#اغادير _ قصص رعب
#الجزء_الرابع
عاجبك كدا ؟؟ دايما انتى كدا يا صفيه تكبرى المواضيع ...تلاقى الولد كان دافى شويه و جايه تقوليلى الواد مولع
و الله يا ادهم كان سخن جدا
خلاص خلاص اسكتى
و رجعنا طول الطريق ساكتين و انا بفكر فى جارتى الغريبه دى و الكلام اللى قالته يا ترى دى صدفه و الا هى فعلا كانت عارفه حاجه ؟؟؟؟
تانى يوم لقيت الباب بيخبط
فتحت لقيتها قدامى ...معرفش ليه لما بشوفها قلبى بيترعش من جوه
حمزه عامل ايه يا ام حمزه ؟؟
الحمد لله يا ام لارا
الدكتور قالكم ايه ؟؟
قال مفيهوش اى حاجه زى ما انتى قلتى
مش قلت لك اصل الدوا اللى ادتهولك ده انا جايباه من بره ...متلقيش منه هنا ..جرعه واحده بس تخلى الطفل كأنه مش تعبان خالص
ياااا دا اكيد دوا غالى اوى
اوى .....مقولكيش
طيب هدخل اجيب لك بقيه الازازه ...اتفضلى جوه على ما اجيبها
دخلت نجوى و قعدت تبص حواليها فى كل مكان فى الانتريه اللى قاعده فيه
ذوقك حلو اوى يا ام حمزه
تسلمى يا حبيبتى ....تشربى شاى و الا نسكافيه
لا شكرا ...انا صايمه
تقبل الله يا حبيبتى ...هدخل اجيب لك الدوا
دخلت ادور على ازازة الدوا ملقتهاش ...الله هى راحت فين ؟؟؟
حاجه غريبه اوى انا كنت حاطها على التسريحه
طب يمكن حمزه لعب بيها ...بس حمزه عمره ما يوصلها ابدا
طب يمكن ادهم عانها هنا و الا هنا ؟؟ مش عارفه
خرجت لنجوى و انا محرجه اوى و قلت لها انى مش لاقيه ازازة الدوا
بان على وشها الضيق و قالت ولا يهمك يا حبيبتى متشغليش بالك .... هقوم انا دلوقتى
و قامت نجوى فتحت الباب و خرجت و انا كنت فى نص هدومى
دخلت انضف المطبخ و اجهز الاكل ...بعد كدا طلعت اوضب الانتريه و الم لعب حمزه لاحظت لعبه غريبه فى وسط لعبه عباره عن عروسه شعرها احمر طويل و لابسه فستان احمر و عينيها مبتسمه ابتسامه مخيفه
ايه دى يا حمزه ؟ جايبها منين العروسه دى ؟؟
من لارا يا ماما
لارا ؟؟؟؟ ازاى انا مشوفتهاش و هى بتدبهالك
حمزه رفع كتافه بمعنى معرفش و اخد العروسه من ايدى و جرى
دخلت على اوضة النوم عشان ارتبها لقيت ازازه الدوا على التسريحه
ايه دااااا ؟؟؟؟ ازاى ؟ ايه اللى جاب الدوا دا هنا ؟؟
سلام قول من رب رحيم ...انا لازم اروح اديها لنجوى لتفتكر انى عاوزه اخدها
لبست اسدالى و رحت عشان اخبط على باب جارتى سمعت صوت مش مفهوم و زى ما يكون صريخ مكتوم ....و دق طبول
رجعت خطوتين لورا ...ايه اللى انا سامعاه ده ؟؟
كنت عاوزه ارجع شقتى بسرعه فجأه لقيت بابها اتفتح و خرجت منه بابتسامتها اللى مبتفارقش وشها كأنها راسماها
تعالى يا صفيه اتفضلى
انتى عرفتى أسمى منين ؟؟
انتى اللى قلتيلى ...هو انتى ناسيه و الا ايه ؟؟
لا انا مش فاكره انى قلت لك حاجه زى كدا
لااا انتى ذاكرتك ضعيفه اوى يا صفيه ...انتى قولتى بأماره منا قولت لك أن أسمى نجوى
يمكن ...مش عارفه ...اتفضلى الدوا اهو متشكره اوى
خليه يا حبيبتى
لا كتر خيرك
طب ما تيجى تقعدى معايا انا كنت بتفرج على فيلم اجنبى رعب بس ايه طول الفيلم صريخ و حاجه وجع قلب خالص
اااه هو اللى سمعته دا تلفزيون ؟؟؟ دا الصوت زى ما يكون طبيعى جوه الشقه
ما هو عشان السماعات بتاعه التلفزيون يا حبيبتى ... التلفزيون ده انا مش جايباه من هنا
تمام ....استأذن انا بقا
طب ما تدخلى
لا أصل رايحه اعمل الغدا لجوزى
ماشي يا حبيبتى سلميلى على حمزه
الله يسلمك
دخلت شقتى و عندى احساس أن الموضوع كله على بعضه مش طبيعى
دخلت اوضة حمزه لقيت لارا قاعده معاه على الأرض و ماسكه العروسه المخيفه بتاعتها
ايه دا ؟؟؟ انتى دخلتى هنا امتى ؟؟
لما مامى كانت بتكلمك يا طنط
انا مشوفتكيش طلعتى قدامى خالص
لا طلعت بس انتى مخدتيش بالك
يمكن يا بنتى
رحت المطبخ اكمل طبخ و قلت كل شويه اروح ابص عليهم كدا عشان ميعملوش حاجه تأذيهم
بعد حوالى عشر دقايق ملقتش اى صوت
رحت بالراحه على اوضة حمزه لقيته قاعد جنب الحيطه و ضامم رجليه على صدره و دافس رأسه بين رجليه
مالك يا حمزه قاعد كدا ليه !؟ و فين لارا صاحبتك ؟؟
لارا زعلت منى يا ماما و مشيت
و زعلت منك ليه ؟؟؟
عشان مرضتش اقطع رأس العروسه
عروسه ايه دى ؟؟
العروسه اللى ادتهالى ...هى كانت بتلعب بيها و قالت لى خد السكينه دى ادبحها
يا خبر اسوح سكينة ايه دى ؟؟؟ انت جبت السكينه منين ؟؟
هى كانت معاها يا ماما
يا خبر ....ازاى امها سايبها ماشيه بسكينه ؟؟؟ طب هى اخدت العروسه معاها ؟؟
لا يا ماما هى ربطت بوقها و رقبتها بايشارب و رمتها تحت السرير بتاعى
ايه ؟؟؟؟
قمت اتنطرت من مكانى و رفعت ملايه السرير لقيت فعلا العروسه مربوطه من رقبتها و بوقها.
استغربت اوى ازاى طفله فى السن ده تعمل كدا ؟؟؟ اكيد بتتفرج مع امها على الافلام العنيفه دى ؟
انا لازم ابعد ابنى عن البنت دى ...البنت دى مش طبيعيه ابدااا لا هى و لا امها
قصص رعب
يتبع....
#دجيهان_عادل
#قصص_وحكايات_د_جيهان_عادل.
فضلا غير مسموح نقل أو نسخ القصه إلا بعد اذن الكاتب ...
ايه القصه المخيفه ديه 🤭🤭🤭
ردحذفايه ده لازم تصارح جوزها بكل مخاوفها وبكل اللى حصل
ردحذف