتهم حاطين لحمه و لوبيا و رز و سلطه و قاعدين ياكلوا كلهم ما عدا وليد كان فى اوضته
ماما
عاوزه ايه يا زفته
انا لقيت الفلوس
طب حطيهم على التربيزه و امشي
قربت منهم حطيت الفلوس و الاكل كانت ريحته هتموتنى لدرجة انى حسيت انهم سمعوا صوت بطنى و هى بتكركر ..بس محدش فيهم قالى حتى اقعدى كلى
و جريت على اوضتى اترميت على سريري و انا بعيط
كان عندك حق يا تلا ...كان عندك حق
يتبع ..
#دجيهان_عادل
#قصص_وحكايات_د_جيهان_عادل.
فضلا غير مسموح نقل أو نسخ القصه إلا بعد اذن الكاتب ...
تعليقات
إرسال تعليق