#اغادير_ قصص رعب
#الجزء_العاشر
قصص رعب
خدى يا تانه الشعله اهى ...بمجرد ما هتولعى فى واحد الباقى هيولعوا قدامك
تانه مسكت الشعله بمنتهى الثبات و رمتها على الشيخ ...
الشيخ كله بقا كتله نار ...بعدها مراته ....أولاده مسك فيهم النار
تانه بعد ما كانت عماله تضحك بصوت عالى و تقهقه ...سكتت و هى بتسمع الاطفال بتصرخ ...افتكرت ابننا عبدالرحمن بس بعد ايه؟؟؟ ...قد فات الاوان 😔
يااا ...دى حاجه صعبه اوى ...اعوذ بالله هو فيه كدا ؟؟
النفس يا بنتى مليانه بالشرور و اللى ربنا يحبه يقدره على نفسه
طب و بعدين ؟؟ ايه اللى حصل مع تانه و ابو العيون ؟
تانه لما شافت الاطفال بتتحرق ضميرها صحى و صرخاتهم بقت تعذبها و هى صاحيه و هى نايمه
طب و فكتك من الحبسه ؟
بعد حادثه الشيخ تانه راحت لابو العيون و طلبت منه الترياق لكنه ضحك و قالها
انتى طيبه اوى يا تانه ....هو انتى فاكره انى هديلك الترياق صحيح ؟؟؟
دا اتفاق
وانا رجعت فيه
انت بتقول ايه ؟؟
بقول اللى سمعتيه
ذاكر فاضله يومين و يموت
ايه ؟؟ يموت ؟
لازم ذاكر يموت علشان سيطرتى عليكى تكون كامله ... بموت ذاكر انتى هتبقى عبده عندى متقدريش تخلفى ليا أمر ...هسيبك اليومين دول تروحى تودعيه ، شوفتى بقا انا حنين ازاى ؟
و رجعت تانه البيت و هى بتجر الذل و العار وراها
دخلت عليا و قعدت بين اديا و هى بتعيط بحرقه و حكيت ليا على الاتفاق البغيض اللى بينها و بين أبو العيون
تانه وطت على رجلى تبوسها و قالت لى سامحنى ، انا حقدى عمانى و خلانى مشفش قدامى ، ضيعتك و ضيعت نفسي و ضيعت اولاد الشيخ الغلابه
كنت ببص لها و مش قادر ارد عليها بس كان جوايا نار ...لو كنت اقدر اتحرك ساعتها الله اعلم كان ممكن اعمل ايه فيها
سامحنى يا ذاكر ...سامحنى انا مستعده اعمل اى حاجه و انقذك من اللى انت فيه ، يا ريتنى سمعت كلامك ، يا ريتنى ما رحت لابو العيون ، انا هعيش عمرى اتعذب بسببك و بسبب اولاد الشيخ ، هعيش عبده ذليله لابو العيون ، بس انا اللى استاهل ..دا جزاء عملى ...
بصيت لها بغضب و لسان حالى بيقول
ودتينا كلنا فى داهيه يا تانه ... يارب متنصرش الشر ، يارب هى غلطت بس انت غفور رحيم ، يارب انصرنا على ابو العيون الملعون..
و جه فى فكرى ابن عمى حكيم و دا من حكماء الجن و يعتبر كبيرنا و يمكن يلاقى لنا حل و يفك تجميدى قبل ما اموت زى ما ابو العيون قال لتانه
بس ازاى هدلها عليه ؟
تانه وقفت و مسحت دموعها و قالت لى
انت سامحتنى يا ذاكر ؟؟ لو سامحتنى ارمش بعينك مرتين ، و لو مسمحتنيش ارمش بعينك رمشه واحده
و بالرغم انى كنت غضبان منها بس محبتش ازود عذابها ، رمشت بعينى مرتين
تانه فرحت و قعدت تبوس فيا
ربنا يخليك ليا ....بس ابو العيون قال انك هتموت ، يادى حظى يا ربى انا اللى عملت كدا فى نفسي
و قعدت تعيط
بصيت فى عينيها كأنى بطبطب عليها و بصيت على الحيطه علشان اجذب انتباهها للصور المتعلقه عليها
احنا عندنا عاده أننا بنعلق صور كبارنا تبجيل لهم و علشان يفضلوا دايما على بالنا
تانه بصت على الحيط و رجعت بصت لى مره تانيه
انت عاوز تقول ايه ؟؟؟ عاوز تودع الصور
رمشت بعينى رمشه ، عرفت انى بقولها لا
قالت طب عاوز اجيبهالك واحده واحده
رمشت بعينى مرتين ، يعنى ايوه
ابتدت تانه تنزل صوره صوره وتحطها قدام عنيا ...لحد ما وصلت لصوره حكيم ابن عمى و دى الصوره اللى كنت قاصدها من الاول
ابتديت اقفل عينى و افتحها كتير ..و تانه تبص باستغراب
انت تقصد حكيم ؟؟؟عاوزه ؟؟
رمشت بعينى مرتين
عاوز منه ايه ؟؟
رمشت تانى
حاضر هروح انده له ...
و راحت تانه لحكيم و جه معاها مع أنه معدش بيخرج من بيته لأن عمره بلغ الالف عام
تانه حكت له على كل اللى حصل ...سمع منها من غير ما يرد بكلمه ، لحد ما خلصت كلام
قالها دلوقتى يا تانه انتى ارتكبتى غلطه كبيره
انا بعترف و مستعده اعمل اى حاجه أكفر بيها عن ذنبى
الحل من وجهة نظرى فيه مخاطره كبيره
انا مستعده لاى مخاطره
بس ممكن تموتى
موافقه بس ذاكر يعيش
انا معرفش حد يقدر يحل الموضوع ده غير العجوز سوفيرا دى اقوى من ابو العيون و هى اللى تقدر تحل الموضوع بس زى ما قلت لك ممكن يكلفك حياتك
و انا موافقه بصيت لتانه و رمشت لها مره يعنى انا مش موافق
تانه نزلت تحت رجليا و هى بتعيط ،
حياتى أقل حاجه اقدمهالك ، دا أقل جزاء ليا ، انا طالبه من ربنا أنه يرحمنى على اللى عملته بس ..سامحنى يا ذاكر و اوعى تنسانى
حكيم اخد تانه و راحوا لسوفيرا اللى قالت لها أن الحل انها تجود بروحها لما العجوز تلقى عليها تعويذه معينه
التعويذه دى بتخليها تتلاشى لحد ما يفضل رمش واحد من عيونها ...رمش هيكون زى الدبوس فى حدته و قوته ..إذا تم شكى بيه ارجع زى الاول و التجميد يزول
تانه وافقت و قالت لحكيم انه يقولى انها كانت بتحبنى اوى و نفسها انى اسامحها و ادعيلها كتير
و بالفعل العجوز ألقت عليها التعويذه ، و نثرت عليها تراب من الجبل الأحمر ابتدت تانه تدوب...لحد ما فضلش منها اى شئ غير الدبوس اللى قالت عليه العجوز
حكيم اخد الدبوس و رجع شكنى بيه
حسيت أن الدم رجع يمشي بعروقى ...و بعد ما كان جسمى متلج رجعت حرارته مره تانيه
اشهد أن لا إله إلا الله و اشهد ان محمد رسول الله
حمد الله على السلامه يا ذاكر
الله يسلمك يا حكيم ...متشكر اوى
لا شكر على واجب
امال فين تانه ؟
تانه هى الدبوس اللى شكك و رجع جسمك مره تانيه
يعنى ايه ؟
تانه ضحت بروحها عشانك
لا لا ...ليه يا حكيم ؟؟ ليه تخليها تعمل كدا؟
هى اللى اختارت
تانه ...تانه
. قصص رعب
و من يومها و ابو العيون هو عدوى اللدود بقيت اتتبع أخباره و احاول أفسد اى شر بيعمله ، لحد ما عرفت حكايه اغادير و انها بتجمع له مية طفل ملهومش ذنب ،
لازم نوقفها و نوقف اللى بتعمله و نوقف ابو العيون عن شره
و انا معاك ..انا مستعده أضحى بعمرى علشان خاطر ابنى
عمرك مهم و كفايه أرواح تروح علشان الكلب ده ، انتى لازم تحافظى على روحك
طب دلنى
انتى لازم تدخلى عالم الجن و تخترقيه زى ما اغادير اخترقت عالمكم...تقدرى ؟ و الا هتخافى ؟
اقدر ...انا اعمل اى حاجه عشان ابنى
خلاص مدام وافقتى انا هدلك على اللى هتعمليه
بس خايفه يكون الوقت فات
متخافيش كل الحكايه اللى حكيتهالك دى مخدتش فى وقتكم غير خمس دقايق ، و بعد شويه هتلاقى زوجك طالع لك زعلان لانه معرفش يعمل اى حاجه ..
همشي و اسيبك دلوقتى و ميعادنا قبل الفجر بساعه هقولك على اللى تعمليه بس ابقى استنينى فى اوضه حمزه
حاضر ...هستناك .
قصص رعب
يتبع....
#دجيهان_عادل
#قصص_وحكايات_د_جيهان_عادل.
فضلا غير مسموح نقل أو نسخ القصه إلا بعد اذن الكاتب ...
البارت ده هايل جدا كملى بليز يادكتورة 👏👌
ردحذفالبارت ده هايل جدا كملى بليز يادكتورة 👏👌
ردحذفالبارت ده هايل جدا كملى بليز يادكتورة 👏👌
ردحذف