عنبر خمسه الجزء السابع عشر

#عنبر_خمسه

#الجزء_السابع_عشر

انت اقعد هنا قدام العماره اكيد هيفكر يرجع ياخد عربيته على الأقل ...و لو جه انت عارف هتعمل ايه كويس 

 طبعا هى دى اول مره ؟؟؟ .....أمر جنابك 

و مشى الدكتور و اعتدال معاه و فضل شعبان قاعد يراقب و عنيه زى الصقر ...لو نزلت هيشوفنى اكيد ..

لازم الاقى ساره و الاقى المذكرات هو ده طريقى للنجاه 😔

فضلت منتظر أن شعبان يمشي لكنه قعد فى مدخل العماره و شكله كدا هيبات ...طب و بعدين اعمل ايه دلوقتى ؟؟ انا عاوز أنزل عشان اروح القسم و احكيلهم على كل اللى حصل و الحمد لله انى سجلت بموبايلى كل حاجه اول ما شفتهم طالعين ...انا عارف إن التسجيل من غير اذن النيابه مبينفعش و انها بتعتبر مجرد قرينه بس اهو ممكن وكيل النيابه يواجههم بيه و يخليهم يعترفوا 

بس لازم الاقى ساره الاول منا مينفعش اروح للشرطه من غير ساره 

اكيد هتتصل بيا تقولى مكانها ...هو تليفونى فين ؟؟

يا خبر التليفون وقع منى 😳 

كدا مش هعرف اكلم ساره و لا اعرف مكانها 

و يا ترى وقع فين ؟؟ قبل ما اهرب و الا فى الشارع ؟؟

يا خبر لو وقع فى ايدين المجرمين دول ؟؟ هتبقى كارثه 

مفيش اى دليل على اتهامى ليهم و لا حتى ساره موجوده تأيد كلامى 

يا الله ...هعمل ايه دلوقتى ؟؟ 

انا قدامى اكتر من مشكله عاوزه تتحل 

اول مشكله التور اللى مستنينى تحت ده 

المشكله التانيه التليفون و اللى عليه و النمره اللى اديتها لساره 

تالت مشكله انى لازم اثبت لساره أن اعتدال مش امها علشان ترضى تساعدنى ندور على المذكرات و نكشفها قدام الشرطه 

قعدت طول الليل افكر و أراقب الزفت شعبان و هو قاعد و الغريب أن عينه مغمضتش لحظه و لا ركن على الحيطه زى ما يكون واخد حاجه مخلياه مصحصح 

الصبح شقشق و ابتدت حركة الناس ترجع للشارع و لقيت العمال اللى بيشتغلوا فى العماره ابتدوا يتجمعوا تحت العماره 

يا خبر الناس دى لو شفتنى جوه العماره مش بعيد يقولوا عليا حرامى و جاى أسرق حاجه من العماره 

طب اتصرف ازاى ؟؟

و جت لى الفكره اللى هخلص بيها من ده كله و شجعنى عليها لما لقيت واحد عامل سايب هدومه فى كرتونه على جنب 

الهدوم كانت عباره عن كالسون و صديري و طاقيه قماش كبيره و قميص قديم اوى 

قلعت هدومى بسرعه و لبست لبس العامل و حطيت الطاقيه على دماغى غطت نص وشي و نزلت جرى من على سلم العماره 

طبعا العمال مخدوش بالهم و افتكرونى عامل معاهم 

و شعبان هو كمان مخدش باله و مشيت بسرعه على اول الطريق وقفت تاكسي و رحت شقتى غيرت هدومى و نزلت على السجل المدنى 

عملت شهادة ميلاد لساره بالكمبيوتر و لقيت فعلا اسم الام مختلف 

اسم الام صفاء محمد ابراهيم 

حلو اوى ...توقعى طلع فى محله ...بس لازم الاقى تليفونى اللى ساره هتكلمنى عليه ؟؟؟ الاقيه ازاى ؟؟ انا لا يمكن اروح ناحية الشقه دى مره تانيه 

الحل انى الاقى ساره و لما نلاقى المذكرات اللى بخط سامر هى دى اللى هتظهر كل حاجه 

بعد كدا رحت أجرت اوضه فى فندق لانى كنت خايف عبداللطيف يبعت لى حد يقتلنى فى شقتى 

و انتظرت يومين والتالت ...بقيت اقول اكيد لقوها ...امال هتكون راحت فين ؟

انا ازاى مدتهاش فلوس مع نمرة التليفون ...يا ترى رحتى فين يا ساره ؟؟

فات اسبوع و كنت خلاص فقدت الأمل و مش عارف هتصرف ازاى ؟ لا انا قادر ارجع شغلى و لا بيتى و لا حياتى العاديه و لا أعرف اعتدال و عبداللطيف بيدبرولى ايه دلوقتى ؟؟؟

و فجأه و انا قاعد جت لى فكره انا اروح شركة الاتصالات و اطلع شريحه تانيه بنفس رقمى علشان لما ساره تتصل بيا تلاقينى 

و فعلا عملت كدا و اخدت الشريحه حطيتها فى موبيل تانى و مكنش قدامى الا الانتظار 

رحت الفندق و يدوب لسه بقعد لقيت تليفونى بيرن برقم غريب 

اخدته بسرعه و رديت 

الو 

الو ...هو انت فاكر انك هتقدر تهرب مننا ؟؟ كان غيرك اشطر يا شاطر ...رجع البت يمكن نتفاوض معاك و نسيبك تمشي 

و اتقفلت السكه 

طبعا المكالمه رعبتنى بس اتطمنت منها أنهم ملقيوش ساره لسه 

مرت ساعتين و لقيت التليفون بيرن مره تانيه .

مكنتش عاوز ارد بس خفت لتكون ساره 

فتحت السكه من غير ما اقول حاجه 

لقيت صوت بنت بتقول 

الوووو

الو ...مين حضرتك 

انا تريزا حضرتك دكتور احمد ؟؟

ايوا انا 

ساره موجوده معانا و عاوزه تكلمك 

ساره ؟؟ هي فين ؟؟ اديهالى اكلمها من فضلك 

و اخدت ساره التليفون و كلمتنى 

الو 

ازيك يا ساره 

الحمد لله

انتى فين ؟؟ و رحتى فين بعد ما هربتى ؟؟

انا مع الاخت تريزا فى الكنيسه , بعد ما هربت اكتشفت انى ممعييش فلوس ....فضلت أجرى أجرى مش عارفه رايحه لفين لحد ما تعبت من كتر الجرى ووقعت على الأرض جت واحده طبطبت عليا و قومتنى و سندتنى و دخلتنى الكنيسه 

و فضلت كام يوم معاهم بيعالجونى لانى كنت فى حاله وحشه اوى و بقوا  يقدمولى الاكل من غير ما حتى يسألونى انا مين و لا ايه اللى حصلى 

بعد كام يوم تعافيت شويه و قمت ادور على النمره اللى كنت مديهالى 

دورت حواليا ملقتهاش قعدت اعيط 

دخلت الاخت تريزا و قعدت جنبى مسحت دموعى و سالتنى بتعيطى ليه ؟؟

قولت لها كان معايا ورقه و ضاعت منى 

ابتسمت اختى و قالت لى متخافيش الورقه فى الدرج ده 

و فتحت الدرج خرجت لى الورقه اخدتها و كنت فى منتهى السعاده و طلبت منها انى اتصل بيك 

بس كل ما كنا نتصل نلاقى تليفونك مقفول 

و اخيرا انهارده اتفتح 

معلش يا ساره موبيلى وقع منى و لسه انهارده مرجع الخط ... قوليلى العنوان بالتفصيل اجى اخدك 

انا معرفش العنوان ...خد معاك الاخت تريزا هتقولك عليه .

يتبع

#قصص_وحكايات_د_جيهان_عادل.

فضلا غير مسموح نقل أو نسخ القصه إلا بعد اذن الكاتب ...