ادم و مليكه الجزء الخامس_ روايات رومانسيه

#ادم و مليكه _روايات رومانسيه

#الجزء_الخامس

فكرت كتير انى اسافر لها تونس بس مكنتش اقدر اسافر لانى ماديا مكنتش اقدر و بعدين حتى لو سافرت كنت هعمل ايه ؟ انا ممعيش اى حاجه أقدمها لها 

ابويا شاف حالى و لاحظ انى متغير ..دايما قاعد فى اوضتى و قافل عليا بابى 

دخل يكلمنى و قالى 

يا ابنى انا حالك ده مش عاجبنى انت مالك فيك ايه ؟؟

مفيش حاجه يا والدى 

امال قاعد فى اوضتك على طول ليه ؟؟ دا حتى مبتنزلش تدور على شغل 

هنزل يا بابا هنزل 

انا برده وصيت واحد قريبنا بيشتغل وكيل وزاره و هيشوف لك شغل باذن الله 

باذن الله يا بابا 

ها مش هتقولى ايه مزعلك كدا ؟؟ و لا تكونش بتحب يا واد ؟؟

الحقيقه ايوه يا بابا 

الله الله ...و الله انا اول ما شوفتك مسهم كدا و بتقعد تسمع الست و عبدالحليم عرفت انك وقعت و لا حدش سمى عليك 

ايوا يا بابا 

و مين سعيده الحظ دى ...تكونش سها بنت خالتك ؟؟

لا لا يا بابا ...سها اختى و عمرى ما ابص لها غير كدا 

حلاوتك ...دا امك عماله تحرجم على الموضوع ده بقالها سنين ...دا امك هتعملنا مواويل ....امال مين دى اللى خطفت قلب البشمهندس ؟؟

بنت تونسيه اسمها مليكه 

تونسيه ؟؟؟ و شفتها فين التونسيه دى يا آدم ؟؟؟ 

شفتها كانت جايه فى رحله هنا يا بابا 

يعنى يا ابنى متعرفهاش كويس ...ازاى يا ابنى تسمح لنفسك انك تحب واحده متعرفش عنها اى شئ 

يا بابا هو ده بايدى ؟؟ 

يا آدم انت لسه صغير يا ابنى و اللى بتقوله ده شبه مستحيل ...هتضيع عمرك فى أوهام يا ابنى ...لا البنت دى اهلها هيسمحولها تتجوزك و لا انت هتعرف تتجوزها و كمان عاداتنا و تقاليدنا غير بعض 

يا بابا قدام الحب كله بيهون 

يا ابنى الحب مع المشاكل بيروح 

لا يا بابا حبى لمليكه غير اى حب 

طيب ممكن اطلب منك طلب 

اتفضل يا بابا 

هو ينفع تروح تتقدم لاى بنت مش مليكه دى من غير ما تكون بتشتغل ؟؟ 

لا طبعا 

طيب يا ابنى يبقى لازم تشتغل فى الاول و تكون نفسك و بعدين تفكر فى الارتباط 

يعنى ايه يا بابا ؟

يعنى يا ابنى متعلقش بنات الناس بيك على الفاضى ...انت متعرفش هتكون جاهز للجواز امتى 

عندك حق يا بابا 

و فى الاخر لو هى من نصيبك صدقنى لو اجتمع أهل الأرض عليك هتاخدها يعنى هتاخدها ...انت دلوقتى بص لمستقبلك و ادعى ربنا لو فيها خير يقربها و لو مفيهاش يبعدها 

حاضر يا بابا 

و فكرت فى كلام والدى و لقيته منطقى جدا ...ازاى اسمح لنفسي اعلق قلب و انا معرفش امتى اقدر اتجوزها 

و قللت مكالماتى مع مليكه و انا قلبى بيتقطع و ساعدنى أن قريبنا اللى والدى قالى عنه جاب لى شغل بعد اسبوعين من كلامى مع والدى

و كانت شغلانه كويسه اوى فى الوزارة  معاه

_روايات رومانسيه

فى الوقت ده مليكه هى كمان كانت اتخرجت و بدأت تفكر تعمل مشروع لنفسها 

و فعلا فتحت شركه

ما شاء الله شركه مره واحده ؟؟

ايوه ...انا فتحت شركه فى مجال دراستى اللى كنت بحبه اوى ووالدى ساعدنى كتير 

و بعدين كملى يا مليكه

مفيش ادم لما مسك الشغل و انشغل شويه 

الدنيا خدتنا انا و هو و لقيت بابا جايب لى عريس من بلدى 

شخص ابن ناس كويسين جدا عيله و مركز مفيهوش غلطه زى ما بتقولوا 

فى الاول رفضت بس بابا اقنعنى أنه مناسب و انى أدى نفسي فرصه انى اعرفه 

وافقت اقعد معاه و كنت بقول فى نفسي انى هلاقى اى مبرر لرفضه 

لكن للاسف ملقتش اى حاجه فيه اقدر ارفضه  ...كان وسيم و شغال فى السفاره بتاعتنا فى باريس و من عيله كبيره جدا 

الفتره دى كان ادم بطل يراسلنى و كان الموضوع بتاعنا شبه انتهى 

رضيت اتخطب للشخص ده ...لكن صوره ادم مفارقتش خيالى ابدا و لا قدرت أنساه لحظه _روايات رومانسيه

عقلى كان بيقولى أنه مستحيل هيكون ليكى انتى فين و هو فين أما قلبى فكان يقولى مش هتقدرى تنسيه ...مفيش غيره 

بعد كام شهر من خطوبتى و لما حسيت انى خلاص مش قادره اتفاهم مع خطيبي و لا حاسه بيه 

و كان خلاص والدى ووالده بيحددوا ميعاد الفرح 

اتصلت عليه و قلت له انا عاوزاك فى موضوع مهم 

هو كان متصور انى هتكلم فى مراسم الزواج و الدعوات و المكان و كدا 

بس اتفاجئ انى بقلع الخاتم من صابعى و بديهوله 

خطيبي مسك الخاتم فى ايده و على وشه علامه اندهاش رهيبه عمرى ما انساها 

قلت له انا مش عاوزه اظلمك معايا ...انت انسان تتمناه احسن بنت فى الدنيا 

بص لى و فى عينه الف سؤال و سؤال 

طب ليه ؟؟

انا قلبى مش ملكى ...قلبى ملك واحد تانى

و رضيتى تتخطبى لى ليه ؟؟

انا اسفه بس الشخص اللى قلبى معاه يمكن يكون مستحيل انى ارتبط بيه 

انتى بتقولى الغاز ؟؟؟ ايه الكلام اللى بتقوليه ده ؟؟

الشخص اللى بحكيلك عليه مش تونسي دا شخص مصرى انا شفته من تلات سنين فى مصر لما كنت فى زياره لمصر 

شفتيه من تلات سنين ؟؟؟ طب و بعدين ؟

مفيش ...انا لما اتخطبت لك كنت عاوزه أدى نفسي فرصه انى أخرجه من قلبى لكن للاسف مخرجش و انا مش عاوزه اعيش معاك على غش ...ابقى عايشه بجسمى معاك و قلبى فى حتة تانيه 

اه ...فهمت اتمنالك السعاده ...استأذنك

و قام و سابنى بكل شياكه و من غير و لا كلمه عتاب و لا انفعال زى ما كنت متخيله 

حسيت ساعتها بشعورين مختلفين 

حسيت انى متضايقه انى عملت فيه كدا ...هو فعلا ملوش ذنب بس مش بايدى انا حاولت و مقدرتش

الاحساس التانى حسيت انى طايره زى العصفور اللى كان محبوس في قفص و اتفتح له الباب 

قلبى كان بيدق جامد و حسيت انى عاوزه اكلم ادم مع انى كان بقالى اكتر من سنه مكلمتوش 

اول ما رد عليا سألته سؤال واحد 

تتجوزنى ؟؟

ياريت .... انا ...انا بحبك اوى يا مليكه و مقدرتش انساكى لحظه مش متخيل حياتى من غيرك ...الفتره اللى فاتت دى و لما عرفت انك اتخطبتى كنت بموت كنت عايش جسد بلا روح 

و انا كمان يا آدم زيك بالظبط ...مقدرتش اكون لغيرك ابدا 

حبيبتى يا مليكه 

تقدر تجيلى تطلبنى من بابا ؟؟

ايوه اجيلك لو ينفع بكرا اجيلك

بكرا ايه يا مجنون ؟؟ مش لما تخلص ورقك الاول _روايات رومانسيه

هخلصه بأسرع ما يمكن و هكون عندك فى تونس باذن الله 

و فعلا ادم خلص ورقه فى شهر و كان عندى فى زياره لتونس 

اول ما شفته حسيت بشعور مقدرش اوصفه....روحى اتردت لى ...انا فعلا مكنتش اقدر اكمل حياتى من غيره 

لقيت نفسي اترميت فى حضنه معرفش ازاى و كأنى برمى على كتفه عذاب سنين مشفتوش فيها 

هو كمان كانت عنيه بتعيط من الفرح و هو واخدنى فى حضنه و مش مصدق انى بين اديه 

اخدته و رحت لوالدى علشان يكلمه و يطلب ايدى منه 

اول ما ادم اتكلم مع بابا ......

_روايات رومانسيه

يتبع 

#دجيهان_عادل

#قصص_وحكايات_د_جيهان_عادل.

فضلا غير مسموح نقل أو نسخ القصه إلا بعد اذن الكاتب ..