#ادم و مليكه
#الجزء_الثالث
بعد اسبوعين تماثلت مليكه للشفاء و عادت لمنزلها وسط فرحة من زوجها و أبنائها
حمدالله على السلامه يا حبيبتى
الله يسلمك يا حبيبي ...انت تعبت معايا اوى
تعبك راحه يا حبيبتى ....نورتى بيتك
بنورك حبيبي ربنا يديمك تاج فوق راسي
و يخليكى ليا و لاولادك يااااارب
البيت كان وحش اوى من غيرك يا ماما
ربنا يخليك يا احمد يا ابنى
و الله يا ماما انا و احمد كنا هنجنن عليكى بس بابا مكنش سايب لنا اى فرصه
طبعا يا مريم ابوكى عشرة عمرى و حبيبي
سيدى يا سيدى ربنا يوعدنا يارب ...اه صحيح عادل عاوز يجى هو ووالده ووالدته يسلموا على ماما يا بابا
يتفصلوا يا بنتى ...ماما بقت زى الفل الحمد لله ...يشرفوا فى اى وقت .
فى المساء حضر عادل و أسرته لزياره عائله مريم
حمدالله على السلامه يا حبيبتى
الله يسلمك يا سعاد
و الله احنا كنا قلقانين عليكى اوى و كنا عاوزين نجيلك المستشفى بس عادل قالنا أن الزياره ممنوعه
حبيبتى حسكم معايا ....تسلميلى يا رب
و انتى عامله ايه دلوقتى ؟؟
الحمد لله فى فضل و نعمه
الحمد لله يا حبيبتى ...احنا باذن الله على ميعادنا بعد العيد شبكة عادل على مريم
باذن الله يا سعاد
هنا نطق عبدالرؤوف والد عادل
كنا عاوزين ناخد العروسه و ننزل نجيب الشبكه يا بشمهندس و طبعا حضراتكم معانا
طب و احنا نيجى معاك ليه يا دكتور ؟؟
طبيعى أن العروسه تنقى شبكتها
و انا بقول أن الشبكه هديه العريس للعروسه و اللى تجيبه منقدرش نعترض عليه
بس ...
مبسش انت عارف انا اتجوزت مليكه من غير اى شبكه خالص بس بعد كدا عوضتها و بقى عندها اكتر من كيلو دهب
ما شاء الله بس لازم عروستنا على الاقل تبقى موجوده ...دا العرف يا بشمهندس
أعراف غلط و بتصعب الحلال ...ابو العروسه يشرط على الشاب اللى لسه يدوب مخلص تعليمه شبكه بمبلغ كبير جدا و شقه و عفش و حاجات فوق طاقته و فى المقابل يطلبوا أن العروسه تجهز و تحمل اهلها فوق طاقتهم و تخلي ابوها يدين عشان ده العرف
هنعمل ايه كله ماشي بالشكل ده
لا نعمل يا ست ام عادل ...لو كل واحد بدأ بنفسه هنغير الفكر العقيم ده ....احنا بندفع ولادنا للحرام لما نصعب عليهم الحلال
فعلا عندك حق بس الناس مبتفكرش بالشكل ده خالص ....الناس يهمها الفشخره و أن يكون شكلهم قدام بعض كويس .
انتى تعرفى يا سعاد أنى اتجوزت ادم بشنطة هدومى ؟؟؟
ايه شنطة هدومك ازاى ؟؟؟ انتى اكيد بنت مدينه لانك لو ارياف دا ميحصلش ابدا انتى بلدك ايه يا مليكه ؟؟
انا تونسيه
ايه دا ؟؟؟؟ اول مره اعرف ...بس لهجتك و شكلك و طريقة لبسك مصرى خالص محدش يقول انك مش مصريه نهائى .
طبعا انا دمى بقا مصرى انا عايشه فى مصر من اكتر من عشرين سنه لازم يكون شكلى كدا
ياااا طب و ايه اللى لم الشامى على المغربى ؟؟ يعنى اتعرفتى على البشمهندس منين ؟؟؟
و الله يا سعاد دى حكايه طويله اوى ☺️
احب اسمعها لو مش هتعبك يعنى
بالعكس أنا عايشه فيها و عمرى ما نسيتها لحظه ...انتى مش هتخلينى افتكر لانى مبنساش لحظه ازاى اتعرفت على آدم
يوم عمرى ما أنساه ابدا
يا سلام شوقتينى انى اسمع حكايتك
حكايتى يا ستى بتتلخص فى كلمه واحده القدر
اوعى تفتكرى أن اى حاجه بتحصلنا كدا بتبقى عبث أو مجرد صدفه ..كله بقدر
بنقابل ناس و نتعرف على ناس مقدر لنا أننا نقابلهم و يبقى لهم دور فى حياتنا سواء بالخير أو الشر
حكايتى بدأت لما كنت طفله صغيره
نشأت فى مدينه صفاقس و دى مدينه على الشاطئ الشمالى لخليج قابس...و طبعا صفاقس من أكبر المدن التونسيه و الميناء الرئيسى لتونس
كنت كأى بنت بحلم بفارس الاحلام اللى هيجى ياخدنى على حصانه ...كنت ساعات كتير احلم انى برقص معاه و انا لابسه ملابس من العصور الوسطى فى باحة قصر كبير و الناس واقفه تتفرج علينا زى مشهد الجميله و الوحش و هى بترقص معاه و كنت دايما اسال نفسي ازاى بنت جميله زى دى حبت وحش بالشكل ده بس اخيرا عرفت الجواب إن القلب مش عليه سلطان ..ساعة ما يحب و الحب يدخل قلبه مفيش سبب أو مبرر للحب ده ...
و انا صغيره كان عندى هوايات كتير اوى بس هوايه الصيد كانت من احب الهوايات لقلبى
و فى يوم و انا قاعده على الشط و راميه سنارتى فى الميه و منتظره مرت من جنبى ست لابسه ملابس بدويه و قالت لى قاعده لوحدك ليه يا شابه ؟؟
بصطاد يا خالتى
عاوزانى اشوف لك قدرك و نصيبك ؟؟
لا انا مبأمنش بالكلام ده
جربى مش هتخسرى حاجه و لو كلامى معجبكيش خلاص
نجرب
خدى الودع ده وشوشيه و قوليله سرك
اخدت الودعه و كنت محتاره هقولها ايه ؟ اللى جه فى بالى انى اقول نفسي اعرف فارس الاحلام هيجى امتى ؟؟؟
( انا كان عندى ساعتها ١٧ سنه )
الست اخدت من ايدى الودع و بدأت تتكلم بكلام موزون و حاجات حصلت و حاجات محصلتش بس قالت لى كلمه فضلت افكر فيها كتير اوى
قالت لى ...اللى بتفكرى فيه جاى بس مش من بلدك و لا أهله يشبهوا اهلك و لا عادته كعادتك بس هتحبيه و تدوبى فيه و هو هيعشقك و هيعشق التراب اللى بتمشي عليه ..
الست مشيت و انا قعدت اضحك ايه اللى بتقوله دا ؟؟؟ و مين الشخص اللى مش من بلدى ده ؟؟؟ هشوفوا فين يعنى ؟؟؟
طبعا ساعتها اعتبرت انها بتخرف أو بتقول كدا عشان تاخد فلوس و خلاص
مرت سنين و كنت نسيت كلام الست دى نهائى و دخلت الجامعه
و كانت الجامعه بتعمل رحلات لبلاد مختلفه
زرت بلاد كتير اوى زرت الجزائر و المغرب و زرت ليبيا و زرت بلاد فى أفريقيا
و انا فى رابعه كليه لقيت اعلان عن زياره لمصر
طبعا انا من زمان اسمع عن مصر و كنت اتمنى انى ازورها و اشوف النيل اللى بيقولوا عليه و ازور الاهرام و الحاجات الحلوه اللى بنسمع عليها فى مصر
طبعا كنت من اوائل الناس اللى اشتركت فى الرحله و كنت فى منتهى السعاده و الطياره بتتحرك بينا على مصر
نزلنا فى فندق فى القاهره و كانت رحلتنا الاولى للاهرامات
بقيت الف فيها و انا منبهره باللى انا شايفاه وكان معايا الكاميرا بتاعتى التقطت صور كتير عشان تكون ذكرى حلوه ليا فى مصر
اليوم التانى للزياره كان للمتحف المصرى و هناك شفت اثار تحفه حاجه هايله اوى ، مكنتش مصدقه نفسي أن فى حاجه بالجمال و الروعه دى
و فجأه و انا بلف جت عينى فى عينه و اتسمرنا احنا الاتنين نبص لبعض من غير و لا كلمه وبعدين ....
يتبع
#دجيهان_عادل
#قصص_وحكايات_د_جيهان_عادل.
فضلا غير مسموح نقل أو نسخ القصه إلا بعد اذن الكاتب ..
تعليقات
إرسال تعليق