#اغادير_ قصص رعب
#الجزء_الخامس
قصص رعب
قمت اتنطرت من مكانى و رفعت ملايه السرير لقيت فعلا العروسه مربوطه من رقبتها و بوقها.
استغربت اوى ازاى طفله فى السن ده تعمل كدا ؟؟؟ اكيد بتتفرج مع امها على الافلام العنيفه دى ؟
انا لازم ابعد ابنى عن البنت دى ...البنت دى مش طبيعيه ابدااا لا هى و لا امها
تانى يوم سمعت باب شقة جارتى بيتفتح جريت بصيت من العين السحريه شفتها خارجه و معاها شنطة هدوم كبيره جدا استغربت هى الست دى رايحه فين ؟؟ دى لسه مبقلهاش يومين جايه ؟؟
فجاه و انا عماله افكر لقيتها بتبص ناحية شقتى زى ما يكون عارفه انى واقفه ابص عليها
عينها زى ما يكون كانت فى عنيا
معرفش انا خفت و تراجعت خطوتين لورا وفجأه سمعت خبط على الباب
جسمى كله اتنفض ...استنيت دقيقه و فتحت لها
ابتسمت ابتسامه مخيفه و قالت لى ازيك يا صفيه
الله يسلمك يا نجوى
انا رايحه عند ماما لأنهم اتصلوا عليا فجأه و قالوا إنها تعبت و كنت عاوزه منك خدمه
اتفضلى يا حبيبتى
الناس بتوع الغاز يمكن يجوا النهارده أو بكرا و انا مش هقدر استناهم فبستأذنك تاخدى المفتاح و اول ما يجوا تفتحى لهم و تقفى معاهم لحد ما يخلصوا
بس انا ممكن مكنش هنا
هاتروحى فين ؟؟
ممكن اكون فى اى مشوار
معلش يا صفيه عشان خاطرى ...لو الناس دى جت و ملقوش حد ممكن ميجوش تانى و تبقى مشكله
صراحه يا نجوى انا مش عاوزه اخد المفتاح
ليه يا حبيبتى ؟؟
احسن حاجه تنقص تقولى انى اخدتها و الا حاجه ؟
اخص عليكى ...انتى بتقولى ايه ؟؟
انتى لا تعرفينى و لا انا اعرفك و انا مش ناقصه وجع دماغ
لا يا صفيه انا اعرفك كويس
ايه ؟؟ تعرفينى منين ؟
قصدى سيماهم فى وجوههم و انتى باين عليكى انسانه كويسه و بنت ناس و مش ممكن اعمل حركه المفتاح دى إلا و انا متأكدة منك كويس
الله يخليكى
طب خدى المفتاح اهو متكسفيش ايدى ..و بعدين يا ستى الحاجات اللى جوه دى مش بتاعتى اصلا هخاف عليها من ايه
ماشى ...هاتى
خدى كمان معاكى خمسمية جنيه اهم عشان تحاسبي الناس
بيتهيالى كدا كتير
ماشي شوفى بس هياخدوا كام و خلى الباقى معاكى على ما ارجع
حاضر ...هو انتى هتتأخرى كتير ؟
ادعيلى متأخرش يبقوا يومين بس لانى اخدت اجازه من شغلى و خايفه يرفدونى لانى جديده
هو انتى بتشتغلى ؟؟
ايوه انا بشتغل مهندسه فى شركة مقاولات هنا
طب معلش يا نجوى هو جوزك فين ؟؟
جوزى الله يرحمه مات و احنا فى الغربه و رجعت انا و لارا مقدرتش اقعد فى شقتى كل حته بتفكرنى بيه
و لما شفت اعلان فى الجريده أنهم عاوزين مهندسه جبت لارا و جيت اشتغل هنا و قلت اشوف شقه مفروشه علشان اشوف هرتاح هنا و الا لا ؟؟ لو ارتحت هشترى لنا شقة و اجيب عفشي و حاجتى و استقر بقا
لا حول و لا قوة إلا بالله ...البقاء لله يا حبيبتى
متشكره ...يلا انا اتأخرت اوى همشي انا بقا
و نزلت نجوى بسرعه و لقيت مفتاحها فى ايدى ...وقفت دقيقه مندهشه انا ازاى طاوعتها و اخدت المفتاح منها ؟؟ دا لو ادهم عرف هتبقى مشكله و هيزعق لى و يقولى حاجه ملناش فيها ايه يدخلك فيها ؟؟
انا مش هقوله على حاجه كدا كدا هو طول النهار مش هنا يعنى لو بتوع الغاز دول جم اصلا مش هيبقى موجود .
فات يومين و محدش جه و انا مأخدتش و لا اديت ...بالعكس قلت يا رب الناس دى متجيش الا اما نجوى ترجع
فى اليوم ده كنت قاعده بالليل لوحدى ادهم متأخر كعادته و حمزه نام و انا مشغله الست جنبى و مريحه على كنبة الانتريه اللى فى الصاله
سمعت خرفشه فى الشقه اللى قدامى
قمت ابص اشوفها رجعت و الا ايه علشان اديها المفتاح
ملقتش اى حد
قلت اكيد بيتهيالى
بعد شويه سمعت صوت تانى ...بصيت مره تانيه و مفيش اى حاجه
الشك دخل قلبى ما يمكن حراميه ...يا خبر طب هتصرف ازاى ؟؟
انا مليش دعوه ...يا ريتنى ما اخدت المفتاح منها _ قصص رعب
فى الليله دى منمتش تقريبا و كنت خايفه اقول لادهم و خايفه أن الشقه تكون اتسرقت و يجروا رجلى فى الموضوع ده بما أن المفتاح معايا
يا ربى اتصرف ازاى ؟ و اعمل ايه ؟؟
تانى يوم ادهم خرج لشغله زى كل يوم و قلت له قبل ما يخرج أننا عاوزين ننزل الهايبر علشان نشترى شويه حاجات عشان عيد ميلاد حمزه الخامس بعد تلات ايام
ادهم قالى هحاول اجى انهارده بدرى و نروح
بعد ما ادهم نزل معرفش ليه جه فى دماغى انى اروح اخبط على الباب و اشوف يمكن نجوى رجعت
لبست اسدالى و اخدت مفتاحها فى ايدى و طلعت من شقتى حمزه جه ورايا
ارجع يا حمزه ..ادخل الشقه
لا يا ماما هاجى معاكى
يا ابنى هدى طنط نجوى المفتاح و ارجع
لا هاجى معاكى
رحت اخبط على الباب لقيته مفتوح
يا خبر ...الباب مفتوح ليه ؟؟؟ يكونش فعلا فى حراميه جم و سرقوا الشقه !؟؟
بس انا مشفتش اى حد نازل منها ....
طب يمكن نجوى جت و انا مشوفتهاش ؟؟ انا هنادى عليها
نجوى ...نجوى
ادخلى يا صفيه
الحمد لله دا جت ...و انا اللى فاكره حراميه دا انا هبله اوى
فتحت الباب و دخلت وورايا حمزه
اول ما دخلت الباب اترزع ورايا ...اتخضيت بس قلت اكيد الهوى _ قصص رعب
ياااا نجوى
تعالى
ايه دا ؟؟؟؟ فين العفش اللى كان هنا ؟؟؟
الشقه فاضيه تماما ....و التراب و العنكبوت فى كل مكان
ازاى كدا ؟؟ الشقه مهجوره زى ما يكون بقالها سنين متفتحتش
من خوفى جريت على الباب احاول افتح فيه مبيتفتحش ببص جنبى ملقتش حمزه
حمزه ...حمزه
دخلت أجرى على الاوض كلها خراااب و حمزه ابنى اختفى ملوش اثر
حمزه ...حمزه
سمعت صرخته الحقينى يا ماما
انت فين يا حمزه ....انت فين ؟؟
الحقينى يا ماما
حمزه حمزه
و فجأة الدنيا اسودت و اغمى عليا ...فوقت لقيت نفسي بالليل معرفش نمت كام ساعه
جريت على الباب احاول افتحه لقيت الباب فتح بسهوله
جريت على شقتى زى المجنونه ادور على ابنى ملقتش اى حاجه
و لقيت ادهم داخل عليا
يلا يا صفيه عشان نروح نجيب الحاجات اللى قلتى عليها
حاجات ايه يا ادهم ؟؟ حمزه اتخطف
اتخطف ؟؟؟ اتخطف يعنى ايه ؟؟
و حكيت لادهم و انا بلطم على كل اللى حصل _ قصص رعب
ادهم جرى زى المجنون على الشقه و بقى يخبط عليها بكل قوه و ينادى حمزه ...حمزه
ادهم جرى على الشارع وانا وراه و رحنا على القسم حكيناله على اللى حصل
امين الشرطه قال احنا مبناخدش بلاغات الغياب إلا بعد ٢٤ ساعه
بس دا مش غياب ...انا ابنى اتخطف
و مين قالك أنه اتخطف شفت حد بعينك بيخطفه ؟؟؟ ما يمكن نزل يلعب و المدام بتاعتك مخدتش بالها
و مشينا من القسم نجرى فى الشارع زى المجانين ندور حوالين العماره و فى كل مكان
لحد ما وصلنا مكتب السمسار اللى جابلنا الشقه
ادهم دخل علشان يسألوا عن الست اللى كانت مأجره منه الشقه اللى قصادنا يمكن معاه بياناتها _ قصص رعب
السمسار بص لنا باستغراب
اى شقه و اى ست ؟؟
قلت له واحده اسمها نجوى و معاها بنت صغيره جت من بومين و قالت إنها مأجره الشقه اللى قدامنا مفروش
اولا الشقه اللى قدامكم مش مفروشه
ثانيا الشقه دى بقالها سنين مسكنتش
انت بتقول ايه ؟؟ انت كداب ؟؟ انت بتكدب لمصلحة مين ؟؟؟؟ اكيد انتوا شركا فى خطف ابنى
يا مدام عيب كدا ...ميصحش اللى بتقوليه ده ....انا لولا مقدر حالتكم كنت عملت حاجه تانيه _ قصص رعب
هتعمل ايه يعنى ؟ يا حراميه يا نصابين انا دخلت الشقه بنفسي و كانت مفروشه
الكلام ده غير صحيح تماما ...الشقه مكنش فيها حاجه ابدا
انت هتجننى
استنى يا صفيه ...طب ممكن تيجى معانا تفتح لنا الشقه نشوف الولد جواها ؟؟
ممكن طبعا ...يلا بينا
يتبع....
#دجيهان_عادل
#قصص_وحكايات_د_جيهان_عادل.
فضلا غير مسموح نقل أو نسخ القصه إلا بعد اذن الكاتب ...
أزال المؤلف هذا التعليق.
ردحذفايه ده كل يوم بتأكدلى انها سيئة التصرف 😟
ردحذف