عنبر خمسه الجزء الخامس عشر

#عنبر_خمسه

#الجزء_الخامس_عشر

لحد ما فى ليله قمت على الم شديد ... حسيت أن بطنى بتتقطع و لقيت الدم مغرق السرير اللى كنت نايمه عليه

سامر اخدنى المستشفى بسرعه كشفوا عليا و لقيت الدكتور بيقول للمرضه

حاله اجهاض و نزيف جهزى اوضة العمليات بسرعه 😔

طبعا بعد موضوع الإجهاض ده نفسيتى تعبت جدا و كنت حاسه ان فى حاجه غلط 

دخلت فى دور اكتئاب رهيييب و اتحجزت فى مصحة الدكتور عبداللطيف اسبوعين 

بعد كدا حالتى ساءت اكتر و بقيت افوق الاقى العلامات اللى انت شايفها على جسمى دى و كانوا بيقولولى انى بدخل فى نوبات و بأذى نفسي 

لفتره صدقت كلامهم و قلت انى خلاص اتجننت 

و ليه صدقتى كلامهم ؟؟

لما الاقى جوزى و امى مجتمعين على نفس الكلام و بيقولوا انى عملت دا كله مش معقول هكدبهم.

طب ووالدك ؟؟؟

انا كنت فى حاله نفسيه وحشه اوى شفت بابا مرتين و بعدها مبقاش يجيلى و للاسف كنت دايما مش فايقه و مش مركزه انى اسال عليه ...عرفت بعد كدا انه مات فجأه و دا زود حالتى اكتر و بقيت بالفعل أكثر عدوانية و بقيت اكسر اى حاجه قدامى 

ماما لما شافت حالتى بتدهور كدا جت و قعدت معايا و كانت ملازمانى و بتدينى الدوا بأيدها 

و كانوا دايما ينبهوا عليا انى لازم اخد الدوا بانتظام علشان مأذيش نفسي لدرجة الانتحار

بس انا كنت زهقت اوى من حياتى و قررت انى ماخدش الدوا مره تانيه

كنت اعمل نفسي اخدت الدوا و ارميه 

الغريبه بقا انى ابتديت افوق و ارجع لحالتى الطبيعيه و بقيت اسمع همس غير مفهوم لوالدتى و سامر كتير..

شكيت ان العلاقه ما بينهم تكون رجعت مره تانيه بس ازاى ؟؟

ازاى ام تشوف بنتها بين الحياه و الموت و تعمل كدا ؟؟

اكيد انا بيتهيألى ...أو اكيد انا غلطانه 

و فى يوم قمت من النوم و كانت الساعه حوالى اتنين صباحا 

بصيت على سرير ماما اللى كان جنب سريري ملقتهاش نايمه فيه ...الشك ملى قلبى و رحت على اوضه سامر على طراطيف صوابعى 

سمعت سامر بيكلم ماما عن فلوس و انها خلاص كوشت على كل حاجه بموت جوزها 

سمعت ماما بتقوله انت مش هتطلقها و الا ايه ؟؟

اطلقها دا ايه ؟؟ انتى عاوزه تاخدى كل حاجه و انا اطلع من المولد بلا حمص ...بقا مراتى ابوها يكتب لها كل أملاكه و اروح انا زى الاهبل اطلقها ؟؟؟

انا مش عارفه ايه اللى خلاه يعمل كدا ؟؟ ...منه لله مطرح ما راح 

يا سلام على البراءه اللى يسمعك كدا يقول مظلومه...اش حال أن انتى اللى مموتاه بايديكى الحلوين دول 

يستاهل فضل بنته عليا و مكتبش ليا اى حاجه .

و ادينا خلصنا منه و فلوسه بقت تحت ايدى 

قصدك تحت ايدنا 

لا يا حلوه ملكيش فيه ...الفلوس فلوس مراتى و انا اللى هبقى وصى عليها بحكم انها مختله عقليا 

انت اتجننت ؟؟؟ يعنى انا اعمل اللى عملته و انت تاخد على الجاهز ؟؟ لاااااا دا انت متعرفش انا ممكن اعمل فيك ايه ؟

هتعملى ايه يعنى ؟ هتموتينى ؟؟؟

ليه لأ ؟؟

متقدريش انا مش احمد العبيط ...انا مسجل اعترافك ليا لما قتلتى جوزك و كاتب ذكرياتنا سوا فى مذكرات و عاينها فى مكان و لا الجن الازرق يعرف طريقه ...و لو حصلى حاجه التسجيل و المذكرات دى اكيد هتظهر و ساعتها هتروحى فى ستين داهيه 

انا سمعت كل ده و مصدقتش ودانى ... امى قتلت ابويا ؟؟؟ 

فتحت الأوضه عليهم علشان اعرفهم انى سمعت كل حاجه ...بصيت لهم كدا و انا مش مصدقه 

ماما قامت من جنبه و لسه جايه عليا لقيت الدنيا اسودت فى عينى و اغمى عليا 

لما فقت لقيت سامر متقطع جنبى و لقيت أحشائه ملفوفه على اديا و دهبى مرمى فى اوضة نومى و حتت لحم فى كل مكان 

جالى هلع شديد و بقيت اصرخ زى المجنونه لحد ما الجيران قعدوا يخبطوا و فتحت لهم 

بدأوا يصرخوا فى وشى و فى دقايق لقيت الشرطه جت و الكل بيقول انى قتلت سامر 

طب ليه مقلتيش الحقيقه ؟؟ ليه مقلتيش الكلام اللى قلتيه ليا دلوقتى ؟

محدش كان هيصدقنى ...و بعدين انا مكنتش عاوزه اتهم ماما انها قتلته دى مهما كان امى 

بس دى قتلت ابوكى ؟؟؟؟!!!

بس معدش ليا غيرها و مكنتش عاوزه أفقدها هى كمان 

بس الحكايه كدا ناقصه يا ساره ....ليه والدك كتب لك كل حاجه و مكتبش لوالدتك اى حاجه ؟؟ 

معرفش معنديش اجابه على السؤال ده 

طيب معلش عاوز أسألك عن حاجه بس مش عاوزك تضايقى 

اتفضل 

مين اللى كان بيغتصبك و عمل كدا كام مره ؟

معرفش ...كان دايما مغطى وشه و ريحة أنفاسه كريهه ...و اتكرر الموضوع ده كتير جدا لدرجه انى كنت بتمنى الموت و مش لاقياه 

ياااا حكايتك صعبه اوى يا ساره ...كفايه عليكى كدا انهارده .

انهيت الجلسه و قعدت اكتب ملاحظاتى واديت لساره مهدئ لأنها بان عليها التأثر الشديد لما افتكرت الحكايه 

تانى يوم كان لازم اروح المستشفى و اتعامل عادى جدا علشان محدش يشك فيا

اول ما وصلت المستشفى لقيت المدير سايب لى خبر على الباب انى اروح له 

رحت و سألنى عن ساره و انا أنكرت تماما معرفتى بمكانها 

دكتور عبداللطيف قال لازم تقول الكلام ده فى محضر رسمى 

و ليه ؟ هو انا متهم ؟؟

لا دا شئ عادى ...كل الناس اتحقق معاهم 

و فعلا تم التحقيق و أنكرت انى اعرف حاجه عن ساره و انى سبت الحاله من اكتر من اسبوع .

خلصت شغلى و كنت مستعجل انى اروح لساره 

رحت لساره و كلامها كله فى دماغى ..بس اكتر كلمه كانت بترن فى دماغى حكايه المذكرات و اعتراف ام ساره بجريمه القتل اللى ارتكبتها 

ساره انا عاوزك تركزى معايا ...سامر ممكن يكون مخبى المذكرات اللى قلتيلى عليها فين ؟؟ 

مش عارفه يا دكتور ..بس اكيد فى البيت 

احنا لازم نوصل للمذكرات دى ... المذكرات دى هى اللى هتخرجك براءه من القضيه 

و احبس امى ؟؟ لا يا دكتور ..انا افضل اكون مجنونه و لا امى تتحبس يوم واحد 

بطلى مثاليه يا ساره انتى مش كنتى بتحبى بابا 

طبعا كنت بحبه ..بس مقدرش 

تعالى يا ساره نقف فى الهوا شويه 

و خرجت انا و ساره فى البلكونه و كانت الساعه تقريبا ١٢ بالليل و قعدت اقنع فيها انها لازم تقول على كل حاجه 

سمعت صوت عربيه وقفت قدام العماره و لقيت د.عبداللطيف ووالدة ساره و شعبان نازلين منها 

ادخلى بسرعه يا ساره ....دول عرفوا مكانا 

هنعمل ايه دلوقتى ؟؟

خدى يا ساره دا رقم تليفونى ...انا عاوزك تهربى ...اطلعى على السلالم و اول ما يدخلوا عندى انزلى أجرى بكل قوتك و بعد كدا هنوصل لبعض بالتليفون 

حاااضر 

و فى ثانيه كانت ساره طلعت الدور الخامس و لقيت الباب بيخبط 

فتحت لقيت التلاته قدام عينى 

بصيت لشعبان كدا ...وطى رأسه فى الارض 

الله دا حضرتك خفيتى و بقيتى تمشي اهو 

فين ساره يا دكتور ؟؟؟؟

ساره ؟؟ ساره مين ؟؟؟؟

#دجيهان_عادل

يتبع

#قصص_وحكايات_د_جيهان_عادل.

فضلا غير مسموح نقل أو نسخ القصه إلا بعد اذن الكاتب ...