هاله الجزء الثالث

#هاله_قصه_حقيقيه

#الجزء_الثالث

نجحت اول سنتين بتفوق الحمد لله و كنت راسمه لنفسي امال عريضه انى اتعين معيده بالكليه لكن للاسف القدر خد منى اغلى ما املك 

 ‏خد منى امى 😔 ...و بقيت وحيده مليش حد ...القلب الحنين راح و فضلت انا ....يا ريتنى انا اللى مت يا امى مش انتى 😔😔😔😔😔

بعد ما امى توفت الدنيا اسودت فى وشى و مبقاش فيها اى حاجه حلوه 

تعبت اوى و دخلت فى حاله نفسيه سيئه ...مبقاش ليا حبيب و لا صاحب امى كانت صحبتى و اختى و امى و كل اللى ليا ..تخيلوا انى مكنتش باكل الا معاها ...طب انا هاكل مع مين دلوقتى ؟؟ هتكلم مع مين و اشكيله همى ؟؟؟ 

حتى اخواتى الولاد وارثين الطبع الصعب من والدى و مفيش فيهم حد حنين عليا 

ماما مكنتش بتعانى من اى مرض و فجأه ماتت كانت بالنسبالى صدمة عمرى 

بعد موت امى مبقاش حد يحن عليا الا جدى و جدتى و كنت بالنسبالهم عوض عن بنتهم اللى ماتت ...و طبعا كانوا بيدعمونى و ساعدوني انى اكمل كليتى 

بس طبعا اللى حصل أثر عليا و نجحت فى سنه تالته بمقبول بعد ما كنت بطلع من الاوائل 

طول الفتره دى ابويا كان بيعاملنى اسوء معامله و كنت أنا بنت باره جدا بيه عمرى ما اتعاملت معاه الا بكل رضا و كنت بسمع كلامه و عمرى ما كسرت له امر . كنت بتقى الله فيه و هو مبيتقيش الله فيا ...كنت بعامله عشان خاطر ربنا بس ...لكن الحقيقه أنه لا يصلح يكون اب 😔

و انا فى سنه رابعه اتقدم لى عريس طبعا والدى وافق و اتفق مع والده من غير ما حتى ياخد رايى و لا يسألنى حتى موافقه و الا لا ...كان بيعتبرنى دابه فى البيت أو مخلوق ملوش أنه يتكلم أو يعبر عن رأيه. انا كمان معترضتش .....العريس كان مهندس و قلت لنفسي يمكن دى تبقى بداية حياه جديده ...يمكن دا اللى يعوضنى عن اللى فات ...يمكن يورينى الحنيه اللى عمرى ما شفتها من والدى .

طبعا ابويا مكنش عاوز يغرم مليم فى الجوازه دى وكانت شبكتى الاجهزه الكهربيه الغساله و التلاجه و البوتجاز و الحمد لله امى كانت بتجهز فيا من بدرى سترتنى الله يرحمها ...و جدتى كملت جهازى.

كل ده كان له تأثير بعد كدا ...خطيبي جه عندنا مرتين تلاته قبل الفرح و شاف المعامله السيئه اللى كان بيعاملهالى والدى 

و الغريبه انى مكنتش بشوف فى عينه اى تعاطف عليا و لا كان بينطق ...و لا زى ما بسمع من زمايلى أن العريس بيكلم خطيبته بكلام حب و الكلام ده 

للاسف كان يجى يقعد مع والدى شويه يتكلموا و بعدين يمشي و انا كان كل دورى انى اخدم عليهم شاى و قهوه و عصير و ممنوع انى اقعد أو اتكلم معاه.

و اتجوزت بهاء اول ما خلصت الكليه على طول و كنت فاكره أن خلاص الجزء الصعب من حياتى عدى و جه الجزء اللى هيعوضنى المرار اللى شفته طول عمرى 

 وللاسف كان انسان غريب جدا الاهانة والسخرية شئ محبب عنده كنت ساعات مش بصدق الكلام إللى بيقوله 

 ‏حتى ليلة العمر اللى كل بنت بتتمناها كانت ليله غريبه و مش طبيعيه 

 ‏اول ما دخل و انا لسه بفستانى قالى وطى قلعينى الجزمه 

 ‏وقفت مذهوله ...اكيد بيهزر 

 ‏لكن للاسف مكنش بيهزر و لا حاجه و لما لاقانى واقفه مبلمه راح زقننى على الأرض عشان انزل اقلعه ...

 ‏قعدت على الأرض بفستانى و قلعته جزمته و الدموع مش قادره أوقفها 

 ‏هتقولولى ليه وافقتى على كدا ؟؟؟ ليه مقولتيش لا ؟؟

 ‏هقولكم اللى زيى مقهوره طول عمرها متقدرش تقول لأ ...و بعدين افرض رفضت و حصلت خناقه و رجعت لابويا تفتكروا ابويا هيعمل فيا ايه ؟؟ الموقف ده فكرنى بموقف امى الله يرحمها و قهرة ابويا لها فى أول يوم جواز

 ‏

 ‏بس انا قلت جوه نفسي دا واحد مهندس اكيد العقليه مختلفه و اكيد مع العشره هخليه يحبنى و يعاملنى احسن من كدا و انا بطبعى هاديه و لسانى حلو معرفش اغلط و لا اتعودت على كدا ..

 ‏بس للاسف كان تفكيري غلط ...بقى يقابل حبى ليه و معاملتى الكويسه بكل جفاء

 ‏كنت اروح اصحيه وابوسه يقولى أعوذ بالله على ده ضب....كتير كسر بخاطرى

كان ‏ يسخر من اكلى و يقولى ايه القرف اللى انتى عاملاه ده ؟؟ و ساعات كان يقلب الطبق و يقوم يمشى

كان يسخر من لبسى و يقولى انتى جايبه هدومك دى منين ؟؟ من سوق الجمعه ؟؟ انا استعر امشي معاكى فى الشارع

كان يسخر من كلامى و يعيب عليه و لو نطقت و الا قلت كلمه كان يقولى اسكتى اسكتى انتى بتعرفى تتكلمى اصلا 

كان ساعات يقولى لما بشوف قرد بفتكرك على فكرة انا مش وحشة انا طالعة لماما عيون ملونة وجمال هادى كان يقولى لون عنيكى يخوف كنت بجد مش مستوعبه هو بيعمل كده ليه وسألته اجوزتنى ليه قالى ابويا يا ستى بيجامل صاحبه إللى هو بابا بجوازى منك !

وقتها فكرت فى الطلاق بس مين هيقف جنبى وكمان طلعت حامل 

حياتى كانت جحيم وجه قالى انه هيجوز تانى بس لازم اسيب الشقة واروح اقعد عند مامته ...تصوروا القهر و الجبروت يعنى مش مكفيه انى لسه عروسه مكملتش سنه و جاى بمنتهى البجاحه يقولى سيبي شقتك عشان اتجوز فيها ....بس اقول ايه ابويا هو اللى رخصنى كدا و خلاه يبيع و يشترى فيا و هو عارف و متأكد أن مفيش حد هيقف قصاده

 لما قالى كدا نار الدنيا ولعت فى قلبى و لقيت نفسي لاول مره برد عليه وقلت له اجوز فى اى داهية وانا قاعدة فى بيتى

 ‏طبعا هو كان معتاد انى بقول نعم و حاضر بس انا كان فاض بيا الكيل 

 ‏اول ما سمعنى بقوله كدا نزل فيا ضرب بايديه و برجليه و قلع حزامه و نزل على ضهرى ...و تلطيش بالاقلام على وشى و شد شعرى و جرجرنى على الأرض خرجنى بره الشقه  و قفل الباب😔

 ‏الجيران اتلموا و قومونى و انا سايحه فى دمى من فوق و من تحت ...و اخدونى ودونى المستشفى وفقدت الجنين ووقتها صممت على الطلاق أو انى ابلغ عنه زى الدكتور ما قال 😢

 ‏#دجيهان_عادل

يتبع

#قصص_وحكايات_د_جيهان_عادل.

فضلا غير مسموح نقل أو نسخ القصه إلا بعد اذن الكاتب ...