الوصيه ( القصه كامله )
جزء اول
دى آخر وصيه هوصيها قبل ما أموت أنا عندى سر كبير حافظه فى قلبى من خمسه و عشرين سنه و جه الوقت إللى أخرجه من قلبى و اقوله لكم انتوا التلاتة
-متتعبيش نفسك يا أمى الدكتور قال أن الإجهاد غلط عليكى.
-لا سبنى يا صلاح أخلص ضميري يا ابنى قبل ما أموت
- طب قولى يا أمى
- أنا يا ابنى من أكتر من 25 سنه كنت لسه شابه جاهله مكنتش اعرف الحلال و الحرام و كنت عديت العشرين سنه و لسه متخطبتش و كانت كل البنات إللى فى سنى اتخطبت و اتجوزت كمان و أنا كنت بحقد على أى ست اشوفها متجوزه و متهنيه فى بيتها
لما كانت واحده صاحبتى تعزمنى على فرحها كانت الغيره تأكل فى قلبى و ابقى رايحه ابص عليها و هى قاعده فرحانه هى و عريسها و قلبى بيولع من النار اللى فيه
و فى مره من المرات كان ليه صاحبه بتعتبرنى زى اختها و كان اسمها ساميه
ساميه كانت بنت جميله نفسها حلوه أى حد يشوفها يحبها ساميه كان عندها 17 سنه لما جالها عريس حلو اوى بيشتغل مهندس بترول فى السويس و كانت ساميه يدوب لسه مخلصه الدبلوم و العريس دا جالها و كان ابن ناس اوى و فرحت بيه جدا . و جت تحكيلى عنه و تقولى أنه ظريف و ابن ناس و مستواه المادى حلو اوى و أنه و أنه ........ و أنا بسمع كلامها و اضحك لها بس ربنا العالم بقلبى و باللى جواه و عرفت من كلامها ازاى اوصل لخطيبها دا لأنها بطيبه قلب فى وسط كلامها كانت بتحكى أنها بتكلمه على التليفون الارضى و أن نمرته سهله اوى حفظتها أول ما سمعتها
و طبعا أنا كمان حفظتها أول ما سمعتها و قعدت أفكر ازاى أطير العريس الحلو دا من ايدها.
اشمعنى هى يجيلها عريس حلو كدا و أنا محدش بيبص فى وشى و لا بيقولى انتى فين
و فعلا خططت فى دماغى خطه جهنميه عشان افرق ما بينهم و كان لى ابن عم واد صايع كدا كانت الفلوس أهم حاجه عنده
رحت له و قلت له عايزاك فى مصلحه يا سيمو و لك قرشين حلوين
قالى تحت امرك يا بنت عمى يا غاليه
قلت له فى بت مش كويسه عملت فى مقلب طلع من عينى و أخدت عريس كان هيتقدم لى و عايزه أرد لها المقلب دا
قالى و ماله نرد لها المقلب المطلوب منى ايه عايزانى اخطفهالك نديها علقه لغايه ما يبان لها صحاب؟ ؟
قلت لا لا احنا هنعلمها الأدب بالراحة و بالذوق و متخافش حقك محفوظ يا ابن عمى
قالى قشطه طب رسينى على الدور عشان استعد يا بنت عمى .
قلت البت دى مع أنها هبله بس مش عارفه أخدت منى العريس ازاى و أنا بقا عايزه اسحبها لك و نجيب العريس ابن الناس دا و يشوفها معاك فتتفركش الجوازه
قالى حلو بس الموضوع ده ممكن يكون فيه لبش يا بنت عمى
قلت له متخافش احنا هنفهم الواد أن البت هى اللى غلطانه و أنها ماشيه على حل شعرها مع كذا واحد مش معاك انت بس
قالى تمام و ازاى بقا هنفذ الخطه دى
عايزين تعرفوا نفذت خطتى ازاى استنونى فى الجزء الجاى
يتبع ..........😊gg
الوصيه
الجزء الثانى
قلت لابن عمى أنا هقنع البت تيجى معايا و أنك بتحبنى و أنا محرجه اقابلك لوحدى و تيجى فعلا و أكون متصله بخطيبها يجى يشوفك معاها
و فعلا بدأت فى تنفيذ خطتى و اتصلت على خطيبها
ألو ممكن اكلم مهندس محمود من فضلك ؟
- نقوله مين يا افندم ؟؟
- لا هو ميعرفنيش بس قوليله سلوى
- حاضر ثوانى
- الو مين معايا
- أنا واحده متعرفهاش بس لما عرفت أنك رحت تخطب بنت اسمها ساميه صعبت على و قلت احذرك
- صعبت عليكى ليه و تحذرينى من ايه ؟
- احذرك أن البنت دى مش كويسه و ماشيه مع طوب الأرض
- يا سلام و أنا بقا المفروض انى اصدقك ياللى معرفش اسمك انتى
- قلت حلو انت كدا صح و أنا هثبت لك كلامى لو مش مصدقنى
- قالى ازاى بقا
- قلت أنا سامعاها امبارح تحت شباكى و هى بتتفق مع واحد من إللى ماشيه معاهم أنها راحه تقابله فى جنينه جنبنا الساعه خمسه بالظبط و أنهم بعد كدا هيخرجوا فى مكان تانى
فلو عايز تشوفها طب عليها الساعه خمسه و اتأكد من كلامى
و قلت له على مكان الجنينه و هو ما عملش أى رد فعل يعنى مفهمتش منه هيروح و إلا لا
بس برده مشيت فى خطتى و رحت لسيمو اتفقت معاه يقابلنى الساعه خمسه إلا ربع فى الجنينه
و رحت لساميه و طلبت منها أنها تيجى معايا نقابل واحد عايز يخطبنى فالأول هى رفضت الصراحه بس أنا قعدت اعيط لها و قلت لها دى فرصتى الوحيده و انى كبرت و الناس بتعايرنى انى عانس . و انى مش عاوزه أروح لوحدى برده علشان ميصحش ووجودها هيطمنى شويه ووعدتها أن الموضوع مش هياخد عشر دقايق
و فعلا قدرت اقنعها للأسف 😢
ووصلنا الجنينه و بعدها بدقايق جه سيمو و سلم علينا
همست لساميه بطنى وجعانى اوى يا ساميه عايزه أروح التواليت
قالت طب تعالى نروح
قلت لها لا خليكى انتى اتكلمى معاه على ما اجى عشان تقوليلى رأيك فيه انتى صاحبتى الوحيده و يهمنى رأيك برده
و فعلا هى صدقتنى و قمت أنا ووقفت بعيد و شفت خطيبها جاى من بعيد و هى بتتكلم مع سيمو
خطيبها وصل عندها و لقيته بيزعق لها
طبعا سيمو هرب بسرعه
و لقيته مشي و سابها و هى قعدت تعيط
أد ايه كنت مبسوطه لما شفت المنظر دا
و طبعا أنا كمان مشيت و روحت بيتى و بعد شويه لقيتها جايه و منهاره و طلبت منى أروح معاها لخطيبها و اقوله الحقيقه و أنا طبعا رفضت و قلت لها انتى عايزه تفضحينى ؟؟؟ لو حد عرف انى كنت رايحه أقابل واحد هتودينى فى داهيه أنا مليش دعوه ابعدى عنى
طبعا قعدت تعيط و خرجت 😣
تانى يوم لقيت حكايتها على كل لسان و الكلام كتر و اللى يقول خطيبها مسكها فى مكان و اللى يقول دا كانت فى وضع مخل...... وووووووو...... وبقت سيرتها على كل لسان
و فى يوم لقينا اهلها قاموا بدرى و عزلوا من المكان من الفضيحه اللى لحقتهم
أنا بقا ضميرى مأنبنيش لحظه بل بالعكس كنت مبسوطه أنها مشيت من الحته
لكن ربكم يمهل و لا يهمل انتقم منى أشد انتقام و دفعت طول عمرى تمن غلطتى انى فضحت انسانه بريئه معملتش اى حاجه و كل ذنبها أنها صاحبت واحده زيى 😢
يتبع ..........😊 gg
الوصيه
الجزء الثالث و الأخير
بعد ما ساميه و عيلتها مشيوا ابتدى سيمو كل شويه يجيلى و يطلب منى فلوس و يهددنى انى لو مدتوش إللى عاوزه هيفضحنى و كنت اخد من ورا اهلى الفلوس و اديهاله
لغاية ما فى مره قالى أنه عايز يتجوزنى و طبعا أنا رفضت لانه واد صايع بيشرب مخدرات بس هو هددنى و ساعتها خفت اوى من ابويا لانه كان شديد و لو عرف اللى عملته ده ممكن كان يموتنى فيها
المهم مقدرتش اقول لا بعد ما سيمو حلف أنه هيقول ابويا على حكايه ساميه و على الفلوس اللى كنت بسرقها له من اهلى .
ابويا وافق عليه بعد موافقتى طبعا عشان خاطر عمى
و عمى قاله أن سمير بقا كويس و بيشتغل و ابويا صدقه
اتجوزت سيمو أو سمير و من أول أسبوع ورالى اللى مشفتوش فى حياتى كل يوم ضرب و اهانه و بقا يقعد فى البيت ميشتغلش و أنا أروح اجيب له فلوس من بيت ابويا و الناس تتدخل فى مشاكلنا و تصالحنا
تعبت اوى معاه و بقيت انزل أشتغل خدامه فى البيوت عشان اصرف على نفسي و على أختكم سعاد
و للأسف حملت مره تانيه و جبتك أنت و أخوك أشرف توأم و بقيت مش عارفه أروح شغلى و اسيبكم اتمرمطت و اتبهدلت أما هو فطفش و ساب البيت
و أنا بقيت اوديكم ساعات عند أمى أو واحده جارتى و انزل أشتغل و بقيت أقبل أى شغل علشان اصرف عليكم
و فى مره طلبنى واحد أروح انضف له شقته و كنت فاكره أن مراته موجوده و لكن فوجئت أنه لوحده
اشتغلت شغلى و هو صراحه ادانى مبلغ كبير و قالى أنه عايزنى كل أسبوع مره
و صراحه فلوسه غنتنى عن أى شغل تانى و كنت مبسوطه انى فضيت لكم و بقيت أروح يوم واحد بس فى الأسبوع اخدمه و لكن كلام الناس مبيسبش حد فى حاله و بقوا يتكلموا على و بقا يطمع فى كلاب السكك و كان ابويا ساعتها توفى
و بقيت كل ما أمشي فى الشارع اسمع الناس بتتكلم على انى ماشيه مشي مش كويس
لغاية ما تعبت و طفشت من الحته و اخدتكم انتوا التلاتة و جيت قعدت فى المكان هنا
و طول الفتره اللى فاتت دى و أنا عارفه أن دا عقاب ربنا ليا فى اللى عملته فى ساميه .
و فى يوم تعبت اوى و رحت اكشف الدكتور شك فى حاجه و حولنى على معهد الأورام و طلع شكه فى محله عندى سرطان فى الدم فى المرحله الاخيره و فاضلى أيام و اموت
اللى عايزاه منكم أنكم ترجعوا المنطقه اللى كنت ساكنه فيها و تحاولوا تسالولى على ساميه و أهلها و توصلوا لها عشان استسمحها فى اللى عملته فيها . هو دا طلبى الأخير
حاضر يا أمى هنعمل كل اللى انتى عاوزاه بس استريحى بس
و فعلا صلاح و أشرف راحوا المكان و كان لساميه قرايب لسه موجودين فى المكان و عرفوا منهم عنوانها و راحوا لها و عرفوها بالحكايه و طلبوا منها أنها تيجى معاهم و تسامح أمهم .
و فعلا الست طلعت كريمه الأخلاق جدا و راحت معاهم لامهم
أول ما شافتها قعدت تعيط و تقولها سامحينى أنا ظلمتك و سوأت سمعتك و ربنا اخد لكى حقك
ردت ساميه أنا مسامحاكى أنا ربنا عوض على بأحسن من اللى راح الحمد لله و شكرت ربنا أن اللى حصل دا حصل و اتعرفت على جوزى الحالى راجل محترم يعرف ربنا و ميعشنى أحسن عيشه و الحمد لله
ساميه مشيت و هى مسامحه و وعدتها أنها هتيجى تزورها تانى
الأم كانت فرحانه اوى و قالت لأولادها الحمد لله انى استبرئت من ذنبها
اوصيكم يا اولادى اوعوا تظلموا حد فإن الظلم ظلمات يوم القيامه .
اوصيكم اوعوا يملى قلوبكم حقد او غل
لازم يكون عندكم رضا . ربنا مقسم الأرزاق و لكل واحد مننا رزقه من المال و الصحه و العيال
الحب هو أعظم شيئ فى الوجود حبوا بعض و حبوا الناس و حبوا لغيركم الخير هتلاقوا السعاده فى الدنيا و الاخره
الحمد لله رب العالمين
أشهد أن لا إله إلا الله و أن محمد رسول الله
قفلت الام عنيها و سلمت امرها لبارئها بعد ما قلبها ارتاح 😢
ارجوا أن القصه تكون عجبتكم و أرجو الترحم على روح والدى رحمه الله عليه
تمت 😊
د. جيهان عادل 😊
 جزء اول دى آخر وصيه هوصيها قبل ما أموت أنا عندى سر كبير حافظه فى قلبى من خمسه و عشرين سنه و جه الوقت إلل…){kind=link}
جميلة اوى يادكتورة 👏👌
ردحذف