حكاية هدى ( كامله )

#حكاية هدى ( القصه كامله )

#الجزء الاول

هحكيلكم انهارده حكايه هدى ......

اولا هنتعرف على أسرة هدى 

الاب ⁦👨‍🦳⁩: الاستاذ فهمى مدرس اول لغه انجليزيه

الام 🧕: استاذه سميحه موظفه فى الشؤون الاجتماعيه

الاخت 👩: سمر  الاخت الأكبر اكبر من هدى بتلات سنين

هدى 👧: بطلة قصتنا 🥰

هدى زى اى بنت عاديه لها أحلامها اللى طول عمرها بتحلم بيها 

هدى من و هى صغيره لما حد كان بيسالها عاوزه تطلعى ايه يا هدى ؟؟ 

كانت تقول عايزه اطلع ست بيت ... كان قرايبها كلهم يضحكوا عليها و يقولولها طب قولى دكتوره و الا مهندسه

و هى تقول لا ست بيت 

ومع ذلك هدى كانت شاطره اوى فى المدرسه و كانت بتطلع الاولى على فصلها . و كان كل مدرسينها مبسوطين منها جدا و بيتنبؤ لها بمستقبل هايل 

هدى كانت بنت جميله و هاديه ملامحها حلوه شعرها ناعم طويل اسود زى الليل ، عيونها عسليه واسعه متكحله كحل ربانى ، بيضا زى الشمع ،باقى ملامح وشها رقيقه زى نور الشمس ، اى مكان تدخله تدخل معاها البهجه و السعاده 

كانت شخصيه خجوله لما حد يكلمها تحط وشها فى الارض و تتكسف 

هدى كان بيجيلها عرسان من و هى فى إعدادى لكن ابوها و امها كانوا مقررين انها لازم تكمل تعليمها علشان يكون سلاح فى أيدها ضد أى ظرف من ظروف الزمن .

أما سمر اختها فكانت اقل منها جمالا و مستواها الدراسي عادى .. و عشان كدا الانظار كلها كانت موجهه لهدى 

سمر مكنتش بتشغل بالها بالكلام دا وكان لها صديقات كتير مشغوله بالفيس و الخروج و الكلام ده 

لما سمر كانت فى الثانويه العامه كانت هدى فى الاعداديه 

سمر جابت مجموع دخلها كليه الاداب 

أما هدى فطلعت الاولى على المحافظه بتاعتهاو دخلت ثانويه عامه 

هدى مكنش لها أصحاب كتير كانوا مجرد زمايل دراسه و بس .

بعد مرور تلات سنين هدى نجحت فى الثانويه العامه بمجموع كبير اوى و كانت من العشره الاوائل على الجمهوريه 

طبعا الأهل و الجيران كلهم بقوا يجوا يباركوا و يهنوا هدى و أسرتها و طبعا الكل كان فاكر أن هدى هتدخل كلية الطب . 

بعد ما الناس مشيت ابوها و امها قعدوا معاها و سالوها طب أن شاء الله يا هدى ؟؟ 

قالت لا يا بابا انا عاوزه ادخل صيدله 

يا بنتى انتى جايبه مجموع طب .. خساره 

مش خسارة و لا حاجه يا بابا الصيدله برده كليه من كليات القمه و انا بحب المجال ده اوى ارجوك يا بابا 

حاضر يا بنتى صيدله صيدله 

هدى دخلت كليه الصيدله و بقت تنجح بتقديرات كويسه 

و لغايه ما خدت الكليه و بقت دكتوره صيدلانيه اد الدنيا 

هدى راحت اشتغلت فى صيدليه علشان تتدرب 

فى الصيدليه شافها المهندس شادى و أعجب بيها جدا و باخلاقها العاليه 

سال المهندس شادى واحد من زمايلها فى الصيدليه عنها و عرف انها مش مرتبطه 

و اخد منه رقم والدها مستر فهمى و اخد منه ميعاد علشان يقابله

شادى حضر فى الميعاد هو ووالده ووالدته

اسره هدى رحبت بيهم و قعدوا كلهم يتكلموا

ام شادى اخدت هدى على جنب و بقت تتكلم معاها 

انتى بقا يا حبيبتى صيدلانيه صح؟

ايوة يا طنط 

اه بتأكد بس .اصل شادى ابنى بنات العيله هيموتوا عليه بسم الله ما شاءالله ادب و علم و أخلاق مفيش منها مش بقول كدا علشان ابنى لا و الله 

طبعا يا طنط 

و انتى بقا يا حبيبتى عندك كام سنه ؟؟ 

انا ٢٤ سنه 

اممممم حلو شادى عنده ٢٨ سنه و انا عندى ٤٧سنه خلفته و انا عندى ١٩ سنه .

العمر الطويل ليكى يا طنط 

و انتى بقا بتعرفى تطبخى ؟؟

ايوه ... شويه كدا على أدى 

لا متقلقيش انا هعلمك كل حاجه أن شاء الله و الا اقولك متتعبيش نفسك ابنى مبيكلش الا من ايديا . اصل دا وحيدى مليش غيره و ملوش غيرى.

بس انتى ضعيفه شويه يا هدى دا انتى لو مليتى شويه هتكون قمر .دا انا و انا فى سنك كنت ادك مرتين كنت بطه بلدى كدا ماشيه على الأرض .

طبعا ام هدى و سمر قاعدين واخدين بالهم من الحوار و عمالين يبصوا لبعض 

أما الأستاذ فهمى بقا يتكلم مع شادى و أبوه و اتبسط اوى منه و من تفكيره و لاقاه شاب طموح جدا 

انتهت الزياره على أنهم يدوهم فرصه يسألوا عليهم و يستخيروا و بعدين يردوا عليهم .

بعد ما الناس مشيت 

ابو هدى قال و الله الجدع ده محترم اوى هو و عيلته

ردت سميحه بس امه عقربه 

عقربه ايه بس ابتدينا بقا شغل الحموات الفارغ 

حموات ايه يا راجل ما هو انت مخدتش بالك كانت عماله تقول لبنتك ايه

ردت سمر ايوه يا بابا الست دى مش ساهله خالص

اسكتى انتى يا سمر ملكيش دعوه بالكلام ده 

و انتى يا هدى رايك ايه يا بنتى ؟؟

و الله يا بابا هو انسان باين عليه كويس بس فعلا مامته باين عليها شديدة شويه 

ملكيش دعوة بيها هو انتى هتتجوزيها هى و الا هتتجوزى ابنها ؟ انتى اعملى استخاره و شوفى ربنا هييسر بايه 

و انتى يا سميحه اعملى انتى كمان استخاره و انا كمان هعمل 

و بكرا بمشيئه الله هروح اسال على الجماعه دول و ربنا يكتب الخير يارب . 

عايزين تعرفوا اهل هدى وافقوا على شادى و الا لا ؟

استنونى فى الجزء الجاى ،😉

#د.جيهان عادل .

#حكاية هدى

#الجزء الثانى 

تانى يوم مستر فهمى سأل عن أهل شادى و عرف انهم ناس كويسين جدا و سمعتهم طيبه و عيلتهم عيله كبيره و لها اسمها كمان الولد سمعته طيبه جدا و الكل بيشهد له بالاخلاق العاليه .

هدى عملت استخارة و لقت نفسها مرتاحه 

مستر فهمى اتصل بأهل شادى و بلغهم موافقته

و اتفقوا على ميعاد يجوا علشان يتفقوا على تفاصيل الزواج .

لما شادى و أهله جم أبو شادى سأل مستر فهمى على طلباته 

مستر فهمى قاله احنا ملناش طلبات اى حاجه العريس بيجيبها بتبقى فى بيته 

رد أبو شادى طب و بالنسبه للشبكه ؟؟

الشبكه دى هدية العريس لعروسته و برده اللى هو يقدر. عليه 

طيب تمام اوى يا حاج فهمى انا هقولك امكانياتنا و لو فى اعتراض على اى حاجه مش هنختلف سوا 

اتفضل طبعا ربنا ما يجيب اختلاف 

شادى عنده شقه سوبر لوكس فوق شقتنا فى بيت العيله عباره عن أربع اوض و ريسبشن بتطل على تلات شوارع 

احنا هنفرش ٣ اوض نوم و انتريه و اطفال و انتوا عليكم سفره و المطبخ بادواته و أجهزته 

تمام 

النجف و السجاد علينا أما الستاير و شاشه التلفزيون و التكييفات عليكم 

تمام 

ردت ام شادى بس فيه نقطه معلش يا جماعه 

اتفضلى يا حاجه 

شادى له شقه اه بس الاكل و الشرب تحت عندى دا ابنى الوحيد يا جماعه و عايزاه هو و مراته و أولاده بعد كدا أن شاء الله يكونوا معايا و فى حضنى

ردت ام هدى طب ما هم هيكونوا ساكنين فوقك يا حاجه يعنى هيكونوا فى حضنك برده ايه لزوم أن الاكل و الشرب يكون تحت ؟😏

طب و فيها ايه يا ست ام هدى دا انا عاوزه اريح بنتك و هتكون زى بنتى بالظبط ايه الغلط فى اللى بقوله أنا 

رد مستر فهمى مفيش غلط و لا حاجه يا جماعه كلها حاجات بسيطه و مش هنختلف و لا هنبوظ الجوازه على حاجه زى دى 

ام هدى سكتت بس بقت متغاظه اوى من جوزها و بقت تقول فى نفسها حاضر يا فهمى بس لما الناس تمشي هيكون لى كلام تانى معاك 

أبو شادى رد و قال بالنسبه للشبكه احنا ملناش بركه الا عروستنا هنجيب بخمسين ألف جنيه دهب 

و هنقسم حق تكاليف القاعه فى الفرح و الشبكه سوا 

و الفرح بعد سنه من دلوقتى بمشيئه الله . و الشبكه الاسبوع الجاى بإذن الله 

تمام يا ابو شادى ...ربنا يتمم بخير 

شادى و عيلته مشيوا

و انفجرت سميحه فى فهمى 

ازاى يا راجل تتفق الاتفاق الخايب دا ؟؟ 

تكييفات ايه اللى هنجيبها و ندفع ليه معاهم فى تكاليف الفرح العرف بيقول أن الفرح على العريس و بعدين بنتى متقعدش مع العقربه دى تاكل و تشرب معاها هو فى ايه انت مالك بايع بنتك كدا ؟ 

بايع بنتى ايه و كلام فارغ ايه اللى بتقوليه هو انا لما اجوز بنتى لراجل مهندس محترم و من عيله يبقى كدا ببيعها 

و بعدين قاعدتها معاهم دى كويسه الست بتقول هريحها و هتبقى بنتى و صراحة حقها ابنها ميبعدش عنها لأنه وحيدها 

أما التكييفات اللى بتتكلمى فيها هنجيب تكييفين الناس مشرطتش نكيف الشقه كلها يعنى 

و الفرح اه بيبقى على العريس بس الشبكه برده بتبقى على العروسه يعنى هى هياها 

يا راجل انت هتجننى انا بقولك بنتى متنزلش تاكل مع العقربه دى و الله هتقرفها فى عيشتها

يا ستى و لا هتقرفها و لا حاجه و لو عملت اى مشاكل بعد كدا يبقوا ينفصلوا و خلاص بس متضيعيش ع البت جوازه زى دى ادينى بقولك اهو 

شادى خطب هدى و عملوا شبكه كبيره تليق بالمقام و الكل كان فرحان اوى بس الناس كلها كانت ملاحظه ام شادى انها لازقه فى ابنها مش سايباه لحظه و كل شويه تعدل فى هدومه و تطبطب على كتفه 

هدى كانت ملاحظه دا كله و كانت بتقول فى نفسها دى امه و لها حق تعمل كدا، مكنتش مضايقه اوى لأنها شايفه أن دا حقها .

مرت الايام و كل يوم هدى تتأكد أن شادى هو العريس المناسب ليها و انها مغلطتش لما وافقت عليه ، شادى فعلا انسان محترم و متدين و فيه كل الصفات الحلوه اللى اى بنت تتمناها 

طبعا سنة الخطوبه عدت بسلام الا من بعض المناوشات الخفيفه بين ام شادى و ام هدى على بعض الحاجات فى فرش الشقه .

لكن دا كله كان بيهون قصاد الكلام الحلو و الاحترام اللى كان بيقدمه شادى لهدى ووالدتها .

اتحدد ميعاد الفرح و هدى و عريسها راحوا اختاروا فستان تحفه و حجزوا قاعه افراح واتفقوا على كل التفاصيل 

جه اليوم الموعود و راح شادى جاب عروسته من الكوافير و لما دخل بيها القاعه كلهم اتفاجئوا بأمه لابسه فستان ابيض شبيه لفستان العروسه و حاطه مكياج كامل 

ام هدى لما شافتها استغربت اوى و بقت تقول فى سرها شوف الوليه عامله فى نفسها ايه ؟؟😏

الغريب بقا أن ام شادى جابت كرسي و قعدت جنب ابنها فى الكوشه و بقت تاخد ايده و ترقص معاه كأنها هى العروسه و كانت بتحاول طول الوقت تحس أنه مهتم بيها اكتر من عروسته 

حتى لما خلص الفرح ركبت جنبهم فى العربيه و جوزها قعد يقولها تعالى اركبى جنبى قالت لا هقعد جنب ابنى 

الحركات دى ضايقت هدى و حست أن حتى الليله اللى مستنياها و المفروض كل الانظار عليها هى لوحدها هى و عريسها حماتها مش عايزه تهنيها عليها .... لكن نظرات الحب اللى كانت بتشوفها فى عين شادى طول الفرح هونت عليها شويه من احساسها بالضيق .

لما شادى وصل البيت و طلع هو و عروسته امه كان باين عليها الضيق 

طبعا اهل هدى وصلوها و طلعوا العشا بتاعهم و نزلوا 

اول ما نزلوا شادى مسك ايد هدى و قالها 

اخيرا يا حبيبتى بقينا لوحدنا اخيرا بقيتى ليا لوحدى مراتى حبيبتى ..... انا بحلم من زمان باللحظه دى 

هدى كانت حاطه وشها فى الارض و مكسوفه اوى 

و فجأه جرس موبيله رن 

ايه دا ؟ دى ماما 

الو .... ايوا يا ماما 

الو ... ايوا يا شادى الحقنى يا ابنى انا بموووووت 

يا ترى شادى هيعمل ايه و هدى موقفها ايه؟؟؟ 

دا اللى هنعرفه فى الجزء الثالث أن شاء الله

#د.جيهان عادل .

#حكاية هدى

# الجزء الثالث 

الو .... ايوا يا ماما 

الو ... ايوا يا شادى الحقنى يا ابنى انا بموووووت

مالك يا ماما فى ايه ؟؟

انزلى يا حبيبى بسرعه حاسه ان قلبى هيقف 

حاضر حاضر يا ماما ثوانى اكون عندك 

 هدى سألته :فى ايه يا شادى ؟

 ‏ماما تعبانه شويه يا هدى .... متشغليش بالك انتى هنزل اشوف فى ايه و هطلع لك على طول 

 ‏لا انا هغير هدومى و هنزلك انا .... انزل بسرعه شوف فى ايه و لو حاجه بسيطه هقولك على حاجه نجيبها من الصيدليه 

 ‏نزل شادى جرى و هو لسه ببدلته .....

 ‏مالك يا ماما فيكى ايه يا حبيبتى 

 ‏تعبانه يا ابنى قلبى بيوجعنى اوى اظاهر خدت عين فى الفرح.... لقيت نفسي مره واحده كدا قلبى شد على و لقيت نفسي راح و كان هيغمى على 

 ‏سلامتك يا ماما دا تلاقيه من المجهود اللى عملتيه فى الفرح بس.

 ‏لا لا مجهود ايه بس... دا فى حاجه اكبر من كدا 

 ‏طب يا ماما تعالى اوديكى المستشفى 

 ‏لا يا ابنى مستشفى ايه بس انا هكون كويسه دلوقتى 

 ‏رد ابو شادى و قالها و ايه لزومه تقلقى الواد بس منا قلت لك تعالى اوديكى المستشفى انتى مرضتيش 

 ‏يا سلام يا اخويا انت عاوزنى اموت من غير ما ابنى يشوفنى 

 ‏بعد الشر عنك يا ماما سلامتك الف سلامه يا حبيبتى

 ‏الله يسلمك يا حبيبي انا لما شوفتك ردت فى العافيه تانى ما هو اول مره تبات بعيد عنى برده اهئ اهئ اهئ

 ‏بتعيطى ليه بس دلوقتى يا ماما منا معاكى فى نفس البيت اهو 

 ‏خلاص يا حبيبي مش هعيط .... اومال مراتك فين مش تنزل تشوف حماتها ايه قلة الذوق دى ؟ 😒

 ‏مراتى هتغير هدومها و هتنزل حالا يا ماما متقلقيش

 ‏و انا ايه يقلقنى يا اخويا مدام انت جنبى 

 ‏نزلت هدى و خبطت على الباب 

 ‏شادى قام و دخلها 

 ‏سلامتك يا طنط فيكى ايه

 ‏مفيش يا هدى اظاهر خدت عين فى الفرح كل الناس كانت بتبص على و مش مصدقين انى ام العريس فى ناس افتكرتنى اخته 

 ‏ايوا طبعا ما انتى قمر يا طنط 

 ‏قمر ايه بقا منا ادهولت اهو على نفسي و شكل دى ليلتى الاخيره 

 ‏لا بعد الشر عليكى طب يلا نوديكى المستشفى 

 ‏لا انا مش رايحه فى حته انا هموت هنا فى بيتى 

 ‏طب يا شادى انزل هات لها دكتور 

 ‏لا لا يا شادى انا هبقا كويسه دلوقتى بس اقعدوا جنبى شويه لغاية ما اروح فى النوم 

 ‏طب تحبى اعملك اى حاجه تشربيها؟؟

 ‏لا شربت ... شربت كتير متتعبيش نفسك 

 ‏هدى و شادى قضوا الليله على كرسين جنب سرير امه 

 ‏تانى يوم اهل هدى جم يباركوا للعروسين 

 ‏ام هدى سالتها عن حالها 

 ‏هدى قالت لها اللى حصل و أنهم باتوا الليله طول الليل تحت لان حماتها كانت تعبانه

 ‏ام هدى اتغاظت اوى و قالت حماتك تعبانه فين دا انا لسه مسلمه عليها تحت كانت زى العفريت ... انا عارفه شغل الحموات دا..... إما هى عايزه ابنها جنبها بتجوزه ليه ؟؟

 ‏يا ماما الله اعلم يمكن فعلا كانت تعبانه امبارح و لما نامت استريحت و بقت كويسه 

 ‏بطلى هبل يا بت انا عارفه ملاعيب شيحه دى كويس اوى 

 ‏الست دى فى دماغها انك هتاخدى ابنها منها ... ربنا يعينك يا بنتى على ما بلاكى

 ‏متقلقيش يا ماما انا هعرف اتعامل معاها كويس و مش هخليها تحس انى اخدت ابنها منها و لا حاجه 

 ‏طيب لما نشوف 

 ‏اهل هدى مشيوا بعد ما رصوا الصباحيه فى المطبخ 

 ‏دخلت هدى تشوف الحاجات اللى اهلها جايبنها .. دخل وراها شادى 

 ‏هدى قالت له احضرلك الاكل ؟؟

 ‏لا اكل ايه تعالى بس نكمل كلامنا بتاع امبارح تعالى بس هقولك انا عاوزك فى موضوع مهم اوى 😊⁦☺️⁩😘😘

 ‏تانى يوم جرس الباب كان بيرن الساعه سبعه صباحا 

 ‏هدى و شادى اتخضوا 

 ‏شادى جرى فتح الباب لقى امه بتقوله يلا يا حبيبي عشان تفطروا حضرت لكم الفطار تحت 

 ‏فطار ؟؟ يا ماما احنا لسه نايمين !!!

 ‏طب خلاص يا ابنى حقك على دا جزاتى انى حضرت لكم الفطار انا اسفه يا ابنى 

 ‏يا ماما اسفه ايه بس ... ما تزعليش هصحى هدى و ننزل حالا وراكى .

 ‏شادى دخل لهدى و قالها يلا يا حبيبتى ماما حضرت لنا الفطار تحت و عايزانا نفطر معاها 

 ‏هدى ردت بضيق لا انا شبعانه انا اصلا مبفطرش دلوقتى انزل انت افطر مع والدتك 

 ‏بس ماما كدا هتزعل يا هدى .... عشان خاطرى انزلى معايا و انا هفهمها بعد كدا انك مبتفطريش 

 ‏حاضر يا شادى هنزل 

 ‏نزل شادى و هدى لقوا امه لسه محطتش الاكل 

 ‏فين الفطار يا ماما ؟

 ‏حالا اهو يا ابنى انا مجهزاه فى المطبخ 

 ‏طيب يا ماما هاجى اساعدك 

 ‏لا يا حبيبتى خليكى هجيبه انا 

 ‏دخلت ام شادى جابت الفطار بيض جبنه زيتون لانشون مربى تونه عيش قشطه و حطيتهم على التربيزه

 ‏قعد شادى و مراته و أبوه و امه يفطروا

 ‏امه قربت كرسيها منه و قالت له كل يا شادى مش عارفه وشك مخطوف كدا ليه ....و تبص لهدى 

 ‏انا وشي مخطوف ؟؟ مخطوف فين يا ماما 

 ‏ابوه رد انتى هتوهمى الواد ليه بس الواد زى الفل اهو و لا مخطوف و لا حاجه 

قاطعته ام شادى و قالت : ‏مش انا تعبت تانى امبارح يا شادى و ابوك الله يجازيه مخلنيش ارن عليك تانى ال ايه زمانك نايم 😒

 ‏ليه كدا يا بابا كنت رنيت على 

 ‏انا بقا فكرت فى فكره مدام انا باجى بالليل اتعب يبقى انت تيجى انت و عروستك تناموا هنا فى اوضتك عشان تكونوا جنبى لو تعبت انادى عليك 

 ‏هدى بصت لشادى كدا اللى هو ازاى يعنى 

 ‏حماتها شافتها بصت كدا راحت قايلالها 

 ‏بتصغريله ليه يا حبيبتى هو انتى عايزه تقطعيه منى و تاخديه لوحدك ... اسمعى ما اقولك دا ابنى انا مربياه بقالى ٢٨ سنه يعنى انا الاولى و الاخيره 

 ‏هدى بصت لها كدا و قامت طلعت على شقتها من غير ما تنطق كلمه 

 ‏شادى قالها ليه كدا يا ماما هى عملت لك ايه ؟ 

 ‏ايوا يا اخويا دافع عنها دافع. .... قلبتك على من اول يوم الحربايه هى و امها العقربه

 ‏ابو شادى : ملوش لازمه الكلام دا يا بسيمه متنكديش ع الواد 

 ‏شادى قام هو كمان و طلع على شقته 

 ‏طلع لقى هدى عماله تعيط 

 ‏انا اسف يا هدى و الله ماما طيبه مش قصدها 

 ‏و انا ذنبى ايه ليه بتتعامل معايا كدا ؟ هو انا عملت لها حاجه ؟؟ ماما كان عندها حق 

 ‏متزعليش بس يا حبيبتى حقك على ... اوعدك مش هخليها تضايقك تانى ، و هجيبهالك تعتذر لك كمان

 ‏لا يا شادى انا مش عاوزه والدتك تزعل منك . خلاص انا مش زعلانه 

 ‏ايوا هو دا حبيبي ابو قلب ابيض ... انا عرفت دلوقتى ليه حبيتك ؟؟

 ‏ليه بقا ؟

 ‏عشان قلبك الأبيض اللى زى القشطه دا يا عسل 

 ‏هدى ضحكت على كلام شادى 

 ‏هدى و شادى لقوا جرس الباب بيرن 

 ‏شادى فتح لقى امه و أبوه جايين 

 ‏بسيمه قالت لهدى متزعليش منى يا هدى يا بنتى حقك على لو زعلتك 

 ‏لا ابدا يا طنط مفيش حاجه 

 ‏انا لما لقيتك طلعتى كدا فجاه قلت يمكن كلامى زعلك و الا حاجه بس انا مقصدش يعنى 

 ‏خلاص يا طنط حصل خير 

 ‏طيب اسيبكم بقا لوحدكم ما انتوا عرسان جداد 😏 ربنا يهنيكم.... يلا يا ابو شادى 

 ‏نزلت بسيمه و هدى فى دماغها الف سؤال و سؤال ازاى هعرف اتعامل مع الست دى ..الست دى حاطانى فى دماغها و عاملانى عدوتها .....

 ‏يا ترى هدى هتتصرف ازاى مع بسيمه ؟؟؟

 ‏دا اللى هنعرفه فى الاجزاء الجايه 

 ‏#د.جيهان عادل .

#حكاية هدى

# الجزء الرابع 

نزلت بسيمه و هدى فى دماغها الف سؤال و سؤال ازاى هعرف اتعامل مع الست دى ..الست دى حاطانى فى دماغها و عاملانى عدوتها .....

فات شهر من الجواز هدى اتحملت فيها سخافات كتير من بسيمه 

شادى لبس هدومه عشان ينزل شغله بعد ما فطروا كلهم سوا و كانت دى اول مره شادى يسبب هدى و يمشي 

هدى قامت ورا شادى تودعه و بسيمه باصه عليهم كأنها ضرتها

اول ما شادى نزل هدى بدأت تشيل الاطباق بتاعه الفطار و قالت هشيلهم فى المطبخ و اطلع على شقتى على طول 

لقت حماتها بتناديها و تقولها ايه يا هدى انتى مش هتنزلى ع الشغل انتى كمان ؟؟ 

شغل شغل ايه ؟

شغل ايه يا حبيبتى انتى مش صيدلانيه و كنتى بتشتغلى؟

ايوا يا طنط بس انا سبت الشغل قبل الفرح بشهر 

ازاى الكلام ده ؟؟ و شادى عارف بالكلام ده ؟ 

ايوا طبعا عارف 

امال مقليش ليه ؟ و بعدين ازاى متشغليش و تساعدى جوزك على المعيشه ؟ امال واخده كليه صيدله ليه ؟؟ ... عشان يقولوا الدكتوره راحت الدكتوره جت و خلاص 

ملوش لزوم الكلام دا يا طنط انا متفقه مع شادى انى هتفرغله هو و مش هشغل نفسي بأى حاجه عنه خالص

نعم يا حبيبتى تتفرغى لمين و ليه منا موجوده اهو متفرغاله و مفيش حاجه ورايا غيره 

هدى معرفتش ترد تقول ايه و قالت لها حاضر لما شادى يجى هكلمه و ارجع شغلى بعد اذنك انا طالعه شقتى 

طلعت هدى و بقت تعيط مش عارفه اخرتها ايه مع الست دى 

هدى نامت شويه و صحيت على تليفون من شادى بيقولها الحقى يا هدى ابويا واقع تحت و امى مش عارفه تتصرف معاه انزلى شوفيه و انا جاى فى السكه بسرعه 

هدى لبست إسدال و نزلت جرى لقت حماها تعبان جدا ماسك قلبه و مش قادر يتكلم 

هدى اتصلت على الإسعاف و الاسعاف جت فى خمس دقائق نزلت هى و حماتها مع الإسعاف و راحوا على اول مستشفى 

هدى اتصلت على شادى و قالت له حصلنا على المستشفى 

شادى حصلهم على المستشفى ..لما وصل سال امه هو فى ايه يا ماما منا سايبه كويس الصبح

قالت هو الصبح مرضيش يفطر زى ما انت شوفت و بعد ما انت مشيت قالى انا حاسس بوجع فى صدرى بس مردتش اقول قدام شادى عشان ميتخضش ... 

قلت له ليه كدا بس ..انا هتصل بيه أرجعه 

قال متقعديش تقلقى الواد كل شويه كدا و تسيبيه شغله اعمليلى اى حاجه دافيه اشربها و هكون عال بإذن الله 

رحت عملت له كوبايه حلبه راح مرجعها كلها و اى حاجه يحطها فى بقه كان يرجعها فاتصلت بيك و قلت مبدهاش بقا و هو مكنش راضى خالص اكلمك 

طب و الدكتور قال ايه ؟؟

لسه يا ابنى الدكتور جوه مطلعش من عنده 

الدكتور طلع ... جرى شادى عليه يسأله الدكتور قال دى حاله جلطه فى القلب و دخل فى غيبوبه دلوقتى ياريتكم جيتوا بدرى من اول ما تعب ..احنا دخلناه العنايه المركزه و ربنا يسترها 

هدى سالت شادى عن كلام الدكتور و قالها بس طلب منها متقولش لوالدته على حكايه الجلطه دى 

شادى قال لأمه أنه شويه تعب بسيط و طلب منها أن هدى تروحها البيت لكن امه مرضيتش و قالت انا مش همشي من هنا 

بعد حوالى ساعتين الدكتور خرج و نادى شادى و قاله تعالى من فضلك 

دخل شادى و كان متخيل أن أبوه فاق لكن الدكتور شاور له على الجهاز اللى أبوه كان محطوط عليه و قاله 

شايف الجهاز ده ؟؟ 

شادى قاله ايوا 

قاله الجهاز دا هيصفر كمان شويه و لما الجهاز يصفر يبقى ابوك مات 

لسه الدكتور بيقول كدا الجهاز صفر 

شادى قاله الجهاز بيصفر 

الدكتور قاله كدا ابوك مات انا قلت أما اوريك بعنيك 

شادى جاله ذهول ازاى كدا ... انت بتقول ايه يا دكتور ابويا مات ازاى ؟ 

انا وريتك بعينك اللى حصل عشان متعملش دوشه و تاخدوه كدا بالراحه عشان محدش يحس و تبقى مشكله لو اتعرف أنه مات هنا .

شادى خرج لامه و هو مصدوم و عنيه كلها دموع 

اول ما امه شافته قالت له حصل ايه ابوك جراله ايه ابوك مات .... ابوك مات يا شادى ..... قولى يا شادى ..ابوك مات 

شادى اخدها فى حضنه و بقى يعيط بحرقه و هى قعدت تصرخ تصرخ لغاية لما وقعت على الأرض 

هدى و شادى شالوها وسط دموعهم و الدكاتره جم قاسوا لها الضغط و السكر و فوقوها من الاغماء و ادوها حقنه مهدئه 

تمت إجراءات الدفنه و العزا و اهل هدى وقفوا مع شادى لآخر العزا 

لما الناس روحت شادى قال لهدى انا هبات انهارده مع ماما 

لو عايزه تنامى هنا تعالى و لو عايزه تنامى فى شقتنا اطلعى...هدى قالت لا طبعا انا هنام هنا معاكوا عشان لو طنط محتاجه اى حاجه منى 

دخل شادى و هدى على بسيمه و هى قاعده لابسه اسود و رابطه دماغها بطرحه سودا و عنيها حمرا من العياط 

شادى سألها محتاجه حاجه يا ماما ؟؟ 

قالت هحتاج ايه ما خلاص ... الغالى راااح معدش لى حد بقيت لوحدى 

ازاى تقولى كدا يا ماما منا جنبك اهو و عمرى ما اسيبك 

ردت هدى و قالت طبعا يا طنط كلنا جنبك اهو 

بسيمه بصت لها كدا كأنها هى اللى موتت جوزها و قالت 

انا عارفه وش مين اللى دخل الخراب علينا ؟؟ ما احنا كنا قاعدين مستريحين ابوك عمره ما اشتكى من قلبه صحيح الناس اقدام 😏

هدى حست بالحرج و حست أن حماتها بتتكلم عليها 

هدى مسكت نفسها بالعافيه انها تعيط و قامت خرجت بره الاوضه 

شادى جه وراها و قالها متزعليش منها يا هدى هى اعصابها تعبانه و مصدومه من اللى حصل 

هدى قالت له مش زعلانه و لا حاجه بس انا هطلع انام فوق بعد اذنك 

ماشي يا حبيبتى اطلعى 

شادى دخل على امه و قالها ايه لزومه الكلام ده يا ماما ؟

هى هدى كانت عملت لك ايه بس ؟

هدى دى وش شوووم بومه من اول ما دخلت علينا و الامراض مسكتنا و البلاوى بقت تتحدف علينا و اهو ابوك اتخطف من وسطتنا بسبب وشها الشوم ده 

استغفر الله العظيم حرام عليكى متقوليش كدا كله بقدر الله و كل واحد له عمره و هو عمره انتهى لحد كدا 

و نعم بالله يا ابنى .... معلش يا شادى انا حالتى النفسيه زى الزفت و مش عارفه بهبل و اقول ايه ... ناديلى على مراتك اقولها حقها على 

مراتى طلعت فوق يا ماما 

ايه؟؟؟ طلعت فوق ؟؟؟ يا سلام على بنت الاصول تسيب حماتها فى الظروف دى و تطلع فوق كتر خيرها و الله 

دا بدل ما تنام تحت رجليا و تشوفني عايزه حاجه و الا لا 

يا ستى انا معاكى اهو اطلبى منى اللى عاوزاه 

لا كتر خيرك يا ابنى مش عاوزه حاجه من حد انا عاوزه اموت و احصل ابوك انا معدش لى لازمه و لا قيمه فى حيات حد خلاص 

يا ماما متقوليش كدا من فضلك ربنا يخليكى لينا و يطول فى عمرك 

طيب يا ابنى يلا اطلع لمراتك يلا و سيبنى انام 

لا انا هنام جنبك هنا عشان لو عزتى اى حاجه بالليل 

و فعلا شادى نام جنب والدته اليوم دا و استمر الوضع دا لمده اسبوع

ولاحظت هدى أن أمه زادت حالتها و بقت تخلى ابنها ميطلعش فوق خالص 

هدى رنت عليه و قالت له اطلع عايزاك 

طلع شادى و سالته هدى لامتى هتنام تحت يا شادى فات اسبوع اهو و انت قاعد تحت ليل نهار مبتطلعش الا عشان تغير هدومك بس

يعنى انتى عاوزانى اسيب امى فى الظروف دى ..ايه الانانيه اللى انتى فيها دى ؟

انت بتقول ايه؟ انانيه ايه اللى بتتهمنى بيها انت اتجننت؟ 

لا انتى اللى اتجننتى لما تطلبى منى اسيب امى فى الظروف دى و حتى انا مطلبتش منك تنزلى لها و كنت منتظر انك هتعملى كدا من نفسك لكن لقيتك و لا على بالك يبقى خلاص تمام سبينى انا بقا اقف جنب امى و اخدمها انا 

انت بتقول ايه هو انت مسمعتهاش و هى بتقول انى قدمى شر عليها و على البيت عايزنى انزل لها و هى معتقده كدا 

قلت لك انها متقصدكيش انتى دا شويه كلام ملوش لازمه كانت بتقوله 

ملوش لازمه عندك انت لكن أنا لا .... انا اهلى ربونى على الكرامه و مش متعوده على قله القيمه 

و مين قل قيمتك يا هدى ؟؟؟ 

معرفش و الله .... بقولك ايه انا اعصابى تعبت انا هروح عند اهلى يومين استريح 

زي ما تحبى .... بس افتكرى انك سبتينى فى اكتر وقت كنت محتاجك فيه .😔

يا ترى هدى هتمشي و تروح لأهلها و الا كلام شادى هيأثر عليها و يخليها تقعد ؟؟ دا اللى هنعرفه فى الجزء الجاى أن شاء الله 

يتبع .....gg

#د.جيهان عادل.

#حكاية هدى

#الجزء الخامس  

بقولك ايه انا اعصابى تعبت انا هروح عند اهلى يومين استريح 

زي ما تحبى .... بس افتكرى انك سبتينى فى اكتر وقت كنت محتاجك فيه .😔

هدى دخلت اوضتها و فتحت الدولاب عشان تلم هدومها و افتكرت كلمة شادى أنه محتاج لها 

قعدت على السرير وفكرت انها مش عاوزه ترجع لأهلها غضبانه بعد شهر ونص من جوازها و قعدت تقول لنفسها انا طول عمرى شاطره فى دراستى و لازم اكون شاطره كمان فى حياتى العمليه ... انا طول عمرى بحلم انى اكون ست بيت شاطره و كنت اتضايق اوى من خروج امى كل يوم لشغلها و احنا اطفال صغيرين و عشان كدا كنت دايما عاوزه اعوض الاحساس ده و مش عاوزه احسس ولادى باللى كنت بحسه لما اقوم من النوم فى الاجازه ملقاش امى جنبى و نفضل انا و اختى طول النهار قاعدين لوحدنا 

انا عايزه اكون ست بيت جدعه واقفه فى ضهر جوزها 

هدى خرجت لقت شادى حاطط وشه بين اديه

قعدت بين اديه و شالت ايده من على عنيه و قالت له 

انا اسفه يا شادى .... 

شادى بص لها و الدموع فى عنيه و قالها انا تعبان يا هدى انا حاسس ان ضهرى اتكسر ...ضهرى اتعرى بموت ابويا .... انتى شايفانى عايش و بتكلم و عادى قدامك بس الحقيقه انى بموت من جوايا تخيلى سندى الوحيد فى الدنيا راح مين هاخد رأيه فى موضوع مهم؟ مين هيرشدنى للصح ؟ انا طول عمرى وحيد مليش اخوات مليش أصحاب مليش غير امى و ابويا .... و بموت ابويا مبقليش غير امى و غيرك انتى يا هدى 

لكن لقيتك جايه تقوليلى انك عايزه تسبينى انتى كمان ...انتى متعرفيش انا حاسس بايه دلوقتى حاسس ان الدنيا كلها اتخلت عنى ..... حاسس ان خلاص الدنيا كلها معدتش تفرق معايا .

هدى قامت و اخدت شادى فى حضنها و طبطبت عليه و قالت له انا اسفه يا شادى اوعدك مش هسيبك ابدا متزعلش منى يا حبيبي .

خلاص يا هدى مش زعلان منك 

طيب انزل لماما يلا عقبال ما اعملها فرخه و لسان عصفور و نأكل كلنا سوا 

ماشي يا حبيبتى 

هدى طلعت فرخه و سلقتها و حمرتها و عملت شويه لسان عصفور و شويه مكرونه و سلطه و نزلت بالاكل 

حماتها اول ما شافت الاكل قالت لها 

تعبتى نفسك ليه يا بنتى 

تعبك راحه يا ماما 

ماما ؟؟؟ اول مره تقوليلى يا ماما يعنى امال فين طنط اللى كنتى بتقوليهالى 

لا من هنا و رايح هقولك يا ماما ..... و يا ست الحبايب كمان 

بسيمه كانت مندهشه من كلام هدى و شادى كان فرحان اوى 

قعدوا يتغدوا سوا و طبعا بسيمه مكنش عاجبها الاكل اوى و قالت لها : 

بس الفراخ دى دلعه شويه يا هدى و مش متبله كويس 

و لسان العصفور دا مش متحمر كويس و المكرونه دى صلصتها شويه، و السلطه برده متقطعه كبير اوى 

ماشي يا ماما منا بقا عاوزاكى تعلمينى كل حاجه عشان انا برده طول عمرى كنت مركزه فى دراستى و بس ... و مستعده دلوقتى انى اتعلم من حضرتك ازاى الاكل بيتعمل و التكات و الحركات بتاعتك 

ماشى يا هدى و انا هعلمك مدام عايزه تتعلمى 

طيب قوليلى بقا انزل بكرا اجيب خضار ايه عشان نطبخه؟؟

و انتى بتعرفى تنقى الخضار يا بنتى ؟

صراحه انا عمرى ما نزلت السوق ماما هى اللى كانت بتجيب لنا الخضار و هى راجعه من الشغل 

اه صحيح يا هدى بمناسبه الشغل انتى مش قلتى انك هتقولى لشادى و تنزلى الصيدليه تانى 

شادى بص لهدى كدا ايه دا هو انتى عايزه تشتغلى؟ 

هدى قالت انا لسه مقلتلوش عشان الظروف اللى حصلت 

شادى قال شغل ايه يا هدى مش احنا متفقين أن مفيش شغل بعد الجواز و انك هتتفرغى لى و للبيت 

منا كنت عايزه اقولك بس ..... 

مبسش الموضوع دا منتهى بالنسبه لى و مفيهوش اى مناقشه

ردت امه مالك يا شادى متسيبها يا ابنى تساعدك المعيشه غاليه برده 

يا ماما انا راجل مهندس و مرتبى محترم مش محتاج مراتى تساعدنى و لا حاجه 

يا ابنى انت بكرا يجيلك عيال و تحتاجوا كل قرش و بعدين امال جبتها صيدلانيه ليه بقا ما كنت جبت واحده جاهله و الا بدبلوم و خلاص تقعد لنا فى البيت 

يا ماما انا اتجوزت هدى عشان استريحت لها و عجبنى أدبها مش عشان شهادتها 

بس خساره يا ابنى شهادتها دى 

خلاص يا ماما الله يخليكى مش عاوز اتكلم فى الموضوع ده دلوقتى 

خلاص يا ابنى انا كان قلبى على مصلحتك انت حر انت و مراتك .

هدى قعدت ساكته و مشاركتش فى الحوار خالص بالرغم أن الكلام كله عليها و بعدها قامت شالت الاكل و دخلت غسلت المواعين و عملت شاى 

حماتها اول ما داقت الشاى قالت 

تئ تئ تئ تئ تئ ايه دا انتى عملالى شربات حتى الشاى مبتعرفيش تعمليه ؟ 😏

هدى قالت لها انا اسفه يا ماما بس انا حطيت معلقتين لكل كوبايه 

طب مش تسالينى الاول بشرب كام معلقه و الا بتتصرفى كدا من دماغك 

طب انا اسفه قوليلى بتشربى كام معلقه و أنا أقوم اعملك غيره 

لا و لا عايزه غيره و لا حاجه خلاص نفسي اتسدت 😏

يا ترى هدى هيكون عندها ثبات انفعالى لغاية امتى ؟ و هل هتدنها تستحمل الكلام السخيف دا كتير ؟؟ 

دا اللى هنعرفه فى الجزء السادس .

# د. جيهان عادل .

#حكاية هدى 

# الجزءالسادس و الاخير

تانى يوم هدى قامت من بدرى نزلت لحماتها و حضرت لها فطار هى و شادى و سالتها عن الحاجات اللى محتاجها من السوق 

حماتها كتبت لها شوية حاجات فى ورقه و قالت لها ورينى شطارتك بقا 

نزلت هدى مع شادى هو راح على شغله و هى راحت على السوق اشترت كيلو بانيه و فرخه و سبانخ و طماطم و فلفل و بادنجان و خضار و كرنبه و اشترت برتقال و تفاح و موز و عجبها شال اسود جميل اشترته 

هدى روحت و حماتها اول ما شافتها قالت لها دخلى الحاجه فى المطبخ و ورينى جبتى ايه و اتضحك عليكى و الا ايه 

هدى طلعت الحاجه ووريتها لبسيمه و قالت لها على أسعارها بسيمه اتبسطت اوى و قالت لها انتى جبتى الحاجات دى منين بالسعر دا 

هدى قالت لها من السوق البعيد يا ماما 

ياااا ايه وداكى هناك يا بنتى ما هنا فى كذا محل زى سوق كدا كنتى جبتى منهم و خلاص 

لا المحلات هنا اغلى من السوق التانى و احنا اولى بكل قرش طبعا 

بسيمه هزت راسها كدا و هى مبسوطه من هدى 

هدى قالت لها و جبت لك هديه كمان يارب تعجبك 

هديه ؟؟ هديه ايه يا بنتى ؟ 

اتفضلى يا ستى شال اسود جميل اول ما شوفته قلت دا معمول مخصوص عشانك 

شال لى انا ؟؟يااااا ليه كدا يا بنتى تعبتى نفسك ليه .... الله دا جميل اوى و شيك اوى ... ربنا يخليكى يا هدى 

انتى عارفه يا هدى انا بقالى كتير اوى محدش جابلى هديه 

انا من هنا و رايح هجيب لك اللى انتى عاوزاه يا حبيبتى 

ربنا يسعدك يا بنتى زى ما سعدتينى 

قومى يلا هاتى بصلتين و قشريهم عقبال ما اضرب الطماطم و هوريلك دلوقتى ازاى تتبلى الفراخ عشان يكون طعمها حلو 

حاضر يا ماما 

و قبل ما تتبليهم لازم تنقعيهم فى ميه بملح بلمون عشان الزفاره 

حاضر يا ماما 

انا بقا هغسل السبانخ و اخرطها و هعملك شويه سبانخ تاكلى صوابعك وراها 

طبعا يا ماما 

هدى و حماتها عملوا الاكل و هدى طلعت فوق ترتاح ساعه عقبال ما شادى يجى 

اول ما دخلت شقتها لقت جرس التليفون بيرن

الو ... ازيك يا ماما 

الله يسلمك يا هدى عامله ايه يا بنتى ؟

انا كويسه الحمد لله زى الفل 

و شادى عامل ايه معاكى ؟

كويس الحمد لله شادى مفيش زيه يا ماما 

و الست حماتك عامله ايه معاكى 😏 ضايقتك بكلامها اللى زى الدبش برده ؟

لا يا ماما حماتى زى الفل معايا و بتعاملنى زى بنتها بالظبط 

يا هدى قولى الحقيقه بقا الوليه دى بتعاملك زى بنتها الله يرحم الفستان اللى لبسته فى فرحك ... دا خالاتك لسه بيتكلموا فى الموضوع ده لغاية دلوقتى 

يا ماما هى لبست عشان تفرح و تفرح ابنها و بعدين ما تلبس و احنا مالنا اصلا

يا سلام دا ايه الرضا دا .... انا شايفه انك راضيه عن حماتك اوى 

يا ماما راضيه و الا مش راضيه حماتى هى ام زوجى يعنى لازم احترمها و اتعامل معاها زى ما بتعامل معاكى مش انتى اللى ربتينى على كدا يا ست الحبايب 

اه .... ايوه طبعا ..... ربنا يكملك بعقلك يا بنتى انا كنت خايفه بس لتكون بتضايقك 

لا يا ماما مش بتضايقنى خالص بالعكس دى من بعد وفاة حمايا بقت غلبانه خالص 

طيب يا هدى يا بنتى الحمد لله سلميلى على جوزك و على حماتك 

الله يسلمك يا ماما يوصل أن شاء الله 

مرت الايام و هدى كل يوم عن يوم تحبب بسيمه فيها 

هدى كل ما تنزل تجيب طلب تجيب لبسيمه حاجه معاها كأن بسيمه بنتها مش حماتها 

مره تنزل تجيب لها شيكولاته مره بيبسي و شيبسي ، مره تجيب لها شنطة كارتييه 

و كل مره بسيمه تضحك و تقولها هو انا صغيره على الكلام ده يا هدى ؟

هدى ترد و تقولها اه طبعا انتى لسه صغيره دا اللى يشوفك ماشيه جنبى يقول اختى مش حماتى 

طبعا بسيمه تضحك و تقولها يو جاتك ايه يا هدى يا بنتى 

انتى مدلعانى اوى ... تعرفى يا هدى انا لو لى بنت مكنتش عاملتنى المعامله الحلوه دى 

كدا يا ماما هتزعلينى منك ؟؟ ... هو انا مش بنتك برده ؟

اه طبعا انتى بنتى و نور عينى كمان ربنا يخليكى لى يا حبيبتى 

هدى قامت باست دماغ حماتها و لقت نفسها دايخه اوى و مش قادره تقف 

حماتها قامت اتنطرت من على الكنبه و قالت مالك يا بنتى ؟فيكى ايه يا حبيبتى ؟ اقعدى هنا ارتاحى

مفيش يا ماما شويه دوخه كدا و هيروحوا دلوقتى 

لا يا هدى انا لازم اتصل بشادى يجى يوديكى للدكتور 

لا يا ماما انا هبقى كويسه دلوقتى ... متقلقيش شادى ارجوكى .

الو ....ايوا يا شادى يا ابنى .. بقولك ايه تعرف تحجز عند الدكتور انهارده ؟ .... لا مش انا اللى تعبانه ... هدى دايخه شويه و عايزين نطمن عليها 

ماشي يا ابنى هنستناك على الساعه سته تيجى تودينا 

مع السلامه 

ليه يا ماما تقلقيه بس 

اسكتى يا هدى هو فى اعز منك يا بنتى 

شادى جه اخد هدى و امه للدكتور و الدكتور طلب منها أنها تعمل اختبار حمل 

شادى نزل جاب الاختبار وهدى عملته و طلعت حامل 

شادى كان فرحان اوى هو و هدى أما بسيمه بقا كانت الفرحه مش سايعاها

لما روحوا البيت بسيمه عنيها رغرغت بالدموع و قالت كان 

نفسي ابوك يكون معانا دلوقتى الله يرحمك يا عبدالرحمن كان نفسك تشوف اولاد شادى

هدى ردت و قالت اكيد روحه حوالينا و حاسس بينا و أن شاء الله لو جه ولد هنسميه عبدالرحمن على اسم حمايا الله يرحمه

صحيح ؟ صحيح يا هدى ؟؟ يااااا يارب 

و لو جت بنت هنسميها بسيمه بسبوسه 

لا يا بنتى اسم بسيمه دا قديم اوى انتى هتعقدى البت 

هدى و شادى و بسيمه قعدوا يضحكوا و هدى اتصلت باهلها فرحتهم 

تانى يوم هدى و حماتها راحوا لدكتور النسا و كشف عليها و كانت المفاجاه أن هدى حامل فى توأم 

طبعا الفرحه مسعتهمش لما سمعوا الخبر و بمرور الأيام 

عرفوا أن هدى حامل فى ولد و بنت 

طول فترة الحمل بسيمه كانت واقفه جنب هدى زى بنتها بالظبط و بقت تساعدها فى كل حاجه و ينزلوا يشتروا هدوم البيبهات سوا و يشتروا السراير سوا و يجيبوا الالعاب مع بعض 

و لما جت لحظه الولاده بسيمه اتصلت على شادى و قالت له حصلنا على المستشفى و اتصلت على اهل هدى 

و اخدت هدى و نزلت وقفت تاكسي و هدى بقت تتلوى من الم الولاده و حماتها مفيش فى بقها غير كلمة يارب 

هدى و بسيمه وصلوا المستشفى 

و الدكتور كشف على هدى لقى انها لازم تولد قيصرى 

بسيمه بقت تعيط على هدى ووقفت قدام اوضه العمليات هى و شادى و اهل هدى واقفين مستنين تخرج بالسلامه 

ام هدى كانت شايفه بسيمه و قلقها على بنتها و كانت مبسوطه و مستغربه من التحول دا 

بعد شويه سمعوا صوت الاطفال بيعيطوا الكل فرح اوى 

الممرضه طلعت الطفلين 

شادى اول ما شافهم عينه بقت تنزل دموع و مكنش قادر يمسك نفسه من الفرحه 

بسيمه اخدت نونه منهم و سميحه اخدت النونه التانيه و سألوا الممرضه على هدى

الممرضه قالت هى هتخرج دلوقتى و هى كويسه الحمد لله فين حلاوتنا بقا 

شادى طلع من جيبه مبلغ و اداه للممرضه 

 واخد الولد و البنت إذن فى ودنهم 

 ‏شادى سمى ولاده عبدالرحمن و بسمه لان امه مرضيتش تسمى بسيمه لأنه اسم قديم فاختار اسم قريب من بسيمه و سماها بسمه 

 ‏هدى رجعت مجبوره الخاطر باولادها و بسيمه كانت فى منتهى الفرحه .

 ‏تانى يوم بسيمه دخلت على هدى و بايت على رأسها...

 ‏و قالت لها انا عاوزه اعترفلك بحاجه يا هدى يا بنتى 

 ‏اتفضلى يا ماما 

 ‏انا كنت فى الاول مش حاباكى و كنت متخيله انك هتاخدى ابنى منى و انك هتعملى معايا مشاكل و عشان كدا كنت بحاول افرض سيطرتى عليكى من الاول و اكلمك بقلة ذوق عشان اكسر شوكتك زى ما بيقولوا 

 ‏بس لقيتك بنت طيبه كنت اعاملك معامله سيئه كنتى تردهالى معامله حسنه .... لقيت فيكى اللى كنت اتمناه لو لى بنت و صدقينى مكنتش هتبقى حنينه على زيك كدا 

 ‏ربنا يسعدك يا بنتى و يفرح قلبك يارب

 ‏ربنا يخليكى يا ماما دا من جمالك انتى و روحك الحلوه .. انا كنت حاسه بيكى و كنت مقدره قلقك لان دا ابنك الوحيد و عارفه هو غالى عليكى اد ايه و مكنتش بزعل منك بالعكس كنت بحط نفسي مكانك و اقول لو انا مكانها هعمل كدا برده و هيبقى خايفه على ابنى اللى شفيت فى تربيته طول عمرى 

صح يا بنتى .. لكن انتى برده بقيتى بنتى ‏و عايزه اهاديكى بهديه و مش عاوزاكى تكسفينى

 ‏ايه دا يا ماما 🥺🥺🥺؟؟؟

 ‏دا دهبى كله... حوالى نص كيلو دهب

 ‏دهبك كله ازاى مش فاهمه حاجه 

 ‏بصى يا هدى انا مليش غير شادى و انتى و اولادكم دلوقتى فانا فكرت فى فكره حلوه ليكى و لمستقبل عيالك 

 ‏فكرة ايه ماما ؟

 ‏انتى عارفه أن البيت هنا مساحته واسعه و أن الدور الأرضى فاضى

 ‏ايوا 

 ‏و أن المنطقه هنا كويسه جدا و تعتبر فى وسط البلد 

 ‏ايوا 

 ‏فانا فكرت أن بدهبى دا نعمل لك صيدليه تحت البيت و شادى يكون شريك فيها وياكى و نجيب اتنين دكاتره و عامل يشتغلوا فيها و انتى تكون وظيفتك اشراف فقط يعنى مش هتتعبى و لا هتاخد من وقتك كتير و عشان خاطر اولادك برده

 ‏بس يا ماما 

 ‏مبسش و لا حاجه دى هديتى ليكى هترفضى هديتى ليكى ؟؟ 

 ‏لا مقدرش ارفض طبعا يا ست الحبايب ربنا يخليكى لينا يارب .

 ‏و يخليكى لينا يا ام عبدالرحمن يا غاليه 😘😘😘

 ‏تمت 🥰

 ‏ارجو أن القصه تكون عجبتكم و اذا كانت أدخلت شئ من السرور على انفسكم ارجو الدعاء لوالدى رحمة الله عليه و سائر اموات المسلمين 

#د.جيهان عادل 😊