#فاطمه١_٢
#الجزء_الاول
( مستوحاه من قصه حقيقيه )
انا فاطمه ٣٩ سنه شغاله فى محل ادوات كهربيه عايزه احكيلكم حكايتى ....عايزه افضفض معاكم لانى تقريبا مبنمش ...كل يوم بنام و دمعتى على خدى
هحكي لكم من البدايه .....
انا بنت يتيمه مليش غير أختين والدى توفى و احنا صغيرين كنت ساعتها فى سته ابتدائى و اختى الاصغر منى فى رابعه ابتدائي و الاخيره كانت لسه مدخلتش المدرسه
اليوم اللى توفى فيه والدى عمرى ما هنساه ابدا
ابويا كان بيشتغل عامل فى مصنع من مصانع العاشر من رمضان و كان بيشتغل اسبوع ورديه بالنهار و اسبوع بالليل
ابويا بالرغم من أنه كان على اده لكنه كان بيحبنا اوى و بيحاول يوفر لنا اى حاجه نطلبها فى حدود إمكانياته طبعا
ابويا و امى كانوا شبه مقطوعين من شجره يعنى ملهمش الا قرايب من بعيد. و بالرغم من كدا عمرنا ما حسينا بغربه هما كانوا دايما ماليين علينا حياتنا ...ابويا كان ياخدنا يفسحنا مره كل شهر ...و كان كل خميس يدخل بحلويات أو فاكهه حاجه كدا على قده بس كنا بنفرح بيها اوى
فى يوم من الايام كانت ورديه ابويا بالليل و كان بينام بالنهار و يصحى بعد العصر يتغدى و يشرب الشاى و يقعد معانا شويه وبعدين يلبس و يمشي على الساعه ٧ كدا
فى يوم وفاته رحنا مدرستنا انا و اختى هدى و كنا قسم ضهر يعنى بنرجع من المدرسه على الساعه ٤ و نص كدا و كنا بنلاقى ابونا قاعد مستنينا نتغدى سوا كلنا...الا اليوم ده
شفت باب شقتنا مفتوح و ناس خارجه داخله فيه و سمعت صويت و عياط جوه الشقه
انا لاول لحظه مجاش فى دماغى اى حاجه افتكرت حاجه ولعت جوه ....حد تعب ...حد اتزحلق لكن مجاش فى بالى لحظه انى فقدت اعز شخص فى حياتى
دخلت لقيت اوضة امى مفتوحه و لمحت امى قاعده بتعيط على السرير و ابويا نايم جنبها
رميت شنطتى من ايدى و دخلت أجرى لقيت ابويا وشه متغطى و امى عماله تعيط جنبه و اول ما شافتنى خدتنى فى حضنها انا و اختى هدى أما صفيه اختى الصغيره كانت نايمه جنب بابا الناحيه التانيه و حاطه أيدها عليه و ساكته
عرفت بعد كدا أن امى جت تصحى ابويا مصحيش...ابويا مكنش عيان و لا بيشتكى من اى حاجه خالص ...ابويا كان فى عز شبابه كان عنده ٣٠ سنه 😔
طبعا بعد كدا حالنا اتبدل خالص معاش ابويا كان صغير اوى و امى اضطرت تشتغل اشترت ماكينه خياطه بالقسط و بدأت تخيط للجيران و المعارف
انا بقا دخلت دبلوم تجاره و خلصته و كنت بروح اشتغل فى الصيف فى اى محل عشان اساعد فى المصاريف و بعد ما خلصت الدبلوم اشتغلت فى محل ملابس
انا الحمد لله جميله و اى حد كان يشوفنى كان يعجب بى بس طبعا احنا فقرا جدا ..و كان حكايه الجهاز دى صعبه على امى
لحد ما جه اليوم اللى اتشقلبت فيه حياتى كلها و لقيت باب شقتنا بيخبط بعد ما رجعت من شغلى
مين ؟؟؟
انا خالتك ام وحيد يا فاطمه افتحى
اهلا و سهلا يا خالتى اتفضلى
امك فين يا حبيبتى
امى جوه هناديها لكى حالا ....تحبى تشربى ايه ؟؟ شاى و الا اعملك كوبايه حلبه
لا يا بنتى اشرب يوم فرحك يا حبيبتى ناديلى بس ماما هقولها كلمتين و امشي على طول
حاضر يا خالتى
امى خرجت و قالت لها اهلا يا ام وحيد
اهلا بيكى يا ام فاطمه
ازيك يا حبيبتى و ازاى وحيد ؟ عامل ايه فى السفر بتاعه
و النبى يا ام فاطمه وحيد ربنا رزقه بواحد كويس اوى بيشتغل معاه هناك و الحمد لله اهو بيبعت لى و بيبعت لمراته و أولاده و الحال الحمد لله ماشي
ان شالله دايما يارب ربنا يوفقه يا حبيبتى و يحسن ما بين اديه .
بس غربته قاطعه فى اوى و فى ابوه انتى عارفه أنه وحيدنا و ملناش غيره بس نقول ايه انتى شايفه ظروف البلد و هو مكنش لاقى شغلانه كويسه هنا يصرف على بيته و أولاده
معلش يا حبيبتى لا هو اول جدع يسافر و لا آخرهم و كويس برده أنه سافر و عياله لسه صغيره عشان يعملهم قرشين ينفعوهم لما يكبروا ...هو اسم الله عنده ولد و بنت صح ؟؟
ايوه يا حبيبتى و عياله عايشين معانا هما و امهم
ايه دا مش هما كان لهم شقه انا فاكره أنه متجوز فى الشارع اللى ورانا
ايوه هو فعلا كان مأجر شقه مطرحين و صاله فى الشارع اللى ورانا بس لما جه يسافر بقا قلت له يجيب مراته تقعد معانا هى و العيال ...من ناحيه يوفروا الايجار و من ناحيه تانيه تبقى العيال معانا اهى حاجه من ريحته
طب و عفشه ودتوه فين يا حبيبتى
عفشه كومناه فى اوضه فوق السطوح أجرتها من صاحب البيت بس طبعا مش زى ايجار الشقه بتاعتهم
بس كدا يا حبيبتى العفش هيتبهدل حرااام
لا ما احنا مغطيينه كويس و مقفلين الاوضه و كل شويه بنطلع نبص على الحاجه كدا ...وبقول يمكن ربنا يفتحها عليه و يجيب غيره و يعمل شقه حلوه كدا
ان شاء الله يا حبيبتى ...ربنا يوفقه و يرجعه لكم مجبور الخاطر يارب
يا رب يا ام فاطمه اه و النبى ادعيله دا هو اللى خرجت بيه من الدنيا دى و خايفه عليه اوى
لا متخافيش أن شاء الله ربنا هيسهله ...الا صحيح هو بيشتغل ايه هناك ؟
هو طلع رخصه درجه تالته وواحد حبيبنا شاف له شغلانه سواق عند راجل أمير اوى مش مخليه عايز حاجه و الحمد لله ماشيه
طب الحمد لله يا اختى يارب دايما .
بقولك ايه يا ام فاطمه كنت عايزاكى كدا يا اختى فى كلمتين مهمين
خير يا حبيبتى ...انا تحت امرك
خير أن شاء الله ...الأمر لله وحده ...انتوا اتفتحت لكم طاقه القدر يا ام فاطمه و ربنا هيعوض صبركم خير ان شاء الله
طاقة القدر ؟؟؟؟؟ يارب يا حبيبتى بس ازاى ؟؟؟؟
يا ترى طاقه القدر هتتفتح ازاى لام فاطمه ؟؟؟ دا اللى هنعرفه فى الجزء التانى 🤗
يتبع .....🤗
د.جيهان عادل
#فاطمه
#الجزء_الثانى
( مستوحاه من قصه حقيقيه )
بقولك ايه يا ام فاطمه كنت عايزاكى كدا يا اختى فى كلمتين مهمين
خير يا حبيبتى ...انا تحت امرك
خير أن شاء الله ...الأمر لله وحده ...انتوا اتفتحت لكم طاقه القدر يا ام فاطمه و ربنا هيعوض صبركم خير ان شاء الله
طاقة القدر ؟؟؟؟؟ يارب يا حبيبتى بس ازاى ؟؟؟؟
انا جايبه عريس للمحروسه بنتك فاطمه بس عريس ايه ...قيمه و سيما و غنى و شباب
ياااا و العريس دا هيجى لفاطمه على ايه يا ام وحيد ؟ عريس زى اللى بتتكلمى عليه دا عايز عروسه بنت ناس زيه و تجهز جهاز حلو ...و انتى عارفه أن إحنا على ادنا و مش هنقدر على الكلام ده
و ان قلت لك انك مش هتدفعى جنيه واحد بل بالعكس هتاخدى فلوس كمان تجهزى بيها البنتين التانين و الراجل عايزها بالفستان اللى عليها كمان
لأ استنى استنى انتى بتقولى ايه يا ام وحيد ؟؟ فهمينى كدا بالراحه ....يعنى انا فهمت صح و الا غلط
انتى فهمتى صح و كل كلمه قلتهالك صح مفيهاش غلطه
طب ازاى انتى هتجننينى طب هو راجل كبير فى السن يعنى ؟؟
لا يا ستى دا صغير عنده ٣٠ سنه
امال ايه ؟ ايه اللى يجبره على جوازه زى دى ؟
الله .....يجبره ايه و بتاع ايه هو بنتك فى زيها فى جمالها و ادبها و شطارتها
ايوه ماشي بنتى جميله و مؤدبه بس برده عريس بالمواصفات اللى بتتكلمى عليها دى تتمناه بنت السلطان
النصيب يا ام فاطمه و الا انتى هتعترضى و الا ايه ؟
لا طبعا مش هعترض و لا حاجه... سبحان الله له فى خلقه شؤون
بس فى حاجه صغيره كدا يا ام فاطمه
ايوه ....انا برده قلت اكيد فى إنا ...ايه هى الحاجه الصغيره دى بقا ؟؟؟؟🤔🤨
لا مش زى ما انتى فاهمه.... هو الصراحه مفيهوش عيب
امال ايه قلقتينى اتكلمى دغرى عشان افهم
العريس مش مصرى
و دا شافها فين يا ام وحيد ؟؟
لأ هو مشافهاش ...دا الراجل اللى شغال معاه وحيد ابنى له واحد صاحبه عاوز يتجوز مصريه و قاله عاوزين عروسه مصريه من عندكم لصديقى نواف
وحيد بقا اتصل على و قالى متعرفيش لنا يا اما عروسه حلوه و بنت ناس للراجل ؟ ووصفهولى و أنه غنى اوى و عنده فلوس ياما و شركات و أنه عاوز عروسه حلوه و بس
و هيدفع مهر لأهلها ١٠٠ الف جنيه و عايزها بالفستان اللى عليها
امى لما سمعت الكلام ده بلمت و معرفتش ترد
الست لاحظت سكوتها و قالت لها بتفكرى فى ايه بس دى جوازه لقطه الف مين و مين يتمناها ...دا انا مرضتش اروح لأم إيمان و لا ام ساره و انتى عارفه لو رحت لواحده فيهم هتفرح اد ايه ...حد طايل جوازه ببلاش كدا ..و بنتك هتعيش فى العز و اكل الوز ...
بس انتى بنت حلال و بنتك حبيبتى و بتمنالك و لبناتك الخير و عشان كدا اخترتكم من بين بيوت الشارع كله
طيب يا ام وحيد هشور البت و ارد عليكى
بس بسرعه يا ام فاطمه عشان الحق اشوف غيركم لو موافقتوش ...الراجل مستعجل و عايز يتجوز فى خلال شهر بالكتير
حاضر يا ام وحيد بكرا اخر النهار هرد عليكى أن شاء الله
ام وحيد خرجت و امى قعدت مسهمه و عماله تفكر
انا بقا خرجت و لقيتها فى الحاله دى و سألتها مالك يا ماما ؟
ماما قالت لى على كل حاجه و انا كمان بلمت
ها يا بنتى ايه رايك فى الموضوع ؟؟
و الله يا ماما دا موضوع يحير طب بصى سبينى لبكرا و انا هفكر و اقولك
دخلت اوضتى و انا عماله احلم بقا انا هبقى هانم زى اللى الهوانم اللى بشوفهم فى التلفزيون ؟؟ بقا انا هيكون عندى عربيه ؟ بقا انا هيكون عندى خدامين يخدمونى ؟؟
بقا انا ربنا هيتوب على من شغل المحلات و طمع اللى يسوى و اللى ميسواش فى ؟
بقا انا هاكل كل الاكل اللى طول عمرى محرومه منه؟؟
و نمت و انا عماله افكر و افكر فردت شعرى الطويل على مخدتى و حضنت مخده تانيه
شفت نفسي فى المنام هانم راكبه عربيه اخر موديل و الناس حواليا بيحيونى كأنى نجمة سينما ...بعدها لقيت واحد فتح باب العربيه و دخل على ابتسم فى وشى و ادانى ٣ غوايش و خاتم و انا فرحت بيهم اوى و مسكتهم فى ايدى و فجاه لقيته نزل من جنبى و لقيت واحده بصت من شباك العربيه على و خطفت منى الغوايش و فضل الخاتم فى ايدى كنت لبسته
قمت من النوم مخضوضه و حاسه ان فى حاجه غلط بس انا مبعرفش أفسر احلام ....
حكيت لامى على الحلم... امى قالت لى عشان بس كنتى بتفكرى فى الموضوع قبل ما تنامى و عشمتى نفسك
سالتها طب و اللى خطفت منى الغوايش دى ايه؟
دا عشان انتى خايفه للخير ده يروح منك بعد ما مسكتيه فى ايدك ؟
طيب يا ماما انا هروح المحل دلوقتى و لما اجى هقولك رايى النهائى
ماشي يا بنتى ربنا يكتب لك الخير يا ضنايا
رحت المحل و طول اليوم عماله افكر فى المستوى اللى هتنقل له و ازاى ربنا هيرحمنى من فتح المحل و مسحه و من تحكم صاحبه فى و من الزباين الرخمه اللى بتتعامل معايا كأنى شغاله عندهم
ياااااا معقوله هكون هانم زى اللى راكبه العربيه هناك دى ؟
انا لازم اتعلم السواقه عشان لما يكون عندى عربيه اسوقها و ألا أكيد جوزى هيجيب لى سواق يسوق لى العربيه
انا لما ربنا يوسعها على هدى لاخواتى كل اللى محتاجينه و مش هخليهم محتاجين اى حاجه
هبعت لهم فلوس و هدوم و مكياج و هساعدهم فى جهازهم ....اه و هقعد امى بقا و مش هخليها تخيط لحد تانى ..امى نظرها ضعف اوى و مبقتش حمل تقعد على مكنه تانى .
اما بابا الله يرحمه هروح اعمله عمره و حج أن شاء الله و هعمله صدقه جاريه على روحه😍
يا سلام مش قادره اصدق انى هتنقل من الفقر اللى انا فيه دا و ابقى غنيه اوى كدا
طول النهار و انا سرحانه فى الكلام ده حتى أن البنات اللى معايا فى المحل لاحظوا انى سرحانه قعدوا يتريقوا على و يقولوا أن اكيد فى حب و كدا
انا بقا قعدت اضحك عليهم و اقولهم حب ايه و نيلة ايه هو انا لى فى الكلام ده !
روحت البيت و انا خلاص موافقه تماما على المبدأ و مهمنيش أنه جنسيه تانيه مختلفه عن جنسيتى ...المهم انه معاه فلوس و هيعيشنى اللى معشتوش
دخلت البيت و انا فرحانه و متفائله اوى ...اول ما شفت امى قعدت ابوس فيها و اقولها ازيك يا احلى ام فى الدنيا
ايه يا بت يا فاطمه اتهبلتى و الا ايه ؟
لو سمحتى أسمى فاطمه هانم انتوا من هنا و رايح لازم تحترمونى .....انا هبقى وش السعد عليكم كلكم
ايه يعنى وافقتى يا فاطمه ؟؟
ايوه وافقت هى دى فرصه تتساب يا ماما
طيب يا بنتى هلبس و اروح لأم وحيد اقولها إن إحنا وافقنا و نشوف هنعمل ايه بعد كدا
يا ترى هيحصل ايه بعد كدا ؟؟؟ دا اللى هنعرفه فى الجزء الثالث 🤗
يتبع .....🤗
د.جيهان عادل 😊
قصص اجتماعية
#فاطمه٣_٤_٥_٦
#الجزء_الثالث
( مستوحاه من قصه حقيقيه )
يعنى وافقتى يا فاطمه ؟؟
ايوه وافقت هى دى فرصه تتساب يا ماما
طيب يا بنتى هلبس و اروح لأم وحيد اقولها إن إحنا وافقنا و نشوف هنعمل ايه بعد كدا
امى قامت لبست جلابيتها السمرا و راحت لأم وحيد اول ما الست شافتها قالت لها
ها ...باين على وشك القبول ما شاء الله
ايوه يا ام وحيد البت وافقت بس عايزه اعرف ايه اللى هيحصل بعد كدا ؟
يا الف مبروك يا حبيبتى ربنا يجعلها جوازة الهنا يااارب
شوفى بقا وحيد ابنى قالى أن الراجل نازل الاسبوع الجاى ووصانى انى اكون لقيت له العروسه قبل ما ينزل
انا بقا هروح اجيب كارت دولى و اتصل عليه و أقوله انكم موافقين
طيب يا حبيبتى استاذنك بقا
لا ازاى هجيب حاجه ساقعه حالا
لا و الله ما هقدر اصلنا لسه محطناش الغدا ...مره تانيه أن شاء الله
امى رجعت و حكت لى على اللى حصل ....حطينا الغدا
و قعدت انا و اخواتى نأكل و كل واحده منهم عماله ترسم احلام و يهزروا معايا و يقولولى اوعى بقا نفسك تعلى علينا و تعاملينا معامله وحشه
و انا اقول لهم لا متخفوش يا اولاد 😂 هعاملكم زى اخواتى و امرى إلى الله
و ماما تضحك على كلامنا
بعد اسبوع لقينا ام وحيد جايه و بتقول أن العريس وصل مصر و أنه عاوز يجى يشوف العروسه
امى قالت لها يشرف و ينور يا ام وحيد
طيب يا حبيبتى بكرا باذن الله على الساعه خمسه هيكون عندكم
جهزنا البيت و امى فصلت لى فستان جديد و البت سماح جارتنا جت حطت لى مكياج و عملت لى شعرى و حطيت عليه الطرحه كدا
و فعلا على الساعه خمسه لقينا الباب بيخبط
و لقينا ام وحيد و ابو وحيد سابقينه على الباب و بيقولولنا العريس جه ....اتفضل يا سي نواف
لقيناه شاب طول بعرض خمرى اللون عنده سكسوكه صغيره عنيه سودا واسعه شعره باين من تحت العقال ناعم
لابس جلباب ابيض و عليه عبايه باين عليها غاليه اوى
و لقينا داخل وراه اتنين شايلين و محملين هدايا كتير اوى ....علب علب و هدوم و بارفانات و كريمات و علب شيكولاته من الغاليه و جاتوه و علب بلح باين عليها قيمه جدا....
احنا شفنا الحاجات دى كلها اتوهمنا
امى رحبت بيه جدا هو و ام وحيد و ابو وحيد و دخلت تنادينى ادخل الحاجه الساقعه
و فعلا اول ما دخلت عليهم ..نطق نواف بسم الله ما شاء الله ...قلتى لى يا ام وحيد أن العروس جميله ..مقلتيش انها رائعه الجمال ...سبحان من صور ..اقعدى يا عروسه شو اسمك ؟
رديت و انا وشي فى الارض فاطمه
ما شاء الله على فاطمه و اسم فاطمه ...و انا نواف
طبعا طول القعده عينه منزلتش من عليا و اتفق مع امى أنه هيطلع لى جواز سفر بأقصى سرعه لانه نازل شهر واحد بس و أن فى خلال الشهر ده هيخلص كل الاوراق و هياخدنى يشتريلى اللى ناقصنى و هياخدنا يفسحنا و يتفرج على مصر لانه بيحب مصر و اهلها و من زمان بيحلم بزياره زى دى
كمان اتفق مع امى على أنه هيدفع مهر ١٠٠ الف جنيه و مش محتاج مننا اى شئ و هيجيب لى دهب كتير و دى هديه العريس لعروسه
فعلا عدى الشهر زى الاحلام
كنت حاسه انى طايره..... نواف هو امير الاحلام اللى اى بنت فى الدنيا تتمناه ...ادب و احترام و جمال و شباب و غنى ...كل شئ
نواف كان أكبر من احلامى بكتير ... انا عمرى ما فكرت حتى فى نص اللى بيحصلى دا
اكيد امى دعيالى زى ما دايما بتقول
ياااا مش قادره اصدق نفسي من كتر السعاده اللى حاسه بيها و بتمنى ربنا يديمها على نعمه
طبعا نواف جاب هدايا كتير لأم وحيد و عرفت أنه أداها مبلغ حلو عشان دلته علينا
الشهر خلص و كنا خلصنا فيه كل حاجه و زرنا فيه اماكن كتير فى مصر كنت اول مره اشوفها رحنا الاهرامات والقلعه و المتحف المصرى و رحنا شرم الشيخ يومين و رحنا حتت كتير اوى و كانت امى متفقه معاه على كتب الكتاب قبل السفر بيومين
و فعلا جه الميعاد و كتبنا كتابنا و كنت فى منتهى السعاده
نواف جابلى اكتر من نص كيلو دهب لبسهولى فى كتب الكتاب و الناس كلها اللى كانوا قاعدين كانت عنيهم هتخرج على الدهب اللى عمال يطلعه من العلب
و اللى كان عباره عن عشر خواتم -دبله -كفين دهب لاديا الاتنين -حوالى ٢٠ غويشه -و سلسه جنزير كبيره- حلق كبير - اسورتين
و بعد كتب الكتاب لقيته حط فى ايدى ١٠ جنيه دهب
طبعا مش عاوزه اقولكم كنت فرحانه اد ايه
فرحت فرحه عمرى فى حياتى ما فرحتها انا و امى و اخواتى .
جهزنا كل حاجه و نواف أدى لامى الميه الف جنيه مهرى
و رحنا على المطار و انا لابسه فستان الفرح و كان نواف نزل وسط البلد معايا اشترالى فستان فرح تحفه و رحت الكوافير زى اى عروسه
و كان واعدنى اننا لما نروح بيتنا هنلاقى حفله و عزومه كبيره احتفالا بزواجنا
امى وصلتنا المطار هى و اخواتى و ام وحيد و ابو وحيد اللى مسبوناش طبعا و لا لحظه خلال الشهر كله
امى قعدت تعيط و تقولى اول مره تفارقى حضنى يا حبيبتى
معلش يا ماما ما اكيد انتى كنتى عارفه أنه هيجى اليوم و هتجوز و هسيبك
طبعا كنت عارفه بس مجاش فى دماغى انك تسافرى و مشوفكيش
لا متشوفنيش ايه بس انا اتفقت مع نواف انى هبقى انزل و كمان هبقى اعملكم دعوه انتى و اخواتى تيجوا تقعدوا معانا تلات شهور فى السنه
طيب يا حبيبتى ربنا يسعدك يا بنتى و يجعل كل ايامك فرح يارب
ردت ام وحيد جرى ايه يا ام فاطمه مالك قلبتيها غم كدا ؟؟ دا بدل ما ترقعيلك زغروطين طب هزغرط انا
لللللللوللللى للللللولللللللى
اسكتى يا وليه هتفضحينا فى المطار
افضحك ايه يا ام فاطمه هو احنا هيجيلنا اعز من فاطمه افرحى يا وليه و فرحى بنتك بلاش تبيعى الغم فى بكاوى كدا 😂
قعدنا كلنا نضحك على ام وحيد اللى كانت فرحانه اوى طبعا لان نواف أداها مبلغ محترم حتى و احنا خلاص رايحين نركب الطياره شفته بيديها سلسله دهب كبيره فى أيدها هى خدتها و كانت هتنط من السعاده
ودعت امى و اخواتى و بقينا نعيط كلنا و نواف يطبطب على كتفى و يقولى لا تعيطى يا فاطمه
رحت ركبت الطياره جنب نواف و بقيت ابصله أن الشخص ده بقا خلاص كل عيلتى ..بقا كل حياتى و اهلى فى بلد انا معرفش فيها اى حاجه
نواف مسك ايدى و ضغط عليها زى ما يكون قرا اللى فى دماغى و بيقولى اطمنى متخافيش
طبعا عاوزين تعرفوا حصل معايا ايه بعد كدا ؟ دا اللى هتعرفوه فى الجزء الرابع 🤗
يتبع ..........😊
#د.جيهان_عادل🤗
#فاطمه
#الجزء_الرابع
( مستوحاه من قصه حقيقيه )
رحت ركبت الطياره جنب نواف و بقيت ابصله أن الشخص ده بقا خلاص كل عيلتى ..بقا كل حياتى و اهلى فى بلد انا معرفش فيها اى حاجه
نواف مسك ايدى و ضغط عليها زى ما يكون قرا اللى فى دماغى و بيقولى اطمنى متخافيش
نزلنا المطار لقيت بعض أصحابه مستنينه ركبنا و روحنا على بيته
البيت ايه خيال ....وهمى سجاجيد ايه و نجف ايه و عفش ايه ....البيت واسع جدا فوق ما كنت اتخيل دا مش بيت دا قصر ....اوض فوق و اوض تحت و انتريهات و صالونات و قعدات عربى أو مجالس زى ما بيقولوا على مساحه واسعه جدا
طبعا لما روحت لقيت زوجات أصحابه مستنينى و رحبوا بيا جدا و كل واحده منهم ادتنى هديه قيمه اللى حطت دهب و اللى حطت فلوس و كانوا عاملين وليمه كبيره
و الرجال لهم وليمه خاصه بيهم
طبعا انا كنت مبهوره جدا بالجو ده و كنت حاسه ان فى حاجات كتير مش فاهماها أو مش قادره اخد بالى منها من كتر التفاصيل و الحاجات اللى بشوفها
طبعا نواف كان قايلى أن والده ووالدته متوفيين و أنه له اخوات بس سكنهم بعيد و أنه هيبقى يعرفنى عليهم بعدين
خلصت الحفله و طلعت انا و نواف اوضتنا
نواف اول ما دخلنا قالى
نورتى بيتك يا عروسه
انا كنت مكسوفه اوى و قلت منوره بيك
نواف اخدنى من ايدى و فتح لى اوضه صغيره جنب اوضة النوم مليانه هدوم شكلها تحفه و احذيه و شنط
و قالى انا وصيت لك على الملابس هادى من فرنسا البسي اللى تبغيه ...
و سابنى واقفه مذهوله من جمال و رقه الحاجات
وقفت متنحه و مش عارفه اختار ايه و الا ايه
هو بقا لاحظ انى اتاخرت لقيته دخل على و هو لابس بيجامه حرير لونها احمر كان شكله تحفه فيها
و قالى مالك حبيبي مخترتيش حاجه ليه
بصيت فى الارض و قلت انا محتاره
قال طيب تسمحيلى اختار لك انا
قلت ياريت
اختار لى قميص بروبه لونه ابيض رائع الجمال و قالى البسى ده ...هيكون جميل اوى عليكى
و خرج و سابنى
بدلت ثيابى و خرجت و انا مكسوفه اوى
اول ما شافنى قال واوووو انتى جميله اوى يا فاطمه
اتكسفت و وشي احمر اوى
نواف اخد ايدى و قعدنا على السرير و قالى أن شاء الله انا هحاول اسعدك على اد ما اقدر بس انا عاوز منك طلب يا فاطمه
هزيت راسي و قلت له اؤمرنى
الأمر لله بس انا نفسي اخلف اولاد كتير ....نفسي يكون عندى من الولاد عشره و الا عشرين
انا ضحكت و قلت عشرين ؟؟..يا خبر دا كتير اوى
قالى و لا يهمك حبيبتى انتى بس عليكى تنجبى لى اولاد و ملكيش دعوه بتربيتهم انا هجيب لهم مربيات من الفلبين
قلت له أنت مش شايف أن الكلام دا بدرى اوى عليه
قال انا عارف بس حبيت اعرفك رغبتى من دلوقتى
حاضر يا نواف بس انت عارف إن الخلفه دى رزق من ربنا يعنى ملناش دخل فيها
عارف عارف بس دى امنيتى
ربنا يسهل يا نواف انا نفسي ربنا يحقق لك كل أمنياتك
يارب.... تسلمى يا حبيبتى
انا و نواف قضينا اسبوع عسل كنت حاسه انى عايشه فى الجنه مش عايشه على الأرض
مكنش فى حاجه نقصانى ...اى حاجه تيجى فى خيالى أو حتى متجيش كنت الاقى نواف جيبهالى
كان عندى خدمات فلبينيات كانوا بيتكلموا انجليزي و مكنتش بعرف اتعامل معاهم فى الاول بس بعد كدا بقيت اعرف اتعامل معاهم كويس جدا
طبعا بعد الاسبوع دا نواف نزل شغله و بقا مشغول طول الوقت .
بقيت ازهق طول الوقت و مببقاش عارفه اعمل ايه طول النهار ...
كان يومى يبدأ بانى انزل الجنينه اقعد شويه و كان عندى مسبح داخلى متغطى كنت انزل اعوم فيه شويه
و اطلع افطر و اشغل التلفزيون و قدامى كل انواع التسالى اللى اعرفها و اللى عمرى ما شفتها من جوز و لوز و كاجو و عين جمل ....كنت فى الاول مبسوطه اوى بالوضع ده بس بعد كدا بدأت ازهق و اطلب من نواف يخرجنى أو نروح نزور حد
و كان ساعات يفضى و الاقيه بيتصل على و يقولى جهزى نفسك و ياخدنى و نخرج و نروح عند حد من أصحابه
يقعد هو مع الرجال و انا اقعد مع زوجته و عاده بيكون عندها مجموعه من النساء كل واحده فيهم بتبالغ و تحاول تظهر انها اشيكهم و احلاهم ...تلاقى الواحده طول الوقت عماله توصف جابت هدوم بأد ايه و راحت للكوافير و دفعت كام و الفستان اللى لابساه دا بكام و جايباه من بره
افتكر اول مره مكنتش اعرف نظامهم و كنت لابسه العبايه السمرا عبايه طبعا بالنسبالي كانت حاجه مفيش زيها
و روحت لواحده منهم
اول ما دخلت لقيتها بتقولى هاتى عبايتك ...انا طبعا استغربت عبايه ايه اللى عاوزاها 😂 اكتشفت بعد كدا أنهم بيبقوا لابسين فساتين و حاجات غاليه اوى تحت العبايه و اول ما بيروحوا لحد منهم بيقلعوا العبايه و يفضلوا بلبسهم دا
طبعا الموقف كان محرج اوى بالنسبالي و مرضتش اقلع العبايه 😂😂😂 و قلت لها معلش اصلى مش عامله حسابى
الست بصت لى كدا و هى مستغربه و كأنى بتكلم هيروغليفى 🤣🤣 بس انا ايه صممت مقلعش و بعد كدا بقيت اعمل زيهم و البس فستان تحت العبايه و اول ما اروح اقول للشغاله تعالى يا بنت خدى العبايه 😂😂😂
طبعا كنت كل يومين اتصل على امى و هى كانت ركبت تليفون مخصوص عشان اكلمها
و عرفت من امى أن اخواتى جالهم عرسان حلوين اوى ...طبعا بعد ما عرفوا أن امى بقا معاها فلوس من جوازتى
امى قالت لى انها هتجهز اخواتى من فلوس مهرى وهتقسم الفلوس بالنص ما بينهم
و انا قلت لها و انا هبعت لهم الهدوم اللى هما عاوزينها متشليش هم اى حاجه
امى قالت لى انها هتظبط فرح اخواتى الاتنين على ميعاد رجوعى لمصر و قالت لى شوفى جوزك يقدر ينزلك امتى عشان نحدد ميعاد الفرح
لما نواف رجع بالليل قلت له على كلام امى فضل يسمعنى و ساكت خالص
ايه يا نواف مقلتليش ممكن تنزلنى مصر امتى ؟
نواف مردش على
عدت السؤال مره تانيه
قالى انتى بقالك اد ايه هنا يا فاطمه ؟
قلت تلات شهور
طيب يعنى لسه جايين ملحقش اخواتك و امك يوحشكى
قلت يعنى ايه ؟؟
يعنى انتى مش هتنزلى مصر الا لما يكون معاكى ابننا
ايه ؟؟ ابننا هو فين ابننا دا ؟ هو انا حملت اصلا ؟
طيب قولى لنفسك لما تبقى تحملى و تولدى هبقى انزلك مصر تحضرى فرح اخواتك
انت بتقول ايه ؟؟ دى حاجه فى علم الغيب
هو دا اللى عندى و مفيش اى نقاش فى الموضوع ده بعد كدا
نواف قام و ساب لى الاوضه و انا كنت مذهوله من رده دا معقول انسان زيه متعلم يفكر بالطريقه دى قعدت اعيط و صعب على حالى و صعبت على غربتى و حسيت لاول مره انى مسجونه ...اى نعم السجن دهب بس يفضل فى الاخر اسمه سجن 😔😔
يتبع .......🤗
#د.جيهان_عادل🤗
#فاطمه
#الجزء_الخامس
( مستوحاه من قصه حقيقيه )
نواف قام و ساب لى الاوضه و انا كنت مذهوله من رده دا ....معقول انسان زيه متعلم يفكر بالطريقه دى قعدت اعيط و صعب على حالى و صعبت على غربتى و حسيت لاول مره انى مسجونه ...اى نعم السجن دهب بس يفضل فى الاخر اسمه سجن 😔😔
قعدت اعيط لغاية ما رحت فى النوم حلمت بابويا الله يرحمه جاى بيطبطب على و يقولى متزعليش و راح ادانى عبايه حلوه جدا انا لما شفتها فرحت اوى و بوست ايد بابا
و هو سابنى و مشي ناديت عليه و قلت له خدنى معاك يا بابا ...مشي و مردش على
قمت من النوم و انا فرحانه اوى انى شفت ابويا فى الحلم انا بقالى سنين مشفتوش و كمان جاى بيديلى عبايه ...انا حاسه ان فى حاجه حلوه هتحصل امى كانت دائما تقول عطية الميت حلوه لكن لو اخد حاجه بتبقى وحشه
قمت من على السرير ملقتش نواف جنبى طبعا ...الليله دى بات لاول مره فى اوضه تانيه
قمت طبعا ملقتوش و لقيت نفسي عنيا وارمه من كتر العياط .
فجاه لقيت جرس التليفون بيرن
لقيت واحده مصريه كنت اتعرفت عليها فى حفله من الحفلات و كنت اتكلمت معاها كلمتين كدا و هى فرحت اوى لما لقتنى مصريه و طلبت منى رقمى عشان تكلمنى و نبقى أصحاب ....طبعا كنت نسيت الموضوع دا خالص لحد ما لقتها بترن
الو ....ازيك يا فاطمه
ايوا مين معايا ؟؟؟
انا رانيا يا بنتى ايه لحقتى تنسينى ؟؟
معلش يا رانيا ... بس لسه صاحيه من النوم و مكنتش مركزه بس ..انتى عامله ايه و شغلك عامل ايه ؟؟
انا الحمد لله بس الشغل هنا فى المستشفى متعب اوى
اه صحيح انتى قلتيلى انك دكتوره بس مقلتيش تخصصك ايه ؟
معقوله مقلتلكيش ؟؟؟ انا دكتورة نسا يا ستى فى أكبر مستشفى فى البلد دى
و الله ؟؟؟؟ طب دا انتى وقعتيلى من السما يا دكتوره رانيا
لا عيب عليكى أسمى رانيا و بس ...بس خير يا حبيبتى انا تحت امرك
انا كنت عاوزه اكشف عشان اشوف حكاية الحمل و كدا
انتى بقالك اد ايه متجوزه يا فاطمه ؟؟
بقالى تلات شهور و كام يوم كدا
طب ما لسه بدرى مستعجله على ايه ؟؟
لا مش مستعجله و لا حاجه بس جوزى هو اللى عاوز يتطمن على
طيب يا حبيبتى انا تحت امرك فى اى وقت عاوزة تيجى اكشف عليكى انا تحت امرك
ماشي يا رانيا هشوف نواف جوزى و ارد عليكى
قفلت مع رانيا و حسيت ان دى إشارة لى ربنا سخرهالى
اتصلت على نواف
الو ...ازيك يا نواف
الله يسلمك
انا اسفه يا نواف انى زعلتك بس مكنش قصدى
و لا يهمك يا فاطمه خلاص الموضوع انتهى
طيب انا عاوزه اقولك على حاجه
خير يا فاطمه
انا اتعرفت على دكتوره نسا مصريه و عاوزه اروح لها تكشف على..
طيب تمام مفيش مشكله شوفى عاوزه تروحى امتى اوديكى
ماشي يا نواف هروح الاسبوع الجاى بإذن الله
تمام ....عاوزه حاجه تانيه
لا شكرا
قفلت مع نواف و اتصلت على امى اقولها إن نواف عنده شغل و مش هنعرف ننزل الا بعد سنه على الاقل و انها لو عايزه تعمل فرح اخواتى خلاص تعمله و انا مش هزعل
امى قالت لا خلاص احنا كدا كدا كنا عاوزين نعمل الخطوبه سنه برده عشان صفيه تكون خلصت الدبلوم هى راخره ...خلاص مفيش مشكله
قفلت مع امى و حسيت انى عملت مشكله مع نواف مكنش لها لازمه ...الراجل برده شايف كل طلباتى و معيشنى فى مستوى مكنتش احلم بيه ...هعوز ايه اكتر من كدا انا ؟؟
بعد اسبوع نواف اخدنى و رحت للدكتوره رانيا و كشفت على و طلبت منى تحليلات رحت عملتها و جبت لها نتيجتها
رانيا اول ما بصت فى التحليل لقيتها ابتسمت اوى و قالت لى مبروك يا ستى انتى حامل
انتى بتقولى ايه يا رانيا انتى متاكده؟
ايوه يا ستى متاكده انا اصلا لما كشفت عليكى و سألتك كام سؤال كدا عرفت على طول بس مرضتش افرحك الا اما أتأكد من التحليل الاول
متشكره اوى يا رانيا بس انا حامل فى اد ايه ؟؟
انتى يا ستى حامل فى شهر و اسبوع يعنى كل يوم خمسه فى الشهر بتتمى شهر من حملك
ياماانت كريم يارب
ايه يا بنتى مالك اللى يشوفك كدا يقول بقالك عشر سنين متجوزه
لا اصل انتى مش فاهمه ...جوزى مكنش عاوز ينزلنى مصر احضر فرح اخواتى الا اما يكون معايا ابنى و انا كنت زعلانه ...كنت نفسي اشوفهم و هما عرايس و احضر فرحهم
ايه دا ...جوزك دا غريب اوى ...طب لو مكنش حصل حمل مكنش نزلك ؟؟ بس هقولك انتى شكلك طيبه و بنت حلال و ربنا بيحبك
الحمد لله ...لما اروح افرح نواف بقا
خرجت من عند الدكتوره و انا الفرحه مش سايعانى
نواف اول ما شافنى و لقانى فرحانه كدا سالنى فى ايه مالك ؟؟
قلت له استنى لما نخرج
خرجنا و ركبنا العربيه و قولت له مبروك يا بابا نواف
قال بتقولى ايه ؟؟ هو انتى حامل ؟؟
قلت له ايوه لسه الدكتوره قايله لى حالا
نواف فرح جدا بقا يتنطط من على الكرسي و يبوس فى اديا و يقولى الف مبروك يا ام مروان
قعدت اضحك و أقوله انت خلاص عرفت أنه ولد
قال أن شاء الله ولد ...و هكون ابو مروان
نواف رجعنى البيت و لقيته اخر النهار جايب لى ممرضه تقعد معايا طول فتره الحمل تاخد بالها منى و من اكلى و ادويتى
و لقيته جايب لى طقم دهب تحفه عباره عن كوليه و خاتم و حلق و اسوره و قالى دى هديه حملك يا حبيبتى و ان شاء الله لما تجيبي لنا الولد هجيب لك ادهم عشر مرات
اتصلت على امى فرحتها ..امى قعدت تعيط و تقولى كان نفسي اكون معاكى ياحبيبتي و انتى بتولدى
قفلت معاها و قلت لنواف قالى و ماله يا حبيبتى نعملها زياره تيجى تحضر الولاده ..فرحت اوى و بقيت ابوس فيه و هو يقولى بالراحه بالراحه عشان الواد
مرت ٣شهور من الحمل و نواف صراحه كان خايف على اوى و على اللى فى بطنى ..رانيا كانت قايلالى أن بعد الرابع ممكن اعرف نوع الجنين
و كان عندى متابعه معاها و قلت لنواف أننا انهارده هنعرف نوع الجنين و هو فرح اوى و قعد يستنانى على احر من الجمر
لما رانيا كشفت على قالت لى
مبروك يا ستى جايلك بنوته زى القمر
بنوته ؟؟؟ انتى متاكده يا رانيا ؟؟
ايوه متاكده ...واضحه اهى زى الشمس ..انتى ايه مشكلتك يعنى ؟؟ ما دا اول حمل ليكى
انا معنديش مشكله بس نواف كان نفسه فى ولد و فاهم ان اللى فى بطنى ولد و مش عارفه هقوله ازاى
لا اله الا الله ...هو ايه اللى تقوليله ازاى ؟ هو ولد و الا بنت دى بإدينا ؟ الاطفال دى هديه من ربنا لينا و مينفعش نعترض على هدية ربنا لينا ...غيرنا بيتمنى ضافر طفل
و نعم بالله يا رانيا و الله انا فرحانه بس خايفه من رد فعله بس
ان شاء الله مفيش رد فعل و لا حاجه هو اكيد هيفرح بيها برده لأنها اول طفله له متخافيش
خرجت من عند رانيا و انا عماله اقدم رجل و اخر رجل ...اول ما نواف شافنى سالنى ها ...شفتى البيبي ؟
قلت ايوه
ها ....طلع ولد صح ؟؟؟
لأ طلعت بنت
بنت ؟؟؟
ايه مالك انت زعلت ؟؟
لا ما زعلت .. بس كان نفسي فى ولد ...بس ملحوقه المره الجايه تجيبي لنا الولد أن شاء الله
يعنى مش زعلان ؟
لا ابدا ايه يزعلنى خير ...دا حتى البنات بيقولوا رزقها واسع
خرجنا من المستشفى و كأن هم انزاح من على قلبى لما لقيت نواف مفرقش معاه حكايه الولد و البنت دى و لقيته بيهزر معايا فى العربيه
مرت شهور الحمل و نواف عمل لامى زياره عشان تيجى تحضر الولاده . و فرحت اوى لما شفتها كنت بقالى حوالى عشر شهور مشفتهاش
و فعلا جه ميعاد الولاده و امى كانت معايا هى و نواف
و اخدونى و رحنا المستشفى اللى فيها رانيا و كانت احسن مستشفى فى البلد و كانت مكلفه جدا وولدت بنتى سهيله اجمل بنت رأتها عينى
ابوها اول ما شافها مكنش مصدق نفسه ..بقا يحضنها و يقول بنتى ...ما شاء الله تبارك الله
انا عاوزك يا فاطمه تشدى حيلك كدا و تجيبي لنا زى سهيله كدا كتير ..انا عاوز عشره
امى قعدت تضحك و تقوله تتربى فى عزك يا ابو سهيله
نواف خرج من جيبه رزمتين فلوس و قعد يوزع على طقم الممرضات كلهم و بقا فرحان اوى بسهيله 🥰
يتبع ......😊
#د.جيهان_عادل🥰
#فاطمه
#الجزء_السادس
( مستوحاه من قصه حقيقيه )
بعد ما ولدت سهيله و روحت البيت نواف طلب منى انى مستخدمش اى وسيله من وسائل منع الحمل و برر ده بأنه نفسه يكون عنده اولاد كتير زى ما قالى يوم جوازنا
و انا طبعا عذرته و قلت حقه ما هو فرحان ببنته طبعا
بعد كدا نواف عمل عقيقه كبيره عزم فيها كل أصحابه و عزم اخواته و كانت اول مره اشوف اخواته و زوجاتهم و صراحه جالى هدايا كتير دهب و فلوس منهم و من زوجات أصحابه
بعدها لما البنت بقا عمرها شهرين امى زيارتها انتهت و نزلت مصر عشان تجهز لفرح اخواتى و اتفقت معاها انى هنزل على الفرح بمجرد ما يحددوا اليوم
ودعت امى و كنت زعلانه اوى انها هتسيبنى و تمشي لكن اللى كان مهون على شويه انى عارفه انى هنزلها قريب
لما دخل على نواف و لاقانى زعلانه سالنى
ايش بيك حبيبي
و لا حاجه يا نواف بس امى هتوحشنى
لا تزعلى هبقى اعملها زياره تانيه بعد ما تخلص اللى وراها
ربنا يخليك يا حبيبي ....اللى مهون على شويه انى قربت اروح لها
تروحى لها فين يا فاطمه ؟
اروح مصر
مصر ايه ؟ ما امك كانت لسه عندك عايزه تنزلى مصر ليه ؟
عاوزه انزل عشان فرح اخواتى هو احنا مش متفقين مع بعض يا نواف
لأ بس امك كانت لسه عندك يعنى ملحقتش توحشك
طب و فرح اخواتى ؟؟؟؟؟
هتروحى الفرح و بنتك هتعملى معاها ايه ؟
بنتى هاخدها معايا طبعا
لااااا البنت صغيره و مش هتتحمل تغيير الجو
يعنى ايه يا نواف ؟
يعنى عاوزه تنزلى يبقى من غير البنت
انت بتقول ايه ؟؟؟ انت عايزنى اسيب بنتى اللى عمرها شهرين ازاى ؟
و انا كمان مقدرش أأمن على بنتى بعيد عنى يوم واحد
طب خلاص تعالى معايا
لأ انا مش فاضى ...انا معنديش اعتراض على نزولك مصر عايزه تنزلى اتفضلى بس لوحدك
نواف قام و سابنى و انا مذهوله من كلامه مش قادره اصدق هو ازاى يقول كدا ....انا لا يمكن اسيب بنتى الرضيعه و امشي دا اكيد اتجنن
قعدت افكر و زاد حزنى انى حسيت انى قليلة الحيله و مش عارفه اتصرف
نمت من كتر البكا ...لقيت كأن حد بيقولى فى ودنى ازاى فاكره نفسك لوحدك ...ليكى رب قريب مجيب الدعاء الجأى لربك قادر يحل مشاكلك
فتحت عينى على عياط بنتى قمت رضعتها و المربيه اخدتها تنيمها ....و قلت فى نفسي ياااا دا المفتاح معايا بس انا هبله ازاى مطلبتش من ربنا أنه يدبر لى امرى
قمت اتوضيت و صليت اجمل و احسن ركعتين صلتهم فى حياتى و دعيت ربنا كتير أنه يكتب لى الخير و أنه يحنن قلب زوجى على و قلت له يارب انا نفسي اشوف اخواتى و افرح معاهم و بيهم ....يا رب نفسي بنتى تبقى معايا ...يارب مش عاوزه ازعل من جوزى و لا ازعله ...يارب دبر لى امرى فأنا لا احسن التدبير ...يا رب يسر لى حالى فأنا الامه الفقيره اليك ..يارب انت تعلم بحالى و غنى عن سؤالى
و قعدت ادعى ربنا كتير اوى لغايه أدان الفجر
صليت الفجر و قعدت أسبح فى سريري و لقيت المربيه جايبالى البنت ارضعها مره تانيه
بقيت ارضعها و انا حضناها و مش متخيله انها تبعد عن حضنى ثانيه واحده و قلت فى نفسي ساعتها انا لا يمكن اسيب بنتى لو حتى منزلتش و لا حضرت فرح اخواتى
بعدها لقيت نواف دخل على و قعد جنبى على السرير و باس ايدى و قالى
لا تزعلى يا فاطمه انا موافق انك تنزلى مصر بس على شرط
اول ما سمعته بيقول كدا نطيت من على السرير و قلت له أى شرط انا موافقه عليه الا انى اسيب بنتى و انزل
لأ يا ستى مش دا الشرط
امال ؟ اتكلم على طول بالله عليك
الشرط يا ستى اننا هننزل يوم الفرح الصبح و نرجع تانى يوم اخر النهار
ننزل ؟؟؟ هو انت هتيجى معايا
ايوه انا مقدرش ابعد عن بنتى ابدا أو تبات بعيد عنى
طب مينفعش نقعد اسبوع واحد بس
لأ و الله ما هقدر انتى شايفه الشغل عامل ازاى انا مقدرش اغيب عنه اسبوع بحاله
طيب خلاص يا نواف انا موافقه ربنا يخليك لى و رحت بايساه فى خده و رفعت نظرى للسما ...ياما انت كريم ياااارب
امى و اخواتى حددوا ميعاد الفرح و كانت بنتى ساعتها عمرها ست شهور ...نواف حجز التذاكر على ميعاد الفرح و اخدت لهم هدايا كتير معايا
و كانت فرحة عمرى لما الطياره نزلت على أرض مصر كان هاين على و الله انى انزل على أرضها ابوسها
اول ما شفت اخواتى بقيت احضن فيهم و ابوسهم و هما كمان اخدوا سهيله من ايدى و بقوا يبوسوا فيها و كل واحده منهم مش عاوزه تديها للتانيه
طلعت لكل واحده منهم هداياها و نواف الصراحه كان جايب لكل واحده منهم طقم دهب (كوليه و خاتم و حلق و اسوره تحفه) هديه زواجهم
اخواتى اول ما شافوا الهدايا كانوا طايرين من السعاده
شويه و راحوا الكوافير و لبسوا فساتينهم و انا كنت معاهم طبعا و لبستهم هديه نواف بايدى
اول ما شفتهم لابسين و متذوقين كدا عنيا دمعت من الفرحه كان نفسي من زمان افرح بيهم
الفرح بتاعهم كان فى قاعه حلوه قعدنا نرقص و كانت ليله جميله فرحت فيها اكتر ما فرحت بفرحى
تانى يوم رحت صبحت عليهم وودعتهم و رجعنا انا و نواف
لما روحت بيتنا و اول ما دخلنا اوضتنا شكرت نواف على اللى عمله معايا و مع اخواتى ...راح واخدنى فى حضنه و باسنى من جبينى و قالى تؤمرى حبيبتى ..ام سهيله الغاليه.
تانى يوم قمت تعبانه اوى و قلت اكيد من السفر و المجهود و طلبت من نواف يودينى المستشفى
رحت لرانيا اسلم عليها و اوصفلها تعبى بصت لى من تحت نضارتها و قالت لى انتى بتاخدى وسيله ايه لمنع الحمل يا فاطمه
قلت مباخدش حاجه انا برضع نضيف
ضحكت و قالت طب روحى اعمليلى اختبار حمل يا فالحه
بصيت لها كدا باندهاش حمل ايه يا بنتى بقولك برضع نضييييييف ....هروح بس عشان اريحك بس انا عارفه أن اللى انا حاسه بيه دا من المجهود و السفر و كدا
رحت عملت اختبار الحمل و رجعت لها
خدى يا ستى التحليل عشان ترتاحى بس................... ها .... حامل و الا ايه ؟ 😂
رانيا بصت لى و قالت .....
طبعا كلكم عايزين تعرفوا رانيا قالت لى ايه ؟؟ دا اللى هتعرفوه فى الجزء الجاى أن شاء الله 😉😉
يتبع ......😊
#د.جيهان_عادل😊
قصص اجتماعية
#فاطمه٧_٨
#الجزء_السابع
( مستوحاه من قصه حقيقيه )
رحت جبت التحليل و اديته لرانيا و انا متاكده من نفسي
رانيا بصت لى و قالت
زى ما توقعت بالظبط مبروك يا ستى انتى حامل
حامل ؟؟ متهزريش يا رانيا ...حامل ازاى
و ههزر ليه بس ؟؟ بقولك انتى حامل
يا خبر ....دا البنت لسه ست شهور
و انتى مخدتيش حظرك ليه يا فالحه و اخدتى وسيله
منا ....انا ...صراحه نواف اللى قالى بس انا قلت انى مش هحمل دلوقتى لانى برضع نضيف زى ما قلت لك
يا ستى حكايه انك بترضعى نضيف دى حاجه مش مضمونه ...الناس اللى بتقول كدا بتعتمد على أن هرمون الرضاعه ممكن يمنع الحمل لكن فى احتمال برده أنه ميمنعوش و عشان كدا بندى حبوب منع الحمل المخصوصه للرضاعه و دى بيبقى الهرمون فيها اقل من حبوب منع الحمل العاديه
طيب سيبك من كلام الدكاتره ده اللى مش فاهمه فيه حاجه ده.....اعمل ايه دلوقتى ؟
هتعملى ايه يعنى ؟ مفيش غير أننا هنبدا نديكى فيتامينات و نحلل لك نسبه الهيموجلوبين و الكالسيوم فى الدم عشان نشوف الدنيا ماشيه ازاى
لأ مش قصدى كدا ....انا قصدى هعمل ايه مع سهيله ..هفضل ارضعها لغاية امتى ؟
بصى انتى ممكن ترضعيها لغايه ما الحمل يتم اربع أو خمس شهور فى بطنك
و الحمل كام دلوقتى ؟؟
لأ انا لسه معرفش بس لما تيجى لى الاسبوع الجاى و اعملك سونار هنحدد تقريبا عمر الجنين كام ...و يا ستى متقلقيش سهله
مقلقش ؟؟؟ طيب 😏
خرجت من عند رانيا و انا مش عارفه افرح و الا ازعل
نواف شافنى و سالنى
مالك فى ايه ؟؟
انا حامل 🥺
الف مبروك حياتى ...ايوا كدا انتى كدا حبيبتى و بتسمعى كلامى
نواف فرح اوى يمكن اكتر ما فرح بحملى فى سهيله
بعدها بأسبوع رحت لرانيا عشان اتابع و اشوف انا حامل فى اد ايه زى ما قالت لى
رانيا اول ما حطت السونار على بطنى ضحكت و قالت بسم الله ما شاء الله
ايه يا رانيا النونه كام شهر
لا نونة ايه قولى النونتين كام شهر ....مبروك يا ستى انتى حامل فى تؤام
يا باي على هزارك السمج بطلى يا بنتى و قولى انا حامل فى كام شهر
يا بنتى هو انتى مصممه ليه انى بهزر معاكى ؟؟ انا بقولك انك حامل فى توأم
معقوله ؟؟؟ يا خبر دا نواف هيطير من الفرحه
انا بقا اللى هقوله بنفسي المره دى
رانيا ضربت الجرس و طلبت من الممرضه تدخل نواف
نواف دخل مخضوض خير يا دكتوره ؟؟
خير متقلقش انا بس مدخلاك ابارك لك على التوأم اللى هيجيلك
توام ؟؟؟ بتتكلمى بجد يا دكتوره ؟؟؟
ايوه طبعا بص كدا ...فى كيسين جنينين اهم قدامك و عمرهم تقريبا شهر و نص
نواف مكنتش الفرحه سايعاه بقى يتفطط من الفرحه و انا كنت فرحانه اوى لفرحه دا
بعد كدا عدت شهور الحمل بس كانت اصعب كتير من سهيله و نواف عمل زياره لامى جت قعدت معايا من اخر شهرين فى الحمل
ربنا رزقنا ببنتين رفيده و خديجه و صراحه نواف مزعلش زى ما كنت متوقعه ...لأنه طبعا كان يتمنى يكون عنده ولد
بعد ما ولدت نواف عمل عقيقه للبنتين زى اللى عملها لسهيله و اكبر كمان
أما ماما نواف جدد لها الزياره و قعدت معايا لحد ما بناتىچ بقا عمرهم سبع شهور
لما امى جت تنزل مصر كنت خلاص اتعودت على وجودها و مش قادره اتصور حياتى بالبنات من غيرها و طلبت من نواف انى انزل اقضى معاها شهر فى مصر لان مصر وحشتنى اوى و اخواتى كمان وحشونى اوى
كنت متخيله أن بعد تلات اطفال منه أنه بقا مااامن عليهم و بيثق فى لكنه قابل طلبى دا بثورة شديده و لقيته لاول مره بيقولى يعنى بعد كل اللى عملته معاكى دا عاوزه تاخدى بناتى تنزلى بيهم مصر
قلت له أنت ليه محسسنى انى هاخدهم مش هرجعهم ...و ليه اسلوب المعايره اللى فى كلامك ده
و لا معايره و لا غيره بس انتى مبتحسيش انا جبت لكى امك قعدت معاكى تسع شهور هنا عشان مسمعش منك الكلمه دى ...لكن مفيش فايده برده
انت مالك متعصب ليه كدا انا بطلب منك طلب توافق أو ترفض دى حاجه ترجعلك ليه تغلط فى الكلام و تقول مبتحسيش ؟؟
لانك فعلا مبتحسيش انا عملت لكى اللى عمرك ما كنتى تحلمى بيه لا انتى و لا عيلتك عيشتك فى مستوى بعيد عن خيالك انك كنتى تتخيله و مع ذلك كل شويه تدلعى و تقولى عاوزه انزل عاوزه انزل يا شيخه قرفتينى
نواف سابنى و خرج و انا قعدت اعيط اعيط مش عارفه اعمل حاجه الا انى اعيط
كنت بعيط على حالى ...فعلا انا بعت نفسي بشويه هدوم و شويه دهب ...عنده حق فى كل اللى قاله ..انا مليش حق انى اطلب و أقوله نزلنى وودينى ...انا رضيت بالذل من الاول و لازم اتحمل نتيجه اختيارى
بعد الكلام ده فضلنا فتره كبيره منتكلمش مع بعض ...كنت مجروحه اوى منه و هو بدأ يبات كتير بره البيت و معدش بيهتم بى خالص
لغايه ما فى يوم تعبت من الوضع ده و قررت انى لازم اتكلم معاه و لازم احل اللى انا فيه ده
خليته بيلبس هدومه فى اوضته و دخلت عليه ( و دا كان بعد ٣ شهور خصام )
قعدت على سريره و بصيت له و قلت له
هنت عليك تقاطعنى كل ده يا نواف ؟؟؟
سكت و مردش على
قمت وقفت و مسكت ايده و بصيت فى عينه و قلت له ايه موحشتكش ؟؟
راح باصص لى كدا نظره فيها استنكار و قال انتى اللى غلطتى و انتى اللى كان لازم تيجى تصالحينى
طيب يا سيدى حقك على انا اسفه ...انا معنتش هطلب منك اى طلب تانى
خلاص يا فاطمه حصل خير
طب ايه ؟ مفيش حضن لفاطمه حبيبتك؟؟
نواف اخدنى فى حضنه بس حسيت انه حضن ساقع مجرد أداء واجب و بس
قلت فى نفسي معلش احنا بقالنا كتير متخاصمين و اكيد اتكون تلج ما بينا ....معلش هناخد وقت لغايه ما ندوب التلج ده
عدى اسبوع و ابتدت العلاقات ترجع بينى و بين نواف عاديه .....مبقاش يبات بره ...و بقى يرجع البيت بدرى يقعد معايا و مع بناتى و كله بقا تمام
و فى يوم من الايام لقيت نواف بيتصل بى و يقولى أنه حجز لنا ليله فى فندق نروح نقضيها سوا و طبعا البنات هيكونوا معانا بس مع المربيه فى اوضه تانيه
انا اول ما سمعت فرحت اوى و قلت إنه اكيد عاوز يعوضنى عن الفتره اللى اتخاصمنا فيها
نواف قالى متجبيش اى هدوم معاكى هى مجرد ليله واحده هنقضيها سوا و بعد كدا هنرجع
و فعلا رحت بعبايتى بس و تحتها فستان طبعا ....و انا من طبيعتى مبحبش البس الدهب اوى
اول ما وصلنا الفندق كان مبهر بالنسبه لى ...انا برده مبخرجش كتير و أن خرجت بروح بيت حد من أصحابه
ليلتها سهرنا فى حفله فى الفندق و كنت فرحانه اوى و حاسه أننا خلاص رجعنا زى الاول و احسن
بعد الحفله طلعنا عشان ننام و كل شئ كان تمام
صحيت الصبح ملقتش نواف جنبى ....رحت على اوضه البنات ملقتش حد ....ايه دا فين نواف ؟؟ و فين البنات ؟؟؟🥺😔😔😔
دا اللى هنعرفه فى الجزء الجاى بإذن الله 😔
يتبع .......😔
#د.جيهان_عادل🥰
#فاطمه
#الجزء_الثامن_والاخير
( مستوحاه من قصه حقيقيه )
اول ما وصلنا الفندق كان مبهر بالنسبه لى ...انا برده مبخرجش كتير و أن خرجت بروح بيت حد من أصحابه
ليلتها سهرنا فى حفله فى الفندق و كنت فرحانه اوى و حاسه أننا خلاص رجعنا زى الاول و احسن
بعد الحفله طلعنا عشان ننام و كل شئ كان تمام
صحيت الصبح ملقتش نواف جنبى ....رحت على اوضه البنات ملقتش حد ....ايه دا فين نواف ؟؟ و فين البنات ؟؟؟🥺😔😔😔
اتصلت على استقبال الفندق اسال قالوا إنهم غادروا
ازاى غادروا طب و انا ؟؟؟
رد موظف الاستقبال حضرتك قدامك للساعه ١٢ الضهر و بعد كدا هيتحسب يوم تانى
بصيت حواليا ملقتش اى حاجه غير عبايتى اللى جايه بيها حتى شنطتى اخدها 😔
بقيت اصرخ زى المجنونه و مش عارفه اعمل ايه و لا اروح فين
الناس فى الفندق اتلموا على و عرض على واحد منهم يوصلنى فى اى مكان عايزاه و قالى انا اخوكى فواز و هادى زوجتى ام فهد
قلت له من فضلك وصلنى بيتى
فواز و زوجته اخدونى وودونى لغايه البيت
و طول الطريق زوجته تطبطب على و تقولى هو انتوا زعلتوا سوا
قلت لا و الله ما فى اى زعل انا هتجنن ليه عمل كدا فى ؟؟
وصلت البيت لقيته مقفول و مفيش اى حد فيه
بقيت اسال الجيران محدش عارف حاجه
حسيت انى ضعت مش عارفه اتصرف دماغى مشلوله
اروح فين و اجى منين يا ربى
طب و بناتى راحوا فين ؟؟؟
ام فهد لما لقت لهجتى مصريه اقترحت على اروح السفاره المصريه
طب يا رب انا ممعيش اى ورق و لا جواز سفر و لا حتى فلوس ....هروح السفاره اقولهم ايه ؟؟؟ هقولهم انا مين و متجوزه مين ؟؟؟
فواز و ام فهد قالوا إن شاء الله هتلاقى الحل فى سفاره بلدك يا اختى
خدونى و رحت السفاره فعلا و دخلت و انا فى حاله يرثى لها .... حاسه انى تايهه دماغى مش فيى
فى السفاره استقبلونى كويس جدا و قعدوا يهدوا فى و جابوا لى عصير و سمعوا منى كل حاجه
طبعا انا اعرف اسم نواف ثلاثى بس و معرفش اسم عيلته مجاش فى بالى انى لازم احفظ اسم العيله
و لما سألونى فى السفاره عن اسم عيلته معرفتش اقولهم
و لما سألوا عن عنوانى معرفتش اقولهم بس قولت لهم ممكن اوصلكم هناك بس انا معرفش اسامى المناطق
بس انا رحت و ملقتش حد ....نواف خطف بناتى ...خطفهم ليه ...ليه يعمل فى كدا ؟؟؟ ليه يحرق قلبى عليهم ...ليه ليه
موظف من السفاره كتر خيره جه معايا لحد البيت ملقناش له أثر و لا حد يعرفه فى المكان و لا انا اعرف اى ارقام تليفونات من تليفونات أصحابه للاسف ذاكرتى ضعيفه و مبعرفش احفظ الارقام
رجعت السفاره و كان كل همى انى اعرف اخلص ورقى و ارجع بلدى ....تفكيري ساعتها جابنى كدا ...انا معرفش اى حد هنا و لا معايا فلوس و لا لى مكان و لا عارفه ادور على بناتى فين ؟؟
موظف السفاره سمح لى انى اكلم والدتى فى مصر
اول ما كلمتها
الو ....ايوا يا ماما
ايوا يا فاطمه ...جوزك طلقك ليه يا بنتى ؟؟؟
جوزى طلقنى ؟؟؟؟🥺طلقنى ازاى يا ماما ...مين قالك ؟٠
هو يا بنتى اتصل على و قالى أنه طلقك هو ايه اللى حصل يا فاطمه
اللى حصل ...مفيش حاجه حصلت غير أنه خطف بناتى و طفش زى الجبان حسبنا الله و نعم الوكيل ...ربنا يحرق قلبه زى ما حرق قلبى على بناتى منه لله احكم الحاكمين
يا خبر ....انتى بتقولى ايه خطفهم ازاى ؟؟؟🥺🥺
قمت من النوم يا ماما ملقتوش و لا لقيت ولادى
طب و هتعملى ايه دلوقتى يا بنتى و بتتكلمى منين
انا بتكلم من السفاره و هرب الجبان من غير ما يسيب لى جنيه واحد و مش عارفه اعمل ايه
يا ضنايا يا بنتى طب و بعدين ؟؟؟
و بعدين السفاره هترحلنى و لما اوصل مصر هدفع تمن تذكرة الطياره
يا حبيبتي يا بنتى ...كان مستخبى لك فين دا كله 😢
خلصت ورقى فى السفاره و رجعت بلدى و انا تايهه شبه مغيبه دموعى مبتنشفش من على خدى
امى و اخواتى استقبلونى و بقوا يحضنوا فى و يعيطوا
و انا من كتر العياط بقيت مش شايفه قدامى
قعدت حوالى اسبوعين مباكلش و لا اشرب و مستنيه انى اسمع اى اخبار عن بناتى يمكن قلبه يحن على و يكلمنى يطمنى
و فى يوم و انا خارجه من اوضتى رايحه الحمام وقعت من طولى امى صرخت و اتلموا الجيران
واحد منهم اخدنا فى عربيته و رحنا المستشفى و هناك عرفت انى حامل 🥺🥺🥺🥺🥺
يا الله انا حامل ...لو نواف كان يعرف كان يمكن ميعملش فى كدا
و سبحان الله تانى يوم لقيته بيتصل على عشان يقولى أنه بعت لى ورقه طلاقى على السفاره و انى اروح اخدها
قعدت أتوسل له اسمع حتى صوت واحده من بناتى و هو قلبه حجر و قالى خلاص انا قلت لهم انك متى و خلاص اتزوجت غيرك
انا اتجننت و قلت له ....طب و لو قلت لك انى حامل فى ابنك او بنتك ؟؟؟
سكت و مردش على و قفل السكه
هو قفل و انا النار ولعت فى قلبى بقيت الطم على وشي زى المجنونه ...و امى تهدى فى
فات حوالى تمن شهور بعد المكالمه دى و انا بتقلب فيها على جمر النار
و جالى آلام الوضع و اللى كانت عندى اهون من اللى انا حاسه بيه
و خلفت ابنى محمد نور عينى و قلبى من جوه
و لقيت اتصال من نواف عشان يعرف انا خلفت و الا لأ
قلت أقوله أن ربنا رزقه بولد يمكن قلبه يحن و يخلينى اشوف أو حتى اسمع صوت بناتى
لما عرف انى جبت الولد كان رد فعله غريب اوى ...
قالى انا هاخد الولد منك زى ما اخدت البنات
ساعتها حسيت انى مكنتش متجوزه انسان ...دا وحش منزوع ادميته ....وحش تجرد من كل معانى الانسانيه
رديت عليه و قلت له انت بتقول ايه ولد ايه اللى هتاخده منى؟؟؟ انت ايه يا اخى ؟؟
ولدى هاخد ولدى منك يا فاطمه انهارده أو بكرا او بعد سنه او عشره هاخده يعنى هاخده
قفلت السكه فى وشه و حضنت ابنى ...خفت خفت اوى منه ....هو معاه فلوس و يقدر يعمل اى حاجه
بقيت افكر انى أعزل عشان ميعرفش طريقى و فى نفس الوقت مش عاوزه اقطع الأمل الوحيد اللى ممكن يوصلنى لبناتى
فكرت كتير انى اسافر مره تانيه ادور عليهم بس مكنش معايا فلوس
نزلت اشتغل فى محل لبيع الادوات الكهربيه عشان اقدر اصرف على ابنى و عشان اقدر احوش مبلغ اسافر بيه و اروح ادور على بناتى
ابنى اسم الله عليه بقا عمره دلوقتى ١٠ سنين و انا لسه خايفه عليه اوى من أبوه قافله عليه و انا اللى بوديه مدرسته و بجيبه منها
انا عايشه فى عذاب محدش يتصوره خوف و قلق على ابنى و حرقه قلب على بناتى اللى زمانهم بقوا عرايس دلوقتى ...بس ميعرفونيش 😔
انا جالى ناس كتير عاوزه تتجوزنى لكن بعد اللى حصل معايا معنتش أثق فى اى حد ابدا معنتش عايزه من الدنيا غير انى اشوف بناتى و بس ...انا كل يوم بنام دمعتى على خدى 😢😢
تمت
🥀🥀🥀🥀🥀🥀🥀🥀🥀🥀🥀🥀🥀🥀
انا عاوزه اقول ان القصه حقيقيه و صاحبتها موجوده لكن طبعا نسيج الأحداث من خيالى
بس بطلب من الناس اللى قرت قصتها يدعولها أن ربنا يرد لها بناتها ردا جميلا
اللهم رد لها بناتها يا رب و حنن قلب ابوهم عليها
اللهم أيقظ ضميره و انزل الرحمه بقلبه يارب
اللهم فرج همها و أقر عينها برؤيه بناتها و احفظ لها ابنها يارب العالمين
#دجيهان_عادل💐
 انا فاطمه ٣٩ سنه شغاله فى محل ادوات كهربيه عايزه احكيلكم حكايتى ....عايزه افضف…){kind=link}
ردحذفمبدأ جواز المصريه خارج بلدها ده كارثه لكن احنا مبنتعظش