#ابن_عمرى(قصه_حقيقيه)
#الجزء_الاول
احب اعرفكم بنفسي انا فرحه اللى عمرى ما عرفت طعم الفرحه بحكيلكم بدموعى عن ابن عمرى
هحكيلكم من البدايه
اسمى فرحه عندى ٤٠ سنه اتجوزت فوزى جوزى و انا عندى ١٧ سنه يعنى من حوالى ٢٣ سنه
بنت غلبانه يتيمه اب و ام ....ابويا مات الاول و انا عندى سنتين و بعده بسبع سنين امى ماتت و سابتنى.
و للاسف ابويا مكنش حيلته اى حاجه اورثها عشان كدا اتذليت بحق 😔
جوازى من فوزى كان هروب من مرات عمى اللى كانت بتعاملنى اسوء ما كانت بتعامل الخدامين
اول عريس جالى رمونى له من غير حتى ما يسألوا عنه زي ما يكون ما صدقوا يخلصوا منى
انا فاكره لما فوزى جه لعمى يطلبنى منه و لقيت مرات عمى داخله على فى المطبخ فرحانه
تعالى يا فرحه
نعم يا مرات عم
تعالى يلا البسي حاجه غير الجلابيه المقطعه اللى انتى لابساها دى
ليه يا مرات عمى ...انا لسه قدامى غسيل مواعين و طبيخ
يا بت بقولك تعالى البسيلك حاجه عدله كدا و سيبي اللى فى ايدك ده دلوقتى
طب فهمينى بس فى ايه ؟
جايلك عريس يا بت ..افرحى يا بت هنخلص منك
و دا شافنى فين؟
لا هو مشفكيش دا قريب خالتك ام حسين جارتنا و كانت أمه بتتكلم معاها و بتقولها عاوزين عروسه غلبانه و على ادها كدا...فخالتك ام حسين فكرت فيكى على طول
و مين قالك انى عاوزه اتجوز يا مرات عمى انا لسه صغيره
نعم يا روح امك صغيره دا ايه ؟ ليه فاكره نفسك نغه ؟ يلا يا اختى انا مش هفضل طول عمرى مستحملاكى كفايه لحد كدا ..... اللى زيك يا حبيبتى فاتحين بيوت دلوقتى و عندهم عيال
طب ما هاديه اهيه اكبر منى بسنتين و مش متجوزه
نعم يا اختى ؟؟ انتى هتقارنى نفسك بهاديه بنتى ؟؟ بنتى يا حبيبتى فى الكليه و هتبقى محاميه اد الدنيا مش زيك ممعهاش شهاده
ما انتوا اللى خرجتونى من التعليم يا مرات عمى و انا كنت شاطره و كان نفسي اكمل تعليمى
ما خلاص يا اختى يعنى كنتى هتطلعى ايه يعنى ؟ مسيرك برده لبيتك و لجوزك و بعدين يا حبيبتى احمدى ربنا انى فتحت لك بيتى و قعدتك معايا واحده غيري كانت ودتك دار ايتام
فعلا كتر خيرك يا مرات عمى
طب يلا يا اختى دقيقتين اتنين تكونى لابسه و جايبه الحاجه الساقعه و داخله ع الجدع و امه
مرات عمى قالت الكلمتين و خرجت و انا كنت هموت من القهره ...طول عمرها بتعاملنى وحش من يوم ما امى ماتت و انا زى ما يكون ضرتها مش عيله عندها ٩ سنين
حتى التعليم مرضيتش انى اكمل اخدت الاعداديه بالعافيه مع انى كنت شاطره و كان نفسي اكمل تعليمى بس هى دايما كانت تشتكى لعمى انى بتحجج بالمذاكره و مبساعدهاش فى شغل البيت مع أن ربنا اعلم انى كنت بعملها كل حاجه من كنس و طبخ و غسيل و مسح و مشاوير للسوق
قعدت تزن على دماغ عمى و تقوله مش كفايه مقسمانا فى اللقمه لما عمى فى النهايه قعدنى و قالى كفايه عليكى كدا
مكنش بيحن عليا فى البيت كله الا جمال ابن عمى ...كان دايما يطبطب عليا و يدينى من الاكل بتاعه بعد ما يخبيه علشان كان بيشوف امه بتعاملنى ازاى و بتحرمنى من الاكل الحلو ..و بتدينى بواقى الاكل و يوم ما كانت تتعطف عليا كانت تدينى راس الفرخه أو جناحها
كان جمال اكبر منى بخمس سنين و كانت له اخت كمان اسمها هاديه مكنتش اسم على مسمى خالص ...كانت دايما تقوم عليا و تخطف اى حاجه من اديا ...كانت تكسر الحاجه و تقول انى انا اللى كسرتها و كنت احلف مهما احلف مفيش حد يصدقنى و كنت اضرب من عمى أو مراته ضرب صعب اوى زى ما يكونوا ماسكين واحد حرامى و بيضربوه بكل غل ...و كانت دايما بنت عمى دى بعد كل عمله من عمايلها تطلعلى لسانها و تغيظ فيا
الوحيد اللى كان بيعطف على زي ما قلت جمال ...و من كتر معاملته الحلوه ليا حبيته ....حبيته اكتر من نفسي و كنت اتمنى اتجوزه ..متخيلتش نفسي الا مراته هو و بس
لما جمال نجح فى الثانويه العامه جاب مجموع كبير اوى يدخله كليه الطب ...فرحت اوى له بس حسيت انى هبقى قليله عليه اوى ...هو هيبقى دكتور و انا معايا الاعداديه ...طبعا اكيد مش هيبص لى
لكن نظراته ليا كانت بتقول غير كدا ...قلبى كان حاسس أنه بيحبنى زى منا بحبه
مش ممكن معاملته ليا دى تكون كدا لله ...اكيد بيحبنى
دائما كان يدافع عنى لما امه تضربنى و كان يقولها حرام عليكى يا ماما و يتخانق معاها عشانى
كان هو أكبر داعم ليا فى البيت و كنت بستحمل كتير عشانه ...مرات كتير فكرت انى اهرب من البيت لكن وجوده كان بيخلينى أتراجع و كنت اقول مش هلاقى حد يحبنى زيه
علشان كدا لما مرات عمى قالت لى على فوزى مكنتش عاوزاه من غير حتى ما اشوفه و لا اعرف عنه حاجه
بس ما باليد حيله مقدرش اقولها لأ ...
قلت فى نفسي اكيد هلاقى فى العريس ده عيب و ارفضه ما هو الجواز مش بالعافيه .
و اكيد لما جمال يجى من الكليه هيرفضه و هيقف جنبى و مش بعيد حكايه العريس دى تخليه ينطق و يقول لابوه أنه عاوز يتجوزنى و بكدا تبقى اتحلت كل مشاكلى و افرح الفرح اللى معرفتوش فى حياتى.
رحت لبست جلابيه نضيفه اى نعم قديمه من بتوع بنتها اللى كانت بتتصدق عليا بيهم ...بس افضل برده من المقطعه اللى كنت لابساها
حضرت الحاجه الساقعه لأربع انفار عمى و مراته و العريس و امه و دخلت عليهم
اول ما شفت العريس ....
عاوزين تعرفوا ايه حصلى لما دخلت بالحاجه الساقعه استنونى فى الجزء التانى هقولكم
يتبع .....
#قصص_وحكايات_د_جيهان_عادل.
#ابن_عمرى(قصه_حقيقيه)
#الجزء_الثانى
رحت لبست جلابيه نضيفه اى نعم قديمه من بتوع بنتها اللى كانت بتتصدق عليا بيهم ...بس افضل برده من المقطعه اللى كنت لابساها
حضرت الحاجه الساقعه لأربع انفار عمى و مراته و العريس و امه و دخلت عليهم
اول ما شفت العريس لقيته اسمرانى و قصير و تخين و قاعد جنب امه مبينطقش
امه عماله تتكلم و تقول ابنى عنده شقته ملكه اوضتين و صاله و هنجيب حاجات على ادنا ...و عارفين أن البت يتيمه و مش هنكلفكم حاجه- لو فى قبول يعنى-
و مرات عمى تقول يا مرحب ...انتوا فوق راسنا ...دا احنا نوديهالكم لحد البيت
اول ما دخلت الست قالت لى تعالى يا فرحه اقعدى جنبى
رحت قعدت جنبها فضلت تجيبنى من فوق لتحت و تقولى فوزى ابنى طيب و غلبان و أن شاء الله هتستريحى معاه
و انا حاطه وشي فى الارض و ساكته ...كان نفسي اقولها و لا عاوزاكى و لا عاوزه ابنك بس كنت خايفه من عمى
الست عرضت عرضها و قالت هنجيب الشبكه بوتاجاز و تلاجه و غساله و طبعا مرات عمى فرحت اوى عشان متغرمش إلا شويه الرفايع البساط كام حله على كام طبق و شويه كوبايات و معالق و خلاص
انتهت القعده و العريس مسمعتش صوته و لا عرفت هو بيشتغل ايه اصلا
بعد ما مشيوا لقيت مرات عمى بتقول لعمى عريس حلو و باين عليه هادى و احلى حاجه فيه أنه مش هيكلفنا ...انا كنت حامله هم جواز البت دى اوى
و عمى موافقها على كلامها و بيقولوا ايوه عندك حق ...ربنا اعلم بينا و بمصاريفنا ...جمال كليته بتاخد فلوس كتير اوى مننا و كمان لسه هاديه عاوزه جهاز اد كدا
انا كنت بسمع كل الكلام ده و انا واقفه فى المطبخ و كأنهم بيتكلموا عن حد تانى ....محاولوش حتى يسالونى رايى ايه ...زى ما يكون موافقتى شئ مسلم بيه أو تحصيل حاصل
بقيت هموت ...نفسي أخرج اقولهم حرام عليكم انتوا ليه بتتعاملوا معايا انى بهيمه ملهاش رأى ...بس خفت ..خفت اوى عمى ايده تقيله و اكيد هيضربنى .
فكرت انى استنجد بجمال هو اللى دايما يدافع عنى
استنيته و كان جمال مبيجيش الا كل خميس لان كليته فى المدينه و كان ساكن فى بيت الطلبه ...و للصدفه الحلوه كان ده ميعاد رجوعه الاسبوعى و عشان كدا كنت واقفه قبل ما يجوا اعمله الاكل اللى بيحبه.
لما جه جمال كنت حاسه أنه المنقذ اللى هينقذنى منهم ، كنت فاكره أنه هيقول لابوه أن بنت عمى مش عاوزه العريس ده ، متغصبوهاش على حاجه ، كنت عامله زى الغرقانه و مستنيه طوق النجاه اللى هينقذنى منهم
طبعا بعد دخوله و ترحيب البيت كله بيه و سلامه على الجميع ...مرات عمى طلبت منى احضرله الاكل
رحت حضرت الاكل ...اكل و قال أنا هطلع انام ....المشوار هد حيلى و طلع ينام فى اوضته اللى فى الدور التانى
استنيت لما البيت كله نام و طلعت خبطت عليه
لقيته لسه منامش و قاعد ماسك كتاب من كتبه فى ايده
ايوه يا فرحه فى حاجه ؟
انت لسه منمتش يا دكتور ؟
و الله كنت عاوز انام بس افتكرت معلومه كدا قلت اتاكد منها مسكت الكتاب و الوقت اخدنى ....كنتى عاوزه حاجه ؟
ايوه كنت عاوزاك فى موضوع مهم اوى يا دكتور
اتفضلى كلى اذان صاغيه
انت عرفت انى جالى عريس انهارده ؟
اه...... لف مبروك ماما قالت لى و انا بتعشى
الف مبروك ؟؟؟ كنت فاكراك هتزعل لما تعرف
و ازعل ليه يا فرحه ...انا افرحلك أن ربنا هيرزقك بابن الحلال
ابن حلال ايه بس يا جمال ؟ انا مش عاوزه اتجوز
ليه يا بنتى مدام كويس اتكلى على الله
انا كنت فاكره ....
فاكره ايه ؟ اتكلمى على طول
كنت فاكره انك مش هتوافق على الجوازه دى
و ايه اللى يخلينى ارفض يعنى ؟؟ لو كويس ليه لأ
انا معرفش كويس و الا لا بس انا مش عاوزاه ...انا عاوزه حد تانى
حد تانى مين ؟
حد أحبه و يحبنى ...حد بيعطف عليا و يطبطب عليا ...حد بيفضلنى عن نفسه و بيدينى اكله .
اااه فهمت ...بصى يا فرحهانا عاوز افهمك حاجه... انا لما بتعامل معاكى كدا دا عشان انتى بنت عمى يعنى زى هاديه اختى بالظبط ...كمان حكايه انك يتيمه دى مخليانى اشفق عليكى شويه و مكنش بيعجبنى تصرفات ماما معاكى و عشان كدا كنت دايما أدافع عنك .....بس هى دى كل الحكايه
تشفق عليا ؟؟ يعنى انت مبتحبنيش ؟
انا بحبك زى اختى الصغيره و بعدين معلش يا فرحه انا لما افكر اتجوز هاخد دكتوره زميلتى مش هتجوز واحده ممعهاش شهاده
هو قالى كدا و مسكت دموعى بالعافيه و قلت له انا اسفه انى ازعجتك و خرجت بسرعه قبل ما انفجر من العياط
نزلت تحت و كانت مرات عمى بتنيمنى فى اوضه بتخزن فيها شكاير الرز و الغله
نزلت قعدت اعيط و اندب حظى فكرت انى انتحر اه و الله ما هو الشخص الوحيد اللى كنت فاكراه بيحبنى طلع بيشفق عليا ...و قالى أنه ساعه ما يفكر يتجوز مش هيتجوزنى
فكرت انى اخد بعضى و امشي من البيت خالص بس هروح فين ؟ انا معرفش اى حد ...خفت
فضلت افكر طول الليل لحد ما هدانى تفكيرى انى اقبل بالعريس و خلاص منا كدا كدا ميته ...على الأقل اخلص من المعامله السيئه اللى بتعاملهالى مرات عمى و يكون لى بيت خاص بيا
تانى يوم قمت عنيا وارمه من العياط لما مرات عمى سالتنى قلت لها نمله قرصتنى فى عينى و هى مهتمتش طبعا ...
بس فرحت اوى لما قلت لها انى موافقه على العريس
بقت تبوس فيا و دى كانت اول مره فى حياتى تعمل كدا
بعد كدا كل حاجه حصلت بسرعه يعنى اتجوزت خلال شهر ...شفت فيهم فوزى مرتين اى نعم شكله مكنش عاجبنى بس فى المجمل كان راجل طيب و على الأقل مش هيذلنى زى منا مذلوله ( دا اللى كنت متخيلاه )
اتجوزت فوزى و لقيته انسان عديم الشخصيه من اول يوم ملوش رأى فى اى حاجه ....اى حاجه اطلبها منه أو تحصل ما بينى و بينه الاقى امه و اخواته عارفينها
مش هنسي اول مره اطلب منه انى اجيب باذنجان عشان اعمله محشي ...هتقولولى و ليه تطلبى منه ما تنزلى تجيبي على طول هقولكم انى كان ممنوع امسك جنيه فى ايدى و ممنوع كمان يبقى معايا مفتاح للشقه بتاعتى
عارفه انكم مش هتصدقونى بس اللى متعرفهوش كمان أن والدته كان معاها مفتاح لشقتى ...اه و الله زى ما بقولكم كدا ...كنت لسه عروسه جديده و قاعده فى اوضتى على راحتى شويه لقيت امه بتفتح باب الأوضه و دخلت عليا
انا اتخضيت جدا و مكنتش متخيله أن ده ممكن يحصل
لما جوزى جه و اشتكيت له بص لى بكل تناحه و قالى :
و ماله ما هى زى امك برده
زى امى مقولتش حاجه بس دا ميصحش يا فوزى ...المفروض على الأقل تخبط
دى امى و تيجى وقت ما هى عاوزه و تدخل وقت ما هى عاوزه و مش عاوز كلام فى الموضوع ده تانى
للاسف مكنش بيستقوى الا عليا 😔
اكملكم حكايه الباذنجان لما طلبته منه قالى حاضر و جاب لى كيسه كبيره
فرحت و جيت افتح الكيس لقيت الباذنجان اللى جواه معفن ...عليه عفن ابيض
ايه دا يا فوزى ؟؟ انت شارى البتنجان ده منين ؟
هكون شاريه منين يعنى ؟
البتنجان معفن اكيد الست ضحكت عليك و نقت لك المعفن
لا ..محدش ضحك عليا
اومال ؟؟ انت اللى منقى دا ؟
لا انا جبتهولك من تلاجه امى
ااااه ...امك
و خدوا بقا من دا كتير
نسيت اقولكم فوزى جوزى دا كان بيشتغل ايه و جاب الشقه دى ازاى
اولا فوزى اكبر منى بحوالى ١٥ سنه كان بيشتغل عامل فى مصنع و بعد كدا جت له سفريه السعوديه سافر و عمل قرش اشترى منه الشقه بتاعتنا ....
بعد كدا استغنوا عنه لأنه عمل غلطه بس مرضيش يقولى عمل ايه
نزل مصر و بدأ يشتغل اى حاجه ....عامل باليوميه فى اى شغلانه أو مصنع
للاسف معرفتش الكلام ده الا بعد الجواز ( و حتى لو كنت عرفته قبل الجواز كنت هعمل ايه يعنى )
طبعا الايام كانت بتمر تقيله ...الفلوس ع الاد اوى و يدوب بيجيب الحاجات الضروريه
لغايه ما فى يوم حسيت انى دايخه و تعبانه شويه ....و كان هو قاعد فى اليوم ده فى البيت ما هو كان يشتغل يوم و يبطل عشره ...اخدنى و رحنا المستشفى و هناك عرفت انى حامل
مش عارفه اوصفلكم احساسي لما لقيت نفسي حامل شعور بالفرحه و فى نفس الوقت بالخوف الشديد
فرحت لأن اخيرا هيكون ليا حد من دمى اخاف عليه و يخاف عليا ...حته منى هحضنه و اخده بين ايديا ....ياااا انا محتاجه الحضن ده اوى
خوفى بقا من الحاله اللى انا فيها و جوزى الخايب ده ...ازاى هيبقى مسؤل عن طفل زى ده ؟ و ازاى هيوفر له حاجاته الاساسيه ؟
جوزى لما عرف بحملى الصراحه فرح و اخدنى و روحنا لامه و اخواته عشان يفرحهم .
طبعا لما روحت قعدت أقوله أن خلاص جايلنا طفل و لازم يشد حيله فى الشغل شويه عشان خاطره و يبطل يقعد كدا من غير شغل
و هو قعد يهز لى دماغه كأنه فاهم
بعد الكلام ده بأسبوع حصل اللى لا كان على بال و لا على خاطر 😔
عاوزين تعرفوا حصل ايه ؟ انتظرونى فى الجزء الثالث بمشيئه الله تعالى
يتبع .....
#قصص_وحكايات_د_جيهان_عادل.
#ابن_عمرى(قصه_حقيقيه)
#الجزء_الثالث
جوزى لما عرف بحملى الصراحه فرح و اخدنى و روحنا لامه و اخواته عشان يفرحهم .
طبعا لما روحت قعدت أقوله أن خلاص جايلنا طفل و لازم يشد حيله فى الشغل شويه عشان خاطره و يبطل يقعد كدا من غير شغل
و هو قعد يهز لى دماغه كأنه فاهم
بعد الكلام ده بأسبوع حصل اللى لا كان على بال و لا على خاطر 😔
قومى يافرحه لمى هدومك كلها متخليش حاجه
ليه فى ايه يا فوزى ؟؟
قومى بس هنسيب الشقه
ليه ايه اللى حصل ؟؟
هفهمك بعدين بس يلا
قمت لميت كل الهدوم بتاعتى و بتاعته و اخدنى و رحنا عند أمه
فهمنى يا فوزى انت خرجتنا من شقتنا ليه ؟؟
بصى يا فرحه انا فكرت فى كلامك و لقيت أن فعلا معدش ينفع اقعد كدا كتير من غير شغل ...انا لازم اعمل مستقبل لابننا أو بنتنا اللى جايه
حلو اوى يا فوزى ..انت كدا ابتديت تفكر صح ...طب و ايه علاقه اللى بتقولوا دا و أننا نسيب شقتنا
منا خلاص بعت الشقه عشان اخد فلوسها اعمل بيها مشروع
ايه بعت الشقه ازاى ؟؟ طب و حاجتى اللى فيها ؟ و هنقعد فين ؟؟
بعتها بالحاجه اللى فيها منا محتاج راس مال محترم عشان انفذ المشروع اللى فى دماغى ...و متخافيش هجيب لك شقه اكبر منها بإذن الله
و هنقعد فين على ما تجيب الشقه اللى بتقول عليها
هنا مع امى و اخواتى
انت بتقول ايه ؟؟ هنقعد فين هنا ؟؟
البيت واسع و هناخد لنا اوضه هنا احنا مش محتاجين اكتر من كدا فى الوقت الحالى
هنا دخلت امه فى الكلام
مالك يا سنيوره ؟؟ مش عاجبك البيت و الا ايه ؟؟
لا ابدا انا مقلتش حاجه ...بس كنت بستفهم بس
و اهو الجدع فهمك اهو و قالك على اللى فى دماغه و انتى بقا من واجبك لو بنت اصول يعنى تساعديه و تقفى فى ضهره مش تقطميه .
انا مقطمتوش و لا حاجه يا ماما ...دا مجرد سؤال و بس
طبعا معرفتش ارد عليها و لا اعمل اى حاجه ...لو غضبت و رحت لعمى مش هينصفنى و لا هيجيب لى حقى
سلمت امرى لربى و صبرت نفسي أنه هيشتغل و يحسن وضعنا و يجيب لى شقه اكبر زى ما وعدنى
وبكدا بدأ فصل جديد من العذاب ...اتحملت فوق اللى يتحمله بشر معامله سيىئه جدا من امه و اخواته البنات كأنهم اشتروا خدامه ...بالعكس الخدامه بتاخد أجرة خدمتها لكن أنا لأ
حماتى و بناتها كانوا بيتفننوا فى مضايقتى و لما كنت اتضايق أو اعترض كانت حماتى تقولى
اسم الله عليكى جايبينك من بيت العز و الهنا ...ما انتى طول عمرك خدامه عند عمك و مراته
لما كنت اشتكى لجوزى أو اتخانق معاه على الوضع اللى حطنا فيه ده كان يقولى اعلى ما فى خيلك اركبيه و لو عندك راجل خليه يجى يتكلم معايا
كنت اسكت و اعيط منا كذا مره اشتكى لعمى و يقولى عيشي و خلاص معندناش بنات تطلق
يا ما امه عايرتنى انى مقطوعه و انى يتيمه ام و اب
كانت دايما كاسره نفسي الله يسامحها بقا
بقت تصحينى من بدرى انضف البيت و اعمل الفطار و اغسل المواعين و بناتها نايمين لحد الضهر ...و كنت لو فى مره تعبت و قلت لها خلى واحده فيهم تساعدنى كانت تقول دول ضيوف و ماشيين يا حبيبتى
كنت بخدمهم و ياريتهم كان بيعجبهم ....كانوا دايما يعيبوا على اكلى و على غسيل المواعين و على تنضيفى للبيت
قلت استحمل لحد ما جوزى ينفذ اللى وعدنى بيه
خلفت ابنى تامر و قلت خلاص انا افرح بابنى و خلاص و إن كان على الخدمه انا متعوده عليها من زمان ...
من امتى يعنى هشتكى ؟؟
بقيت كل شويه اقول لجوزى فين المشروع اللى قلت عليه و فين الشقه اللى قلت لى عليها انا خلاص معنتش مستحمله الوضع ده انا و ابنى
بقا يرد عليا و يقولى ربنا يسهل لغايه ما فى يوم قلت له انا لازم افهم نهايه الموضوع ده ايه صارحنى يا فوزى
أنا شاركت واحد صاحبى فى مشروع و خسرنا الفلوس
خسرتوا الفلوس ازاى ؟ و مشروع ايه دا اللى كنتوا عاملينه ؟؟ انا مشفتكش بتروح و لا تيجى يعنى ؟
ما هو صاحبى دا هو اللى كان بيدير المشروع
طب ما تفهمنى ايه هو المشروع اللى كان بيديره صاحبك ده ؟؟
كنا جايبين عربيه شركه انا و هو و هو كان بيسوقها
طب و بعدين ؟؟
مفيش ...عمل حادثه بالعربيه من كام يوم و العربيه ادشدشت و للاسف معدتش تنفع تتصلح
يعنى خسرت الفلوس ؟؟ طب و الشقه انا مش قادره اقعد هنا اكتر من كدا
خلاص اتصرفى انتى و هاتيلنا سكن و احنا ننقل على طول
اتصرف ازاى يا راجل ؟؟ انا يتيمه مليش حد و لا عندى حتى حتة دهب ابيعها عشان اتخلص من العذاب اللى انا فيه دا
خلاص تبقى تسكتى و تحطى جزمه فى بوقك دى إمكانياتى و لو عجبك على العيشه دى عيشي و لو مش عاجبك ارجعى يا اختى للقصر اللى كنتى عايشه فيه
الدنيا اسودت فى عنيا ...انا فعلا قليلة الحيله و معرفش اروح فين بابنى ده .... إذا كان عمى و مراته مكنوش طايقنى و انا بطولى أومال بقا لو رجعت لهم بعيل هيعملوا ايه ؟؟
حاولت اتعايش و اتحمل سخافات حماتى و اخوات جوزى البنات و قلت اهى عيشه و السلام و حملت للمره التانيه
و فى التوقيت ده اخواته البنات اتخطبوا لأخين و بقيت رغم حملى و تعبى بقيت شايله كل حاجه على دماغى ...و كنت بصبر نفسي انها هانت و هيتجوزوا و هيقل القرف اللى كانوا بيوريهولى و الخناقات المستمرة اللى كانت بتوصل فى بعض الأحيان أنهم يتلموا عليا و يضربونى .
طبعا الفتره اللى بعد كدا بقى جوزى ينزل يشتغل يوميه عشان يجهز اخواته ...كل الفلوس رايحه عليهم و طبعا ممنوع اخد جنيه ليا أو لابنى
امه بقت تروح تشترى حاجات للاتنين بالقسط و تدبسه فى تمنها و هو على قلبه زى العسل
و ساعه ما اطلب منه طلب ينزل عليه غضب الله و يتخانق معايا ...اجيب لك منين ؟؟
لما خلفت بنتى امه حكمت عليا انى اسميها على اسمها و بالرغم انى بكرهه الاسم ده جدا من كتر اللى كانت بتعمله فيا الا انى مقدرتش اقولهم لأ و سموها فهيمه على اسمها ...قلت خلاص ابقى ادلعها فيفى و امرى إلى الله
لما خلفت بنتى التانيه قلت خلاص معنتش هخلف تانى و كدا رضا من عند ربنا لكن للاسف لقيت نفسي حملت للمره التالته على الاربعين معرفش ده حصل ازاى بس مشيئة ربنا بقا 😔
تعبت اوى فى الحمل التالت ده لانى كنت لسه والده بنتى فيفى مكملتش السنه و كنت فاتحه بطنى و الحمد لله ربنا عداها على خير عشان انا غلبانه و مليش حد يقف معايا بس ربنا كان لطيف بيا و محوجنيش لحد الحمد لله
طبعا حماتى حاولت تسمى بنتى دى على اسم بنتها الكبيره بس انا المره دى صممت انى اسميها على اسم امى الله يرحمها سميه.
لما دخل على فوزى فى المستشفى و كنت لسه بفوق من البنج
حمد الله على سلامتك يا ام تامر
أن شالله تسلم يا ابو تامر
البت زى القمر شبهك تمام
الله يخليك يارب ...عاوزه اطلب منك طلب و بالله عليك ماتردنى بحق التعب اللى تعبته و الموت اللى كنت خلاص قربتله
طلب ايه يا فرحه
انا عاوزه أسمى البنت سميه على اسم امى الله يرحمها
بس كدا امى هتزعل و اختى عبير هتزعل ...دى خلاص قالت البت هتتسمى على أسمى
معلش يا فوزى مش هطلب منك اى طلب تانى و اوعدك لو جبنا بنت تانى هنسميها عبير
مش عارف ... هحاول أقنع امى و ربنا يسهل
طبعا حماتى زعلت و عملتها شغلانه حتى غضبت و مرضيتش تنزل تجيب السبوع زى اول عيلين و فوزى هو اللى نزل جابه
فى السبوع بتاع سميه كان تامر ابنى عنده حوالى اربع سنين ... كنت مشغوله بتعبيه السبوع و لقيت حماتى بتقول لجوزى على خبر غريب و معلومه اول مره اعرفها بالرغم انى متجوزه ابنهم بقالى اكتر من خمس سنين
الخبر ده كان بعد كدا السبب فى كل العذاب اللى شفته فى حياتى 😔 .
عاوزين تعرفوا ايه هو الخبر ده استنونى فى الجزء الرابع باذن الله تعالى
يتبع .....
#قصص_وحكايات_د_جيهان_عادل.
#ابن_عمرى(قصه_حقيقيه)
#الجزء_الرابع
فى السبوع بتاع سميه كان تامر ابنى عنده حوالى اربع سنين ... كنت مشغوله بتعبيه السبوع و لقيت حماتى بتقول لجوزى على خبر غريب و معلومه اول مره اعرفها بالرغم انى متجوزه ابنهم بقالى اكتر من خمس سنين
الخبر ده كان بعد كدا السبب فى كل العذاب اللى شفته فى حياتى 😔 .
الحق يا فوزى عيد اخوك هيخرج بكرا باذن الله ...مصلحه السجون بعتت لنا جواب
صحيح يا اما ...كويس اوى انا كنت فاكر أن لساله تلات سنين كمان
لا ما هو خرج بتلات اربع المده لحسن السير و السلوك
طيب الحمد لله
انت بقا تاخد له غيار جديد و تروح تجيبه بكرا باذن الله
باذن الله حاضر
و انا هوضب له الاوضه بتاعته و اعمله اكله حلوه كدا على ما تخلصوا الإجراءات و تيجوا
انا كنت قاعده بسمع الكلام ده و مستغربه ...جوزى عمره ما جاب سيرة أخوه ده و لا عمرى شفت صوره له فى البيت ...حتى معرفش هو دخل السجن فى ايه
لما حماتى جالها جواب السجن انفشت شويه و بقت الفرحه مش سايعاها و لقيتها بتقولى
بكرا يا فرحه عاوزاكى تقومى من بدرى عشان عندنا شغل كتير اوى ... عاوزين ننضف أوضة عيد و نفرشها و بعدين هجيب لك كرنب و مكرونه و فراخ عشان نعمل محشي و مكرونه بالبشاميل و فراخ مشويه ...عيد ابنى بيحب الحاجات دى اوى.
سكتت ما هى البعيده معندهاش دم ...لسه والده بقالى اسبوع و بطنى مفتوحة و هى مش عاوزه ترحم برده ...قلت فى نفسي أما اشوف رأى الاستاذ اللى متجوزاه فى الكلام ده
دخلت انيم البنت و ناديت على فوزى
ايوا يا فرحه عاوزه ايه ؟
هو مين عيد دا يا اخويا ؟؟
عيد اخويا
و الله ؟؟ اصلك عمرك ما جبت سيرته قدامى يعنى
مجتش مناسبه انى اجيب سيرته ...و بعدين انتى مالك اصلا اقولك و الا مقولكيش .... دا شيئ ميخصكيش فى حاجه
لا يخصنى ...يعنى يبقى ليا سلف مسجون و انا معرفش عنه حاجه ؟؟ الا صحيح هو كان مسجون فى ايه يا فوزى ؟
و انتى مالك انتى مسجون فى ايه؟ اللى ملكيش فيه متساليش فيه
لا ليا ....لما اكون والده بقالى اسبوع بس و امك عاوزانى انضف و افرش اوضه المحروس اخوك و بعد كدا اعمله اكل اد كدا يبقى حرام ...انتوا مشتروتنيش ...الرحمه حلوه برده
اومال انتى عاوزه مين اللى يعمل ؟ امى الست الكبيره ؟ و الا اخواتى الضيوف اللى فاضلهم شهر و يتجوزوا ؟؟ و بعدين بقولك ايه مكنش عاجبك خدى عيالك و روحى على عمك انا مش ناقص وجع دماغ
فوزى قالى الكلمتين دول و خرج بسرعه من الاوضه زى ما يكون بيهرب لانه عارف كويس إنه جاى عليا اوى و أن جرحى المره دى من القيصريه اصعب بكتير من جرح المره اللى فاتت ... بس هقول ايه ..صعبت عليا نفسي اوى و قعدت اعيط ليا و للزمن ...
لو كان ليا أب مكنوش باعواو اشتروا فيا كدا
لو ليا أم كنت رحت اترميت فى حضنها و سبتلهم البيت مطربق على دماغهم
تانى يوم لقيت حماتى جايه تخبط عليا من بدرى و طبعا طلعت معاها الاوضه المقفوله و لقيتها كلها تراب و عنكبوت ....قعدت انفض و اكنس و امسح و هى كانت قاعده بسميه تحت فى الدور الاول
مش قادره اقولكم الجرح شد عليا كام مره مع كل حركه كنت بتحركها جوه الاوضه ...بقيت اتلوى زى التعبان و دموعى نازله على خدى من الالم و قلة الحيله
قعدت اكتر من ساعتين انضف فى الاوضه لغاية ما خليتها زى الفل
نزلت لحماتى لقيتها حاطه قدامها كرنبه كبيره جدا و مكرونه و فراخ صاحيه ...و المطلوب منى بقا انى اقوم بالليله دى كلها لوحدى
طبعا بناتها نايمين و هى شايله فهيمه و سميه نايمه جنبها ع الكنبه و تامر بيلعب حواليها
يلا يا فرحه همى يا بنتى عشان نلحق نخلص الاكل قبل ما يجوا
عمك اكيد هيجى ميت من الجوع
حاضر يا اما ...الا صحيح يا اما هو عمى عيد دخل السجن ليه ؟؟
هو فوزى مقلكيش ؟
لا مقلش حاجه
دا تهمه ظلم ابنى معملش حاجه و لا له فى الكلام ده خالص
كلام ايه بقا 🤔
كان مسافر يا بنتى العريش و مسكوه فى كمين ...قال ايه كان معاه بانجو ...عملولوا قضيه اتجار و اتحبس فى سجن السويس العام ...كانوا حاكمين عليه ب ١٥ سنه سجن بس الحمد لله طلع بعد ١٢ بس
يااا و دخل السجن و هو عنده كام سنه كدا ؟
كان يا حبة عينى عنده ٣٠ سنه يعنى فى عز شبابه بس هنقول ايه الله يجازيهم ولاد الحرام اللى لفقولوا التهمه دى
يعنى هو دلوقتى عنده ٤٢ سنه صح ؟؟
ايوه هو أكبر من فوزى بخمس سنين ....و بعدين انتى عماله تسالى كل الاسئله دى ليه ؟؟
لا كنت فاكراه اخو فوزى الصغير
لا يا ستى دا اخوه الكبير و فى مقام أبوه كمان
طب معلش ممكن اسال سؤال تانى
انتى انهارده رغايه اوى يا فرحه
هو انتوا ليه مكنتوش بتزوروه ...يعنى انا بقالى معاكم خمس سنين عمرى ما شفتكم رحتوا له ؟
هقولك يا اختى و لو أن دى حاجه متخصكيش ...احنا مقلناش لحد أن عيد مسجون و اهل الحته هنا فاهمين أنه مسافر بره و كنت انا بروح له اول خمس سنين على طول زيارات مرتين فى الشهر على الأقل ...بعد كدا انا تعبت اوى من المشوار و المصاريف كمان ...لانى كنت لوحدى فوزى كان ساعتها مسافر السعوديه ...بعد كدا عيد بذات نفسه هو اللى قالى معنتيش تيجى يا اما المشوار كبير عليكى و بعدين عشان الناس متاخدش بالها انك كل شويه شايله و محمله وواخده عربيه مخصوص و اخواتى البنات بتكبر و مسيرهم يتجوزوا و احنا مش عاوزين نعملهم سمعه ع الفاضى
قلت له يعنى معنتش هشوفك تانى يا عيد يا ابنى ؟
قالى اللقا نصيب يا اما و كلهم سبع سنين و اخرج لك باذن الله ....
بس يا ستى و من ساعتها مشفتوش و كنت بدعى ربنا انى اشوفه قبل ما اموت و الحمد لله ربنا استجاب لى ...يلا بقا قومى أدى انتى ارتحتى شويه اهو ...يلا سخنى ميه عشان تسلقى الكرنب و تدبحى الفراخ و بعد كدا تسلقى المكرونه ... شغلى على اكتر من عين من عيون البوتجاز عشان تخلصى بسرعه يا فرحه
قمت و انا حاسه انى هموت من الجرح ..بس كلام حماتى مأقنعنيش ...هما مين اللى هيلفقوا له تهمه دول ؟؟ طب و ايه اللى كان مسفره العريش ؟؟ اكيد كلامها ده كذب
على العموم يا خبر انهارده بفلوس بكرا يبقى ببلاش
دخلت المطبخ و شمرت دراعى و بدأت اطبخ ...قعدت و لا اربع ساعات اعمل فى الاكل لحد ما خلاص كنت هلكت
اول ما خلصت كنت هموت و اريح ضهرى شويه ...يدوب اخدت بناتى و دخلت اريح شويه سمعت صوت فوزى و صوت حماتى و اخوات جوزى و هما عمالين يقولوا
حمدالله ع السلامه يا عيد ...وحشتنى يا ابنى
الله يسلمك يا اما ...الله يسلمك يا عبير ...الله يسلمك يا امل ...و انتوا كمان وحشتونى اوى و الله
انا سمعت الكلام و قلت دلوقتى حماتى تخلى عندها دم و تخلى واحده من بناتها تفرغ الاكل و يأكلوا الجدع ...هى شافت اد ايه انا تعبت ...هنام شويه و لما اصحى ابقا اسلم عليه
و لسه بقول الكلام ده لنفسي و بغمض عنيا لقيت فوزى بيفتح عليا باب الاوضه و بيقولى انتى نايمه يا فرحه ؟؟ قومى سلمى على اخويا و حطيلنا ناكل
يا فوزى انا لسه داخله الاوضه حالا من الصبح عماله اشتغل و عملت الاكل كله ...سبنى ارتاح
كملى جميلك بقا يا فرحه و تعالى فرغى و مش هنطلبك منك حاجه تانى ...يلا كمان عشان تسلمى على عيد
حاضر يا فوزى ...حاضر
قمت لبست حجاب على شعرى ...ما خلاص البيت بقا فيه واحد غريب و اخدت سميه فى ايدى وفوزى اخد فيفى فى ايده مع أنها كانت نايمه بس عشان عمها يشوفها
دخلت على عمى عيد لقيته راجل فى الأربعينات اسمر زى فوزى جوزى بس رفيع ... أقرع من قدام مفيش غير شويه شعر فى جوانب رأسه ...سنانه سودا جدا و صوابع ايديه صفرا من مسكة السيجاره ...صوته مغشلق و بيكح كل ما يتكلم كلمتين تلاته ....لابس فى صابعه الصغير خاتم فضه كبير ...و ضوافره طويله و قذره
سلمت عليه و اخد سميه و فيفى باسهم و ادهوملنا تانى ...لما شاف تامر ابنى بيجرى من اوضه لاوضه قال الله مين القمر ده ؟؟
ردت حماتى دا تامر ابن اخوك ...تعالى يا تامر سلم على عمك
تامر راح يسلم على عمه ...راح عمه اخده فى حضنه و سأله اسمك ايه يا واد ؟
أسمى تامر فوزى سعيد
عندك كام سنه يا عم تامر
اربع سنين
انت عارف انا مين؟؟
ايوا انت عمى عيد
عرفت منين ؟؟
ستى فهيمه قالت لى
ضحك عيد اوى و قال... ايوووووه اهو الواد ده هو اللى انا عاوزه ...انتوا تنسوا انكم خلفتم خلاص ...الواد ده هيبقى ابنى من هنا و رايح .
لقيت حماتى ردت و مالوا يا اخويا ما انت أبوه برده ...بصيت على جوزى لقيته بيبتسم زى العبيط و بيهز له رأسه بالموافقه .
يا ترى هيحصل ايه بعد كدا ؟؟ و يا ترى معنى كلام عيد ايه أننا ننسي تامر من هنا و رايح ؟؟ عاوزين تعرفوا معنى كلامه ايه استنونى فى الجزء الخامس بإذن الله تعالى
يتبع .....
#قصص_وحكايات_د_جيهان_عادل.
فضلا غير مسموح نقل أو نسخ القصه إلا بعد اذن الكاتب ...
#ابن_عمرى(قصه_حقيقيه)
#الجزء_الخامس
ايوووووه اهو الواد ده هو اللى انا عاوزه ...انتوا تنسوا انكم خلفتم خلاص ...الواد ده هيبقى ابنى من هنا و رايح .
لقيت حماتى ردت و مالوا يا اخويا ما انت أبوه برده ...بصيت على جوزى لقيته بيبتسم زى العبيط و بيهز له رأسه بالموافقه .
لما دخلت اوضتى سألت جوزى ايه معنى الكلام اللى اخوك قاله ده ؟؟
قالى و فيها ايه ما هو عمه هو انتى هتعمليلك شغلانه و الا ايه ؟؟
سكتت ...و قلت يمكن مجرد كلام و خلاص ...بس اللى بعد كدا اثبت أنه مش مجرد كلام خالص
مر شهر و كنا مشغولين فى تجهيزات الفرح لاخوات جوزى ...و كنت فرحانه اوى أنه خلاص هيمشوا من البيت و يريحونى من كلامهم اللى زى الدبش و المعامله الوحشه اللى كانوا بيعاملوها ليا ...
الشهر ده كان متعب جدا بالنسبه لى ...بقيت الف على الحاجات اللى ناقصاهم (طبعا غصب عنى مش بمزاجى)
حماتى جابت كميه طيور اشي حمام و اشي بط و اشي فراخ و خلتنى انضف ده كله و حطيته فى الفريزر عشان بناتها
بقت تخلينى اروح اشترى خزين البيت للاتنين من زيت و سكر و ارز و بصل و توم و سمن و كافه شيئ و أشيل على دماغى و احول
و بالرغم من تعبى ده بس كنت مبسوطه برده برحيلهم عن البيت
حتى قبل الجواز بحوالى اسبوع حصل خلاف كبير بسبب القايمه و أنهم كاتبين مبالغ كبيره جدا مبالغ فيها اوى و كان الموضوع هيتفركش و عمى عيد حكم رأيه هو و جوزى و كانت خلاص الحكايه هتنتهى ...وقفت بكل قوه و بقيت اهدى هنا و أهدى هنا و اتصل على عرسان البنات احنن قلوبهم و اقولهم دول بيحبوكم خساره شويه ماديات تعمل كدا ...
و بقيت اقول لجوزى اهدى يا راجل و هدى اخوك ...الناس يقولوا ايه لما يعرفوا أن اخواتك عرسانهم سابوهم قبل الفرح باسبوع ؟؟ سمعتهم هتبقى فى الارض يا اخويا و محدش هيبص فى وشهم بعد كدا .... محدش هيقول خلاف قايمه ابدا ...الكل هيقول اكيد حاجه تانيه
و ممكن حد يحفر وراكم و يتعرف أن اخوك كان مسجون وساعتها ابقى قابلنى لو اتجوزوا و الا شافوا الجواز بعينهم
طبعا كنت بعمل كل ده مش حبا فيهم لأ ...دا عشان مبيفضلوش فى ارابيزى و يقعدولى
لغايه ما الحمد لله المشكله اتحلت و العرسان رضيوا يمضوا على القايمه و اللى مكتوب فيها بس من غير شهود و لا حد من اهلهم ...لأنهم عملوا كدا من ورا اهلهم
بعد كدا رحنا فرشنا الشقق بتاعتهم و كانوا شقتين قدام بعض
و جه الفرح و بقيت ارقص و انا بقول فى نفسي يا زيحه خدى الزيحه ...افرحى يا بت يا فرحه العقربتين هيغوروا اخيرا بعد ما دوقوكى المر خمس سنين .
المهم عدى الفرح على خير الحمد لله و بقيت انا و اولادى و حماتى و سلفى فى البيت لوحدنا و قلت خلاص الحمد لله المشاكل هتقل و هتبقى على اد حماتى بس ...لكن كان فى موضوع دايما مأرقنى ...عيد بقا واخد ابنى معاه على طول ...فى اى مشوار فى اى خروجه
بقيت اشوفه مقعده مع أصحابه اللى شكلهم شمال
بقيت مش عارفه اتلم على ابنى خالص ... لغايه ما فاض بيا و قلت لفوزى انا عاوزاك فى كلمتين يا فوزى
دخل فوزى و هو بينفخ زى عادته لانى اخرته على قعدة القهوه
عاوزه ايه يا ام تامر ؟ انا مش فاضيلك
ام تامر ؟؟. هو فين تامر ده هو انا بقيت اشوفوه و الا اتلايم عليه خالص
يعنى انتى عاوزه ايه دلوقتى مش فاهم
عاوزه ابنى ...مش فاهم ايه يعنى ؟؟
طب ما ابنك معاكى هو احنا شحتناه ؟؟
ايوه شحتناه لاخوك
أدى انتى قلتيها بنفسك دا اخويا يعنى عمه لحمه و دمه و بعدين الجدع مش متجوز وواخد الواد ابنه
طب و انا ذنبى ايه ؟؟ هو انت مش شايف يا راجل صحاب اخوك شكلهم عامل ازاى ؟؟ هو انت مش خايف يعلم ابنك اللى بيعمله ؟؟
بطلى كلام فاضى يا وليه ...دا جزات الجدع أنه شايل عنك هم الواد
هم مين اللى شايله ؟.... الله الغنى يا عم عن دى شيله
نامى و اتغطى انتى و متشغليش بالك بالموضوع ده
انام و اتغطى ايه يا راجل ؟؟ انت مش شايف الواد بقا عامل ازاى ؟؟ الواد مبقاش عاوز يعرفنا ...بقا على طول يا اما خارج مع عمه يا اما قاعد معاه ...دا حتى النوم مبقاش يجى ينام معانا هنا
طب ما كويس ...انتى ايه اللى تاعبك ؟؟ على الأقل وسع لنا شويه ...عجبك يعنى اننا نكون احنا الخمسه فى اوضه واحده ؟؟؟
و مين اللى عمل فينا كدا ؟؟ مش انت اللى رحت اتصرفت من دماغك و بعت الشقه اللى حيلتنا و يا ريتك فلحت ....ضيعت الشقه و ضيعتنا معاك
يوووووه رجعنا لأم الموال الاسود ده تانى ...عشان كدا مبحبش اتكلم معاكى ...كل حاجه قالبها نكد و كل ما نتكلم فى اى موضوع تقلبى على طول على موضوع الشقه
انت كدا دايما تهرب من الحقيقه و تدفن راسك فى الرمل زى النعامه
و مالوا يا ستى انا نعامه ... ايوه نعامه عاوزه حاجه ؟؟
هعوز ايه يعنى ؟؟
طب خلاص سبينى اغور من وشك بقا
طب و الواد ؟؟
اتغطى و نامى يا فرحه و ملكيش دعوه بالواد
فوزى قال الكلمتين و طلع يجرى ع القهوه و انا قعدت اكل فى روحى
مرت الايام و الحال هو الحال ابنى مبقاش ابنى ...بقا ابن عمى عيد
حطيت همى فى البنتين و تعليمهم و كانوا ما شاء الله شاطرين ...قلت ربنا يعوضنى فيكم خير يا حبايبي ..
و فى يوم و انا قاعده فى اوضتى بخيط شويه هدوم مقطعه و بطبق الغسيل لقيت فيفى جايه تقولى الحقى يا ماما تيته واقعه فى الارض و مش قادره تقوم
قمت اتنطرت من على الكنبه و رحت جرى عليها لقيتها واقعه و رايحه فى دنيا غير الدنيا ...قعدت احاول اشيل فيها بس هى كان وزنها زايد شويه و انا كنت رفيعه و سفيفه ....قعدت احاول و هى راميه جسمها خالص ...لحد ما قدرت ارفعها الحمد لله من على الأرض
حاولت افوقها لكن معرفتش جريت جرى ناديت على حد من الجيران اخدها فى عربيته و رحنا بيها المستشفى
رحنا قالوا لنا جلطه فى المخ بعد ما عملوا لها الإشعات اللازمه .
و لقيت عيد و فوزى و معاهم تامر جايين ليا ع المستشفى و قلت لهم أن الحاجه جالها جلطه و أن الدكتور قال إن الجلطه هتأثر على النص الشمال من الجسم .. و تؤدى لشلل نصفى ...
طبعا لقيت جوزى قعد يعيط زى الطفل ...امه بالنسباله هى كل حياته ميعرفش يمشي خطوه الا بمشورتها
الدكاتره كاتبولنا على حقن غاليه اوى عشان تدوب الجلطه ...و قعدنا يومين فى المستشفى و كنت انا المرافق لها ...بناتها كانوا بيجوا يزوروها زى الغرب و يمشوا
بعد كدا نقلناها البيت و الدكتور وصانا نعمل لها تدليك على أيدها و رجلها اللى مبيتحركوش مع الالتزام الشديد فى الدوا
بقيت انام تحت رجليها احسن تعوز حاجه بالليل و مسمعهاش ...بقيت احميها زى الطفل الصغير و اسندها للحمام و انضفها ...
بقيت اغير لها هدومها و مسبهاش الا و هى نضيفه و مسرحه شعرها و ريحتها جميله
بقت تبص لى كدا و ترفع ايدها و تدعيلى ...و لما رجعت تتكلم تانى بقت تقولى انتى احسن من بناتى ...سامحينى يا بنتى دا ذنبك و اللى عملته فيكى
كانت لما تقولى كدا مكنتش بعرف ارد عليها ...كنت اطبطب على كتفها و اسكت
فوزى شاف اد ايه تعبت مع أمه و بقى يشكرنى على كل حاجه بعملها معاها
انت بتشكرنى على ايه يا فوزى امك زى امى و مهما عملت انا بعمل باصلى برده
كتر خيرك يا فرحه ...انتى متعرفيش كبرتى فى نظرى اد ايه .
ربنا يقعدلى العمل الطيب اللى بعمله معاها ده فى اولادى
حماتى قعدت سنتين طريحه الفراش و كنت بخدمها بضمير و كان بناتها بيجوا زى الضيوف مفيش واحده بتشيل كوبايه من مكانها مطرح ما شربت
حماتى ماتت و فضى البيت علينا احنا و عيد سلفى ..كنت مشغوله اوى مع حماتى و مكنتش باخد بالى من حاجات كتير كانت بتحصل مع ابنى
لغايه ما فى يوم لقيت ابنى اللى فى تانيه إعدادى ريحته سجاير
انت ايه الريحه اللى فى هدومك دى يا تامر ؟؟
عاوزين تعرفوا تامر رد عليا و قالى ايه ؟؟ انتظرونى فى الجزء السادس بإذن الله تعالى
يتبع .....
#قصص_وحكايات_د_جيهان_عادل.
فضلا غير مسموح نقل أو نسخ القصه إلا بعد اذن الكاتب ...
#ابن_عمرى(قصه_حقيقيه)
#الجزء_السادس
حماتى ماتت و فضى البيت علينا احنا و عيد سلفى ..كنت مشغوله اوى مع حماتى و مكنتش باخد بالى من حاجات كتير كانت بتحصل مع ابنى
لغايه ما فى يوم لقيت ابنى اللى فى تانيه إعدادى ريحته سجاير
انت ايه الريحه اللى فى هدومك دى يا تامر ؟؟
ريحة ايه ؟؟ مفيش ريحه و لا حاجه
لا ريحة هدومك سجاير خالص ...ورينى كدا اما اشم بوقك
سجاير ايه و بقى ايه انتى هتحورى و الا ايه ؟
اه يا قليل الادب فى حد يقول لامه انتى هتحورى ؟؟
انتى ملكيش دعوه بيا خالص ملكيش فيه
هو ايه اللى مليش فيه يا واد ...اقف هنا كلمنى
الواد شوح لى بايده و خرج بره البيت و انا قعدت اهرى و اكل فى نفسي ...لحد ما المحروس جوزى جه
انت هتفضل سايب الواد كدا لاخوك ؟؟ الواد جاى ريحته كلها سجاير يا فوزى
هو انا مش قلت لك يا وليه ملكيش دعوه بالواد ...انفضى ايدك منه خالص ...الواد عمه اللى بيربيه
تربيه الشوم و الندامه ...هو عمه دا متربى اصلا عشان يربى الواد ؟
انتى بتقولى ايه يا وليه ؟؟ انتى اتهبلتى و الا ايه ؟؟ اوعى حسك عينك تغلطى فى اخويا مره تانيه خليكى يا اختى فى بناتك و ملكيش دعوه بالواد
يا عالم يا خلق هو ده كلام ؟؟ أنهى عاقل يقول نسيب ابننا لواحد رد سجون زى ده ؟؟
مش بقولك احترمى نفسك ...دا عمه و اكيد مش هيضره
طب و دينى لانا شاكيه لاخواتك البنات لما يجوا بكرا و أما اشوف هيعجبهم الحال ده و الا لا
اشتكى يا اختى ...هو انتى فاكره أن اخواتى هينصفوكى على اخوهم ؟
يعنى اما يشوفوا ابن اخوهم هيضيع مش هيقولوا كلمه حق ؟؟
هأ هئ هئ .... طيب ابقى اشتكى بقا زى ما انتى عاوزه و سبينى اروح اقعد ع القهوه اعدل دماغى بحجرين كدا ....جبتيلى صداع
ما هو ده اللى انت فالح فيه ..دا بدل ما تشوف ابنك يا راجل و تشوف اخوك علمه ايه تانى ؟
هيكون علمه ايه يا اختى ؟؟ انتى مخك مهوى يا وليه هو عمه هيضره ؟؟ روحى نامى و اتغطى
يخربيت انام و اتغطى اللى ماسكها فى لسانك دى ....انا عاوزه فلوس يا فوزى
منين يا حسره ممعيش فلوس
اومال رايح تقعد ع القهوه ازاى ؟؟
لا دا انا هروح اقعد على حساب صاصا صاحبى
يا سلام و صاصا هيقعدك على حسابه ليه أن شاء الله
اصل انا كسبته امبارح فى الطاوله و المشاريب انهارده عليه ....سلام بقا مش قادر اقف اكتر من كدا معاكى
سلام يا اخويا
طبعا دا تقريبا السيناريو بتاع اى حوار مع فوزى جوزى يتكلم كلمتين ماخدش منهم لا حق و لا باطل و يجرى
الحال كان على الاد و فوزى كان يشتغل يوم و يقعد عشره و انا محتاجه مصاريف لاولادى .. بقيت اجيب شويه فراخ او بط و ارييهم و اييع منهم و امشي نفسي بأى قرش يطلع منهم ....بقيت احاول اوفر فى القرش على اد ما اقدر
كنت انزل وكاله البلح اجيب لبس لاولادى من هناك عشان اللبس هناك رخيص شويه ...كنت اعمل الصابون فى البيت و مشتريش حاجات كتير من بره ...كنت ماشيه على اد الاد و كانت اهم حاجه عندى تعليم بناتى و تربيتهم تربيه حلوه ...اما تامر فمكنش نافع فى مدارس خالص و كان بينجح بملاحق على طول
لما اخوات جوزى البنات جم (و كانوا متعودين يجوا كل جمعه يتغدوا مع اخواتهم و يمشوا ) رحت شاكيالهم و قلت لهم انى مش عارفه اتلايم على ابنى خالص و انى متاكده أنه بقا بيشرب سجاير
مش قادره اقولكم اتقلبوا عليا ازاى ؟؟ انا لو قتلت ابوهم مكنوش عملوا كدا فيا....يا الله بقا صوتهم يجيب الشارع التانى و بقوا يردحوا ليا زى ما يكون غلطت فيهم
ابنك مين يا ام ابن ؟؟ هو انتى فاكره أن مفيش حد خلف غيرك و الا ايه ؟؟
هو انتى هتذلى اخونا اكمنه متجوزش و لا خلف
لا فوقى يا ماما انتى قاعده فى بيته و أن مكنش عاجبك خدى ولادك و شوفيلك حته بره اتنيلى اقعدى فيها
قعدوا يردحوا و يقلوا ادبهم و فى الآخر انفجرت
هو انتوا محسسنى أن اخوكم ده امام جامع ؟؟ اش حال أنه رد سجون ...و بعدين اشوف حته بره ليه يا حبيبتى انتى و هى ؟؟ ما هو زى ما ده بيته هو بيت جوزى انا كمان ....و بعدين انا لا عاوزه اقعد هنا و لا طايقه هنا اصلا بس اعمل ايه فى ميلة بختى و جوزى الخايب اللى باع شقتنا و حوجنا للى يسوى و اللى ميسواش
انتى بتشتمتى اخواتنا يا بنت الكلب و الله لنعلمك الادب
و نزلوا عليا الاتنين و هما كانوا تخان جدا و انا عامله زى البرص فى وسطهم ...نزلوا ضرب و عض و تقطيع فى شعرى و انا اصووووت و هما يزيدوا
لحد ما فوزى و عيد نزلوا من فوق على الصويت و حجزوا ما بينا
طبعا لما قوموهم من فوقى لقيت نفسي مش قادره احرك دراعى و بقيت اصرخ اتاريه اتكسر
فوزى شاف دراعى مدلدل عرف أنه اتكسر اخدنى و طلعنا على المستشفى العام عملولى اشعه و جبسهولى
الدكتور سالنى ايدك اتكسرت ازاى ؟؟ مين عمل كدا فيكى ؟
لانه كان شايف علامات الضرب على وشى و جسمى و قال إن لو حد عمل كدا فيكى يبقى لازم يبلغ و يتعمل محضر بالواقعة
فوزى بصلى انى اسكت و قال للدكتور محدش عمل فيها حاجه يا دكتور ...دى وقعت من ع السلم و هى نازله اتكربست ووقعت على دراعها
الدكتور بص لى و قالى صحيح الكلام ده يا مدام ؟؟
هزيت راسي بالموافقه
خلاص انتوا حريين ....واجبى انى كنت اقولكم على المحضر ...انتى هتفضلى متجبسه اكتر من ٢١ يوم و دى تعتبر قضيه
و لا قضيه و لا حاجه يا دكتور انا زى ما قلت لك كدا محدش لمسها ...هى اللى وقعت لوحدها
طيب تمام هات لها الروشته دى و تمشي على العلاج ده لمده شهر و بعد كدا هنفك لها الجبس
و لمؤاخذه يا دكتور ..العلاج ده هنجيبه من المستشفى هنا صح ؟؟
لا دا من بره
و ليه بقا ؟؟ هى مش دى مستشفى حكومه و الحكومه بتصرف ع الشعب و لامؤاخذه ؟
يا سيدى دى حاجه بسيطه دول دويين اتنين ميتعداش تمنهم ١٥ جنيه
ماشي يا دكتور خلاص مفيش مشكله
مشي الدكتور و خرجت انا و فوزى من المستشفى
كان نفسي مرجعش معاه البيت ...بس كنت هروح فين ؟؟ مليش حد اروحله حتى عمى و مراته سابوا البلد و طلعوا على مصر بعد ما باعوا بيتهم و اشتروا ارض هناك عملوا دور عياده للدكتور جمال و دور اتجوز فيه واحده زميلته و دور لهم .
عاجبك كدا يا فوزى اللى اخواتك عملوه فيا ؟ انا كان ممكن اعمل فيهم محضر زى ما الدكتور قال بس مرضتش عشان خاطرك انت
اصيله يا فرحه ...معلش حقك عليا امسحيها فيا المره دى
خلاص يا فوزى انا مش زعلانه بس كل اللى عاوزاه منك انك ترجع لنا الواد مره تانيه و تبعده عن اخوك عيد
مقدرش يا فرحه دا اخويا الكبير و مقدرش اتخانق معاه و لا أقوله حاجه
بعد الموقف ده بطلت اتكلم فى حكايه تامر دى خالص و استعوضت ربنا فيه و سبته خالص مبقتش أسأل عليه ...ركزت مع البنات و ما شاء الله البنتين دخلوا كليات حلوه
فيفى دخلت كليه علاج طبيعى و سميه دخلت اداب عربى
و فى يوم من الايام كنت طالعه أودى اكل للطيور فوق السطح و كان الواد تامر فى اليوم ده بايت عند جماعه أصحابه و بناتى راحوا على كلياتهم ...مفيش غير فوزى اللى كان نايم فى اوضتنا
و انا طالعه لقيت أوضة عمى عيد مفتوحه ماخدتش و لا اديت مع أن دى حاجه غريبه ..هو على طول بيبقى قافل الاوضه سواء موجود فيها أو لأ و مبيخلنيش و لا انا و لا حد من بناتى ينضفهاله ...مفيش غير تامر بس هو اللى بيدخلها و بينضفها
اكلت الطيور و ببص بعينى كدا لقيت عمى عيد واقع فى الارض و مبرق عنيه و مبيتحركش و جنبه سرنجه مرميه على الأرض .... شكله مفزع جدا
صرخت الحقنى يا فوزى ...الحق اخوك
طبعا كلكم عاوزين تعرفوا ايه اللى حصل لعيد اخو جوزى ...دا اللى هتعرفوه فى الجزء السابع بمشيئه الله تعالى
يتبع .....
#قصص_وحكايات_د_جيهان_عادل.
فضلا غير مسموح نقل أو نسخ القصه إلا بعد اذن الكاتب ...
#ابن_عمرى(قصه_حقيقيه)
#الجزء_السابع
اكلت الطيور و ببص بعينى كدا لقيت عمى عيد واقع فى الارض و مبرق عنيه و مبيتحركش و جنبه سرنجه مرميه على الأرض .... شكله مفزع جدا
صرخت الحقنى يا فوزى ...الحق اخوك
طلع فوزى جرى على صوتى قلب فى اخوه شمال و يمين لاقاه ساقع و مشضض و مفيش نفس تقريبا كدا ميت من بالليل و للاسف ميت بجرعه مخدرات زايده
طبعا البيت اتقلب مناحه و اخواته البنات بقت كل واحده فيهم تندب عليه و تقول كلام استغربه جدا زى ما يكون اخوهم ده كان شيخ فى الأزهر و انا معرفش
على العموم هما حرين و احنا ملناش نذكر الا محاسن موتانا
اللى كان صعبان عليا فى الموضوع ده كله ابنى تامر .. الواد لما عرف أن عمه مات كأن الدنيا اتطربقت فوق دماغه الواد بقا يصرخ زى اللى بيتشوى على النار ...انا بيتهيالى لو أبوه مات مش هيعمل كدا
تامر كان كل ما حد يجى يسلم عليه و يقوله البقاء لله كان يعيط و يترمى فى حضن اللى بيعزيه
لدرجه أن أبوه نفسه قاله مالك بتعمل كدا ليه ؟؟ امسك نفسك شويه مش كدا سيب الكلام ده للحريم
الواد بص له كدا و قاله انا ابويا مات انهارده ...انت فاهم يعنى ايه ابويا مات انهارده ؟
ابوك ؟؟؟ و انا مين يا ابن الكلب ؟؟؟
انت ؟؟ انت حد معرفوش و متتكلمش معايا و ملكش دعوه بيا تانى فاهم ؟؟
انا مش هكلمك دلوقتى عشان خاطر الناس اللى موجوده بس بعد العزا هشوف شغلى معاك يا قليل الادب
و لا تقدر ...
بتقول ايه يا كلب
بقولك و لا تقدر تعمل معايا حاجه و لا لك كلمه عليا و ريح بقا على جنب مش ناقصاك انت كمان
فوزى جوزى فوجئ بكلام تامر و مبقاش مصدق نفسه ...لقيته مره واحده ساب العزا و دخل اوضتنا و قعد يعيط
افتكرت أنه زعلان على اخوه دخلت اطبطب عليه
لقيته مفحوم من العياط
وحد الله يا ابو تامر ...كلنا لها يا اخويا
و نعم بالله بس انا مبعيطش على كدا يا فرحه
اومال مالك يا اخويا ؟؟ تكونش خايف من المصاريف ؟؟ ما هو اخوك كان بيساعد برده شويه ...لا صراحه كتير فى المصاريف ...سيبها على الله هو هيحلها من عنده
لا يا فرحه مش المصاريف
اومال فى ايه ؟؟
الواد يا فرحه كلمنى بقلة ادب و قالى أن أبوه مات و بيقولى ريح على جنب و ملكش دعوه بيا و لما قلت له هوريك الواد رد بمنتهى البجاحه و قالى متقدرش
يااااا انت لسه فاكر أن لك ولد يا فوزى ؟ منا قلت الكلام ده كتير و محدش سمع منى ....مستغرب أن الواد بيكلمك بقلة ادب ؟ و مش عدك أبوه ؟ ما دى الحقيقه يا فوزى
الحقيقه انك سبت ابنك لاخوك و نفضت ايدك منه خالص و كنت فرحان أنه اتحمل مسؤليتك ...اشرب بقا يا فوزى
قلت له الكلمتين و خرجت من الاوضه ما هو الكلام زى ما هو بيكوى قلبه بيكوى قلبى انا كمان
بعد اليوم ده ظهر الوش الحقيقى لابنى تامر ...الوش اللى كان مستخبى ورا عمه للاسف
اكتشفت أن تامر مبيشربش سجاير بس لا دا طلع بيشرب حشيش و استروكس و فودو
عيد مات بعد ما علم ابنى شرب كل حاجه وحشه ....بعد ما ربى لنا وحش صغير جوه البيت ...مات و سابنا للمرار
الواد بقا كل يوم يطلب فلوس عشان يصرفها على الزفت اللى بيشربه
انا عاوز فلوس يا اما
ممعيش فلوس يا تامر
مليش فيه طلعى الفلوس لاولع لكم فى ام البيت ده دلوقتى
قلت لك ممعيش هعمل ايه يعنى
تعملى اللى تعمليه يا اختى ...ما انتى بتصرفى على المحروستين بناتك و بتديهم كل اللى هما عاوزينه
ما هم بيروحوا كلياتهم يا ابنى يعنى مبيدلعوش
مليش دعوه انا.... انتى تجيبى اللى بقولك عليه من تحت الارض
روح خد من ابوك
ابويا ؟؟؟؟هو فين المحروس جوزك دلوقتى ؟
عيب يا ابنى كدا مينفعش تتكلم عنه كدا
ابويا مات خلاص و انتى و الا جوزك هتدونى اللى احتاجه .....اخلصى هو فين ؟ و الا انا عارف خلاص هو ملوش قعده إلا ع القهوه ...انا رايحله
خرج الواد و انا مش مصدقه نفسي بقا دا ابنى اللى كنت بترجاه من الدنيا ؟ بقا دا ابن عمرى اللى كنت بتمنى أنه يكون دكتور زى جمال ابن عمى ؟؟
يا رب انت القادر على فك كربى ...يارب أهديه و رجعه لحضنى
بعد كدا الواد محدش بقى يقدر عليه
بقا كل يوم يتهجم علينا و يشتمنا باقذر الشتايم عشان ياخد فلوس و يا ويلى لو قلت له ممعيش فلوس يبقى نهارى ميعديش
بقيت اقول لفوزى يا راجل شوف الواد ...انت ايام اخوك كنت بتخاف تتكلم و تقول اخويا الكبير طب و دلوقتى ايه مانعك ؟
الواد خلاص كبر هعمله ايه يعنى ؟
وطب و بناتنا و سمعتهم
طظ مفيش حد له عندنا حاجه
بقيت اقول فى سري منك لله ضيعت الواد بسلبيتك فى الاول و لسه بتضيعه لحد دلوقتى
لما الحال ابتدى يضيق ابتديت اجيب شويه بضاعه كدا كارتيهات على شيبسهات و شويه بقاله عل علافه و ابيعهم فى مدخل البيت عشان اجيب حتى مصاريف البنات
و كان تامر مبيسبنيش لازم ياخد منى فلوس كل يوم ...لحد ما فى يوم مكنش معايا فعلا اى فلوس
قعد يشتم و يزعق و يهبد بايده على الترابيزه و على الحيطان ...و انا مش عارفه اتصرف
شوفلى فلوس معاكى حالا
و الله ما معايا يا ابنى
بقولك ايه الكهن اللى بتعمليه ده مش هيخيل عليا ...قومى يا مره هاتيلى فلوس لاطلع روحك
انت واد قليل الادب امشي اطلع بره يلا
بتطردينى من بيت ابوكى و الا ايه ؟؟ مش عاوزه تدينى فلوس ؟؟ حاااضر انا هوريكى
و دخل جرى على المطبخ انا قلت هيجيب السكينه و يدبحنى لقيته سحب انبوبه البوتجاز و شدها من الخرطوم و رفعها على كتفه و خارج
رايح فين وواخد الانبوبه اللى حيلتى
اوعى من وشي لاموتك دلوقتى عفاريت الدنيا بتتنطط قدامى
لا مش هسيبك تخرج بالانبوبه ...دا دى اللى بعمل عليها اكلنا ...حرام عليك
حرمة عليكى عشتك يا اختى
و راح زاققنى وقعت على ضهرى و خد الانبوبه و جرى
قعدت اتحسبن عليه و ادعى عليه من حرقتى و من اللى عمله فيا
بقيت اعيط ليا و للزمن و ربنا يسامحنى بقا على الدعاوى اللى دعيتها عليه 😔
و زى ما يكون كان باب السما مفتوح و ربنا استجاب ليا و لقيت واحد صاحبه جاى لى جرى و بيقولى
الحقى يا خالتى تامر خبطته عربيه 😲
عاوزين تعرفوا تامر ابنى حصله ايه ؟ استنونى فى الجزء الجاى باذن الله تعالى
يتبع .....
#قصص_وحكايات_د_جيهان_عادل.
فضلا غير مسموح نقل أو نسخ القصه إلا بعد اذن الكاتب ...
#ابن_عمرى(قصه_حقيقيه)
#الجزء_الثامن_والاخيره
بقيت اعيط ليا و للزمن و ربنا يسامحنى بقا على الدعاوى اللى دعيتها عليه 😔
و زى ما يكون كان باب السما مفتوح و ربنا استجاب ليا و لقيت واحد صاحبه جاى لى جرى و بيقولى
الحقى يا خالتى تامر خبطته عربيه 😲
فين يا محمود ؟؟
خدوه على مستشفى السلام يا امى
طب ودينى يا ابنى انا معرفش المستشفى دى فين
رحنا المستشفى و فوزى حصلنى بعد ما واحد تانى من أصحاب تامر راح له ع القهوه
الواد خد خبطه جامده فى رأسه عملت له ثقب فى الجمجمه و تهتك فى ايده الشمال أدت إلى بترها من عند المفصل دخلوه العمليات بسرعه لان كانت حالته خطيره اوى بعدها دخل خمس مرات عمليات
بقيت امشي فى الشوارع و اطلب من الناس تدعيله اللى اعرفه و اللى معرفوش كنت اطلب منهم يدعى لابن عمرى
الواد اول ما فاق من العمليه طلع يجرى و كان عاوز يرمى نفسه من الدور السابع
لولا الممرضين و ناس كانت موجوده لحقته على اخر لحظه و كنت خلاص هفقده للابد
لما سألنا الدكتور قالنا أصله قبل الحادثه كان واخد مخدرات و اللى عمله ده اعراض انسحاب
ابنى قعد فى المستشفى مده و خرج باعاقه و كان صعبان عليه نفسه اوى
و للاسف رجع أسوأ من الاول بقى بيشرب مخدرات تانى و بقى مبهدلنا اكتر من الاول ...كل يوم ياخد منى فلوس بالعافيه و يشتمنى و يشتم اخواته البنات
تعبت اوى و مبقتش عارفه اتصرف ازاى
ناس ولاد حلال دلونى على مستشفى اسمها الدمرداش و قالولى روحى هناك هيعالجوا ابنك ببلاش
رحت و كلى امل أنه يتعالج و يرجع كويس لكن للاسف الدكاتره هناك قالولى لازم هو يكون عاوز يتعالج بنفسه و يكون عنده اراده لكدا ...غير كدا مش هينفع معاه العلاج و هنسيبه يمشي احنا مش هنكتفه و نعالجه غصب عنه .
بقيت اعيط لما الدكتور قالى كدا ...يعنى خلاص مش هعرف اعالج ابنى ؟؟
واحده جارتى لما لقتنى زعلانه و عماله اعيط قالت لى سيبك من مستشفيات الحكومه دى ...دول بيخفوا من على قفاهم انتى تروحى لمركز خاص لعلاج الادمان و هما هايعالجوا ابنك ...و ادتنى عنوان لمركز من المراكز دى كان بيتعالج فيها ابن اختها
اخدت العنوان و رحت اسال عن النظام و المصاريف و كدا
قابلنى دكتور صغير بيشتغل فى المركز ....
اتفضلى يا ماما ...تحت امرك
الامر لله يا دكتور ...انا عندى ...
ايوا اتفضلى اتكلمى
عندى ولد مدمن و عاوزه اعالجه
و ماله هيتعالج باذن الله
بس هو مش راضى يتعالج ... هل ممكن تعالجوه من غير رضاه ؟؟
ايوه طبعا احنا بنستخدم احدث الوسائل فى علاج الادمان و بناخد المريض بعربيه مخصوصه تابعه لينا من بيته ...كمان بيقيم هنا اقامه كامله كأنه فى فندق خمس نجوم
طب و بيقعد اد ايه يا دكتور ؟؟
و الله دا على حسب إرادة الشخص نفسه و درجه الإدمان اللى وصل لها ..بس فى المجمل بيقعد من ٦ شهور لسنه تقريبا
ياااااا ...سنه؟؟ دا كتير اوى
ما انتى متنسيش يا ماما أنه لازم يتحط تحت المتابعه مده عشان ميرجعش يتعاطى مره تانيه
طب معلش يا دكتور كنت عاوزه اسال عن التكلفه يعنى
لا بسيطه احنا عاملين خصم هايل ...و لو سألتى بره هتلاقينا اقل من باقى المراكز بالفين جنيه
الفين جنيه ؟؟ ليه هو الشهر عندكم بكام ؟؟
الشهر عندنا علاج و طقم تمريض و اقامه خمس نجوم زى ما قلت لك يتكلف من ١٥ إلى ٢٠ الف جنيه
ايه عششششرين ايه يا دكتور ؟
امال انتى فاكره ايه يا مدام
طيب متشكرين اوى يا دكتور
طب انتى لازم تحجزى من دلوقتى و تدفعى خمس الاف تحت الحساب قبل ما نروح ناخد الحاله
لا منا ممعيش المبلغ ده دلوقتى ...وقت تانى يا دكتور هبقى اجى و ادفع باذن الله
تحت امرك يا مدام
خرجت من عند الدكتور و الدنيا بتلف بيا ...يعنى عشان اعالج ابنى عاوزالى من ١٢٠ إلى ربع مليون جنيه ؟؟؟
يا رب انا مش عارفه اتصرف اعمل ايه يا رب
رجعت البيت و انا هموت من الزعل لدرجه ان جالى شلل مؤقت و الحمد لله ربنا صرفه بلطفه
و للاسف ابنى بعد الحادثه تحول لغول مش مجرد وحش
زادت اهاناته لينا و شتيمته باقذر الألفاظ ليا و لبناتى ...كل يوم الناس سامعه بينا
لدرجه أن حد من الجيران قالنا نروح نبلغ عنه فى القسم أنه بيتهجم علينا و بيبهدلنا و هما هناك هيمسكوه يأدبوه
بس انا خفت ابنى عنده ثقب فى الجمجمه من الحادثه خفت لياخد خبطه تموته و اعيش ندمانه طول عمرى و ابقى انا اللى عملت فيه كدا
تعبت ..تعبت اوى يا ناس و مش عارفه اتصرف ...ابن عمرى ضاع منى
بعترف انى غلطانه فى حقه لما سبته لعمه و ضيعته بسلبيتى و قلة حيلتى ..يا ريتنى اخدته هو و اخواته و مشيت انشاله كنت اشحت بيه على الابواب و مكنتش سبته كدا....بس للاسف كنت صغيره و معرفتش اتصرف لوحدى و خفت اضيع ولادى اكتر
انا دلوقتى اللى بدفع التمن ...بدعى من ربنا تحصل معجزه و يهديهولى و يرجعه للطريق المستقيم عشان خاطره و عشان خاطر البنات اللى ملهاش ذنب و خايفه عليهم يتاخدوا بذنب اخوهم.
تمت .
ارجو أن القصه تكون نالت اعجابكم ...ارجو الدعاء لوالدى رحمه الله
#قصص_وحكايات_د_جيهان_عادل.
فضلا غير مسموح نقل أو نسخ القصه إلا بعد اذن الكاتب ...
 #الجزء_الاول احب اعرفكم بنفسي انا فرحه اللى عمرى ما عرفت طعم الفرحه بحكيلكم بدموعى عن ابن عمرى هحكيل…){kind=link}
ردحذفجميله
الله يرحم والدك