الشبح ( كامله ) ‏| ‎اقوي ‏قصص ‏رعب ‏2020

الشبح 👽(١ ؛ ٢ ؛ ٣ )

الجزء الاول

أنا سلمى عندى 25 سنه متخرجه من سنتين من معهد خدمه اجتماعيه 

بنت عاديه جدا عايشه حياتى بطريقه عاديه بحب السهر جدا لى صديقتين ندى و صافى مليش حد غيرهم طول النهار رغى معاهم على التليفون لدرجه أن ماما بتزهق منهم 

لى أخت بس مسافره مع جوزها السعوديه و بنتكلم كل يومين مره 

بدأت حكايتى فى يوم و أنا قاعده بالليل و حاطه السماعات فى ودانى و بسمع اغنيه للست ام كلثوم  

 أمل حياتى ياحب غالى ما ينتهيش

يا أحلى غنوه سمعها قلبي 💕ولا تتنسيش

خد عمرى كله بس النهارده خلينى أعيش

خلينى جنبك فى حضن قلبك💕💕

وسيبنى أحلم ياريت أمانى يا ريت زماني ما يصحينيش

أملى ... حياتى … عينيه يا أغلى منّى عليّه

يا حبيب امبارح وحبيب دلوقتِ

ياحبيبى لبكره ولآخر وقتى

أحكى لى قوللى

إيه من الأمانى ناقصنى تانى وأنا بين ايديك

عمرى ما دقت حنان فى حياتى زى حنانك

ولاحبيت ياحبيبى حياتى إلا علشانك

وقابلت آمالى وقابلت الدنيا وقابلت الحب

اول ماقابلتك واديتك قلبى💕 يا حياة القلب💗

أكتر من الفرح ده ما احلمش أكتــر من اللى أنا فيه ما أطلبش

بعد هنايا معاك يا حبيبى لو راح عمرى أنا مااندمش..)

و عماله أغنى معاها و من كتر اندماجى قمت أرقص كأنى برقص مع حد و مغمضه عنيا و فجأه بفتح عنيا و ببص على المرايه شوفت شبح اسود 💀كأنه كان بيرقص معايا أول ما شفته اختفى و أنا دمى هرب 

ايه دا ؟؟ هو اللى شفته دا حقيقه و إلا خيال ؟؟ 

أكيد بيتهيالى 😨

قعدت شويه و أنا مش مستوعبه اللى حصل و رحت متصله على البت ندى 

ألو ندى 

ألو سلمى انتى لسه صاحيه يا بنتى 

أيوه صاحيه ما انتى عارفه انى مبنامش غير بعد الفجر 

طب و أنا ذنبى ايه بس يا بنتى أنا عندى شغل الصبح أمى هتخلينى أقلب لها الشقه و اغسلها السجاد عشان العريس اللى قلت لكى أنه هيجى يوم الجمعه سبينى أنام بقا 

طيب يا ندى بس كنت عايزه اقولك على حاجه غريبه حصلت معايا دلوقتى 

حاجه ايه دى يا ستى 

انتى أكيد مش هتصدقينى 😴

يا ستى هصدقك بس قولى بسرعه عشان الحق أنام لى ساعتين 

أنا شفت شبح 👽كان بيرقص معايا دلوقتى و لما فتحت عينى و بصيت اختفى 

يا سلام ايه الهبل اللى بتقوليه دا يا بنتى شبح ايه و خرف ايه ؟ أنا كنت عارفه أنك بتشتغلينى 

و الله يا ندى ما بشتغلك و لا حاجه هى دى الحقيقه

بسم الله الرحمن الرحيم سلام قول من رب رحيم انتى متأكده من الكلام دا يا سلمى ؟؟

أيوه و الله متأكده 

طب استعيذى بالله كدا و شغلى جنبك قرآن و إلا اقولك قومى اتوضى و صلى ركعتين و نامى شويه 

حاضر يا ندى هعمل كدا سلام 

قمت اتوضيت و صليت و نمت على سريري بس كل تفكيري فى اللى شفته أنا متأكده انى شفته راجل طويل لابس اسود و لابس فوق رأسه زى زعبوط كدا و وشه مش باين 😢

عايزين تعرفوا حصلى ايه بعد كدا استنونى فى الجزء الثانى 👌👌

يهمنى اعرف رأيكم فى الجزء الاول

يتبع .......😊gg

الشبح👽

الجزء الثانى

نمت و صحيت الصبح على صوت ماما 

قومى يا سلمى حضرى الفطار 

حاضر يا ماما قايمه أهو 

حضرت الفطار و قعدنا نفطر أنا و ماما و سألتها انتى عمرك شفتى عفريت يا ماما ؟؟؟ 

قالت بسم الله الرحمن الرحيم ليه السيرة دى ع الصبح ؟

قلت لها بس قوليلى بس عمرك شفتى او حد من قرايبنا شاف عفريت ؟

قالت ايوا أمى كانت بتشوفهم و كانت ساعات تتكلم معاهم 

طب احكيلى يا ماما تيته قالت لك ايه عنهم 

يا بنتى سيبك من السيره دى أنا جسمى مش خالص  من كتر ما ستك كانت بتحكى لنا عليهم 

طب بس قوليلى اى حكايه تيته قالتها لكى يا ماما 

هقولك يا ستى أمى كانت بتحكيلنا أنها كانت لما تيجى تنام و تفتح عنيها فجاه بتشوف أشباح لونها اسود بتظهر واقفه جنب سريرها و أول ما نظرها يقع عليهم يختفوا 

و ساعات كانت تشوفهم بيدخلوا جوه الحيطه و ساعات كانت تشوفهم على شكل شبح طويل اسود و ساعات شبح قصير طول الولد كدا 

و فى مره كانت نايمه و فتحت عنيها لقت واحد منهم قاعد جنبها بس من غير رأس و أول ما شفته برده اختفى 

غير بقا أنها كانت ساعات تشوف أمها او أختها قاعده فى الصاله و هى معديه عليهم و تدخل تلاقيهم فى البلكونه او الاوضه جوا 

طبعا الكلام ده زمان اوى ايام اللمبه الجاز بس بيتهيألي دلوقتى مفيش الكلام ده 

لا يا ماما لسه موجودين أنا لسه شايفه واحد منهم امبارح 

شفتى ايه 😨😨😨

شفت واحد بيرقص معايا قدام المرايا 

طب و انتى كنتى بترقصى بالليل ؟؟؟؟

أيوه يا ماما 

ليه كدا يا بنتى ؟؟ يا أدى المصيبه 

أنا لازم أخدك للشيخ حسين يشوف ايه اللى حصل و نعمل ايه فى الحكايه دى ؟

لا يا ماما شيخ ايه هو انتى شايفانى ملبوسه و إلا ايه 

لا يا ستى انا هشغل قرآن و أحاول اواظب على الصلاة  و خلاص بإذن الله مش هشوفه تانى 

براحتك يا بنتى بس أنا بقولك عشان نطمن بس 

متخافيش يا ماما 

خلصنا فطار و دخلت اتصلت على صافى و حكيت لها على اللى شفته 

لقيت صافى خافت اوى و قالت لى بطلى تحكى على الكلام ده عشان هما بيجو على السيره 💀👻

قفلت معاها و شغلت قران و بدأت انضف فى البيت 

بعد شويه لقيت طنط سميحة بتتصل بماما و بتقولها أنها جايبالى عريس و سمعت ماما بترحب بالموضوع و أنها عايزه تجيبه بكرا 

أمى قفلت و جت عشان تقولى طنط سميحه جايبه لك عريس كويس اوى دكتور صيدلى و بيشتغل فى السعوديه و نازل اجازه يشوف عروسه و هيسافر و لما ينزل الأجازة الجايه هيتجوز و هيعيش هنا على طول و هيفتح صيدليه على مستوى و .... 

قلت لها تانى يا ماما ؟ دا عاشر عريس يجى و يكون مبسوط و يمشي و ميسالش تانى 

أنا تعبت و الله و مش عايزه أتعرض للتجربه دى تانى 😢

يا بنتى طب شوفيه بس مش يمكن يعجبك 

و لما يعجبنى و يمشي زى اللى قبله هعمل ايه ؟

ان شاء الله مش هيمشي أنا قلبى حاسس المره دى أن الحكايه هتكمل بإذن الله و بعدين يا سلمى هو انتى مش عاوزه تفرحينى و إلا ايه ؟؟

نفسي اطمن عليكى يا بنتى قبل ما أموت 

بعد الشر عنك يا ماما 😳 خلاص هشوف العريس عشان خاطرك و لو انى عارفه اللى فيها كويس 

طيب قومى بقا اقلبى الشقه و طلعى المفارش الجديدة و ظبطى الحته كدا 

حاضر حاضر يا ماما 😏 أما نشوف آخرتها 

عايزين تعرفوا حصل معايا ايه بعد كدا استنونى فى الجزء الثالث 

يتبع ..........😊gg

الشبح 👽

الجزء الثالث 

نضفت الشقه و خلصت على آخر النهار و دخلت أنام علشان هلكت طول النهار  

أول ما حطيت جسمى على السرير افتكرت انى لازم احضر طقم شيك كدا عشان أقابل العريس 

كنت لسه شاريه تايير جديد لونه بينك و ملبستوش و لا مره 

فتحت الدولاب ادور عليه ملقتهوش 

فين التايير؟  أكيد ماما عانته فى هدومها بكرا أن شاء الله اجيبه و أشوف محتاج كوى و إلا لا 

دخلت سريرى و نمت حلمت بحلم غريب اوى 

حلمت أن فى راجل ضخم اوى شبه عفريت مصباح علاء الدين اخدنى تحت كتفه كدا و زى ما يكون طاير على وش الميه و أول ما اخدنى قالى تعالى عشان تقابلى خطيبك 

أنا فى الحلم تخيلت أن خطيبي دا العربس اللى جاى بكرا 

الراجل حطنى على جزيره فى وسط الميه و على الجزيره دى قصر كدا شكله قديم عامل زى البيوت اللى بشوفها فى الأفلام الاجنبيه 

و لقيت نفسي طايره و عماله ابص من خلال الشبابيك على اللى جوا البيت 

لقيت زى ما يكون فى احتفال كدا و طربيزه طويله عليها زى شيكولاتات و حاجات حلوه 

و لقيت نفسي دخلت جوه معرفش ازاى و بفتح باب اوضه من الاوض لقيت واحد قاعد على سرير و شكله واحد عادى جدا 

قلت له أنت مين و أنا فين هنا 

رد على و قالى انتى فى بيتك و أنا عريسك و انهارده خطوبتنا 

قلت له خطوبتنا ازاى و أنا حتى معرفش اسمك 

قالى أنا اسمى مدينا 

قلت ايه الاسم الغريب دا و ايه المكان الغريب دا أنا عاوزه أروح 

و فجأه لقيته غضب بشده و قام وقف و قالى تروحى فين ؟ انتى هنا فى مملكتى و محدش هيقدر يخرجك من هنا ابدا انتى فاهمه ؟

صحيت من النوم مفزوعه و ريقى ناشف جدا 

ايه الكابوس الوحش دا ؟

قعدت استعيذ بالله من الشيطان الرجيم و استغفر ربنا كتير و قلت لنفسي اكيد عقلى الباطن هو اللى صور لى كل دا عشان بفكر فى العريس و بفكر فى الشبح اللى شفته امبارح 

أنا هقوم اصلى ركعتين لله بنيه الحفظ 

و فعلا قمت صليت و قعدت استغفر شويه لقيت آذان الفجر رحت مصليه الفجر و قعدت أختم الصلاه 

ماما صحيت تصلى و قالت لى انتى لسه منمتيش يا سلمى ؟ 

قلت لها لا نمت يا ماما بس حلمت بكابوس صحانى 

أعوذ بالله كابوس ايه دا 

متقلقيش يا ماما مفيش حاجه روحى بس الحقى الصلاه قبل ما النهار يطلع 

طبعا أنا معرفتش أنام خالص وبدأت أجهز الفطار 

و احنا قاعدين نفطر قلت لماما هو انتى عنتى التايير الجديد فين يا ماما أنا مش لاقياه خالص فى دولابى 

ماما قالت أنا معنتش حاجه و لا شفته اصلا 

ازاى يا ماما أنا دورت كويس اوى 

انتى مسطوله يا سلمى هيروح فين يعنى قومى دورى هتلاقيه او اقولك هاجى اجيبه لكى يا فالحه ما انتى ما بتعرفيش تدورى على اى حاجه 

ماما دخلت اوضتى و أنا دخلت وراها 

و قلت لها اتفضلى يا ستى دورى و لو لقتيه هعملك احلى فنجان شاى بس لو ملقتهوش يبقى الشاى عليكى انتى 😂

أمى أول ما فتحت الدولاب قالت أهو يا ستى قدام عينك مش بقولك انتى مسطوله 

قلت ايه دا ؟ و الله أنا دورت كتير شكرا يا ماما يا حبيبتى 

و أخدت التايير من ايدها و ببص لقيته متقطع و مرسوم عليه بالدم حرفين م ، س 

أنا و ماما أول ما شفنا كدا اتخضينا جدا و ...

عايزين تعرفوا عملنا ايه انتظرونى فى الجزء الرابع 

يتبع .........😊gg

الشبح ( جزء ٤ ؛ ٥ ؛ ٦ )

الجزء الرابع

  أخدت التايير من ايد ماما و ببص لقيته متقطع و مرسوم عليه بالدم حرفين م ، س 

أنا و ماما أول ما شفنا كدا اتخضينا جدا و لقيت ماما بتقولى ايه دا مين عمل فى التايير كدا ؟؟

قلت معرفش يا ماما 

قالت الموضوع دا ميتسكتش عليه طب يمكن حد من صاحباتك اللى بتيجى تقعد معاكى هى اللى عملت كدا؟

قلت لا مش ممكن طبعا مفيش واحده من صحابى تهزر الهزار ده و بعدين استنى يا ماما استن.. ...

مالك يا سلمى فيه ايه يا بنتى ؟😨

أنا يا ماما حلمت حلم غريب اوى امبارح و يمكن يكون له علاقه باللى حصل دا

حلم حلم ايه ؟؟

حكيت لماما الحلم و لقتها اترعبت و قالت أنا قلت لكى نروح للشيخ حسين اتريقتى على 

بقولك ايه قومى ألبسي يلا لازم نروح له دلوقتى و هاتى التايير دا معاكى و هنحكيله على الحلم و على الشبح اللى شفتيه بيرقص معاكى قومى يلا 

حاضر حاضر يا ماما بس انتى ناسيه العريس اللى جاى انهارده؟ 

لا مش ناسيه أنا هتصل على طنط  سميحة تأجل الميعاد ليوم الجمعه

و فعلا قمت لبست و ماما اعتذرت لطنط سميحه أنه كان عندها ميعاد مهم و هى كانت ناسياه و استاذنتها تأجل الميعاد للجمعه الجايه 

أمى لبست عبايتها و نزلنا سوا و معانا التايير 

ركبنا المترو احنا ساكنين فى شبرا جنب محطة كليه الزراعه و الشيخ حسين دا ساكن فى فيصل 

نزلنا محطة فيصل و ركبنا توكتوك يوصلنا لبيته 

سألت ماما انتى عرفتى المكان دا منين يا ماما و عرفتى الشيخ حسين دا منين اصلا ؟

قالت الشيخ حسين دا راجل عجوز اوى كانت بتيجى مع جدتى و خالاتى عنده زمان اوى 

طب ما يمكن يا ماما الراجل عزل او مات 

لا الراجل و لا عزل و لا مات و بطلى فقر شويه 😒

وصلنا لبيت الشيخ بيت قديم اوى شبه مهجور 

مفيهوش عفش تقريبا 

من البيوت القديمه الواسعة اوى دهانه قديم و متقشر شبابيكه من الشبابيك الطويله اللى عليها حديد 

الصاله واسعه بلاطها قديم اوى متاكل و فيها شويه دكك  قاعد عليها شوية ناس 

و فى الوش راجل عجوز قاعد على مكتب قديم 

ماما راحت له و قالت له 

السلام عليكم 

و عليكم السلام يا حجه 

الشيخ موجود يا أخويا 

ايوا يا ستى موجود بس لازم تستنى دورك 

و ماله يا حاج نستنى 

و لقيت أمى طلعت فلوس من شنطتها و اديتها للراجل العجوز دا

الراجل قالها قدامك خمس انفار و هتدخلى 

قعدنا نستنى الشيخ و قعدت أتأمل الناس اللى قاعده منهم اللى قاعده ببنتها و منهم اللى جايب ابنه معاه 

و كلهم باين على وشهم البؤس 

و سرحت أن أكيد لكل واحد منهم قصه هى اللى جبته هنا 

بعد حوالى ساعتين جه دورنا و لقيت الراجل العجوز بيشاور لامى بالدخول 

أمى قامت اتنطرت و شدتني من أيدى زى العيل الصغير

معرفش ليه خفت فجأه و حسيت انى مش عاوزه ادخل 

بس أمى مسبتليش  فرصه للتفكير و اخدتنى و دخلت 

أول ما دخلت لقيت راجل عجوز جدا عنده حوالى 90 سنه  قاعد على الارض و لابس جلابيه بيضا و طاقيه و غطره فوق الطاقيه 

دقنه قصيره مش طويله اوى و لونها ابيض لابس فى ايده اليمين خاتم بفص كبير اوى لونه أحمر ، التجاعيد فى وشه غيبت ملامحه 😟

قدامه منقد للبخور و فى ايده سبحه خشب كبيره 

أول ما دخلنا أمى سلمت عليه و فكرته بنفسها و أنا كانت بتجيله زمان مع أمها و أخواتها 

الشيخ افتكرها و رحب بيها 

و هى حكت له على لقيته بيبص لى كدا بصه رعبتنى

و قالى هاتى الهدوم اللى لقتيها مقطوعه دى و تعالى اقعدى جنبى 

قمت و انا رجليا مش شايلانى مش عارفه انا مرعوبه من ايه و اديته الهدوم 

مسكها فى ايده و قعد يتمتم بكلام مش مفهوم 

و لقيته سكت فجأه و قال 

موضوعكم حله مش عندى و مقدرش عليه 

ماما لقتها انزعجت اوى و سألته ليه يا شيخ حسين ؟ هو فيه ايه بالله عليك ؟؟

يا حاجه عيلة أمك معاها قبيله من الجن من زمان و معظم ستات عليتكم مصابين و بنتك من العيله بس للاسف وقعت مع أكبر واحد فى قبيلتهم الملك بتاع القبيله دى و هو ملك يهودى صعب جدا التعامل معاه و اسمه مادينا 

قلت له فعلا دا الاسم اللى حلمت بيه 

قالى حلمتى بيه ازاى 

حكيت له على الحلم 

سمع و قالى انتى كدا فى حكم خطيبته و كدا زواجك عليه لازم هيتم خلال أيام و محدش هيقدر يغير المصير دا 

اى حد هيحاول هتحصله مصيبه علاجكم مش عندى 

من فضلكم اتفضلوا مع السلامه 

ماما لقتها وقفت و لقيت الدموع نزلت من عنيها و قالت له طب متعرفش نروح لمين يا شيخ ؟؟

رد عليها بعصبيه لا معرفش و يلا مع السلامه ... 

خرجنا من عند الشيخ و انا احترت أكتر و أمى قعدت تعيط و منطقتش بكلمه 

و انا كل تفكيرى ايه الكلام اللى اتقال ده 

عايزين تعرفوا انا حصلى ايه بعد كدا استنونى فى الجزء الخامس 

يتبع .......😊gg

الشبح👽

الجزء الخامس 

خرجنا من عند الشيخ و انا احترت أكتر و أمى قعدت تعيط و منطقتش بكلمه 

و انا كل تفكيرى ايه الكلام اللى اتقال ده 

روحت البيت لقيت ندى و صافى بيتصلوا بى و عايزين يجوا يقعدوا معايا 

ماما دخلت اوضتها و قعدت تعيط 

ندى و صافى لما جم حكيت لهم على كل حاجه لقيتهم خافوا اوى و حسيت انى غلطت انى حكيت لهم على اللى حصل 

قعدوا شويه و استاذنوا ان وراهم مشاوير و أنا بصراحه مزعلتش منهم لأنى أنا نفسي كنت خايفه و مش عارفه أتصرف ازاى 😣

قعدت على سريري و أنا دماغى مليها التفكير لغاية ما لقيت نفسي زى ما يكون متكتفه و لقيت ظهر قدامى واحد مدينى ضهره لابس عبايه سودا واسعه و رأسه متغطيه 

أنا شايفه دا كله و عماله انادى على ماما بس هى مش سمعانى و لا انا قادره أقوم اتحرك 

و فجأه لقيت الشخص ده  لف بجسمه وبيقرب منى 

و لقيت ايده بيحطها على شعرى و بينزل ببطء شديد 

و أنا عاوزه أقاوم و مش قادره و لقيت ايده جايه على وشي عايز يلمسه افتكرت ايه الكرسي قعدت اقراها فى سري و فجأه لقيته اختفى و لقيت جسمى فك خالص 

بس حسيت بإحساس بشع جدا و لاقيت نفسي عماله اعيط بصوت عالى 

أمى جت على صوتى 

مالك يا سلمى ؟ فيكى ايه يا حبيبتى ؟؟ 

شفته تانى يا ماما و المره دى حاول يلمسنى 😢😢

يا حبيبتى يا بنتى أنا مش عارفه هنعمل ايه 

و لا انا يا ماما دا حتى صحابى خافوا منى و مشيوا بسرعه أول ما حكيت لهم 

انتى حكيتى لهم ليه يا سلمى ؟؟؟ دلوقتى حكايتك تكون على كل لسان و يقولوا عليكى ملبوسه ليه كدا يا بنتى ؟

معرفش يا ماما انا كنت شايله هم و كنت عايزاهم يشيلوا عنى شويه

خلاص متزعليش يا سلمى المهم خلينا فى اللى احنا فيه دلوقتى 

أنا خايفه أنام لوحدى يا ماما 😴

طيب تعالى نامى جنبى و هنشغل جنبنا سورة البقره و الرقيه الشرعيه و متقلقيش  

رحت الليله دى نمت فى حضن أمى و كنت حاسه بيها طول الليل منامتش  😧

عدى يومين و احنا مشغلين القرآن ليل نهار 

و لقيت ماما جايه تقولى انا كلمت خالتك و حكيت لها على اللى قالوا الشيخ حسين و هى قالت لى أنه كبر و خرف و أن فى شيخه كويسه اوى اسمها الشيخه وهيبه قريبه مننا هنا هاخدك و نروح لها كمان شويه 

تانى يا ماما هتاخدينى لشيوخ 

عشان نطمن يا بنتى و نشوف كلام الشيخ حسين دا صح و إلا غلط 

رحنا فعلا للشيخه وهيبه ست فى الخمسينات من عمرها مبتسمه لابسه طرحه خضرا و جلابيه بيضا متكحله و كل كلمه تقولها تتبعها بالصلاة على النبى و المكان كله ريحته بخور حلوه اوى

قالت اسمك و اسم أمك ايه ؟؟

قلت لها سلمى بنت سعاد 

لقيتها مسكت أيدى جامد و غطت وشها بطرحتها وقالت انتى يا سلمى فى واحد عاشقك من الجن  

و الواحد دا عدك مراته 

سألتها و دا جالى منين 

قالت دا جالك من الحمام و من كتر ما بتشغلى أغانى و تسمعيها بالليل و الرقص قدام المرايا خلتيه خد باله منك و عشقك 

طيب اتصرف معاه ازاى ؟؟

انتى ملكيش دعوه انا هصرفه عنك بس محتاجه مبلغ كدا عشان هجيب بخور غالى و هعملك تحصينه عشان ميقربلكيش تانى 

و هديكى حاجات تستحمى بيها فى أدان الفجر و مع أدان المغرب لمدة أسبوع و أن شاء الله خير بالصلاة على النبى 

ماما سألتها طب و محتاجه مننا كام يا شيخه وهيبه ؟؟

لا انا مش هاخد حاجه لنفسي انا هعملكم  الموضوع دا خدمه عشان الست أختك 

منا عارفه يا شيخه وهيبه بس كنت عايزه اعرف بس عشان اعمل حسابى  

طيب بالصلاة على النبى 7 آلاف بلاش 10 عشان خاطركم 

بصيت لماما كدا ايه المبلغ دا كله و قلت لها طيب يا شيخه هندبر الفلوس و هنجيلك ان شاء الله 

قالت بس قوام قبل بدايه الشهر العربى عشان انا شغلى على النجوم و هديكى حاجات قبل ظهور القمر فى السما تستحمى بيها 

شكرنا الست و طلعنا من عندها و قلت لماما 

ماما أنا مش هعمل اى حاجه من الحاجات دى و مش هندفع المبلغ دا كله دى ست نصابه 

ماما قالت متقوليش كدا يا بنتى ليروحوا يقولولها 

هما مين اللى يروحوا يا ماما و بعدين ما يروحوا 

أنا بقولك انا مش هرجع لها تانى 

ماما طبعا مكنش عاجبها كلامى بس سكتت لأن المبلغ فعلا كان كبير عليها .

تانى يوم لقينا طنط سميحة بتتصل بماما و تقولها احنا على ميعادنا بكرا ان شاء الله 

شاورت لماما تقولها لأ  لكن لقيت ماما بتقولها آه طبعا اتفضلوا أهلا و سهلا 

بعد ما ماما خلصت المكالمه قلت لها ليه يا ماما هتخليهم يجوا ما انتى عارفه الشيخ قال ايه انا خلاص محكوم على انى معشش زى اى بنت عاديه محكوم على أكون لواحد من الجان و اى حد هيتعرض له هيوديه فى مصيبه زى ما الشيخ قال 

يا بنتى أهو احنا بنحاول يمكن ربك يكرم 

خلاص يا ماما اللى تشوفيه 

تانى يوم بعد العصر لقيت ماما جايه تقولى مش هنقومى تلبسي يا سلمى انا عايزاكى تبقى قمر و عايزاكى ...... 

ماما أنا هلبس لبس عادى انا عارفه اللى فيها بس انا وافقت بس عشان خاطرك مع أنى  عارفه نتيجه المقابله دى 

عايزين تعرفوا حصل ايه بعد كدا استنونى فى الجزء السادس 

يتبع ........😊gg

الشبح 👽

الجزء السادس و الاخير

لبست لبسي العادى و حضرنا الحاجه الساقعه و الجاتوه و لقينا العريس جاى فى ميعاده بالظبط الساعه 6 مساء و جاى معاه والدته و طنط سميحه 

أمى رحبت بيهم و دخلتهم الانتريه و  نادت على

دخلت بالحاجه الساقعه و لقيت شاب فى التلاتينات عنده دقن طويله لابس بدله و نضاره و باين على ملامحه التدين 

قلت سلام عليكم 

كلهم ردوا و لقيته مرفعش عينه على 

أمه و طنط سميحه قاموا سلموا على  

أمى قعدت تتكلم مع والدته و ترحب بيهم و هو ساكت و محرج و أنا كمان ساكته مبتكلمش 

أمى لقتها فجأه بتقول احنا عمالين نتكلم و العرسان منطقوش و لا كلمه احنا بقا نسيبهم يتكلموا سوا شويه و نقعد قصادهم هنا فى الصاله 

أم العريس وافقت طبعا و أمى قالت لها اتفضلى يا حبيبتى البيت بيتك 

أول ما سابونا لقيت وليد رفع عينه و قالى 

تشرفنا انسه سلمى 

هزيت راسي و متكلمتش 

قالى أنا عاوز أعرفك بنفسي عشان .....

قلتله مالوش لازمه 😐

عفوا هو ايه اللى ملوش لازمه ؟؟

ملوش لازمه تعرفنى حاجه عن نفسك و تقعد تتكلم و تتعب نفسك و فى الآخر هتمشي و مش هترجع تانى زى اللى قبلك  

و مين قالك كدا مش يمكن عجبتينى؟ 

ما هو كل اللى قبلك برده قالوا كدا و عجبتهم و مشيوا مرجعوش 😔

طب مش يمكن أنا مختلف عنهم شويه 

مختلف ازاى يعنى ؟

انسه سلمى هو أنا فى حاجه مش عاجباكى ؟

ليه بتقول كدا ؟

عشان من أول كلامك معايا مش عايزه تدينى فرصه اتعرف عليكى و أعرفك بنفسي فلو كان مفيش قبول من ناحيتى أقوم و أمشي و خلاص 

لا أنا مقولتش كدا 😧 بس ....

ايوا بس ايه أنا عاوز اسمع منك سبب الهجوم ده

أصل أنا عارفه أن الموضوع مش هيكمل 

و ليه يا ستى تقدرى البلا قبل وقوعه مش يمكن ترتاحى لى و ارتاح لكى . طيب عايز أسألك سؤال 

اتفضل .

انتى انطباعك المبداى عنى ايه يعنى فى ارتياح و إلا لا 

أيوه فى ارتياح 😊

طيب عظيم اوى . ليه بقا بتقولى أن الموضوع مش هيكمل ؟

عشان انت مش هترجع 

ليه بس كدا ؟ و إذا قلت لك انى ارتحت اوى من أول ما دخلت بيتكم و ارتحت أكتر من أول ما عينى وقعت عليكى و حسيت انى أعرفك من زمان اوى هتقولى ايه ؟

صراحه و أنا كمان ارتحت لك بس أنا عندى مانع هيخليك تبعد عنى 

مانع مانع ايه دا هو انتى مرتبطة بحد تانى ؟

لا أنا مش مرتبطه و لا عمرى كان لى علاقات مع حد خالص 

طب عظيم ايه بقا اللى ممكن يكون مانعك يا ستى 

هقولك بس مش هتصدقنى 😢

قولى و هصدقك ان شاء الله 

اللى هيمنع مادينا 

مين  سي مادينا دا كمان ؟

دا عفريت بيحبنى و عايز يتجوزنى 

ههههههههههه عفريت ؟ ايه الكلام الغريب دا عيب عليكى دا انتى ست متعلمه متقوليش الكلام ده 

و الله زى ما بقولك أنا مبكدبش عليك 

طب ازاى ؟ فهمينى و عرفتى أنه بيحبك و عايز يتجوزك ازاى ؟

هقولك يا سيدى كل ما يجيلى عريس و يكون مبسوط زيك كدا يمشي و ميرجعش 

عادى جدا دا نصيب و يمكن نصيبك لسه مجاش مش يمكن نصيبك لسه معايا أنا 😉

طيب هقولك على كل حاجه 

و حكيت لوليد عن كل اللى حصل معايا و اللى قاله الشيخ حسين و الشيخه وهيبه و لقيت وليد قعد يسمع يسمع و فى الآخر قعد يضحك اوى 

قلت له ايه دا انت مخفتش؟

قالى و هخاف من ايه يعنى ؟ ما هو انتى لو كنتى صبرتى على و خلتينى أعرفك كل حاجه عنى كنتى عرفتى أنا بضحك ليه دلوقتى 

بصيت له كدا و أنا مش فاهمه حاجه و قلت له طب قول 

قالى أنا يا ستى دكتور صيدلي متخرج من جامعة الأزهر و حافظ كتاب الله و كمان معالج بالرقية الشرعيه 

صحيح ؟😨طب يعنى تعرف تعالجنى 

الشفاء دا من عند الله بس الإنسان لازم يكون عنده ثقه و يقين بالله عز و جل هو دا الحبل اللى لازم تتمسكى بيه . السبب فى اللى انتى فيه بعدك عن ربنا مع أنه أقرب اليكى من حبل الوريد . حتى لما جيتى تستعينى بحد يساعدك روحتى للدجالين و المشعوذين و بعدتى عن طريق ربنا عز و جل 

فعلا عندك حق 😢

لازم اولا تتوبى إلى الله و تبرأى إليه و تندمى و تعزمى أنك مترجعيش للمعصيه دى ابدا 

حاضر حاضر يا دكتور وليد 

و بعدين تنفذى البرنامج العلاجى اللى هعملهولك و بإذن الله ربنا هيعافيكى من اللى انتى فيه 

لازم تلتزمى باذكار الصباح و المساء و تلتزمى بالرقيه الشرعيه قراءة و اغتسال و سوره البقره و انا هجيب لكى مسك و زيت زيتون مقروء عليهم تدهنى بيهم جسمك . بس الأهم من كل دا هو يقينك بالله 

و نعم بالله 😢

متخافيش أنا هكون معاكى خطوه بخطوه لغاية ما ربنا يعافيكى من اللى انتى فيه .

و فعلا تكررت زيارات وليد لينا و فى كل مره يدينى التعليمات و اعمل زى ما بيقولى لغايه الحمد لله تخلصت من اللى أنا فيه و حسيت أن ربنا ادانى المحنه دى عشان أقرب منه أكتر و ابقى مسلمه بحق و حقيق مش على الورق بس .و فهمت اللى ساعات اللى بنفتكره شر لينا بيكون خير احنا مش مقدرينه. 

آه نسيت أقولكم أن موضوعى أنا ووليد تم و كان فرحى الخميس اللى فات عقبال كل البنات 😍😘😘😘

تمت 

أرجو أن القصه تنال اعجابكم و إذا كانت أدخلت عليكم شئ من السعاده ارجو الترحم على روح والدى رحمة الله عليه 

د. جيهان عادل 😊

..