اغادير الجزء الثالث

#اغادير

#الجزء_الثالث

و خرجت اشوف البنت و اجيبها لمدام ناديه ملقتهاش 

البنت ...البنت كانت هنا دلوقتى 

سألت المساعده مشفتيش بنت لابسه فستان احمر كانت بتتمرجح هنا على المرجيحه 

المساعده قالت لا مشفتش اى بنت هنا 

ازاى الكلام ده ؟؟؟ امال راحت فين ؟؟؟ و امها لو جت دلوقتى هقولها ايه ؟؟

و بعدين يا ميس صفيه انتى كدا عملتيلنا مشكله كبيره 

و الله انا مكنش قصدى يا مدام ناديه

استنينا كتير و مفيش حد جه و لا سأل ...بقيت ادعى ربنا أن الأم تكون جت و اخدت بنتها 

و فات اليوم و روحت و انا ملاحظه ان مدام ناديه كانت متضايقه منى و بتعاملنى بطريقه مش حلوه

قررت ساعتها انى مرجعش للحضانه دى مره تانيه انا مش ناقصه تحمل مسؤليه 

اليوم عدى عادى بس كنت متضايقه و حاجه خنقانى معرفش هى ايه

لما ادهم رجع بالليل حكيت له اللى حصل و قلت له انى مش هروح الحضانه تانى 

ادهم قعد يقنعنى أن محصلش حاجه لكل ده بس انا كنت اخدت القرار خلاص 

فى الليله دى نمت و حلمت انى ماشيه فى موكب زحمة اوي في شارعنا مع ناس اشكالها غريبة ومخيفة ... مش بشر أبدا ..احداث كتير اوى فى الحلم و رحلة طويله كانت بتعذب روحى لدرجة انى مكنتش قادره اصحى من النوم.....

 لما صحيت من النوم كنت مرعوبة ومرهقة جدا و زى ما يكون كنت فى عالم تانى فعلا 

 ‏قمت بحط ايدى على حمزه ابنى لقيته سخن جدا ...يا خبر هعمل ايه دلوقتى انا معرفش اى حد هنا و الصيدليه بعيده جدا عنى هسيب حمزه فين ؟؟ 

 ‏اتصلت على ادهم و قلت له قالى أنه فى شغل بره المزرعه و مش موجود حاليا و انى اتصرف اعمل للولد كمادات لحد ما يجى بالليل يوديه للدكتور

 ‏قمت بسرعه اعمل كمادات لحمزه بس الحراره منزلتش برده .  

 الحراره بقت تزيد الولد بقا وشه احمر زى الدم و انا مش عارفه اتصرف 

 ‏نزلت جرى اشوف حد من جيرانى يمكن يكون عنده خافض للحراره 

 ‏خبطت على الست اللى فى الدور التانى بس للاسف ملقتهاش 

 ‏خبطت على الشقه التانيه طلعت لى ست عجوزه لطيفه عايشه هى و جوزها لوحدهم 

انا اسفه جدا للازعاج.... ‏لو سمحتى حضرتك انا جارتكم اللى فوق و ابنى سخن اوى و تعبان و معنديش اى حاجه اديهاله ..مفيش عند حضرتك خافض للحراره ؟؟

لا و الله يا بنتى ...زى ما انتى شايفه احنا ناس كبار فى السن و معندناش اطفال 

متشكره اوى يا حاجه 

و طلعت على السلم و انا بقول فى نفسي طب كنتى خليتى معاها حمزه على بال ما تروحى تجبيله الدوا

بس رجعت قلت لنفسي طب و انا اعرفها منين ؟؟ ما يمكن تخطف ابنى و معرفلهاش طريق ...لا انا اصبر و اعمل كمادات و خلاص 

طلعت شقتى و لسه بفتح الباب عشان ادخل لقيت باب الشقه اللى قدامى بيتفتح 

ايه دا ؟؟ هى الشقه سكنت ؟؟؟ بس غريبه انا مسمعتش اى عفش أو اى حد طالع أو نازل منها 

ببص لقيتها ....ايوه هى ....الست دى حكايتها ايه معايا ؟؟؟ 

الست طلعت و ابتسمت لى نفس الابتسامه المخيفه اللى خلت جسمى يقشعر وقالت لى 

انا جارتكم الجديده أسمى نجوى و دى بنتى لارا 

حضرتك اللى جيتى لى فى الحضانه امبارح ؟؟

ايوا ...معلش انا اسفه كنت مستعجله و جيت اخدت لارا و مشيت على طول لأن كان فى ميعاد مع السمسار اللى جاب لى الشقه دى 

ااه ...دا انا خفت ...اصل البنت اختفت و مكنتش عارفه راحت فين 

معلش انا اسفه انى قلقتك 

و لا يهمك ...طب ملقيش عندك خافض للحراره ابنى تعبان اوى و مش عارفه اتصرف 

ايوه موجود يا حبيبتى اتفضلى اجيبهولك 

دخلت شقتها لقيتها مفروشه مفيهاش حته فاضيه و السجاد فى كل مكان و كل شي مترتب 

طب امتى نقلت العفش ده كله و امتى رتبته ؟ دا انا قعدت اسبوع على ما رتبت حاجتى ؟؟؟ و بعدين انا ازاى مسمعتهاش و هى بتطلع العفش ده كله 

نجوى بصت لى و انا مستغربه و ضحكت ضحكه لئيمه كدا و لقيتها بتقولى 

اظن انتى بتقولى فى نفسك ازاى من امبارح فرشت و نقلت العفش دا كله ؟ صح ؟

الصراحه صح ؟؟ انا مسمعتكيش و انتى بتنقلى اى حاجه 

يا حبيبتى عشان انا واخده الشقه دى مفروشه ...صحابها بياجروها مفروش انا بس جيت بشنطة هدومى انا و بنتى 

اااه ...انا اسفه

لا و لا يهمك الدوا اهو و الف سلامه على حمزه 

الله يسلمك 

دخلت جرى على شقتى و اديت لحمزه الدوا ....اقسم لكم أن بمجرد نزول الدوا فى جوف ابنى حرارته رجعت طبيعيه زى ما كان 

معقول فى دوا يشتغل بالسرعه دى ؟؟؟

الله ...هى عرفت اسم ابنى منين ؟؟ انا مذكرتش لها اسمه نهائى 

استغفر الله العظيم يا ربى يمكن قلت لها و مخدتش بالى 

حمزه قام يلعب و رجع كويس جدا 

ادهم جه بدرى من الشغل علشان نروح للدكتور بس لقى حمزه بيلعب و انا قلت له جارتنا اللى قدامنا اديته دوا و بقى كويس 

بس لازم نروح نطمن برده يا صفيه ..يمكن الدوا ده مسكن و الولد يرجع يسخن تانى قومى يلا بينا نروح للدكتور 

هنزل اوقف تاكسى على ما تلبسي و تلبسي حمزه 

نزل ادهم و لبست و لسه خارجه من الشقه لقيتها واقفه قدام باب شقتها 

حمزه عامل ايه دلوقتى يا ام حمزه ؟؟

هو الحمد لله بشكرك اوى على الدوا ...بس أبوه هياخده يطمن عليه ليكون عنده التهاب فى الحلق و الا حاجه ؟

لا متخافيش مفيهوش اى حاجه ...الاحسن تقوليله يرجع ...الولد زى الفل 

بصيت لها كدا و معرفتش ارد ...هو انتى ايه اللى عرفك ؟ و بعدين انتى مالك اصلا 

نزلت و رحنا للدكتور انا و ادهم 

الدكتور كشف على حمزه و قال حمزه زى الفل مفيهوش اى حاجه 

ازاى يا دكتور ؟ دا كان سخن جدا الصبح ؟

لا ابدا الولد كويس اوى و معندوش اى التهابات فى زوره و لا اى حاجه 

نزلنا من عند الدكتور ...ادهم بص لى و قالى 

عاجبك كدا ؟؟ دايما انتى كدا يا صفيه تكبرى المواضيع ...تلاقى الولد كان دافى شويه و جايه تقوليلى الواد مولع 

و الله يا ادهم كان سخن جدا 

خلاص خلاص اسكتى 

و رجعنا طول الطريق ساكتين و انا بفكر فى جارتى الغريبه دى و الكلام اللى قالته يا ترى دى صدفه و الا هى فعلا كانت عارفه حاجه ؟؟؟؟

يتبع....

 ‏#دجيهان_عادل

#قصص_وحكايات_د_جيهان_عادل.

فضلا غير مسموح نقل أو نسخ القصه إلا بعد اذن الكاتب ...



كلمات مفتاحية : رعب,قصص رعب,افلام الرعب