اريد حقى الجزء الثالث عشر و الاخير

#اريد_حقى

# الجزء_الثالث_عشر_والاخيره

قصص رعب روايات جميلة روايات رومانسية روايات اون لاين روايات كاملة

 كتب وروايات

 ‏بقا كدا ؟؟ بتعضينى يا بنت الكلاب ؟؟؟ و الله لاحرق قلبك على عيالك ولاد الحرام دول 

و راح شايل البنتين فى اديه الاتنين و البنات تصرخ 

هى سمعت كدا و أدركت أنها سابتهم قدامه راحت راجعه 

كان هو اخدهم و نزل و هى وراه و بتصرخ

عاشور ...عاشور ....

و انا نزلت وراهم اشوف هيحصل ايه 

الراجل خد العيال و دخلهم الاوضه التالته اللى احنا عاملينها اوضة ضيوف دلوقتى و ربط البنتين بحبل كان موجود فى الاوضه 

الست كانت بتتحايل عليه زى ما يكون معتاده منه على كدا و بقت تقوله 

خلاص يا عاشور ارجوك متعملش زى كل مره 

انا هموتهم لك عشان متتحججيش بأن البيت باسمهم 

ارجوك يا عاشور ابوس ايدك اللى بتعمله فيهم دا خلالهم مش طبعيين 

مجانين زى اللى جابتهم انا هوريكى انتى و هما 

الست بصت حواليها لما معرفتش تتصرف لقت كرسي خشب راحت رافعاه بسرعه و خابطه الراجل بيه عشان يسيب بناتها 

بس هو كان عامل زى الحيطه و لا أثرت فيه الخبطه بس اتغاظ جدا و راح ملفوت لها و مسكها من شعرها و لفها قدامه و راح دابحها 

ايوه زى ما بقولكم كدا دبحها بالسكينه الطويله اللى فى ايده 

الست وقعت على الأرض و هى بتفرفر  زى الفرخه المدبوحه ، اول مره فى حياتى اشوف واحده بتتقتل قدامى كنت عاوزه اصرخ بس لقيت نفسي اتخرصت خصوصا لما شفته رايح ناحية البنات اللى كانت بتصرخ على امها 

و راح دبحهم بنت بنت وهو بيقول لازم ادبحكم علشان اخلص منكم كلكم 

التلات جثث كانوا مرميين فى الأرض و الدم مغرق المكان لدرجة أنه طلع بره للصاله 

هو قعد على كرسي و قعد يفكر يتخلص منهم ازاى ؟؟؟ 

بعد دقايق راح جاب الطبق الكبير اللى لقينا فيه الدم و كان فاضى و جاب ساطور كبير و عدة جزاره كامله 

قعد يقطع فيهم حتت كنت هموت و انا بتفرج على المنظر 

بعد كدا خرج فى الجنينه و خرج كنبتين كبار من الصاله وولع فيهم 

و بدأ ينقل فى الطبق الاجزاء اللى هو مقطعها و يروح يرميها على الكنب المولع 

و هو بينقل شفت الصوابع اللى وقعت من الطبق و هو مش واخد باله 

نقل كل الجثث المتقطعه و بقى يرمى عليها بنزين و قطع شجر عشان تولع اكتر و اكتر و تتفحم 

بعد شويه النار صفيت خالص كان هو غير هدومه و مسح المكان من الدم و غسل الطبق و العده اللى قطع بيها 

فضل العضم المتحرق راح حافر حفره غويطه جدا و حط فيها بواقى العضم  و عشان يخفى مكان الحفره راح ناقل شجره كانت مزروعه فى صفيحه كبيره و حطها فوق الحفره و رواها 

ابتدى بعد كدا ينضف اثر الحريق الموجود و يشيل البواقى و يرميها بعيد 

دخل بعد كدا يدور على الدهب و عقد البيت بس ملقاش غير دهب الست محطوط جوه صندوق و لقى ورده🌷 كان هو جايبها لها قبل ما يتجوزها محطوطه مع الدهب كانت حاطاها فى وسط ورقه مكتوب عليها اول ورده من حبيبي ♥️

رمى الورده فى الارض و اخد الدهب حطوا فى جيوبه و طلع بره فى الصاله لقى الدم مغرق الصاله 

بقى واقف مذهول هو لسه ماسحه ايه اللى جابه تانى هنا 

دخل جرى على الاوضه لقى مراته و أولاده متقطعين و مرميين فى الأرض الراجل اترعب و خاف جدا و طلع يجرى و مرجعش مره تانيه 

اول ما خرج الاوضه فضيت تانى و مبقاش فى جثث و لا دم 

فقت من الحلم و عرفت أن صاحبة البيت عاوزانى اعرف الحقيقه و ايه اللى حصلها بالظبط و فهمت لغز اختفائها 

بس اخدتى ولادى ليه ؟؟ انا ذنبى ايه ؟؟؟ 

لما شفت الرؤيا دى مكنتش عارفه اتصرف ازاى 

الفجر اذن و نزلت لقيت ماما و بابا بيتوضوا عشان يصلوا الفجر حكيت لهم على اللى شفته بعد ما صلوا 

بابا قالى تقدرى تحددى مكان الشجره اللى شفتيها دى  ؟ 

ايوا يا بابا ...الشجره دى جنب السور بالظبط 

طب تعالى ورينى المكان 

اخدت بابا و رحت شاورت له على المكان اللى شفته فى الرؤيا 

متأكده يا بنتى ؟؟ 

ايوا يا بابا متأكده و الله 

يبقى الشيخ حسنى هو اللى هيدلنا نعمل ايه فى الموضوع ده 

طب نتصل بيه دلوقتى ؟؟

يا بنتى لسه الساعه اربعه و نص الصبح

يا بابا زمانه صاحى عشان يصلى الفجر 

طب زى ما تحبى 

اتصلت على الشيخ و حكيت له على كل اللى شفته 

الشيخ قالى يبقى كدا احنا عرفنا هى اخدت ولادك ليه ؟؟

ليه يا عم الشيخ ؟؟

هى كدا عاوزاكى تساعديها ترجع حقها من المجرم اللى قتلها هى و اولادها

تقوم تاخد ولادى منى ؟؟؟

هى دى الطريقه الوحيده اللى تخليكى متسبيش البيت ، لانك كنتى هتمشي انتى و جوزك و خصوصا بعد حرق العربيه 

اه صحيح هى حرقت عربيتنا ليه ؟

لنفس السبب... انكم متمشوش

اااه فهمت طب انا اساعدها ازاى ؟؟؟

لازم البوليس ياخد خبر باللى حصل ده 

طب و انا بعد ١٥ سنه هروح أبلغ البوليس أقوله ايه ؟؟ 

اختها ممكن تبلغ و تقول إن اختها مدفونه فى المكان ده 

و هو البوليس هيصدق كدا على طول ؟؟

لا لازم نجيب اختها و نحكيلها الحكايه و نحفر قدامها و لما نطلع العضم تروح هى تبلغ أن أثناء حفر الحديقه لقت بقايا لجثث ادميه و هى بتشك أن البقايا دى لاختها و اولادها اللى اختفوا من ١٥ سنه و تعمل محضر بكدا 

حلو اوى ...بس انا معرفش حد ممكن يجى يحفر 

إن كان على دى سهله هجيب لك انا و لا يكون عندك فكر

متشكره اوى يا شيخ انا هتصل بالست ناديه دلوقتى و ارجع اكلمك 

و فعلا اتصلت على الست و حكيت لها كل الحكايه الست قعدت تعيط و قالت لى انا جاييه حالا 

الشيخ جاب راجلين و جه و بدأوا حفر فى المكان اللى شاورت لهم عليه و بالفعل طلعوا بقايا عضم و حتت من فساتينهم مكنتش اتحرقت 

الست ناديه راحت القسم عشان تقدم بلاغ 

و انا دخلت عشان استريح لقيت المفاجأه 

لقيت نور الدين و فخر الدين نايمين على السرير بكل هدوء و شكلهم شبعانين و نضاف 

بقيت اصرخ من الفرحه و ناديت على امى و ابويا و بقينا مش مصدقين 

خلص الموضوع أن تم إخراج بقايا التلت جثث و عمل( الدى إن ايه DNA) للتأكد منهم و بالفعل طلعوا هما عايده و بناتها 

و تم اتهام زوجها بقتلها و الشرطه بدأت بالبحث عنه 

أما أنا و فوزى بقا فصراحه بعد اللى حصل ده مكنش ينفع نقعد فى البيت ده تانى 

حماتى اتشلت من الجلطه اللى جت لها و طلبت انى اسامحها ووعدتنى انها مش هتضايقنى ابدا بس ارجع شقتى 

و رجعنا بالفعل و جوزى مسافرش تانى علشان يبقى جنب والدته و اولاده و جنبى انا 😍😘

كانت تجربه قاسيه اوى بس الحمد لله طلعنا منها ، و الحمد لله انى قدرت ارجع للست حقها 💪🥺

تمت 🌷

ارجو أن القصه تكون نالت اعجابكم ، إذا عجبتكم القصه ارجو الدعاء لوالدى رحمة الله عليه بالرحمه والمغفره و سائر موتى المسلمين

قصص رعب روايات جميلة روايات رومانسية روايات اون لاين روايات كاملة كتب وروايات

#دجيهان_عادل

#قصص_وحكايات_د_جيهان_عادل.

فضلا غير مسموح نقل أو نسخ القصه إلا بعد اذن الكاتب ...