ابو رجل مسلوخه الجزء الاول

#ابو_رجل_مسلوخه

#الجزء_الاول

سلام عليكم يا اخوانا ...انا عاوز احكيلكم حكايتى بس متأخذونيش انا مبعرفش اذوق الكلام انا فلاح ابن فلاح و هحيلكم عن حكايات قديمه و اللى كتير منكم ميعرفهاش بحكم  السن الصغير و التقدم اللى حاصل فى كل حاجه و الكهربا اللى بقت منوره كل حته و العمار اللى ملى الدنيا  

 المهم انا أسمى سعد من قريه المفتى مركز ميت غمر محافظة الدقهليه 

عاوز احكيلكم عن عيلتى زمان و اللى كان بيحصل زمان 

الاول احنا كنا اسره مكونه من الاب عبدالحميد الحداد و الام نرجس و اربع اخوات محسوبكم أكبرهم و اسامه أصغر منى بسنه و عزيزه اصغر بسنتين و اخر العنقود ثريا أصغر منى بخمس سنين 

زمان من يجى حوالى ستين سنه كانت الحياه ابسط من كدا بكتير ، كانت اكتر حاجه تهم الناس هى لقمة العيش و ازاى كل مسؤل عن اسره يوفر لها القوت الضرورى اللى يعيش أسرته دى 

أما الصحه بقا فكانت بعافيه شويه ، كان لسه مفيش الوعى بتاع دلوقتى و لا الدكاتره الكتير اللى بنشوفهم حاليا و كانت أقرب مستشفى حكومى اللى كانت فى المركز و دى كنا يا اما نركب لها بقرشين و طبعا دا بيمثل عبء على المسؤل عن الاسره أو نمشي حوالى ١٥ كيلو نبدأ فيهم من قبل صلاة الفجر و نوصل بعد اذان الضهر 

حكايات كتير و مواويل اكتر بس انا اخترت انى ابدء لكم الحكايه من و انا عمرى ٨ سنين 

كلكم طبعا تسمعوا على ابو رجل مسلوخه و أمنا الغوله و مفيش بيت فيكى يا مصر إلا و عارف انها كان وسيله لتخويف العيال الصغيره علشان يسمعوا الكلام أو يناموا أو يكتبوا الواجب 

امى الله يرحمها برده كانت دايما تهددنا أننا لو منمناش بدرى هيجيلنا ابو رجل مسلوخه أو امنا الغوله اللى فارده شعورها على شط الترعه و قاعده مستنيانا 

و بحكم أننا فى ارياف و كانت الكهربا لسه مدخلتش البلد كنا ننام بعد العشا على طول 

امى كانت تعشينا  بعد ما نيجى من الغيط عيش شعير و جبنه قريش من الحصيره و بطاطس مفعوصه و كنا ننام شاكرين حامدين ربنا علشان هنقوم من بدرى نروح الغيط مره تانيه

ابويا كان يصحى قبل الفجر بساعه و كان يملى جيوبه عيش من المشنه و يمشي يرمى لكلاب السكك لحد ما يوصل المسجد 

الكلاب كانت بتفضل مستنياه لحد ما يخرج و توصله لحد البيت 

فى يوم من الايام كنت شارى حلاوه من (حامد بتاع بره ) هو كان مسمى نفسه كدا علشان ال يعنى حاجاته بيجيبها من البندر و كدا ،😂

المهم الواد اسامه اخويا سرق منى الحلاوه اللى مدبق تمنها بقالى كام شهر ...منا ابويا كان غلبان بيدينى قرش كل فين و فين 

المهم الواد اسامه ده كان دايما طماع بيطمع فى حاجتى و مبيرضاش يدينى حاجه ابدا من اللى معاه 

قعدت اعيط امى شافتنى و عرفت الحكايه راحت مطبطبه عليا ووشوشتنى فى ودنى و قالت لى هبقى اديك قرش تجيب بيه حلاوه من حامد بتاع بره 

لا يا اما الحلاوه دى بتلات قروش و ابنك المفجوع اكلها منى و مخلليش و لا واحده 

خلاص يا سعد متزعلش بكرا تروح لخالتك شاكره تبيع لها عشر بيضات و كوزين زبده و تجيب لى الفلوس اديك اللى انت عاوزه 

و انا مالى يا اما ...اروح لشاكره ليه انا ؟؟؟؟ ما تبعتى عزيزه اختى 

يا واد عزيزه صغيره ممكن تكسر البيض او توقع الزبده 

صغيره ايه ؟؟ دى عندها ٧ سنين و انا اكبر منها بسنتين بس 

خلاص يا سعد هروح انا و اجيب لك الحلاوه اللى عاوزها بس متزعلش 

لا انا اللى عاوز اشترى 

حاضر قوم بقا اربط الجاموسه لتسهينا و تخرج و ابوك يجى يطين عيشتنا 

حاضر قايم اهو بس لو ضحكتى عليا مش هكلمك تانى 

عيب عليك يا واد من امتى ضحكت عليك ؟

نعم يا اختى ..كتير متعديش

يووه جتك ايه واد ...طب يلا بقا علشان تلحق تخلص اللى وراك و تنام 

لا مش جايلى نوم 

لا يا سعد اللى زيك لازم ينام احسن ابو رجل مسلوخه بيبقى قاعد و مستنى على الباب اول ما يشوف عيل زيك صاحى بيدخل عليه 

بيدخل يعمله ايه يعنى ؟؟انا مبخفش يا اما 

اسكت متقولش كدا ليكون سامعك دلوقتى و يجى ياكلك 

ياكلنى ؟؟؟

ايوا امال انت فاكره هيهزر معاك و الا ايه ؟؟ 

خلاص يا اما رايح اهو و بعدها هدخل انام 

تانى يوم امى راحت لشاكره و باعت لها البيض و الزبده و خدت منها الفلوس 

تعالى يا واد يا سعد خد قرشين اهم و هات الحلاوه اللى كنت عاوزها

و انا يا اما ...عاوز قرشين كمان زى سعد 

قرشين فى عينك انت ياض مش نتشت منى الحلاوه بتاعتى امبارح ؟؟ قرشين ايه اللى عاوزهم جك حش وسطك 

عاجبك يا اما الكلام اللى بيقوله سعد ده ؟؟

انت غلطان يا اسامه بتاخد الحلاوه بتاعه اخوك ليه ؟؟

منا كان نفسي فيها يا اما 

تقوم تاخدها و تأكلها كلها ؟؟ 

اعمل ايه خفت سعد ياخدها منى تانى حطيتها كلها فى حنكى 

يبقى خلاص ملكش قروش تانى مدام عملت كدا 

لا مليش دعوه انا عاوز قرش عااااا 

اخرص ياض بقا و بطل زن هروح لحامد اجيب لى بقرش و انت بقرش 

لا انا عاوز امسك القرش بتاعى و اروح اشترى من حامد بتاع بره 

خلاص يا اما اديله قرش و انا قرش 

طول عمرك حنين يا سعد يا ابنى

ياك يطمر فى ابنك يا نرجس 

اختشى يا واد و متنساش تسيب حتة حلاوه لعزيزه اختك 

كمان ؟؟ طب ما تجيبي قرش اجيب بيه حلاوه لعزيزه 

لا لا اسكت دا ابوك لو عرف انى اديتكم قرشين ممكن أطلق فيها دى ..يلا روحوا جيبوا الحلاوه قبل ما يرجع 

حاضر يا اما 

اخدت اسامه و رحت لمحل حامد و اللى كان بالنسبالنا و لا اجدعها هيبر  و الا سوبر ماركت حاليا

كان له ريحه مميزه كدا و كان مليان بما لذ و طاب من قطع الهريسه و البسبوسه و المشبك ، كمان كان بيبيع برغوت الست و المصاصه  ام ايد طويله اللى كنا ساعات نلاقى جواها قرش 

كمان كان بيبيع لبان و غوايش بلاستيك ملونه و حلقان للبنات و كافة شئ 

كنت كل ما اروح الاقى بنت او بنتين واقفين يشتروا منه و يفاصلوا معاه 

حامد كان راجل فى الأربعينات كان شعره منحول من قدام و كان بيتحايل على الصلع اللى عنده بتطويل شعرتين من الجنب ده و شعرتين من الجنب ده و فردهم فوق صلعته اللى بتلمع جدا من تحت الشعر 

حامد كمان كان له شنب صغير رفيع ملوش ريحة اللازمه و كان فاكر أن شنبه ده عامل شغل مع الستات مع انى ياما سمعت البنات على الترعه بيتريقوا عليه و على شنبه اللى شبه شنب صرصار دكر 😂

أما صوت عم حامد بقا مش عارف اوصفه لكم تقريبا كدا شبه صوت صرصور الغيط رفيع و حاد جدا مبيوطيش صوته ده الا لما يجى يتكلم مع حرمه اما احنا فبيخرم ودانا بصوته 

عم حامد عم حامد 

عاوز ايه يا واد يا ابن عبدالحميد 

عاوز بقرش حلاوه ليا وبقرش حلاوه لاخويا 

ملكش دعوه انت يا سعد انا اللى هشترى ..انا مش عاوز حلاوه زى بتاعتك 

امال عاوز ايه يا واد ؟؟ 

عاوز مصاصه من اللى بتكسب 

لا احنا متفقناش على كدا 

و انت مالك يا سعد ..خايف لاكسب قرش تانى ؟؟ 

انا خايف ؟ اش حال انى انا اللى مديك القرش بتاعى و امك مكنتش هتديك ...على العموم انت حر 

هات يا عم حامد الحلاوه و هات للواد اسامه المصاصه 

طب هاتوا الفلوس الاول 

ما احنا ناولنهالك لما كانت الست واقفه بتجيب صابون 

لا مدتونيش حاجه 

و الله العظيم ادينهالك 

امشى يا حرامى انت و هو و دينى لاقول لابوكم انكم جايين تنصبوا عليا 

لا لا متقولش لابونا ...احنا هنمشي 

و مشينا من قدام حامد و احنا بنسب و نلعن فيه 

ايه يا سعد انت خفت منه ليه ؟؟ هو احنا صحيح حراميه و الا ايه ؟؟ 

انت مش واخد بالك أن امك مديانا الفلوس من ورا ابوك و لو عرف هيطين عيشتها و عيشتنا 

اه صحيح بس انا متغاظ اوى من اللى اسمه حامد ده و لازم ارجع حقى 

هتعمل ايه يا فالح 

هقولك انا .....

يتبع ..

#دجيهان_عادل

#قصص_وحكايات_د_جيهان_عادل.

فضلا غير مسموح نقل أو نسخ القصه إلا بعد اذن الكاتب ...