#اغادير
#الجزء_الثانى
معرفش انا حصلى ايه ...حسيت انى اتجمدت مكانى و مكنتش قادره اقف
بس قلت فى نفسي يمكن مجنونه أو مخها مش سليم لكن اللى حصل بعد كدا خلانى اعرف انها مش كدا خالص ....
طلعت على شقتى و حطيت ابنى فى سريره و بعدها بشويه لقيت ادهم جاى
مالك يا صفيه قاعده كدا ليه ؟؟
مفيش يا ادهم ...احضرلك العشا ؟؟
ياريت ...انا ميت من الجوع
و حضرت العشا و قعدت قدامه سرحانه فى الست اللى شكلها عجيب دى
ادهم لاحظ و سألنى
هو فى ايه يا صفيه ؟؟ مسهمه كدا ليه ؟
اصل فى حاجه غريبه حصلت من شويه
حاجة ايه دى ؟
كنت قاعده فى الشارع بحمزه و لقيت ست جت عليا وقفت ابتسمت لى و راحت ماشيه تانى
طب و ايه الغريب فى كدا ؟
معرفش يا ادهم جسمى قشعر و حسيت انها شكلها عجيب
يا ستى بيتهيألك و بعدين انتى ايه اللى نزلك الشارع فى الوقت ده ؟
الواد كان زهقان و قعد يعيط مسكتش الا اما نزلنا تحت
انتى اكيد اتجننتى ...انتى متعرفيش أن المكان هنا جديد و ممكن تتعرضى للسرقه أو أن حد يخطف ابنك منك
اعوذ بالله انت بتقول ايه ؟
زى ما بقولك كدا ...حسك عينك تعملى كدا تانى
حاضر ...انا مجاش فى بالى الكلام اللى بتقوله ده ..خلاص متزعلش بقا
خلاص بس خدى بالك يا صفيه بعد كدا ...طلباتك انا بجيبهالك بالاسبوع مفيش داعى انك تنزلى خالص
منا زهقت يا ادهم ...طب هناك كنت بشتغل هنا انا قاعده مش لقيه شغل و انت ضحكت عليا و قلت لى أن الشغل هنا كتير
و الله انا ما ساكت بس كنت بفكر فى حمزه برده هنسيبه فين ؟؟ و لقيت أن احسن حل ليكى انك تشتغلى فى حضانه
حضانة ايه يا ادهم انا افهم ايه فى الحضانه ؟
يا ستى دا سهله هتحفظى العيال الحروف على كام نشيد على كام سوره صغيره و خلاص مش ثانويه عامه هى
طب و انا اجيب الحضانه دى منين بقا ؟
فى واحد صاحبى مراته فاتحه حضانه معانا هنا فى الحى و محتاجه مشرفه لأن المشرفه اللى كانت شغاله معاها مشيت و مرجعتش
و مشيت ليه ؟
معرفش..... يا ستى احنا مالنا المهم أن دى وظيفه حلوه و راتبها كويس و ابنك هيكون معاكى
طيب خلاص انا موافقه بس الحضانه دى فين ؟؟
عارفه اول الشارع بتاعنا ؟؟؟ الحته اللى بينزلنا فيها الميكروباص
ايوه
اهو فى الحته دى هتلاقى حضانه باسم النحله الشقيه ....الصبح من بدرى روحيلهم انا قلت له انى هبعتك لمراته
تمام ...حلو اوى من النجمه هكون هناك ...متعرفش هيدونى مرتب كام ؟؟
يا ستى ابقى اتفقى معاها انتى بقا
ماشى
و فعلا رحت تانى يوم الحضانه و لقيت صاحبتها ست محترمه اوى و لطيفه و لقيت عندها حوالى ٢٠ طفل
الحضانه عباره عن بيت كبير بجنينه و فى العاب مراجيح و زحاليق و فى مساعده بتساعد الاطفال
حمزه ابنى كان فرحان اوى و هو بيلعب مع الاطفال
صاحبة الحضانه لما اتطمنت لوجودى استأذنت انها هتروح مشوار ساعه و ترجعلى
قعدت قدام الأطفال اتفرج عليهم و هما بيلعبوا و فجأه لقيتها قدامى
نفس الست اللى شفتها قدام العماره بس المره دى بنتها ماشيه جنبها و أيدها فى أيدها
دخلت عليا و ابتسمت و قالت انا عاوزه ادخل بنتى الحضانه عندكم
تحت امرك ...بس المديره فى مشوار و زمانها جايه
طب ممكن اسيبها تلعب مع الاطفال شويه عقبال ما المديره تيجى
اوى اوى يا حبيبتى اتفضلى
البنت جريت على المراجيح و هى فرحانه
معرفش قلبى اتقبض ...هو انا كدا عملت غلط و الا لا ؟؟ مفروض مكنتش خليتها تلعب الا لما تتقيد فى الحضانه ...بس هعمل ايه الست احرجتنى ...الله الست راحت فين ؟؟ كانت واقفه هنا حالا ...هى سابت بنتها و راحت فين ؟؟
جريت على البنت و سألتها هى ماما فين يا حبيبتى ؟؟
ماما راحت تجيب لى شيبسى يا ميس
طيب يا حبيبتى
رحت قعدت على الكرسي و انا قلقانه ...الوقت طول و الست بقالها اكتر من ساعه مجتش
و فجأه لقيت مدام ناديه المديره داخله ...شاورت لى من بعيد علشان الحقها على المكتب
دخلت وراها لقيتها مبتسمه و سالتنى
ها ...الشغل عامل ايه معاكى ؟؟ الولاد تعبوكى ؟؟
لا ابدا ...دول لطاف جدا
عظيم ...و أن شاء الله لما تتعودى عليهم اكتر هتحبيهم اوى و هتحسي انك مرتاحه جدا
اه صحيح فى ست جت علشان تقدم لبنتها فى الحضانه
هى فين ؟؟
مش عارفه هى سابت بنتها تلعب مع الاولاد و مشيت بقالها ساعه
ايه ؟؟؟ ازاى تعملى كدا يا ميس صفيه ؟؟؟
ازاى تاخدى منها بنت من غير اى ورق ...مش يمكن خطفاها و تجيب لنا مصيبه ؟؟
لا خطفاها ايه بس ؟؟ البنت عارفاها كويس و لما سالتها ماما راحت فين قالت راحت تشترى لى شيبسي
هى فين البنت دى ؟؟
بره على المرجيحه
تعالى وريهالى
و خرجت اشوف البنت و اجيبها لمدام ناديه ملقتهاش
البنت ...البنت كانت هنا دلوقتى
سألت المساعده مشفتيش بنت لابسه فستان احمر كانت بتتمرجح هنا على المرجيحه
المساعده قالت لا مشفتش اى بنت هنا
ازاى الكلام ده ؟؟؟ امال راحت فين ؟؟؟ و امها لو جت دلوقتى هقولها ايه ؟؟
يتبع....
#دجيهان_عادل
#قصص_وحكايات_د_جيهان_عادل.
فضلا غير مسموح نقل أو نسخ القصه إلا بعد اذن الكاتب ...
هى غلطانة المفروض ماكنتش توافق تدخل البنت الحضانة بس تسلم ايدك 👌👏
ردحذفهى غلطانة المفروض ماكنتش توافق تدخل البنت الحضانة بس تسلم ايدك 👌👏
ردحذف