عنبر خمسه الجزء الثامن عشر

#عنبر_خمسه

#الجزء_الثامن_عشر

معلش يا ساره موبيلى وقع منى و لسه انهارده مرجع الخط ... قوليلى العنوان بالتفصيل اجى اخدك 

انا معرفش العنوان ...خد معاك الاخت تريزا هتقولك عليه .

و اخدت العنوان و رحت لساره ، بس بعد ما وصلت و فكرت لقيت انى مش هقدر اخدها من هناك 

انا مقدرش ارجع بيتى و اخدها معايا و مقدرش اخدها الفندق هى ممعهاش بطاقه ....يبقى أأمن مكان لها انها تفضل زى ما هى.

اختفاء ساره ممكن يخلى المجرمين دول ميفكروش فى قتلى طول ما هى مختفيه لكن ظهورها معناه الموت المؤكد ليا و لها 

دخلت الكنيسه و سألت عن الاخت تريزا 

قابلتها و اخدتنى وصلتنى لمبنى خدمات ملحق بالكنيسة 

و لقيت ساره مستنيانى فى حديقه قدام المبنى 

الاخت تريز استأذنت و انا قعدت قدام ساره 

ازيك يا ساره 

الله يسلمك يا دكتور ...قولى عملوا معاك ايه بعد ما سبتك ؟؟

مفيش كانوا جايين يقتلونى و يقتلوكى

لا مش ممكن ماما مش ممكن تقتلنى 

و اذا قلت لك انى اعتدال مش امك تقولى ايه ؟؟

اقول كدب ...

طب بصى فى شهادة الميلاد دى ...بصى على خانه الام ...

ايه دا ؟؟؟ دا صحيح ...اعتدال مش امى

انا مش عارف ازاى عمرك ما اخدتى بالك و انتى بتقدمى فى مدرسه و الا الجامعه من اسم الام ؟؟؟

انا عمرى ما مسكت ورقى فى ايدى بابا الله يرحمه هو اللى كان متولى الحكايه دى ...دا حتى شهادتى و سحب ملفى من الجامعه هو اللى  راح خلصه ليا لانى كنت فى أفريقيا ساعتها

اه عشان كدا معرفتيش ...

طب و بعدين ؟؟؟ 

بصى انا سجلت لهم كل تهديدهم بس للاسف تليفونى وقع  منى و مش عارف وقع فى ايدهم و الا لا ...مبقاش قدامنا دلوقتى الا المذكرات لازم ندور عليها كويس..

 اكيد سامر فاضح فيها اعتدال و كمان هنلاقى التسجيل اللى بصوتها بتعترف فيه انها قتلت والدك 

يا حبيبي يا بابا ....

دا مش وقت عياط يا ساره احنا لازم نكون عمليين و نتحرك بسرعه 

طب و هو انت فاكر أن اعتدال مدورتش على المذكرات ؟؟ اكيد دورت و قلبت الدنيا كمان 

انا عارف انها دورت بس يمكن ملقتهاش و بيتهيالى أن ده السبب انها كانت باقيه على حياتك الفتره اللى فاتت دى كلها 

يعنى ايه مش فاهمه ؟؟

اعتدال مش امك و املاك والدك و زوجك بقت بتاعتك انتى ...بموتك اعتدال مش هتاخد اى حاجه و اكيد بوجودك برده مش هتاخد اى حاجه و يمكن عشان كدا فكرت انها تجننك و اتفقت مع عبداللطيف على كدا ....و حالتك كمريضه نفسيه تسمح لها انها تتصرف فى اى حاجه بصفتها الوصيه عليكى أو يمكن كانت مستنيه شويه هى و عبداللطيف و يخلوكى تمضى على كل املاكك و بعد كدا يتخلصوا منك 

لو كلامك ده صحيح ليه بيفكروا فى قتلى دلوقتى ؟؟؟ منا لسه منقلتش املاكى لها 

بيتهيالى أن عبداللطيف هو اللى عاوزك تموتى علشان ظهورى بحياتك و طبعا هو عارف كويس اوى أن لما تتعرف حكايتك هيروح فى داهيه ...و بيتهيالى أن اعتدال متفقه معاه أنه ميقتلكيش الا لما تمضى الاول و يمكن عشان كدا كشفت نفسها و جت لحد شقة اكتوبر ..خافت لعبداللطيف ينفذ قبل ما تمضى 

ياااا دى لفه طويله اوى يا دكتور ...معقوله فى بشر شياطين كدا ؟؟

الخير و الشر موجودين فى البشر من ايام ادم عليه السلام ...اول جريمه فى البشريه اخ قتل اخوه علشان الطمع ...الطمع ممكن يخلى الإنسان يعمل اى حاجه 

صح يا دكتور ربنا يرحمنا 

طيب انتى لازم تساعدينى نلاقى المذكرات دى حاولى تفتكرى اى مكان أو اى حته ممكن سامر يكون مخبى حاجه مهمه زى دى 

انا مش عارفه سامر كانت أوراقه المهمه فى الشركه او الخزنه اللى فى البيت 

بس لا يمكن يكون مخبى حاجه مهمه زى دى فى خزنه موجوده و ظاهره كدا ...لازم يكون فى مكان محدش يعرفه

 مكان محدش يعرفه ؟؟؟؟؟؟.....ايوه  افتكرت ...افتكرت ...فى مره كنت سهرانه فى اوضتى بسمع فيروز كعادتى و سامر كان بره ...فى الليله دى رجع سامر على الساعه تلاته الفجر كدا و دخل على اوضة المكتب 

انا قمت و كنت لسه هكلمه لقيته محرك التابلوه اللى ورا كرسي المكتب و فاتح خزنه جوه الحيطه زى الافلام و بيحط ورق جواها ....

استغربت اوى هو عمره ما جاب سيره أن فى خزنه فى المكان ده خصوصا أن عندنا خزنه كبيره جدا فى نفس الاوضه محطوطه فى دولاب خاص بيها 

حلو جدا .....احنا كدا عرفنا المكان تقريبا بس بقى قدامنا مشكله تانيه ...هنفتح الخزنه دى ازاى ؟؟

هو تقريبا كان بيقفلها بأرقام سريه 

ما هى دى المشكله ...هنجيب الارقام دى منين دلوقتى ؟؟؟

مش عارفه 

طب اقولك ...استنى خدى القلم و الورقه دول اكتبيلى اى تاريخ مميز فى حياة سامر

تاريخ مميز ازاى ؟

يعنى تاريخ ميلاده ، تاريخ زواجكم تاريخ ميلادك انتى ...اى تاريخ كان له ذكرى عنده 

حاضر ...بس هو انا هكتبهم لك ليه ؟؟ هو انا مش هاجى معاك ؟؟

لا يا ساره وجودك هنا أأمن لك و أمن لى انا كمان 

طب و لو معرفتش تفتح الخزنه هتعمل ايه ؟؟

هشوف اى حل يا ساره متقلقيش بس اكتبيلى كل التواريخ هنا 

طب و هتدخل الشقه ازاى ؟؟؟ انا ممعييش المفتاح 

حكايه مفتاح الشقه دى سهله انا هعرف اتصرف فيه ملكيش دعوه انتى 

تتصرف ازاى فهمنى ؟؟

هشوف اى طفاشه و اطفش الباب ...بس عاوز منك تكتبيلى العنوان بالظبط علشان اجهز نفسي و اروح على طول الوقت مش فى صالحنا ابدا 

حاضر ....... الورقه اهى مكتوب فيها كل التواريخ اللى فاكراها و العنوان بالتفصيل 

تمام كدا ...هسيبك انا دلوقتى خلى بالك من نفسك 

انت اللى خد بالك من نفسك ..انا عاوزه اشكرك ...انت رديت لى حياتى مره تانيه

متشكرنيش يا ساره استنى لما نكشف المجرمين دول و نتخلص منهم 

باذن الله املى فى ربنا كبير 

و سبت ساره بعد ما وصيت عليها الاخت تريز و مشيت 

انا لازم افكر فى طريقه اتنكر بيها علشان محدش يعرفنى و انا رايح شقة ساره 

و بالفعل اشتريت عبايه خروج شيك و طرحه و شويه مكياج 😂 و باروكة شعر و جزمه حريمى بكعب و بقيت ايه ست اخر حلاوه 😂😂😂

 استنيت لحد ما الساعه جت ١٢ بالليل و رحت على العماره اللى فيها شقة ساره 

 ‏اول ما وصلت ...

يتبع

#قصص_وحكايات_د_جيهان_عادل.

فضلا غير مسموح نقل أو نسخ القصه إلا بعد اذن الكاتب ...