#توحا(مستوحاه_من_قصه_حقيقيه)
#الجزء_الاول
ايوه انا اللى قتلتها يا سعاده البيه انا مش هنكر ...بس هى قتلتنى قبل ما اقتلها ...استحلت تعبى و شقايا و اخدته و انا زى الطور بلف فى ساقيه عشانها و عشان خاطر ولادى
و قتلتها ليه يا مرسي ؟؟
انا هحكيلك الحكايه من الاول يا بيه و انت تحكم
انا راجل صنايعى على باب الله معايا دبلوم اخدته بالعافيه لانى خارج من اسره معدومه ...ابويا كان راجل فلاح بيشتغل بالاجره فى الغيطان عند الناس و عنده خمس اخوات غيري
ابويا كان نفسه يعلمنى عشان مطلعش زيه شغلانه متعبه و فلوسها قليله ...كان دايما يقولى انا نفسي يا ابنى تتعلم و تروح صنعه تأكل منها عيش احسن من الفلاحه اللى قطمت ضهرى دى على الفاضى
كنت أقوله يا أبا طب منا ممكن اخد اعداديه بس يا أبا أو حتى اطلع من المدرسه عشان اساعدك
يا ابنى انا نفسي تتعلم برده و متبقاش زيى ...التعليم برده هيفتح مخك و يخليك احسن ما تبقى جاهل ....معلش يا ابنى انت ممكن تشتغل بعد المدرسه اهو منك تجيب مصاريفك و منك تتعلم صنعه
حاضر يا أبا...... انا كلمت عم احمد الحداد و هروح له من بكرا باذن الله
بس انا مش عاوز دا يأثر على دراستك يا مرسي يا ابنى انت طول عمرك شاطر
متخافش يا أبا ...انا هذاكر و هجيب لك الشهاده و هفرحك بيها باذن الله
ربنا يرضى عليك يا ابنى
و فعلا رحت تانى يوم لعم احمد و كان الشهاده لله بيعاملنى زى ابنه ....كان بيعلمنى و بيخاف على و على مذكرتى....و كان ساعات كتير يدينى اكتر من حقى بغرض المساعده يعنى
مشوار الحداده ده صعب اوى يا باشا طول النهار بتتعامل مع النار و اى غلطه ممكن تتحرق حرق ملوش حل ....كمان بتحتاج قوه عضليه و مجهود كبير اوى
طبعا خلصت الاعداديه و دخلت دبلوم الصنايع قسم صاج و بحكم شغلى فى الحداده كنت من افضل الطلاب اللى فى المدرسه فى الشغل العملى و كان استاذ العملى مبسوط منى اوى لدرجه انه كان عاوزنى اشتغل معاه فى شغله الخارجى ...بس انا مرضتش لسببين :
اولا مكنتش عاوز اسيب عم احمد لانه مربينى زى ابويا و صراحه فضله كبير على
السبب التانى هو توحا بنته ...توحا كانت اجمل بنت وقعت عليها عينى خفة دم ،جمال ....كانت سمرا بس كل حاجه فى وشها جميله تقاطيع وشها تحب تبص لها كدا، مناخير اد النبقه و عنين سود زى الليل واسعين زى عيون الغزلان شعر ناعم كان بيبان من تحت طرحتها ....كانت حته شيكولاته من الاخر كدا
كانت تيجى لابوها المحل و الاقي عنيها على و انا شغال ...فى الاول مكنتش واخد بالى ..بس بعد كدا نظرتها لى فضحتها و خلتنى اخد بالى منها
و ابتدت تيجى كتير و انا قلبى كل ما كان يشوفها يهفهف و كأنه هيطير من صدرى
اول مره اتكلم معاها كأن عم احمد مش موجود كان رايح يستقضى شويه حديد من الوكاله و جاى
دخلت على زى الغزال
ابويا هنا يا مرسي
لا مش هنا يا انسه توحا ...راح مشوار و جاى كمان شويه
يعنى هيتاخر و الا ايه؟ اصلى مستعجله اوى
خير يا آنسه ...لو محتاجه اى حاجه اقدر اعملهالك تحت امرك
لا مش هينفع
ليه بس ...قولى يمكن اقدر اساعدك
كنت عاوزه خمسه جنيه عشان اصور مذكره و صاحبتها مستعجله عليها اوى
اه صحيح انتى فى سنه كام ؟
انا فى الاعداديه
انا بقا فى تانيه صنايع
ياااا دا انا كنت فاكراك شغال هنا بس ...مش فى التعليم يعنى ...اصل كل ما باجى بلاقيك
ايوه منا باجى بعد المدرسه و ساعات كتير بغيب لان اهم حاجه عندنا العملى ...بروح التلات أيام بتوع العملى و اليومين الباقين ساعات اغيبهم و ساعات لأ
ربنا يوفقك
طب اتفضلى
ايه دا ؟
الخمسه جنيه اللى انتى عاوزاهم
لأ لأ مقدرش اخدهم ...انا همشي أودى المذكره لصاحبتى و ابقى اخدها منها بكره و خلاص
لأ و الله لتاخديها ...كدا هتكسفينى ؟؟
بس مينفعش يا مرسي
ايه بتقولى ايه ؟؟ قولى مرسي كدا تانى ...
يا مرسي
دى احلى مرسي سمعتها فى حياتى .... يا خرااااابى ...بالله عليكى تاخديها و متكسفيش ايدى
طيب هاخدها بس على شرط هجيبهالك بكرا باذن الله
لا مش عاوزها
يبقى خلاص مش هاخدها
طب خلاص خلاص ...انتى مالك كدا طبعك حامى اتفضلى يا ستى
شكرا يا مرسي
يااااا خرابى يا اولاد ....دا أسمى طلع حلو اوى ...كنت طول عمرى عاوز اغيره بس خلاص انا حبيته ...مش هغيره خلاص
ضحكت و مشيت يا بيه و قلبى راح معاها ...بقيت اسمع اغانى عبدالحليم و احس انه بيوصف اللى فى قلبى ...حبيت ام كلثوم و اغانيها من حبى لتوحا
تانى يوم و انا جاى من المدرسه و رايح على الورشه لقتها مستنيانى قبل الورشه بشارعين ...اول ما شفتها قلبى دق و لقيت نفسي ببتسم زى العبيط
ازيك يا مرسي
انشاله تسلمى يا توحا
انا جبت لك الخمسه جنيه اخدتهم من ابويا امبارح و قلت له انى استلفتها من واحده صاحبتى.... اتفضل اهى
طب ما تخلى يا توحا
لا انا متفقه معاك من الاول ...مبحبش اللى يرجع فى كلامه
طب خلاص هاخدها بس على شرط
شرط ايه بقا ؟
اعزمك على حاجه ساقعه و شيكولاته
لأ إذا كان كدا بقا يبقى موافقه.
يتبع .....
#قصص_وحكايات_د_جيهان_عادل
#توحا(مستوحاه_من_قصه_حقيقيه)
#الجزء_الثانى
عزمتها على الحاجه الساقعه و جبت لها شيكولاته يومها بكل الفلوس اللى معايا يا بيه ..يعنى صرفت الخمسه اللى كانت مستلفاها و عليها خمسه من معايا و مفضلش فى جيبي و لا قرش ... بس كنت فرحان انى فرحتها و جبت لها اللى نفسها فيه
بعد كدا كنت اطلع من المدرسه و استناها قدام مدرستها نروح نتمشي شويه و اجيب لها حاجه و بعدين هى تروح و انا اطلع على الورشه
بدأ عم احمد يشتكى من تاخيري و بقيت اكدب عليه و أقوله أن استاذ العملى بقا بياخرنى معاه و انى هعوض له الساعه اللى بتأخرها دى بالليل يعنى ساعه زياده عن ميعادى و كان عم احمد راجل طيب و بيصدقنى
فضل الحال على كدا لحد ما خلصت و دخلت توحا الصنايع برده ...و كان لزاما على ادخل الجيش
خفت لحد تانى ياخدها منى و تتخطب و انا فى الجيش
رحت لابويا و قلت له انى عاوز أخطب قبل ما ادخل الجيش ...قالى يا ابنى انا ما صدقت انك تخلص عشان تساعدنى فى مصاريف اخواتك
يا أبا منا خايف توحا تطير من ايدى
طب هنعمل ايه يا ابنى ...ما باليد حيله
خلاص يا أبا ...بس كان نفسي نقرأ فاتحه بس
ما هو يا ابنى الفاتحه دى مصاريف برده متفتكرش أن دخول بيوت الناس بالساهل كدا
عدت سنه يا بيه و انا فى الجيش و كنت حاطط ايدى على قلبى لتوحا تتخطب
و كنت انزل اجازات اشتغل مع عم احمد و اقابلها و فى يوم جت قالت لى أن الواد فاضل ابن الحج حسنى راح و اتقدم لابوها و هى مش موافقه بس ابوها عمال يزن على دماغها
ساعتها حسيت ان دماغى هتولع و رحت اتخانقت مع ابويا و قلت له البت هتضيع منى يا أبا
ابويا مقدرش يتكلم معايا و لما فهمته انى هروح لعم احمد و اطلب منه قراية فاتحه بس ابويا سكت و متكلمش
رحت فعلا لعم احمد و طلبت ايد توحا ... الراجل بصراحه فرح اوى و قالى دا يوم المنى يا مرسي يا ابنى بس انت عارف لازم اخد رأى البت الاول
طبعا يا عم احمد خد رأيها زى ما انت عاوز
طب استنى يا ابنى ...هدخل اكلمها على ما تشرب الحاجه الساقعه دى
دخل عم احمد لتوحا اللى انا عارف ردها طبعا و عارف انها موافقه ...و انا قاعد بضرب بعينى كدا على الحيطه لقيت صوره لتوحا حبيبتى و هى صغيره وصوره تانيه لتوحا و بنت تانيه شبهها جدا واقفين ماسكين أدين بعض
استغربت اوى انا اعرف ان عم احمد عنده بنت وحيده هى توحا ...اومال مين اللى فى الصوره دى
دخل على عم احمد و انا باصص للصوره و مستغرب و هو بيقول الف مبروك يا مرسي يا ابنى البت موافقه
الله يبارك فيك يا عمى
انا شايفك باصص للصوره اوى و زمانك بتقول مين اللى مع توحا دى ..؟...صح ؟
أيوة الصراحه اول مره اعرف ان توحا لها اخت شبهها كدا
دى بنتى سمارا تاهت من امها فى مولد السيده و هى صغيره كان عندها حوالى خمس سنين ...امها بعد كدا ماتت بحسرتهاو مفضليش غير توحا
طب مدورتوش عليها يا عمى
يوووو لفينا مخلناش حته الا اما سألنا فيها ...حتى العرافين و الدجالين رحنا لهم و دوخونا معاهم و اخدوا منا فلوس بالكوم ... لغايه ما زهقت ...
ياااا دى حكايه صعبه اوى
متشغلش بالك انت يا عريس ...خليك فى فرحتك انت
كنت عاوز اقولك يا عم احمد انى ..
متقولش حاجه ...انا عارف كل حاجه انت ناسي يا واد أن انا اللى مربيك و عارفك كويس...انا بشترى راجل و ميهمنيش معاك فلوس و الا ممعكش
انت تجيب ابوك نقرأ فاتحه و مش عاوز منك اى حاجه الا بعد ما تخلص جيشك بالسلامه
ربنا يخليك لى يا عم احمد
استنى لما انده لك العروسه تعملنا كوبايتين شربات
يا توحا
نعم يا أبا
اعمليلنا الشربات و تعالى
حاضر يا أبا
تانى يوم اخدت ابويا و امى و رحنا قرينا فاتحه توحا و كان اجمل يوم فى حياتى ....حسيت اخيرا انها بقت بتاعتى و محدش فى العالم هيقدر ياخدها منى
عدت سنة الجيش التانيه زى اختها ..و توحا اخدت الدبلوم
🌹🌹🌹🌹🌹
الف مبروك يا مرسي يا ابنى انك خلصت جيشك بالسلامه
الله يبارك فيك يا عم احمد
يلا شد حيلك بقا عشان نفرح بيك انت و توحا
باذن الله يا عمى ...صحيح يا عمى كنت عاوز اسالك عن طلباتك و كدا
طلبات ايه يا ابنى ؟؟
قصدى يعنى تفاصيل الجواز
انا مليش طلبات يا مرسي ...توحا بنتى و انت كمان ابنى و عارف انك بتساعد اهلك و مش هتقل عليك ....انتوا تتجوزوا هنا معايا فى الشقه يعنى جيب اوضه نوم جديده دا إذا حبيت يعنى
اوضه نوم بس ؟
ايوه يا ابنى مالك مستعجب ليه ؟
طب و الشبكه ؟؟
لا انا مش عاوز منك شبكه انا عارف الحال كفايه الدبلتين و خلاص
لما عرفت توحا باتفاق ابوها معايا لاحظت انها اتضايقت و ظهر على وشها الزعل
مالك يا توحا زعلانه ليه ؟
مفيش يا مرسي
لا في ....متخبيش على
انا كان نفسي اكون زى كل البنات لى شقتى و يجيلى عفش و شبكه و اعمل فرح كبير ....انا مش اقل منهم فى حاجه يا مرسي
انتى ست البنات يا توحا و تستاهلى اجيب لك حته من السما كمان ....بس انتى عارفه الحال و عم احمد مقدر حالى ...و على العموم اوعدك انى اعوضك و هجيب لك اللى انتى عاوزاه باذن الله
خلاص يا مرسي ...لما نشوف
رجعت اشتغل مع عم احمد و ابتديت اجهز نفسي ....اشتريت الدبلتين و اتفقت مع النجار على اوضه النوم و مفيش شهور كان كل شئ جاهز و اتجوزت توحا حبيبتى و عملت لها فرح فوق سطوح بيتهم على الضيق كدا
كنت فاكر يا بيه أن كدا خلاص وصلت للسعاده اللى محدش وصلها لكن دوام الحال من المحال ...حصل اللى لا كان على بال و لا على خاطر ....
يتبع .......
#قصص_وحكايات_د_جيهان_عادل
#توحا(مستوحاه_من_قصه_حقيقيه)
#الجزء_الثالث
كنت فاكر يا بيه أن كدا خلاص وصلت للسعاده اللى محدش وصلها لكن دوام الحال من المحال ...حصل اللى لا كان على بال و لا على خاطر...بعد شهر واحد من جوازنا مات حمايا الله يرحمه و للاسف كل حاجه اتشقلبت فوق دماغى
الورشه اللى كنت شغال فيها كانت ايجار ... صاحبها بعد موت عم احمد جالى و طلب منى اخليها فى خلال شهر لانه محتاجها .....اتحايلت عليه كتير انى أجرها لكن للاسف مرضيش اضطريت ابيع الحديد و شويه الأدوات اللى فيها برخص التراب و طبعا اديتهم لتوحا مراتى لأن ده حقها
بعد كدا بقيت أتردد على الورش عشان اشتغل صبى و كنت اشتغل يوم و عشره لا ....و كنت مستحمل و بقول بكرا ربنا يفرجها من عنده
و فى يوم رجعت لقيت مراتى زعلانه و عماله تعيط
فى ايه مالك يا توحا ؟؟
صاحب البيت يا مرسي
ماله ؟
عاوز يخرجنا من الشقه
طب و ليه ؟
بيقول العقد بتاعنا قرب يخلص و هو عاوز الشقه عشان يجوز ابنه فيها
يا ادى المصيبه ...طب و هنعمل ايه دلوقتى ؟؟؟ دا أقل شقه عاوزه مقدم اد كدا و ايجار اد كدا
انا لسه معايا قرشين من اللى بعت بيهم الحديد ممكن ندفعهم مقدم لاى شقه تانيه
طب و لو دفعناهم هندفع الايجار منين ؟؟
ربك هيفرجها يا مرسي
لما سمعت حكايه الشقه دى يا بيه اتخنقت و الدنيا اسودت قدامى .... نزلت اتمشي شويه ....رجليا خدتنى على القهوه قلت اقعد اشرب لى حجرين و احاول انسي اللى انا فيه ...بعد شويه و انا سرحان فى حالى لقيت اللى بيخبطنى على كتفى
ازيك يا مرسي ....فينك من زمان يا ابنى
اهلا ازيك يا مصطفى ...انت اللى فين يا ابنى ؟؟ من بعد المدرسه ما خلصت مشفتكش و لا مره
ما انت عارف بقا يا مرسي انى مليش جيش عشان وحيد اهلى ...بعد ما خلصنا الدبلوم طلعت على العاشر من رمضان اشتغل هناك ...و اهو الحمد لله
العاشر ؟؟ ايه اللى وداك العاشر يا ابنى ؟؟
العاشر حلوه مليانه شغل و السكن هناك رخيص و حلو
السكن ؟؟ بجد ؟
اه و الله الإيجارات هناك نص او ربع هنا كمان
بس يا عم الحته مقطوعه هناك
مين اللى قالك كدا ؟ دا العاشر دى مدينه صناعيه كبيره و بعدين اذا ما كناش الشباب اللى زينا يشجعوا المدن الجديده مين بقا اللى هيشجعها و يروح يعمرها
انت مالك بتتكلم زى كتاب الدراسات كدا يا مصطفى ؟
ههههههههه دراسات ايه بس ....و الله زى ما بقولك كدا ...الحياه هناك اروق و احلى كتير ...الدنيا هنا زحمه اوى و تلاقى الشغلانه بالعافيه لكن هناك المصانع على قفا من يشيل ...أن معجبكش الشغل ده تلاقى غيره
طب و انت بتشتغل ايه هناك يا مصطفى ؟
بشتغل فى مصنع تجميع سيارات
لا و الله ...طب و بتكسب حلو على كدا ؟
ايوه الحمد لله مرتب كويس بالنسبه للمرتبات هنا و بيدونا وجبه كمان و نسبه من الأرباح
حلو اوى يا مصطفى ...ربنا يوفقك يارب
طب و انت يا مرسي ؟ لسه شغال حداد زى ما انت ؟
يعنى ....
يعنى ايه شغال و الا مش شغال ؟
يعنى بعد موت صاحب الورشه بتاعتى بقيت اشتغل يوم و اقعد عشره
ايه دا ؟ هو عم احمد مات ؟
ايوه يا مصطفى مات بعد جوازى من بنته بشهر
لا اله الا الله ....البقاء لله يا مرسي ....ايه دا انت اتجوزت كمان ؟
ايوه اتجوزت توحا بنت المعلم احمد الله يرحمه من حوالى سنه كدا
طب الف مبروك يا مرسي و لو انها متاخره شويه
الله يبارك فيك يا مصطفى عقبالك
لا يا عم انا مش ناوى اعملها دلوقتى ....انا كدا ملك زمانى ...انا ناقص وجع دماغ
الجواز وجع دماغ ؟؟ دا احلى حاجه فى الدنيا يا ابنى
ههههههههه منا عارف انت هتقولى ؟
يوووووو شوف نستنى ازاى ؟ تشرب ايه يا مصطفى ؟
اشرب شاى ....
اتنين شاى هنا يا محمد......طب كنت عاوز اسالك ..لو انا حبيت اجى العاشر هلاقى شغل و كدا و الا لسه هقعد ادور ؟
يا عم لو عاوز تيجى اشغلك معايا من الصبح فى المصنع اللى بشتغل فيه ....الراجل طالب عمال كتير
طب و السكن ؟
لا دا مفيش اسهل منه ....متخافش من حكايه السكن دى ....السماسرة هناك يجيبولك بدل الشقه عشره
طب انت مسافر امتى يا مصطفى ؟
السبت الفجر باذن الله
طيب تمام ....هشوف كدا و يمكن اجى معاك
ياريت يا مرسي ...
بعد ما روحت قعدت افكر فى كلام مصطفى طول الليل
مالك يا مرسي حاسه بيك طول الليل عمال تتقلب و منمتش ؟
ايوه يا توحا فى موضوع كدا بفكر فيه ...بس مش عارف
موضوع ايه دا يا مرسي ؟
موضوع كدا قلى عليه مصطفى صاحبى لما قابلته ع القهوه امبارح ..
و قالك ايه صاحبك دا خلى النوم يطير من عينك كدا ؟
قالى أن فى شغل فى العاشر بفلوس كتير و السكن هناك يعتبر ببلاش ...ففكرت يعنى اننا نروح نجرب يمكن يكون خير
العااااااشر ....دى بعيده اوى يا مرسي و منعرفش اى حد فيها
و احنا عاوزين نعرف حد ليه يا توحا ؟؟ اهم حاجه الشغل و خلاص
هى فكره حلوه و يمكن كمان الاقيلى مصنع انا كمان اشتغل فيه
لا تشتغلى ايه بس ؟؟ انا مش عاوزك تتبهدلى
و لا بهدله و لا حاجه ....يا مرسي احنا ناقصنا حاجات كتير اوى و انا نفسي شقتى تكون زى شقق الناس فيها كل الاجهزه ...فرش حلو ، سجاجيد حلوه ....نفسي البسلى حتتين دهب فى اديا قبل ما اموت يا مرسي
معلش يا توحا ....بكرا ربنا يفرجها يا حبيبتى ....اصبرى على انتى بس
منا صابره اهو يا مرسي ... و هتروح ازاى العاشر دى ؟
هروح مع مصطفى يوم السبت مصنع السيارات ، اشوف الشغل و لو عجبنى ندور لنا على شقه و نتكل على الله ننقل هناك
زى ما تشوف يا مرسي ....المهم نقب شويه على ضهر الدنيا
تانى يوم رحت لمصطفى وقلت له انى هسافر معاه يوم السبت علشان اشتغل
و فعلا سافرت يا بيه و رحت اشتغلت اول يوم فى المصنع و ......
يتبع
#قصص_وحكايات_د_جيهان_عادل
#توحا(مستوحاه_من_قصه_حقيقيه)
#الجزء_الرايع
تانى يوم رحت لمصطفى وقلت له انى هسافر معاه يوم السبت علشان اشتغل
و فعلا سافرت يا بيه و رحت اشتغلت اول يوم فى المصنع
الشغل هناك مكنش متعب بالنسبه لى لكن مكنتش مستريح اوى طبعا لانى طول عمرى راجل صنايعى و متعودتش ابقى مجرد عامل فى مصنع ....بس مصطفى صاحبى اقنعنى انى بكرا هتعود زى ما آلاف غيري متعودين و أن ساعات اكل العيش بيحكم علينا بحاجات مش حابينها
مصطفى اخدنى بت معاه فى السكن الخاص بيه و قعدت حوالى اسبوع على ما عرفت الاقى شقه كويسه و ايجارها على أدى
بعد كدا رحت جبت مراتى و شويه العفش اللى حيلتى و نقلتهم الشقه
طبعا ابويا كان زعلان انى همشي و اسيبه لدرجة أنه قعد يعيط و يقولى:
يا ابنى دا انا ما صدقت انك خلصت و بتساعدنى ...انا كبرت يا ابنى و مبقاش فى خصوصا بعد ما جالى الفيروس
يا أبا ما انت شايف الحال بقا عامل ازاى هنا ...بشتغل يوم و عشره لأ ...هناك بقا هيبقى لى دخل ثابت و متخفش يا أبا إن كان على الفلوس فأنا هبعت لك كل شهر مبلغ كدا يساعدك على تربيه اخواتى ....و يمكن اشوف شغلانه لسعد اخويا معايا فى المصنع اول ما يخلص دبلوم أو حتى فى الاجازه
خلاص يا مرسي ...روح يا ابنى ربنا يفتحها عليك يا ابنى و متنسناش يا ابنى و لا تنسي اخواتك
انساكوا ازاى يا أبا بس؟ ...طب بقولك ايه يا أبا ما تيجوا معايا
نيجى معاك ازاى يا ابنى ؟
اشوف لكم شقه جنبى و تنقل مدارس اخواتى و تيجوا تقعدوا معايا فى العاشر ...هتقعدوا هنا تعملوا ايه ؟؟
مينفعش يا ابنى ...هروح العاشر اعمل ايه و اتحمل ايجار كل شهر ازاى ؟
ملكش دعوه بالإيجار يا أبا انا هدفعه
لا يا ابنى مينفعنيش انا مقدرش اسيب البلد ....اتوكل انت على الله و ابقى شوف شغل لاخواتك زى ما قلت
حاضر يا أبا ... هروح اسلم على امى عشان امشي بقا
و روحت العاشر يا بيه و كنت فاكر أن الوضع هيكون افضل لكن للاسف الدخل مع الايجار مع مساعدتى لوالدى مع حمل توحا خلى الحال على الاد اوى و مش زى ما كنت متوقع أو راسم لتوحا
طبعا كانت المشاكل مبتخلصش بينى و بين مراتى ...كنت اشتغل ورديه تانيه و أيام العطلات عشان اعرف اجيب لها اللى عاوزاه لأنها كانت دايما تزن
انا عاوزه فلوس يا مرسي
ما انا مديكى مرتبى كله يا توحا
خلص ....المرتب خلص و بعدين هو ده بتسميه مرتب ؟
احمدى ربنا يا توحا
حمداه يا اخويا و شاكره فاضله بس تعبت انا حامل و محتاجه تغذيه
طب ما تجيبي اللى عاوزاه يا توحا ما الفلوس كلها معاكى
فلوس ايه دى ؟ دا يدوب بتاكلنا قرديحى ...عاوزه لحمه يا مرسي ..عاوزه فراخ
حاضر يا توحا هجيب لك
و هتجيب لى منين أن شاء الله ...ما انت لو كنت سبتنى انزل اشتغل مع سعاد جارتنا كان حالنا هيبقى افضل
يا بنت الناس انا مش عاوزك تتبهدلى شغل المصانع هنا بهدله و بعدين هتشتغلى ازاى و انتى حامل كدا
ملكش دعوه انا مش اول و لا اخر ست بتشتغل و انا حامل
بقولك ايه يا توحا الكلام ده انتهينا منه خلاص متقعديش تزنى كل شويه
دا عيشه تقرف ...مش كفايه انك حابسنى فى المخروبه دى لا بخرج و لا بروح فى حته و قعده ٢٤ ساعه بكلم الحيطان
متزعليش يا ستى هجيب لك عايده اختى تيجى تقعد معاكى يومين كدا تونسك و تاخد بحسك
عايده ايه دى كمان هو انت لاقى تاكلنى لما تروح تجيب لى اختك كمان
الله يسامحك يا توحا ...انا مش لاقى أكلك ؟
ايوه يا مرسي انا مبفتريش عليك و بعدين الصراحه بقا احنا اولى بالفلوس اللى بتبعتها لأهلك ابوك عنده راجلين غيرك يقدروا يشتغلوا و يجيبوا قرش و احنا جايلنا طفل يعنى محتاجين اى قرش عشانه
انتى بتقولى ايه يا توحا ؟ انتى مش عاوزانى اساعد ابويا ؟
لا مبقولش كدا ...بقول أن انا داخله على ولاده يا مرسي و انت معملتش حسابك خالص على مصاريف الولاده
متشغليش بالك انا سألت واحد صاحبى مراته لسه والده و قالى أنه ولدها ببلاش فى مستشفى خيري هنا اسمها مستشفى الاربعين بيشكر فيها اوى و فى نضافتها و بيقول عامله زى الخاصه
خيري ؟؟ خيري يا مرسي ؟ بقا دى اخرتها ؟ فينك يا أبا ؟ لو كنت عايش دلوقتى مكنش دا بقا حالى
الله يرحمه يا توحا ...فعلا لو عايش مكنش دا بقا حالنا
بعد كدا مراتى ولدت و طبعا الخناق زاد عشان مصاريف الولد و ابتديت اقلل شويه من الفلوس اللى ببعتها لاهلى و بقيت اشتغل ورديتين كل يوم لما هلكت
و فى يوم لقيت مراتى تعبانه و عماله ترجع
مالك يا توحا ؟ انتى واخده برد و الا ايه ؟
لا بينى حامل يا مرسي
حامل؟ حامل ازاى دا ابننا لسه عنده ست شهور
معرفش اهو دا اللى حصل
و جالى الطفل التانى يا بيه و زادت مشاكلى مع توحا على المصاريف...و بدأ لسانها يطول على و ترجع تصالحنى تانى بعد كدا ابتدت توحا تزن و تحاول تقنعنى انها تودى الواد و البت حضانه و تنزل تشتغل و تعاونى ع المصاريف
انت عاجبك الحال اللى احنا فيه دا يا مرسي ؟
عاوزه ايه يا توحا ؟؟ انا بشتغل ورديتين اعمل ايه اكتر من كدا؟
متعملش انا نازله بكرا مع سعاد الشغل
يااادى سعاد و سنين سعاد ....هو انا مش قلت لك تقطعى علاقتك بسعاد دى ؟
و اقطع علاقتى بيها ليه ؟ هى كانت عملت لى ايه ؟ دا جزاتها انها عاوزه تحسن أوضاعنا و بعدين متخافش انا هشتغل فى قسم كله حريم مفيهاش رجاله خالص
طب و العيال يا توحا ؟
العيال هوديهم حضانه زى ما قلت لك متخافش عليهم ...بالله عليك توافق يا مرسي احنا ناقصنا حاجات كتير اوى
خلاص يا توحا روحى بس طلبات البيت لو نقصت أو قصرتى معايا أو العيال هقعدك ....الشرط نور
لا متخافش مش هقصر
و اشتغلت توحا و يا ريتنى ما شغلتها ....بقت تحط رأسها الند بالند و لما اسالها مثلا معملتيش اكل ليه ؟ كانت تفتح صوتها و تقولى انا زى زيك هنا ...انت بتشتغل و انا بشتغل يبقى متأمرنيش و تقول اعملى و متعمليش
يا بنت الناس بس انتى كدا مش ناويه على عيشه
عيشه ؟ هى دى عيشه ؟؟
و فضلت يا بيه على الاسطوانه دى ليل و نهار و انا افوت عشان خاطر ولادى لغايه ما فى يوم دخلت على توحا لقتها فرحانه اوى
خير انا شايفك فرحانه على غير العاده
ايوه يا مرسي عندى خبر ليك بمليون جنيه
خير أن شاءالله اوعى تكونى حامل تانى
لا لا حامل ايه ...بقولك خبر بمليون جنيه
طب قولى و فرحينى
انا ......
يتبع ......
#قصص_وحكايات_د_جيهان_عادل
#توحا(مستوحاه_من_قصه_حقيقيه)
#الجزء_الخامس
و فى يوم دخلت على توحا لقتها فرحانه اوى
خير انا شايفك فرحانه على غير العاده
ايوه يا مرسي عندى خبر ليك بمليون جنيه
خير أن شاءالله اوعى تكونى حامل تانى
لا لا حامل ايه ...بقولك خبر بمليون جنيه
طب قولى و فرحينى
انا لقيت لك سفريه حلوه اوى يا مرسي
سفريه ؟؟ و مين قالك انى عاوز اسافر اصلا ؟
امال هتدنك هنا بالكام مليم اللى بتاخدهم دول ؟؟ انت عندك ولد عاوز يتجوز و بنت عاوزه تتجهز ... دا غير أن احنا مش هنفضل طول عمرنا قاعدين ايجار
بس انا مش عاوز اسافر يا توحا ...انا مقدرش ابعد عنكم
لا يا مرسي لازم تسافر منا مش هفضل فى الفقر ده طول عمرى
و أن قلت لأ يا توحا
هقولك براحتك يا مرسي بس تطلقنى
ايه ؟؟ انتى بتقولى ايه يا توحا ؟ و هان عليكى تنطقيها
ايوه زى ما هنت عليك و سايبنى اتمرمط فى المصانع
انتى اللى صممتى على الشغل يا توحا انا مجبرتكيش
و انا نزلت ليه يعنى ؟ مش عشان انت مش مكفى طلباتى و طلبات ولادى ؟
كدا يا توحا ؟ بتعيرينى ؟
مبعايركش بس عاوزاك تفوق لنفسك و تاخد بالك أنت طالع لك ولاد عاوزين مصاريف
طب سبينى افكر يا توحا
و فكرت يا بيه و قدام ضغط توحا و إقناع زمايلى سافرت
لما سافرت لقيت الراجل اللى كان مسفرنى ضحك على و ملقتش الشغل اللى كنت طالع عليه
اتلطمت و بقيت اشتغل فى اى حاجه عشان اعرف ابعت فلوس لتوحا و العيال ... بقيت استخسر فى نفسي اللقمه عشان احوش فلوس و ابعتهالهم
فضلت على الحال ده سنتين..... تعبت اوى يا باشا و مكنتش عارف انزل عشان الاقامه و فى يوم كنت قاعد فى الجامع بعد صلاة العصر و عمال ادعى لربنا و اعيط و أقوله يارب ارزقنى يا رب عشان خاطر مراتى و اولادى
يارب أنا سايبهم معرفش ايه حصل فيهم و سايب بلدى ....يارب ابعت لى رزقى من عندك من حيث لا أدرى و لا احتسب
فجاه لقيت اللى بيطبطب على كتفى ....رفعت عينى و كانت متغرقه بالدموع عشان اشوف مين دا .... لقيت واحد بيقولى :
مالك يا ابنى بتعيط ليه ؟
مفيش يا عم الشيخ
قولى يا ابنى ...دا الناس لبعضها برده
الدنيا ضاقت على اوى يا عم الشيخ بقت أضيق من خرم ابره
لا اله الا الله ...هو انت متعرفش انها كلما ضاقت كل ما فرجت ....فرجه قريب و من قصده لن يخيب
و نعم بالله يا عم الشيخ
طب احكيلى حكايتك بقا يمكن اقدر اساعدك
حكيت للراجل حكايتى بدموعى من اول ما جيت البلد دى و شغلى فيها ...الراجل سمعنى و ابتسم و قالى مشكلتك بسيطه و حلها عندى باذن الله
صحيح يا عم الشيخ ؟ بتتكلم جد ؟
ايوه صحيح
احمدك يا رب و اشكر فضلك ...احمدك يا رب و اشكر فضلك
و اشتغلت فى شركه الراجل ووضعى اتحسن و عرفت اعمل اقامه ...بعت لتوحا مصاريفها و فرحت اوى و بقت تبعت لى جوابات انى ابعت لها مرتبى كله عشان تشترى شقه لينا و لأولادنا
كنت كل ما اقولها عاوز انزل وحشتينى ووحشنى اولادى كانت تقول اصبر على ما نجيب اللى نفسنا فيه ....اصبر لمتعرفش ترجع تانى
و بقيت ابعت كل مرتبى عليها ...حتى اكلى و شربى كان على حساب الشركه مكنتش بصرف منه مليم علشان مراتى تحوش تمن الشقه و العفش الجديد زى ما كانت مفهمانى
قعدت على الحال ده سبع سنين و كل ما اقولها عاوز انزل يا بنت الناس تقولى اصبر شويه ...اصبر شويه
لحد ما تعبت و قررت انزل من غير ما اقولها و اعملها لها مفاجاه
و فعلا نزلت و طبعا رحت على السكن القديم لقيت ناس تانيه ساكنه هناك و عرفت أن مراتى لسه سايبه الشقه من شهرين بس
وقفت محتار طب هعرف مكانها منين ؟ طب هى مقالتش لى ليه فى الجوابات انها عزلت لشقتنا الجديده ؟؟ اكيد نسيت أو حبت تعملهالى مفاجاه
افتكرت سعاد جارتنا قلت يمكن تعرف سكننا الجديد
رحت خبطت عليها ....الست معرفتنيش فى الاول طبعا بقالى ٩ سنين غايب و شكلى اتغير خالص ...لما فكرتها بنفسي افتكرتنى و رحبت بى و قالت لى حاجه غريبه اوى
قالت لى كنت فين يا سي مرسي ؟ بقا كدا تسافر و تقول عدو لى ....مش حرام عليك تسيب البنيه دا كله ؟
قلت معلش يا ست سعاد اكل العيش مر
مر ايه اللى يخليك تغيب دا كله من غير ما تعرفهم عنك حاجه
من غير ما اعرفهم عنى حاجه ازاى ؟
ايوه و لا يعرفوا أن كنت حى و الا ميت ؟ مش حرام تعمل فيهم كدا ؟...و عيالك دول مش مسؤلين منك ...الست اتمرمطت اخر مرمطه و فى الاخر اتكسر عليها الايجار و عزلت من هنا
هو انتى بتتكلمى عن مين ؟ عن توحا مراتى ؟؟
ايوا اومال هكون بتكلم عن مين ؟
انا مش فاهم اى حاجه ....طب معلش يا ست سعاد انتى تعرفى عنوانهم الجديد؟
انا معرفوش اوى بس اسمع أنهم سكنوا فى مجاوره ٤٥ بس فين بقا معرفش بالظبط ...بس ممكن اعرف لك من واحده صاحبتنا كانت شغاله مع توحا و سرهم ما بعض
طب يا ريت يا ست سعاد تكونى عملتى فى أكبر معروف
طب استنى هسالهالك بالتليفون
طب معلش يا ست سعاد بالله عليكى متخليش صاحبتك دى تقول لتوحا انى جيت لانى عاملهالها مفاجاه
حاضر ... ثوانى هكلمها فى المحمول و اقولك
وقفت استنى الست على ما تخلص مكالمه و بقيت محتار فى كلامها طب هو ليه توحا مقلتش انى على اتصال بيهم و انى ببعت لهم مرتبى كله ؟؟ طب يمكن خايفه من الحسد و بتخزى العين عنها ؟ اكيد هو كدا
قطع تفكيرى صوت جارتنا سعاد
اتفضل يا ابو حماده العنوان اهو
متشكر اوى يا ست سعاد كتر الف خيرك
اخدت شنطتى و ركبت تاكسي و طلعت على العنوان الموجود فى الورقه ...و طول السكه و انا عمال اكلم فى نفسي و فرحان ...و عمال اقول هروح بقا على شقتى شقايا و عمرى و هشوف ولادى حماده و امنيه زمانهم كبروا ...يمكن اما يشوفونى ميعرفونيش بس انا عارفها من الصور ، الواد حماده شبهى بالظبط و امنيه طالعه لامها.... ...و هشوف توحا حبيبتى وحشتنى اوى بنت الايه
وصلت العنوان و طلعت السلم و انا فى منتهى الحماس
مكنتش اعرف المصيبه اللى مستنيانى يا سعاده البيه
يا ترى مرسي هيلاقى مصيبه ايه مستنياه ؟؟ و هيتصرف مع المصيبه دى ازاى ؟ دا اللى هنعرفه فى الجزء الجاى باذن الله تعالى
يتبع ....
#قصص_وحكايات_د_جيهان_عادل
#توحا(مستوحاه_من_قصه_حقيقيه)
#الجزء_السادس
اخدت شنطتى و ركبت تاكسي و طلعت على العنوان الموجود فى الورقه ...و طول السكه و انا عمال اكلم فى نفسي و فرحان ...و عمال اقول هروح بقا على شقتى شقايا و عمرى و هشوف ولادى حماده و امنيه زمانهم كبروا ...يمكن اما يشوفونى ميعرفونيش بس انا عارفها من الصور ، الواد حماده شبهى بالظبط و امنيه طالعه لامها.... ...و هشوف توحا حبيبتى وحشتنى اوى بنت الايه
وصلت العنوان و طلعت السلم و انا فى منتهى الحماس
خبطت على الباب فتح لى ابنى حماده اخدته فى حضنى ابنى حبيبي فين ماما ؟؟..... الواد خاف و دا انا كنت متوقعه طبعا لانه مشافنيش من زمان ...سمعت صوت راجل جاى من جوه
مين يا حماده
معرفش يا بابا ...واحد عاوز ماما
بابا ؟؟؟ بابا ايه ؟ دخلت على جوه زى المجنون لقيت الهانم قاعده بقميص نوم و حاطه قدامها طبق فاكهه و قاعده تقطع فيها و الباشا قاعد بالملابس الداخليه
اول ما شافتنى اتخضت جدا ووقفت مكانها
مممممرسي ...انت جيت هنا ازاى ؟؟
مين دا يا توحا ؟
انت اللى مين يا أخينا انت ؟ و ازاى تدخل على الناس فى بيوتهم كدا ؟؟
انا اللى مين ؟؟ انا جوزها يا اخويا ...انا صاحب الهلمه اللى انت فيها دى
جوزها ايه ؟ انت هتخرف و الا ايه توحا مراتى انا ...متفهمينى يا توحا فى ايه بالظبط ؟ و مين دا ؟
دا طليقى يا هانى اللى حكيت لك عنه
طليقك ازاى ؟؟ انا طليقك ؟؟ طلقتك امتى ؟ و فين ؟؟ و حكتيله ايه عنى ؟
مش انت اللى سافرت و سبتها بقالها تسع سنين متعرفش عنك حاجه ؟؟ نسيت ان عندك عيلين و جاى دلوقتى تقول مراتى و اولادى
انت بتقول ايه ؟؟ هى متعرفش عنى حاجه ...دا انا كنت بحرم نفسي من اللقمه عشانها و عشان اولادها
هنا ردت توحا بمنتهى البجاحه اخرررص امشي اطلع بره من شقتى انا متطلقه منك بحكم محكمه ...امشي من هنا لاجيب لك البوليس دلوقتى و اقول انك جاى تتهجم على
هى قالت كدا يا بيه و انا محستش بنفسي ..لقيت الدم بيغلى فى عروقى و لقيت نفسي بسحب السكينه اللى كانت على طبق الفاكهه و بديلها فى رقبتها ...بقيت اطعن فيها و احس ان كل طعنه بتخلص تعب سنين الغربه اللى ضيعتها على ....مدرتش بنفسي إلا و جوزها واقف بيصرخ قدام الباب و الجيران متجمعه و لقيت كذا راجل مسكونى و جسمى كله دم من دمها و اولادى عمالين يصرخوا
انت طعنتها ٢١ طعنه فى أماكن متفرقه من جسدها يا مرسي
محستش يا بيه ...و الله ما حسيت ...هى اللى قتلتنى لما استحلت شقايا و تعبى ...هى اللى قتلتنى لما نيمتنى الفتره دى كلها و راحت اتطلقت من غير ما تقولى ..و خدت فلوسي اتجوزت بيها ...هى اللى قتلتنى لما خلت عيالى تكرهنى و يقولوا لواحد تانى غيري يا بابا و انا اللى طافح الدم عليهم
بس كل اللى قلته ده يا مرسي ميدكش الحق انك تقتل نفس ...كان ممكن تاخد حقك بالقانون
قانون ؟ قانون ايه يا باشا ...القانون لا يحمى المغفلين اللى زى حالاتى
طب و اولادك يا مرسي ؟ مفكرتش فيهم هيعملوا ايه بعد ما قتلت امهم ؟؟
لا يا باشا ...مش عارف ولادى هيعملوا ايه ؟ بس ليهم رب اسمه الكريم
طيب يا مرسي ...عندك أقوال تانيه؟
لا ...لا معنديش
يتم حبس المتهم لمده خمسة عشر يوم على ذمه القضيه
خده يا عسكرى
و اخدونى و نزلونى على الحبس و منه على السجن الاحتياطى ...عقبال ما اتعرض على النيابه تانى و بعدين اتحول للجنايات
و هناك قابلت ضرغام ...مجرم عتيد الإجرام زى ما كان بيعرف نفسه ....
لاقانى قاعد فى حالى و عمال افكر فى اللى حصل معايا ...و ازاى توحا عملت فى كدا ؟ و ازاى ضحكت على كدا؟ و ازاى اتحول الحب لخدعه كدا؟ انا هتجنن
مالك يا بلدينا عمال تكلم نفسك ليه ؟
بصيت للصوت اللى بيكلمنى لقيت واحد شبه الضرفه واقف قدامى شنبه وأكل نص وشه و أسنانه سودا من شرب الدخان ...شعره اكرت و مجعد شبه الخواتم. لابس فى ايده الشمال خاتم كبير بفص احمر و فى رقبته سلسله جنزير ...كنت مستغرب أنه لابسهم لأنهم خدوا مننا كل حاجه و احنا داخلين
الراجل مد ايده يسلم على و قالى
محسوبك ضرغام و بيقولولى الواصل علشان اقدر اوصل لاى حاجه انا عاوزها لو حطيتها فى دماغى ...انت بقا اسم الكريم ايه و جاى فى ايه ؟
اسمى مرسي و جاى فى جريمه قتل
قتل كدا مره واحده ....ليه كدا ؟ دا انت باين عليك راجل طيب و ابن ناس ...ايه اللى رماك الرميه دى ؟ و الا انت مظلوم و الا حكايتك ايه بالظبط ؟
لا انا اللى قتلت
طب ما تحكيلى يمكن اعرف اساعدك
هتساعدنى ازاى ؟؟ التهمه لابسانى لابسانى
بس احكى بس ....ما انت قاعد فاضى وراك ايه يعنى
و حكيت لضرغام الواصل كل حكايتى من اول ما رحت اشتغل عند عم احمد لغايه ما قتلت توحا و خدونى على النيابه
الراجل قعد يسمعنى و هو بيشرب سيجاره حشيش كد ا فى ايده و يهز رأسه و بعد ما خلصت الحكايه قالى
يااااا انت صعبت على اوى ...انت مغلطتش فى اللى عملته ...اى حد مكانك كان عمل كدا و اكتر ...انا لو مكانك كنت قطعتها و رميتها لكلاب السكك
يا ريتنى ما عملت كدا يا ضرغام ....طب انا استفدت ايه من موتها ؟ و دلوقتى مش عارف ولادى هيحصل فيهم ايه ؟
متقلقش يا مرسي انت راجل جدع و انا قررت اساعدك
هتساعدنى ازاى يا ضرغام ؟
شوف يا سيدى ......
يا ترى ضرغام هيساعد مرسي ازاى ؟؟؟ دا اللى هنعرفه الجزء الجاى باذن الله تعالى
يتبع .......
#قصص_وحكايات_د_جيهان_عادل
#توحا(مستوحاه_من_قصه_حقيقيه)
#الجزء_السابع
متقلقش يا مرسي انت راجل جدع و انا قررت اساعدك
هتساعدنى ازاى يا ضرغام ؟
شوف يا سيدى اللى عملته ده فى عرفنا اسمه مجدعه و الراجل الجدع احنا نقدره و نقف معاه لحد ما نوصله بر الأمان
طب يعنى هتوصلنى ازاى لبر الامان ؟
عيب لما تسأل الواصل يوصلك ازاى ....ارتاح انت بس و سيب الموضوع ده على ...انت هتتعرض تانى على النيابه امتى ؟
كمان عشر ايام
حلو اوى ...انا عاوزك لما تروح النيابه تنكر اللى قلته فى المره الاولى خالص و تقول إن ظابط المباحث هو اللى هددك و خلاك تقول إن انت اللى قتلتها
ازاى يا ضرغام ...دا انا معترف و كان فى شهود كمان
شهود مين ؟؟
جوزها الجديد و اولادى و الجيران
دول كلهم شافوك و انت بتقتلها ؟
لأ ...مش كلهم
امال مين اللى كان واقف و انت بتقتلها بالظبط حاول تفتكر لى
كان واقف اللى اسمه هانى ده اللى هى اتجوزته
طب و اولادك ؟
لا ولادى كانوا دخلوا جوه لانى فاكر أن توحا اول ما ابتديت اتكلم معاها راحت شاخطه فى العيال و قالت لهم على جوه يلا
طب حلو اوى ....يعنى انتوا كنتوا تلاته فى الصاله صح
ايوه بس هانى بعد كدا طلع على بره و قعد يصرخ و يقول مراتى اتقتلت...طليقها قتلها و لم على الناس
ملناش دعوه دلوقتى بالجيران...الجيران جم بعد ما الجريمه حصلت صح ؟؟
ايوه صح
يبقى خلاص انت بقا هتعكس اقوالك ...يعنى هتقول انك لما رحت و فهمت هانى ده على الحكايه ...الدم فار فى دماغه و قتل توحا قدامك
طب ما بصمات اديا على السكينه يا ضرغام
لا ما انت هتقول انك حاولت تاخد من ايده السكينه بسرعه لما لقيته عمال يطعن فيها و اول ما نجحت انك تاخد السكينه هو جرى على الباب ينادى الجيران عشان يلبسك التهمه
ازاى كدا يا ضرغام ؟ طب و وكيل النيابه هيصدقنى ؟؟
يصدقك ميصدقكش ميهمش المهم أن احنا هنرمى بلانا على الجدع ده و نجره معانا فى القضيه ...هو انت مش واخد بالك أن الجدع ده هو اللى هيورثك بالحيا ....دا له ربع شقة المرحومه و الباقى لعيالك القصر ...يعنى بالصلاه على النبى هيكوش على كل حاجه لوحده و مش بعيد يودى ولادك ملجأ عشان يخلص منهم
يا خبر اسود ...كلامك صح يا ضرغام طب و بعدين ؟
و لا قبلين ...هو انت فاكر أن الموضوع هينتهى بكدا و هو هيتحبس ؟ لا ....اللى بنعمله ده عشان نجره و نعطله عن اى حاجه بيخطط ليها على ما نعمل احنا اللى فى دماغنا
طب و ايه اللى فى دماغك يا ضرغام ؟
اللى فى دماغى كبير لو عرفته ممكن تخاف ..انا مش عاوز منك غير اللى قلت لك عليه و بس لا تزود حرف و لا تنقص حرف . و انا هشوف لك واحد محامى من حبايبنا يحضر معاك التحقيق المره الجايه و يفهمك تقول ايه بالظبط عشان متعكش الدنيا قدام وكيل النيابه ...و بعدين انت خايف من ايه يعنى ؟
عندك حق هخاف من ايه؟ ال ضربوا الاعور على عينه
حاضر يا ضرغام هعمل اللى انت عاوزه منى
و فعلا بعد عشر ايام اتعرضت تانى على النيابه و حضر معايا الاستاذ سلامه المحامى راجل قصير و له شنب زى بتاع هتلر كدا و شكله محامى عقر و تقيل قعد يحفظنى اول ما ادخل على وكيل النيابه أقوله ايه بالظبط و وصانى أن عينى تبقى عليه عشان لو خرفت فى اى كلمه هو هيتدخل و يصححها لى
و فعلا اول ما دخلت طلبت من وكيل النيابه انى ادلى باقوال مقولتهاش المره اللى فاتت
وكيل النيابه فتح محضر جديد و قلت فيه كل اللى ضرغام و المحامى قالولى عليه
و كيل النيابه يجيب فى شمال يمين و انا مصمم على اللى قلته و الاستاذ سلامه يبص لى كدا بمعنى هايل اثبت على كلامك....وكيل النيابه بدأ يسالنى مره تانيه لما لاقانى مصمم على كلامى :
و انت مقلتش الكلام ده قبل كدا ليه يا مرسي ؟
اصل ظابط المباحث هددنى يا باشا و خلى المخبرين يدولى علقه و خلونى اعترف على نفسي
طب و ظابط المباحث هيستفيد ايه من كدا ؟
معرفش يا باشا اساله هو ...يمكن عشان انا غلبان و مليش حد عاوز يلبسنى التهمه و خلاص
طب و بصماتك اللى على السكينه يا مرسي
منا قلت لسعاتك انى حاولت اخد السكينه من اللى اسمه هانى ده عشان يبطل ضرب فيها
طيب يا مرسي عندك أقوال تانيه؟
ايوا يا باشا توحا مراتى و انا معايا اللى يثبت انى كنت براسلها و ببعت لها فلوس طول السنين ده يعنى حكايه جوازها من الجدع ده باطله و انا جوزها الشرعى ....يعنى الجدع ده ملوش يقعد فى شقتى و خاصة بعد اللى عمله ده ...كمان عاوز اعرف مصير عيالى يا باشا مش معقول هيدنهم مع الراجل ده
لا عيالك مش معاه يا مرسي
امال راحوا فين يا سعادة البيه ؟
عيالك فى دار رعاية الامل بالعاشر من رمضان لان مفيش حد عرض ياخدهم
ايه ؟ دار رعايه و انا لسه على وش الدنيا ؟ معلش يا سعادة البيه ممكن ابعت لحد من اهلى يروح يستلمهم
احنا بعتنا لاخواتك و للاسف محدش منهم رضى يستلمهم يا مرسي
بقا كدا ؟؟ ماشي يا باشا
هنا نطق المحامى و طلب من وكيل النيابه التحفظ على شقه توحا لحين الفض فى النزاع القائم عليها
وكيل النيابه ايد طلب المحامى .
خرجت من النيابه بعد ما وكيل النيابه ادانى تجديد خمستاشر يوم تانين و انا بلعن اليوم اللى شفت فيه توحا و بترحم على ابويا و امى اللى لو كانوا عايشين كانوا اخدوا ولادى ....اما اخواتى فأنا مش زعلان منهم لانى اتخليت عنهم من زمان و فضلت توحا عليهم
ركبنا عربيه الترحيلات و انا غرقان فى التفكير و مش عارف ولادى حاصل معاهم ايه دلوقتى ؟ و شقايا و تعبى اللى راح لواحد غريب قاعد فيه دلوقتى ...بقيت اقول لنفسي يا ريتنى قتلت اللى اسمه هانى ده هو كمان مع توحا ....اكيد برده هو غواها و شجعها على الطلاق منى ..و فى الاخر كوش على كل حاجه ....اه يا نارى لو تقع تحت ايدى يا هانى ...مش هرحمك انت كمان .و فجاه و انا ع الحال ده لقيت .......
يا ترى مرسي لقى ايه ؟ و هل ده هيساعده فى حل قضيته و الا لأ ؟ دا اللى هنعرفه فى الجزء الجاى باذن الله تعالى
يتبع ....
#قصص_وحكايات_د_جيهان_عادل
#توحا(مستوحاه_من_قصه_حقيقيه)
#الجزء_الثامن
ركبنا عربيه الترحيلات و انا غرقان فى التفكير و مش عارف ولادى حاصل معاهم ايه دلوقتى ؟ و شقايا و تعبى اللى راح لواحد غريب قاعد فيه دلوقتى ...بقيت اقول لنفسي يا ريتنى قتلت اللى اسمه هانى ده هو كمان مع توحا ....اكيد برده هو غواها و شجعها على الطلاق منى ..و فى الاخر كوش على كل حاجه ....اه يا نارى لو تقع تحت ايدى يا هانى ...مش هرحمك انت كمان .و فجاه و انا ع الحال ده لقيت العربيه اللى راكبنها فرملت فجأه ببص من شباك العربيه الصغير لقيت ناس مسلحه محاوطيين العربيه و مفيش لحظات و ضرب النار اشتغل و فجاه لقيت باب العربيه بيضرب على القفل من بره نار وبيتفتح الباب و لقيت اتنين ملثمين معاهم رشاشات بيقولولنا مين مرسي ؟
انا ااا
انزلوا
نزلنا كلنا و لقيت كل اللى معايا طلعوا يجروا ...واحد من الملثمين قالى تعالى معانا
اخدونى فى عربيه مقفوله و قعدت العربيه ماشيه اكتر من خمس ساعات لحد ما وصلنا لمكان نزلونى فيه و مشيوا
اتنين استلمونى و دخلونى بيت ...اول ما دخلت لقيت الاستاذ سلامه المحامى قدامى
ايه دا ؟ هو انت اللى خاطفنى ؟
لأ مش انا
امال مين ؟
الواصل هو اللى أمر بكدا و هما كلهم يومين و يكون هنا ..قضيته بسيطه و هيخرج منها لما يتعرض على النيابه بعد يومين
طب ليه مقليش ؟
انا معرفش حاجه ...هو هيفهمك على كل حاجه لما يشوفك ...انت دلوقتى ضيفنا و الواصل أمرنا أننا نضايفك و نقوم معاك بأعلى واجب ...لو عايز اى حاجه نجيبهالك
طب كنت عاوز اعرف انا فين ؟
انت فى حته تبع الصعيد و اكتر من كدا مقدرش اقولك
تمام يا استاذ سلامه
اتفضل تعالى عشان اوريك الاوضه اللى هتنام فيها و فى اتنين هنا هيشوفوا طلباتك و هيجيبوا لك العشا
ممكن اعرف انتوا بتعملوا معايا دا كله ليه ؟
انا مبعملش معاك حاجه ...اللى بيعمل هو ضرغام ..و هو الوحيد اللى يقدر يقولك بيعمل معاك كدا ليه
هزيت راسي بالموافقه و طلعت مع المحامى اشوف الاوضه و بعد شويه لقيت واحد داخل على بصنيه اكل
اتعشيت و انا بفكر الواصل ده بيعمل معايا كدا ليه ؟ معقوله عشان صعبت عليه أو استجدعنى زى ما بيقول يعمل معايا دا كله ؟
على العموم اكيد هعرف
قعدت تلات ايام على الحال ده...كان مسموح لى أخرج فى البلكونه أو اطلع على السطح غير كدا لأ
بعد التلات أيام ما عدوا لقيت ضرغام داخل على و بياخدنى بالحضن ...
كفاره يا مرسي
كفاره يا ضرغام
عامل ايه يا مرسي ؟ مبسوط و الا الرجاله مقصرين معاك فى حاجه ؟
لا ابدا الرجاله زى الفل و قايمين بالواجب و زياده
طيب الحمد لله ...
بس كنت عاوز اعرف انا تقعد هنا لحد امتى و ايه الخطوه اللى بعد كدا ...يعنى انا هفضل كدا محبوس هنا ؟ و هعمل ايه ؟ و كنت عاوز اعرف انت عملت معايا ليه كدا ؟
استنى استنى مالك مستعجل كدا ليه ؟ انا هفهمك كل حاجه
اولا انت مش محبوس و لا حاجه لو عايز تخرج أخرج بس لازم تغير فى شكلك شويه عشان اكيد الداخليه هتنزل نشره بأوصافك
اغير شكلى ازاى يعنى ؟
يعنى تحلق شعرك مثلا خالص ...تربى شنبك تلبس جلابيه كدا يعنى ...بص ملكش دعوه انت انا هظبط لك كل حاجه
طيب انت عملت معايا دا كله ليه؟
استجدعتك يا جدع ...و عاوزك تشتغل معايا
اشتغل معاك ايه ؟
هتشتغل ايه يعنى ؟ انت مش قلت لى انك حداد
ايوه
و اشتغلت شويه فى تجميع السيارات ؟
ايوه
هو ده اللى عاوزه منك
مش فاهم
يعنى عاوز تشتغل معايا فى السيارات بس مش تجميع بقا ...فك و لمؤاخذه
لأ فهمنى اكتر
الله متزعلنيش منك بقا ...دا انا بقول عليك مجدع و تفهمها و هى طايره ..... احنا هنجيب لك عربيات و انت تفككهالنا و ملكش دعوه بأى حاجه بعد كدا
طيب انا موافق بس على شرط
ايه هو الشرط ؟
انا عاوز ولادى
سهله ...اجيب لك ولادك
و عاوزك تخرجنى بره مصر
الله .....عاوز تسيبنا ليه بقا ؟
انا هشتغل معاكم و هعمل اللى تقولولى عليه بس تخرجنى بره مصر دا شرطى الوحيد
و هو كذلك ...هخرجك بس هتشتغل معانا سنه الاول
ماشي و انا موافق
استبينا
بعد كدا بدأت اعمل اللى قالى عليه ضرغام ...حلقت شعرى و ربيت شنبى و لبست جلابيه و لاسه و ضرغام ضرب لى بطاقه باسم فريد احمد ممدوح و قالى من هنا و رايح انسى انك مرسي خالص ..انت دلوقتى فريد
طب كنت عاوزك فى موضوع يا ضرغام
عاوز ايه يا فريد ؟
انا كل ما بفكر أن شقايا راح للى اسمه هانى ده دمى بيتحرق اوى و ببقى نفسي اولع فيه
طب و انت عاوز ايه دلوقتى يا فريد ؟
عايز شقتى ... عاوز عفشي
طيب انا هقولك بقا اللى مكنتش عاوز أقوله لك عشان متضايقش
انت بعد ما قلت اللى قلته فى تحقيق النيابه ... وكيل النيابه استدعى اللى اسمه هانى ده وواجه بالكلام اللى انت قلته و طبعا التانى أنكر و طلع منها زى الشعره من العجين
الا صحيح يا ضرغام انت ليه خلتنى اقول ان هانى هو اللى قتل و انت مخطط انك هتهربنى ؟
علشان متخفش و متتهزش و انت واقف قدام وكيل النيابه ...لو كنت قلت لك كنت ممكن متوافقش أو تعمل اى حاجه تخليهم يعملوا عليك حراسه مشدده ...انا حبيت اجذب انتباهك لحاجه تانيه خالص و تفتكر انى هحلها معاك قانونى فتقوم تتعامل زى ما اتعاملت كدا بالظبط
انت مش سهل يا ضرغام
طبعا انا مش سهل انا الواصل يا فريد ....المهم بقا كنت عاوز اقولك أن لما وكيل النيابه واجه اخينا بأنك كنت على اتصال بتوحا و انك كنت بتبعت لها فلوس طول المده دى كلها و أن بكدا جوازه منها بقى باطل و أنه ملوش الحق فى شقه الزوجيه
طلع ايه بقا ؟؟؟ أن الست توحا اللى يجحمها مطرح ما راحت كاتبه الشقه باسمه و كل العفش اللى فى الشقه باسمه
انت بتقول ايه يا ضرغام ؟
اه و الله زى ما بقولك كدا ....بس انا مرضيتش اقولك من ساعتها عشان متتغمش
اه يا اولاد الكلب ...اه يا نارى اللى يحكمنى عليه دلوقتى كنت شربت من دمه هو كمان
أهدى ...أهدى يا فريد كل شيء و له حل
يا ترى ضرغام هيحل لمرسي قصدى فريد الموضوع ده ازاى ؟؟؟ دا اللى هنعرفه فى الجزء الجاى باذن الله تعالى
يتبع....
#قصص_وحكايات_د_جيهان_عادل
#توحا(مستوحاه_من_قصه_حقيقيه)
#الجزء_التاسع
طلع ايه بقا ؟؟؟ أن الست توحا اللى يجحمها مطرح ما راحت كاتبه الشقه باسمه و كل العفش اللى فى الشقه باسمه
انت بتقول ايه يا ضرغام ؟
اه و الله زى ما بقولك كدا ....بس انا مرضيتش اقولك من ساعتها عشان متتغمش
اه يا اولاد الكلب ...اه يا نارى اللى يحكمنى عليه دلوقتى كنت شربت من دمه هو كمان
أهدى ...أهدى يا فريد كل شيء و له حل
حل ازاى بس ما خلاص تعبى و شقايا راح
لا مراحش و لا حاجه
هتعمل ايه يعنى ؟
مش عيب لما تسأل الواصل هيعمل ايه ؟؟ انا بعون الله هجيب لك حقك كله بس لينا الحلاوه
طبعا يا ضرغام ...طب و اولادى ؟
ولادك فى الحفظ و الصون احنا لنا حبايبنا فى دار الامل و بيجبولى أخبارهم اول باول و أن شاء الله هجيبهم لك زى ما وعدتك
صحيح يا ضرغام ...طب انا نفسي اشوفهم
لا مينفعش ...انت عاوز تودينا فى داهيه و الا ايه ؟
طب خلاص عاوز صور ليهم
دى سهله هجيب لك صور حاضر
تانى يوم لقيت ضرغام جايب لى صور لاولادى ...قعدت ابوس فيهم ما هم وحشنى اوى ...انا ملحقتش اخدهم فى حضنى و اشبع منهم ....انا رضيت اشتغل مع ضرغام علشان وعدنى أنه هيجيبهم لى و يخرجنى بره البلد خالص ....بس يا ترى امهم قايلاهم على ايه ؟؟ و يا ترى هيسامحونى انى قتلت امهم ؟؟ الاطفال بتنسي و طبيعتها متسامحه و انا لما احكيلهم على اللى امهم عملته معايا اكيد هيعذرونى و يسامحونى
ابتدى بعد كدا ضرغام يجيب لى الشغل اللى قالى عليه ....شغل كتير اوى تقريبا مكناش بنرتاح عربيات اخر موديل كانت تيجى و تتفكك و تتباع قطع غيار و طبعا فى تجار كتير بياخدوا الحاجات دى لأنها تعتبر بتراب الفلوس
قعدت على الحال ده حوالى تلات شهور شغل مستمر و كل ما اسال ضرغام عمل لى ايه فى حكايه الشقه و الا العيال يقولى لسه ..اتقل ...كل حاجه بوقتها
لغايه ما فى يوم جالى وائل اللى بيشتغل معايا و قالى بقولك ايه يا فريد ...انا سمعت أن البلد دى فيها مولد الايام دى و الليله الكبيره انهارده
طب و احنا مالنا يا وائل
يا جدع تعالى نرفهه عن نفسنا شويه
لا يا عم انا يدوب انام عشان عندى شغل كتير اوى الصبح
يا عم دا هى ساعه واحده هنفك عن نفسنا و نتفرج على المولد
لا روح انت يا وائل انا مليش نفس أخرج اصلا
برده هتدنك ماسك صور ولادك لحد ما تروح فى النوم ؟
هو انا لى غيرهم يا وائل ؟
طب على الطلاق من الوليه لتيجى معايا ...ايه يا جدع انا عازمك
طب و بتحلف بالطلاق ليه بس ؟؟؟ هو انت متجوز اصلا يا وائل ؟
اه يا جدع متجوز امال ايه ....يعنى شحط قدامك كدا و لسه متجوزش طب ازاى ؟
و عندك اولاد على كدا ؟
عندى يا اخويا اربع بنات ...الوليه خلفتها كلها بنات لما قرفت منها و سبت لها البيت و هجيت
طب و هى ذنبها ايه ؟ و بعدين مالهم البنات يعنى ؟
هى المسؤله عن مجايب البنات امى قالت لى كدا ....البنات حملهم تقيل يا فريد يا اخويا و مشاكلهم كتير ...البت زعلانه مع جوزها ...البت جوزها ضربها.... البت خلفت.. البت تعبانه فى المستشفى... البت البت .....و مش هتخلص هتدنك شايل همها لحد ما تموت ....إنما الولد بقا هو اللى يشد ضهرك و يوصل اسمك فى الدنيا دى و يشيلك وقت كبرك
ياااا فى لسه ناس بتفكر بالتخلف ده ؟
احترم نفسك يا فريد ...انا متخلف ؟؟
ايوه متخلف لما تفكر بالطريقه دى تبقى متخلف
بتعيدها تانى يا فريد ؟ انا كدا هزعل منك و الله
يا جدع روح ....هو فى احسن من البنات دا الرسول بيقول عليهم المؤنسات الغاليات ...دا انت معاك كنز من كنوز الجنه و انت مش عارف قيمته
كنز ازاى يعنى ؟
هو انت متعرفش أن اللى يربى تلات بنات تربيه كويسه و يعلمهم يدخلوه الجنه
لا معرفش
طب و أن قلت لك كمان لو بنتين او بنت ممكن تدخلك الجنه إذا أحسنت تربيتها
يا سلام
اه و الله
دا على اساس بقا أن احنا داخلين الجنه يا عم فريد ...فوق يا فرى و بص حواليك احنا حراميه و بنشتغل مع حراميه و انت قتال قتله
ربنا غفور رحيم يا سيدى ...مين قالك أن احنا هنفضل كدا مش يمكن فى يوم ربنا يتوب علينا و نبقى ناس كويسه
يارب يا اخويا ...هو حد يكرهه ....هو انت فاكر انى مبسوط انى حرامى بسرق عربيات الناس كدا يا فريد ؟
انا ابن ناس بس الظروف هى اللى اضطرتنى اشتغل الشغلانه دى ...و محدش من اهلى يعرف عنى انى حرامى ...كلهم فاهمين انى شغال فى شركه فى شمال سينا و بروح لهم كل كام شهر
طب و ليه متوبش مدام بتقول انك ابن ناس كدا و الوضع ده مش عاجبك
هههههه و ليه متوبتش انت ؟
انا عندى ظروف و هشتغل مده معينه بعدها هسيب البلد دى و همشي و هبطل اللى بعمله ده
ههههههههه ضحكتنى و الله يا فريد ...و الله انت غلبان اوى...و مين بقا هيسيبك تمشي
دا اتفاقى مع ضرغام
اتفاقك ؟؟؟ مفيش حاجه اسمها اتفاق ...ضرغام لا يمكن يسيبك تمشي ...انت بالنسبه له كنز
انت بتقول ايه ؟ لا انت متعرفش ضرغام كويس
لأ انت اللى متعرفوش خالص ...انا بقولك أن ضرغام مش زى ما انت متصور ...ضرغام مجرم فاهم يعنى ايه مجرم
انت خوفتنى اوى يا وائل
ما انت لازم تخاف يا فريد ...ضرغام مش اهبل و لا اى كلام ...ضرغام حاسب حساب كل حاجه بيعملها معاك
طب ما يمكن انا حاله خاصه و أنه استجدعنى زى ما قال
ههههههههه يا عم بطل هطل ...يعنى انت عاوز تفهمنى أنه قوم لك محامى و عمل عمليه الخطف دى و اللى اتكلفت الوفات و بعدين نقلك هنا و عمل لك بطاقه جديده كل ده عشان استجدعك ....لا طبعا
انت بتقول ايه ؟؟
انا بقولك على اللى حصل معايا قبل منك و لسه لغايه دلوقتى بدور فى الساقيه و مش عارف اخلص من ضرغام
ليه هو انت حصل معاك ايه انت كمان ؟؟
بلاش تقلب على المواجع الله يرضى عليك
لا عيب يا جدع هو انت خايف منى
لا مش مساله خوف بس لو ضرغام عرف انى حكيت لك هيبقى نهارى مش معدى ...دا يمكن يقتلنى فيها
طب احكى و انا وحيات ولادى ما هنطق بكلمه واحده
طيب تعالى نخرج بره المكان ...هحكيلك و احنا رايحين المولد
انت مصمم برده على حكايه المولد دى ؟؟
ايوه بالله عليك انا مخنوق و عاوز اروح عن نفسي شويه
طب حاضر يا سيدى هغير هدومى و اجى معاك أما نشوف اخرتها ايه ؟
طب يلا
خرجت مع وائل و بدأ يحكيلى قصته مع ضرغام
انا يا سيدى ....
يا ترى ايه حكايه وائل مع ضرغام ؟ و هل الحكايه دى هتفيد فريد ؟ دا اللى هنعرفه فى الجزء الجاى باذن الله تعالى
يتبع ......
#قصص_وحكايات_د_جيهان_عادل
#توحا(مستوحاه_من_قصه_حقيقيه)
#الجزء_العاشر
انت مصمم برده على حكايه المولد دى ؟؟
ايوه بالله عليك انا مخنوق و عاوز اروح عن نفسي شويه
طب حاضر يا سيدى هغير هدومى و اجى معاك أما نشوف اخرتها ايه ؟
طب يلا
خرجت مع وائل و بدأ يحكيلى قصته مع ضرغام
انا يا سيدى كنت زى كتير من الشباب عيل طايش و ماشي مع شله فاشله و كان دايما ابويا يقولى بلاش يا ابنى العيال دى ....العيال دول اخرتهم وحشه
بس انا مصدقتش و كنت راكب دماغى و كنت اقول عليه انه كبر و خرف و كنت اعند معاه لدرجه انى منفعتش فى مدارس و خرجت من تالته إعدادى
بقيت امشي مع العيال دول و ابتدأو يعلمونى حاجات مش كويسه
مش كويسه ازاى بقا ؟
يعنى مثلا فى مره الواد عصفور صاحبى جالى و قالى عاوزينك فى حوار حلو و لك لقمة عيش حلوه
كنت ساعتها متخانق مع ابويا و مبدينيش فلوس
قلت له انا معاك فى اى حوار
لقيت الواد فرح اوى و عينه لمعت و قالى طب تمام ميعادنا الساعه اتنين بالليل
طب و هنعمل ايه اتنين بالليل دى يا عصفور ؟
الله ...انت مش قلت انك معانا فى اى حوار
قلت ايوا
طب خلاص هتعرف كل حاجه لما نتقابل
طب و فى حد معانا فى المصلحه دى ؟
ايوه معانا حماده و تيتو
تمام
جه الليل اتسحبت و خرجت من البيت على الساعه واحده و نص و رحت قابلتهم و سألتهم على فين يا جماعه ؟
قالوا متقلقش
خدونى و قعدوا ماشيين لما وصلنا المقابر
هنا ...وصلنا
وصلتوا فين ؟؟ انتوا جايين هنا تعملوا ايه ؟؟
احنا هنجيب امانه كدا لبت طالبه غلبانه
هتجيبوها من هنا ؟؟؟
ايوه ...هى لها مكان غير هنا ؟
هو ايه الحكايه بالظبط يا جماعه انا مش فاهم حاجه
مفيش حكايه و لا حاجه يا لولو ...احنا هنستقضى جثه لطالبه فى كليه الطب
انتوا بتقولوا ايه يا جدعان ؟ طب و حرمة الميت ؟؟
الله ما احنا بنخدم العلم يا جدع
طب و انتوا عرفتوا البنت دى منين اصلا ؟
لا احنا منعرفهاش شخصيا بس فى راجل جدع اوى هو اللى جاب لنا المصلحه دى
راجل جدع ؟ مين ده و عرفتوه ازاى ؟
بطل كلام و يلا قبل ما الفجر يأذن
لا انا مليش فى الكلام ده
يا عم انت مش هتعمل حاجه انت بس هتقف تراقب من بعيد احسن الغفير يجى و يقفشنا
طيب بس هاخد كام فى المصلحه دى؟
يا عم مش هنختلف الراجل هيدينا الفين جنيه هنقسمهم علينا احنا الاربعه ...يعنى كل واحد هياخد خمسميه
ماشي
ووقفت اراقب لهم الطريق و اخدت الفلوس تانى يوم و كنت فرحان بيها اوى ...كانت اول مبلغ كبير كدا اتحصل عليه و اتكررت العمليه و الفلوس جريت فى ايدى
و فى يوم طلبت من اصحابى يعرفونى على صاحب الشغل ده ...و كانت المفاجأة
مفاجأة ايه بقا ؟
المفاجأة هى ضرغام .... صاحب الشغل كان ضرغام و لما اصحابى قالوله انى عاوز اشوفه رحب اوى و قالهم تعالوا انا عازمكم كلكم على سهره حلوه فى شقه ...و اداهم العنوان
رحنا الشقه انبهرنا باللى شوفناه ....حاجه كدا زى افلام السيما ...ناس لابسه ملابس سهره ...ستات عريانه و رجاله سكرانه ...بودى جاردات على الباب
اول ما دخلنا اصحابى راحوا على تربيزه قمار من اللى بنشوفها فى الافلام و راحوا على ضرغام سلموا عليه و عرفونى عليه
ضرغام رحب بى اوى و قالى انا بسمع من صحابك عنك ...انك راجل جدع و انا بحب الجدعان
الله دا قالى نفس الكلمه
ما هى اسطوانه واحده يا فريد ....المهم فى الليله دى ضرغام علمنى القمار و شرب الخمره ...و اللى فهمته بعد كدا أن ده أسلوبه مع كل حد بيجى يشتغل معاه عشان يقدر يسيطر عليه
و بقيت كل ليله و التانيه اروح أسهر عند ضرغام بالفلوس اللى بنكسبها من بيع الجثث ...فى الاول كسبت مبلغ محترم من القمار ...بعد كدا ابتديت اخسر و اخسر و ابتديت اتدين و اكتب على نفسي شيكات و طبعا فلوس الجثث مبقتش تعمل حاجه و هنا عرض على ضرغام انى انزل مع رجالته نسرق شقق ووافقت علشان اسد اللى على
و الفلوس جريت فى ايدى و قللت من قعدة الترابيزه ....فى الفتره دى اتجوزت ام البنات و فضلت على الحال ده كام سنه و ربنا كان ساترها معايا
لحد ما فى يوم اغبر كنت رايح أسرق شقه و المفروض انها فاضيه ....لأننا مراقبينها بقالنا شهر ...دخلت الشقه و طبعا بيبقى فى نادورجى مستنينى على السلم قرب الباب و نادورجى تانى على باب العماره ...
اول ما دخلت الشقه لقيتها من الشقق التقيله اوى .. أصل الشقه التقيله بتبان برده
و بتبان ازاى ؟ عشان نستفيد يعنى ؟؟؟
بتبان من العفش الغالى ...من التحف الغاليه...الشمعدنات الفضه ...الفازات الحلوه
اول ما شفت الحاجه فرحت اوى و قلت فى نفسي دا بينها ليله عسل الليله دى ...و دخلت على اوضه النوم و منها على الدولاب مباشرة ...بفتح الدولاب لقيت علبه زى اللى بنشوف الهوانم بتطلعها فى الافلام
فتحت العلبه لقيت فيها كميه دهب قول و لا اتنين كيلو دهب ....اول ما شفت الدهب اتوهمت و مبقتش مصدق نفسي ....لسه بفتح شنطتى عشان أفضى الدهب فيها لقيت ست عجوزه مسكت فى رقبتى ...الست بدأت تصرخ و تقول حرامى ...انا لما شفتها جالى هلع و حطيت ايدى على بوقها ...الست بدأت تعافر و عضتنى فى ايدى ..اتغظت موت قمت زاققها وقعت على الأرض دماغها اتفتحت و قطعت النفس
انا شفت كدا ركبى سابت و مبقتش عارف اتصرف ازاى
رنيت على ضرغام و حكيت له بسرعه على اللى حصل و أن الست تقريبا ماتت
قالى متخفش خد الحاجه و امشي انت و النادورجيه و انا هبعت اللى ينضف وراكم
و فعلا عملت زى ما ضرغام قالى و اخدت الدهب و رحنا على المكان اللى بنتجمع فيه لما تكون فيه سريقه
ضرغام جالى بعد ساعه و قالى أن الست فعلا ماتت و للاسف الست كانت حاطه كاميرا مراقبه و كل حاجه اتصورت و ان جريمة السرقه و القتل واضحه فى الفديو
هو قالى كدا و مكنتش قادر اقف على رجليا
بس هو طمنى و قالى عيب عليك ...انت شغال مع رجاله انا جبت الفيلم اللى صورته الكاميرا...و اخدنا الست و دفناها فى الصحرا و اللى عرفناه أن الست دى وحدانيه ملهاش قرايب الا من بعيد و كانت مسافره و لسه راجعه. ... و تقريبا كدا محدش عرف برجوعها يعنى محدش هيقدر يوصلك
طبعا لما قالى كدا كان هاين على اوطى على ايده ابوسها
بعد كدا ضرغام اقنعنى انى لازم أبعد فتره عشان الشوشره و كدا ...و عشان لو حد شافنى و انا خارج من عند الست و الا حاجه ...و قالى هغيبك فى الصعيد فتره كدا و بعدين ارجعك تانى
و طبعا حالتى النفسيه وقتها مكنتش تسمح لى بالرفض..... ووافقت على أمل انى هقعد شهرين تلاته و ارجع
لكن الشهرين بقوا سنين و لما حاولت ارجع لقيت ضرغام معاه تسجيل الكاميرا بتاع الست على تليفونه و بقى يهددنى بشكل صريح انى لو مكملتش معاه هيبلغ عنى
و للاسف بقالى خمس سنين على الوضع ده ...مقدرش ارفض طلب لضرغام لانى عارف إن رقبتى فى ايده
ياااااا يا خبر ..انت كدا هاتخلينى أشك أنه ممكن يكون بيصورنى انا كمان و انا بفكك العربيات
ضرغام مجرم و توقع منه اى حاجه يا فريد ....ضرغام كل سككه شمال ...مفيش اى حاجه بيعملها سليمه و لا اى حاجه بيعملها لوجه الله
يا خبر ...انا كدا رحت فى داهيه اكتر منا رايح
بص يا فريد طول ما انت طوع و بتسمع كلام ضرغام مش هيأذيك ...لكن اول ما تفتح عنيك و تبتدى تقوله انك عاوز تسيبه هيظهر لك الوش التانى على طول
ها ....وصلنا المولد اهو
يا عم وائل ...انت لك نفس بعد اللى قلته ده تروح المولد ...دا انا بطنى مغصت
يا عم لا مغصت و لا حاجه ...تعالى بس الرقاصه اللى فى المولد هتنسيك المغص...انت مش سامع الاغانى
يلا يلا متبقاش نكدى بقا ...
نكدى ايه بس ؟ هو الكلام اللى انت قلت ده شويه ؟ دا النكد كله
يا عم بكرا تتعود ....يلا بس عشان نلحق العرض من الاول
دخلنا المولد ....موسيقى عاليه و اصوات ذكر ...مراجيح و عيال بتجرى ...حلويات شكلها غريب ....شحاتين و مجاذيب حاوى و معاه تعابين ....ناس بتبيع طبل و العاب للعيال ...شدنى وائل على خيمه كبيره وقطع تذكرتين و قالى تعالى الرقاصه هنا
اول ما دخلت الخيمه لقيت كراسي على الصفين و فى اخر الخيمه حتة مسرح صغير واقف عليه فرقه موسيقيه باين عليها الفقر من لبسها و من الآلات اللى ماسكينها فى أيديهم
شدنى وائل و قالى تعالى هنقعد فى اول صف
بعد لحظات لقيت الرقاصه طلعت من جنب و ابتدت ترقص
انا بقا مكنتش مركز معاها و لا حتى ببص لها ...كل تفكيري فى كلام وائل
يا جدع مالك كدا باصص فى الارض ؟ بص يا جدع على الرقاصه دى بترقص حلو اوى
رفعت عينى ابص على الرقاصه لقيت .....
ايه دا ؟؟؟ توحا مراتى 😲 ؟؟؟؟
يتبع ......
#قصص_وحكايات_د_جيهان_عادل
#توحا(مستوحاه_من_قصه_حقيقيه)
#الجزء_الحادى_عشر
يا جدع مالك كدا باصص فى الارض ؟ بص يا جدع على الرقاصه دى بترقص حلو اوى
رفعت عينى ابص على الرقاصه لقيت .....
ايه دا ؟؟؟ توحا مراتى 😲 ؟؟؟؟
مراتك مين ؟؟ مراتك ماتت و شبعت موت يا جدع ...و بعدين اقعد انت قمت وقفت كدا ليه ؟
الست دى يا وائل توحا مراتى
انت هتجننى ؟ مراتك ازاى ؟
ايوه و الله ..لا ..لا دى ...دى اختها اللى قالى عليها عم احمد ...ايوه هى ...هى ...اسمها سمرا لأ اسمها سمارا ايوه ..ايوه اسمها سمارا
طب أهدى بس عشان محدش ياخد باله ...اقعد يا جدع
لأ انا عاوز اكلمها يا وائل ...عاوز اكلمها
هتكلمها تقولها ايه بس ؟ هتقولها انك قتلت اختها ؟
معرفش بس عاوز اكلمها و خلاص
يا عم بلاش ...الموضوع ده ممكن يودينا فى داهيه ...البت دى لو عرفت الموضوع ممكن تبلغ عنك و هاتجرنا معاك ....يا عم الله يهديك ضرغام لو عرف هيودينا فى داهيه
لا يا وائل لازم اكلمها
طب هتقولها ايه بس ؟
متخفش مش هجيب لها سيرة قتل توحا خالص ...بس لازم اكلمها
طب هنستناها لما تخلص ..انا عارف انك هتودينا فى داهيه يا اسطى
متخافش يا وائل ....متخافش
مشي وائل و استنيت سمارا و كانت معروفه باسم سوسو ..
رحت للراجل اللى مشغلها و كان راجل طول بعرض عنده عين واحده و التانيه متصفيه ...واخد ضربه سكينه فى وشه و اثر الخياطه واضح جدا عليها
انا عاوز اكلم سوسو يا معلم
و عاوزها ليه ؟
معجب و عاوزها فى كلمتين ....و قمت مناوله متين جنيه
الراجل بص فى اللى اديتهوله و ابتسم و قالى اتفضل
مساء الخير يا ست سوسو
مساء النور يا عنيا ...اؤمرنى
انتى رقصك حلو اوى ...مشفتش واحده بترقص زيك كدا
تسلملى يا روحى ..كلهم بيقولولى كدا
طب انا كنت عاوزك فى موضوع كدا يا ست سوسو
الليله ب ٦٠٠ جنيه يا عنيا
لا انتى فهمتينى غلط ...انا عاوزك فى حاجه تانيه خالص
حاجة ايه ؟؟ هعلمك القرايه و الكتابه ؟ ههههههههه
لا بس عندى موضوع مهم
مفيش اهم من الفلوس يا عنيا ...السبيج اناناس
طب خلاص انا موافق ....أدى الفلوس اللى قلتى عليها
ايووووه كدا اسمعك و ابقى تحت امرك كمان
كنت عاوز أسألك على حاجه
اتفضل يا اخويا ....شكلنا هنقضيها أسأله و اجوبه
انتى تعرفيلك أهل يا ست سوسو ؟
الله الله انت هتقبح و الا ايه ؟ انت مالك و مال اهلى بقا ؟
يا ستى و لا هقبح و لا حاجه انا عاوز اعرف اصلك ...يعنى منين يعنى ؟
طب و دى حاجه تخصك فى ايه يا روحى ؟ انت فاكر انك اشترتنى بالكام ملطوش بتوعك دول ؟
لا ...ابدا بسسسسسسس
مبسش ياعنيا
حلمك على بس يا ست سمارا
ايه ده انت عرفت أسمى منين ..انا مفيش حد يعرف أسمى خالص غير أما وداد
انا عارفك و عارف عيلتك يا سمارا و عارف ابوكى الله يرحمه
انت بتقول ايه يا جدع انت ؟ انت تعرف اهلى؟ طب هما فين ؟ اروح لهم ازاى ؟
اصبرى بس ...اهلك معدوش موجودين على ضهر الدنيا
لأ انت جاى تهزر بقا .... اطلع بسبجاره ...انا مخنوقه اوى
طب تعالى نتمشي شويه و هفهمك كل حاجه
طب ثوانى هلبس عبايتى السمرا و اجى معاك
خرجت انا و سمارا و لقينا زغلول واقف و بيقولها على فين يا ست سوسو
قامت مطلعه الستميت جنيه و اديتهومله
قام سابنا نمشي ...بس كنت مستغرب انتى اديتلوه كل الفلوس ليه ؟
ما هو كدا يا سيدنا الافندى ... امال انت فاكر ايه ..انا لو مدتوش مش هيخلينى امشى و لا اخطى بره المولد ....حكم القوى ..ربنا يتوب علينا من الأشكال دى
بعدنا عن المولد و رحنا قعدنا فى كافيه
فهمنى بقا يااااا ..الا انت اسمك ايه ؟
اسمى فريد
فهمنى بقا يا سي فريد انت عرفتنى منين و عرفت اهلى منين ؟ و هما فين ؟
عرفتك من دى
ايه دى ؟ دا انا ...انت جبت الصوره دى منين ؟
دى مش انتى دى اختك التوأم توحا
اختى ؟ هو انا لى اخت كمان ؟
كان لكى اخت
كان ؟؟؟؟؟ليه هى فين ؟
ماتت الله يرحمها
ماتت ؟ طب امى ...ابويا ؟؟؟
للاسف ماتوا بردوا
طب و انت جاى عشان تقولى أنهم ماتوا ؟ يعنى بعد ما ادتنى الأمل انى اخلص من القرف اللى انا فيه ده ...الاقيك بتقول ماتوا ؟...طب احكيلى عنهم ...احكيلى عن ابويا و عن امى و اختى اللى بتقول عليها دى ...قولى تعرفهم منين ؟
انا كنت جوز اختك
جوز اختى انا ؟؟ طب و اختى ماتت ازاى ؟؟ هى كانت مريضه ؟
ماتت موتة ربنا ....ابوكى عم احمد كان حداد و كان راجل طيب اوى ...اطيب خلق الله اما الست والدتك فاللى اعرفه انها ماتت بحسرتك لما توهتى منها فى المولد
ايوه ..ايوه أما وداد كانت بتحكيلى انها لقتنى فى المولد و مكنتش فاكره غير أسمى بس ....لا اعرف امى و لا ابويا و لا اعرف مكان سكنى
اما وداد كانت من اللى بيلفوا فى الموالد يقروا الودع ...خدتنى و بقت تلف بى على الموالد فى كل البلاد لحد ما ماتت و بعدها اتجوزت جلال كان شغال معانا فى المولد ....كنت فاكراه واد مجدع و هيصونى و يعوضنى عن الايام السودا اللى شفتها فى اللف على الموالد .. لكن للاسف طلع أنه متجوزنى عشان يشغلنى رقاصه
و كان يشغلنى و يقبض على ....قعدت معاه خمس سنين و كان نفسي فى حتة عيل و بقيت ازن على ودانه انى اروح للدكتورة ....و فى مره خلته مش موجود و رحت لوحدى للدكتوره
الدكتوره بعد ما كشفت على قالت لى ان عندى عيب خلقى فى الرحم و مش ممكن اخلف ابدا
مشيت من عندها و الدنيا سودا فى عنيا ...لما رجعت جلال مسكنى ضربنى علقه جامده لدرجة أنه كسرلى دراعى ....ساعتها مبقتش طايقاه و لا عاوزه اقعد على ذمته لحظه و رحت لزغلول و اتفقت معاه انى اشتغل معاه بس يخلصنى من جلال
زغلول مجرم و الكل بيخاف منه ...راح لجلال و قاله يطلقنى و يسيب المكان خالص اللى احنا فيه و يرحل
و طبعا جلال مقدرش يقوله لأ ...لانه عارف لو قال لأ ايه اللى هيحصل فيه
جلال مشي بعد ما رمى على يمين الطلاق ...و انا بقا فقت على المصيبه الاكبر اللى وقعت نفسي فيها و بقيت اسيره لزغلول بقى يشغلنى و ياخد كل الفلوس اللى بشتغل بيها و يرميلى الفتافيت ...لما قلت انك تعرف اهلى فرحت اوى و قلت خلاص اخيرا هنضف و هخرج من البير اللى وقعت نفسي فيه دا ...بس يا خساره
متزعليش نفسك يا سمارا ...انتى لسه برده فى حد من دمك عايش على وش الأرض
حد ؟ حد مين ؟
ولاد اختك حماده و امنيه
هى اختى كان عندها ولاد ؟ طب هما فين ؟
هما مش هنا ...بس معايا صورهم تحبى تشوفيهم
ايوه طبعا احب ....احب اوى
اهم يا ستى
الله ....يا جمالهم ...حلوين اوى ما شاء الله ...البت شبهى بالظبط ....طب و هما مش معاك ليه ؟
هما فى الملجأ يا سمارا
ملجأ ؟؟ ليه ملجأ و انت لسه موجود على ضهر الدنيا
منا علشان كدا كلمتك ..و عايزك تساعدينى انى أخرج ولادى من الملجأ يا سمارا
انا تحت امرك بس اساعدك ازاى ؟؟ و ليه انت مخرجتهمش بنفسك ؟
يا ترى فريد هيطلب من سمارا تساعده ازاى ؟ و هل هترضى تساعده ؟ دا اللى هنعرفه فى الجزء الجاى باذن الله تعالى
يتبع ......
#قصص_وحكايات_د_جيهان_عادل
#توحا(مستوحاه_من_قصه_حقيقيه)
#الجزء_الثانى_عشر
هما فى الملجأ يا سمارا
ملجأ ؟؟ ليه ملجأ و انت لسه موجود على ضهر الدنيا
منا علشان كدا كلمتك ..و عايزك تساعدينى انى أخرج ولادى من الملجأ يا سمارا
انا تحت امرك بس اساعدك ازاى ؟؟ و ليه انت مخرجتهمش بنفسك ؟
انا عندى ظروف هبقى احكيلك عليها بعدين ...المهم انتى لازم تطلعى شهادة ميلاد باسمك عشان تثبتى انك بنت احمد عبدالحميد الشوربجي
طب منا معرفش تاريخ ميلادى هروح اقولهم ايه ؟
هو انتى ناسيه انى كنت جوز اختك التوأم و حافظ تاريخ ميلادها كويس جدا ....انتى كل اللى عليكى تروحى بكرا تطلعى شهادة ميلاد بالكمبيوتر باسم سمارا احمد عبدالحميد و بعد كدا تعملى بطاقه و بعديها تقدرى تخرجى اولادى من الملجأ
لا لا استنى ...انت شكلك كدا وراك مشاكل او الموضوع ده فى لعبه ...بقولك ايه انا مش عاوزه مشاكل فى حياتى ...انا اه غلبانه بس مش هتعرف تضحك على
يا ستى و انا هضحك عليكى ليه بس ؟ ...صدقينى يا سمارا انا مضحكتش عليكى فى اى كلمه قلتها
طب و متروحش تجيب عيالك ليه من الملجأ ؟ جاى لى ليه ؟
عشان ...عشان
ايووووه عشان ايه بقا ؟ فهمنى ...انا مش همشي وراك زى الحمار كدا
اصل انا على قضيه و مقدرش اروح اجيبهم
يا حلاوة ....انا برده قلت كدا ....بقولك ايه يا جدع انت انت تبعد عنى خالص انا مش ناقصاك و لا ناقصه مشاكلك روح حلها بعيد عنى
انتى بس خايفه من ايه ؟ انا مش عاوز منك اى حاجه ابدا غير انك تجبيلى عيالى طب انتى صدقتينى انى اعرف اهلك ؟
ايوه صدقتك بس هستفيد ايه يعنى ؟
أن كان على الاستفاده هتستفيدى يا ستى ....انا مستعد ادفع لك اللى تقولى عليه من جنيه لعشر آلاف
عشر الاف مره واحده
ايوه
طب سبنى افكر و ارد عليك
طيب انا هفوت عليكى بعد الشغل بكرا اعرف رايك
تمام بس خلى بالك احنا قدامنا اسبوع على ما نلم حاجتنا عشان هنروح مولد سيدى عبدالرحيم القناوى
اسبوع ازاى ؟؟ لا يا توحا. ...قصدى يا سمارا ارجوكى
خلاص بكرا هرد عليك
روحت يومها و انا خايف و فرحان
فرحان أن املى فى رجوع ولادى قرب بعد ما طلبت كتير من ضرغام يرجعهم لى و يقولى اصبر
و خايف لسمارا مترضاش تساعدنى أو تاخد حاجتها و تمشي
كمان كنت عمال افكر فى كلام وائل لى عن ضرغام و ازاى اخلص نفسي من الحفره اللى وقعت نفسي فيها ....ساعات كتير كنت اقول لنفسي انى لازم اسلم نفسي و خلاص و اخلص من الهم ده ...لكن برجع اقول انى كدا هضيع عيالى خالص و بيصعب على شقايا و فلوسي اللى راحوا لواحد غريب ...النار بتقيد فى جتتى كل ما افتكر اللى عملته فى توحا
تانى يوم رحت لسمارا عشان اعرف رأيها
قالت انا موافقه بس عندى شرطين
ايه هما الشرطين ؟
اول شرط ...الفلوس اللى قلت لى عليها دى شويه اوى انا هاخد مئة ألف جنيه
ايه مية الف جنيه ؟ و هجيبهم لك منين دول ؟
و الله معرفش ...اتصرف ...الموضوع ده باين عليه لبش و انا مش ضامنه ممكن يطلع لى من وراه ايه ؟
طب و الشرط التانى ؟
الشرط التانى انى اعرف كل حاجه عنك و قضية ايه اللى انت خايف منها دى
تتجوزينى يا سمارا ؟؟
انت بتقول ايه ؟؟ انت عاوز تضحك على و الا ايه ؟؟ هو انت مش عارف انا بشتغل ايه ؟ هتكون عاوز تتجوزنى ليه يعنى ؟
عاوز اتجوزك عشان اساعدك و تساعدينى ...انا هخلصك من اللى انتى فيه و انتى هتخلصينى من اللى انا فيه
هو انت بتتكلم جد ؟
ايوه و الله بتكلم جد و إن كنتى فاكره انى بعمل كدا عشان الفلوس فلا..... انا هدبرلك الميه الف اللى انتى طلبتيهم قبل ما نتجوز
انت لخبطتنى يا جدع انت ...طب و عاوز تتجوزنى ليه ؟ ما انت ممكن تتجوز اى واحده تانيه انضف منى
انا عاوزك لكذا سبب يا سمارا ...انتى اخت مراتى و شبهها جدا يعنى لما اولادى هيشوفوكى مش هيحسوا أن امهم ماتت ..دا غير أن انتى هتكونى احن الناس عليهم ...و بعدين هما هيعوضوكى عن موضوع الخلفه اللى قلتيلى عليه
طب و ايه يجبرك تتجوز واحده زيى ؟؟
منا كمان زيك ...
زيى ازاى يعنى ؟
انا كمان حكمت على الظروف انى اتحول لمجرم بعد ما كنت طول عمرى بكسب لقمتى بعرق جبينى و عمر ما دخل جوفى لقمه حرام ...بس للاسف ساعات الظروف بتحكم على الإنسان أنه يمشي فى طريق مش طريقه و لا كان فى خياله أنه يمشي فيه فى يوم من الايام
طب ما تفهمنى يا ابن الناس اتحولت مجرم ازاى ؟؟ انا من حقى اعرف برده
هقولك كل حاجه لو وافقتى على جوازنا ...انا هسيبك تفكرى الليله بس عاوز اقولك ان انا كنت راجل حداد اتعلمت الحداده على ايد ابوكى الله يرحمه و زى ما قلت لك طول عمرى شقيان على اللقمه الحلال لغايه ما حصلت معايا حاجه خرجتنى عن شعورى و خلتنى ارتكب جريمه عمرى ما تخيلت انى ارتكبها ...انا صحيح غلطت و ندمان أشد الندم بس هيعمل ايه الندم فقدت اعز الناس على و عشت مطارد ...بموافقتك على جوازنا هتخلص من ده كله و هخلصك انتى كمان من اللى انتى فيه دلوقتى ...هاخدك و هناخد عيالنا و نسافر بعيد و هنبدا حياتنا فى حتة بعيده ابعد ما يتخيل خيالك
يااااا ....انت لفتلى دماغى يا فريد ...و لو انى حاسه ان ده مش اسمك برده
فعلا دا مش أسمى ...بس انا وعدتك لو وافقتى على عرضى هفهمك كل حاجه
طيب يا فريد سبنى افكر الليله دى و بكرا هقولك رأيى
يا ترى سمارا هتقبل بعرض فريد ؟ و لو قبلت هتعمل ايه لما تعرف أنه قتل اختها ؟دا اللى هنعرفه فى الجزء الجاى باذن الله تعالى
يتبع ......
#قصص_وحكايات_د_جيهان_عادل
#توحا(مستوحاه_من_قصه_حقيقيه)
#الجزء_الثالث_عشر_والاخير
يااااا ....انت لفتلى دماغى يا فريد ...و لو انى حاسه ان ده مش اسمك برده
فعلا دا مش أسمى ...بس انا وعدتك لو وافقتى على عرضى هفهمك كل حاجه
طيب يا فريد سبنى افكر الليله دى و بكرا هقولك رأيى
تانى يوم قابلت سمارا و قالت انها موافقه على عرضى بس الفلوس قبل الجواز لأنها خايفه اكون بضحك عليها
وعدتها انى هجيب لها الفلوس بس هى لازم تتحرك و تروح تعمل شهادة الميلاد و البطاقه
وافقت سمارا بس سالتنى عن سبب قضيتى كنت خايف اقولها لانى معرفش رد فعلها ...قلت لها بعد ما تعملى البطاقه هقولك كل حاجه ...كنت عاوز اكسب وقت و احببها فى عشان متعملش حاجه لما تعرف انى انا اللى موتت اختها
قعدت افكر اجيب الفلوس اللى طلبتها منى ازاى؟ اتصلت على ضرغام و سألته عن موضوع الشقه
ضرغام عشان مشاغله الكتير كان ناسي الموضوع ده و قالى متقلقش انا فى ظرف أسبوع هجيب لك فلوس الشقه
فى الفتره دى بدأت اجهز نفسي علشان اهرب انا و سمارا و العيال بره البلد و دا طبعا من ورا ضرغام لانه لو عرف هيوقف لى كل حاجه و جايز كمان يقتلنى عشان سره
رحت لوائل و سألته عن اى حد يعرف يهربنا للسودان ...وائل قعد يقولى
طب و ليه كدا يا ابن الناس ضرغام لو عرف هيوديك فى داهيه
انا مش عاوز اقعد هنا يا وائل ...انا عاوز ابدا حياه نضيفه
طب ما تطلع جواز سفر عادى بالبطاقه اللى عملهالك ضرغام
منا فكرت فى كدا بس للاسف فى الحاله دى مش هعرف اطلع جوازات سفر لاولادى ببطاقه فريد
اه صحيح عندك حق ...طب و بعدين هتعمل ايه ؟
ما هى دى الخدمه اللى انا عاوزها منك يا وائل ...تشوفلى حد يهربنى انا و سمارا و العيال من على الحدود
بس يا فريد الموضوع ده مش سهل زى ما انت فاهم و بيحتاج مصاريف كتير اوى
يا عم عارف و الله أنه مش سهل....انت بس شوفلى بالله عليك
بس انا مليش دعوه بالحوار ده ...لو ضرغام عرف أو الشرطه شمت خبر متجبش سيرتى خالص
عيب عليك ...وصلنى بالناس بس و ملكش دعوه بعد كدا بأى حاجه
طيب تمام ادينى يومين كدا أسأل و اعس على الموضوع
يومين كتير يا وائل حاول تلاقيلى الناس دى بسرعه
حاضر يا عن فريد و لو انى عارف انك هتودينى فى داهيه
بعد الاسبوع لقيت ضرغام داخل على بشنطه و بيقولى اتفضل يا سيدى فلوسك اهى
كام دول يا ضرغام
دول ١٥٠ الف جنيه
ايه دا ؟ الشقه جابت المبلغ ده بس ؟
لا الشقه بالعفش جابت ٣٠٠ الف ...بس انت ناسي أن فى رجاله شغاله معانا و ده عرقهم ...دا الواد كان هيموت فى ايدهم و هما بيمضوه على التنازل
ماشي يا ضرغام ..متشكر اوى
اخدت الفلوس من ضرغام و قلت الحمد لله هدى لسمارا ١٠٠ الف و انا معايا عشرين ألف هحطهم على الخمسين الباقيين من حق الشقه و اشوف الناس اللى هتهربنا هتاخد كام و هيفضل معايا مبلغ ابدأ بيه هناك
رحت لسمارا لقيتها عملت البطاقه مستعجل و اديتلها الفلوس
انا كنت عند وعدى اهو و جبت لك الفلوس اللى طلبتيها ..اعتبرى الفلوس دى مهرك يا عروسه ...عاوزك بكرا تسافرى على العاشر العنوان فى الورقه دى و تروحى تشوفى الإجراءات عشان تخرجى الولاد ..بعدها تيجى نتجوز و ناخدهم و نسافر على السودان
بس لسه فى حاجه مهمه انا معرفتهاش يا فريد ...انت قضيتك ايه ؟ و ليه هربان من البوليس ؟
انا ...انا قتلت
قتلت مين ؟
بصى انا هحكيلك الحكايه و انتى تحكمى بنفسك ...انا سافرت السعوديه ٩ سنين كنت بحرم نفسي من اللقمه عشان ابعت الفلوس لولادى و مراتى ...و لما تعبت و قررت انى انزل عشان اعيش بقا مع اولادى و مراتى و استمتع بشقايا اللى شقيته لقيت مراتى رفعت على قضيه طلاق و المحكمه طلقتها و انا معرفش ...و للاسف اتجوزت واحد تانى غيرى و لقيته قاعد فى شقتى اللى بفلوسى و عرفت بعد كدا انها كانت كاتباله كل حاجه باسمه بيع و شرا
يااا معقوله ؟؟ طب ليه عملت كدا ؟
و الله انا نفسي معرفش انا كنت بحبها اكتر من روحى معرفش عملت فى كدا ليه ؟
و انت قتلت جوزها على كدا ؟
لا انا مقتلتش جوزها
اومال قتلت مين ؟ اوعى تقول قتلتها هى ؟؟؟!!!!
ايوه هى...بس غصب عنى و الله انا معرفش عملت كدا ازاى ؟
مالك سكتى ليه يا سمارا ؟
لا مفيش بس دى اختى يا اااا ...الا انت اسمك الحقيقى ايه ؟
انا أسمى مرسي
طيب يا مرسي انا بكرا هسافر على العاشر و اعمل اللى قلت لى عليه
مشيت سمارا و انا طاير من الفرحه خلاص كل حاجه ماشيه زى ما انا مخطط لها ...وائل عرفنى على الناس اللى هتسفرنا و هروح ادفع لهم الفلوس ...و سمارا هتجيب لى عيالى و نتجوز و نمشى من البلد و نبدا حياه جديده نضيفه
تانى يوم كنت قاعد افكك فى عربيه جابهالنا وائل و عمال احلم برجوع سمارا من العاشر و احلم هتقولى ايه و كنت موصيها تصور لى اولادى و تجيب الصور معاها على ما الإجراءات تخلص و تقدر تاخدهم
و فجأه لقيت الشرطه بتهجم على المكان و بيمسكونى انا ووائل و باقى الرجاله و بيحرزوا العربيات الموجوده و القطع المفكوكه
اللى عرفته بعد كدا أن سمارا بلغت عنى ....مكنتش مستغرب اوى من اللى عملته ...ما توحا اختها عملت فى اكتر من كدا
و فى يوم لقيت حد طالب يزورنى ...تخيلت أنه حد من اخواتى اخيرا حن على و جاى يشوفنى لكن لقيتها سمارا
اول ما شفتها قلت لها ليه ؟؟ ليه عملتى كدا فى ؟
قالت لى
هو انت فاكر يا مرسي انك تكون قاتل اختى و ارضى اتجوزك ؟؟ دا انا مرضتش أن جوزى يضربنى و رحت لزغلول يخلصنى منه علشان بس كسر لى دراعى ...يبقى هآمن لك ازاى و انام جنبك ازاى و انت قاتل اختى ؟؟
اختك سرقتنى زى ما انتى كمان سرقتينى
انا مسرقتكش يا مرسي ...الفلوس اللى اخدتها منك دى عشان انا فعلا قدمت على طلب انى اخد الولاد من الملجأ و نويت ابعد بيهم عن جو الموالد و عن زغلول و اربيهم بالفلوس دى
صحيح يا سمارا ؟
صحيح يا مرسي ...انا منكرش أن اختى غلطت بس انت كمان غلطك كان أكبر بكتير و لازم تاخد جزائك ...و انا من ناحيتى هعمل اللى على و هاجى ازورك و اعرفك مكاننا عشان خاطر ولادك بس ...و هقوم لك محامى كويس و هدفعله من الفلوس اللى اديتهالى
خلاص يا سمارا مدام هتخلى بالك من ولادى انا مش زعلان منك ...كتر الف خيرك
و فعلا سمارا عملت اللى قالت لى عليه و قومت لى محامى قدر يثبت أن مكنش فى سبق إصرار و ترصد فى حكايه قتلى لتوحا و اعتبرها القاضى مشاجره ادانى فيها خمس سنين و اخدت كمان سنتين فى حكايه سرقة السيارات دى ...بس المحامى طمنى و قالى أنه فى النقد هيحاول يقلل الخمس سنين دول و يخليهم سنتين أو تلاته يالكتير و ادينى مستنى على أمل انى أخرج لاولادى بعد كام سنه و احاول اعوضهم على اللى حصل معاهم .
تمت
🌹🌹🌹🌹🌹🌹🌹🌹🌹🌹🌹🌹🌹🌹
انا عاوزه اقول حاجه يمكن فى ناس متعاطفه مع مرسي و كان نفسهم أنه ميتحبسش لكن هو برده قام بعمل عظيم و هو قتل نفس ..اللى هى عند ربنا أعظم من هدم الكعبه ، كان لازم يكون فى عقاب ...و عقاب الدنيا مش هيغنى عن عقاب الاخره..كلنا هنتحاسب على أفعالنا ...توحا ربنا هيحاسبها على اللى عملته فى مرسي و هو كمان هيتحاسب على كبيره من الكبائر عملها الا و هى القتل
يقول رسول الله صلى الله عليه و سلم (لن يزال المؤمن في فسحة من دينه ما لم يصب دماً حراماً )
💞💞💞💞💞💞💞💞💞💞💞💞💞💞
ارجو أن القصه تكون نالت اعجابكم ...و اذا عجبتكم ارجو الدعاء لوالدى رحمة الله عليه بالرحمه و المغفره و سائر موتى المسلمين
#قصص_وحكايات_د_جيهان_عادل
 #الجزء_الاول ايوه انا اللى قتلتها يا سعاده البيه انا مش هنكر ...بس هى قتلتنى قبل ما اقتلها ...است…){kind=link}
تعليقات
إرسال تعليق