#اليتيم( كامله )🌹
الجزء الاول
انا اسامه جيت انهارده علشان احكيلكم حكايتى
انا دلوقتى عندى ٢٧ سنه عايش مع والدتى بس مشفتش والدى هو مات قبل ما اتولد
يعنى عمرة ما شفته و لا حتى اعرف شكله ، لما كنت أسأل والدتى على صوره له كانت دايما تقولى أن ممعهاش حاجه من صوره و انها اتجوزته فتره قليله اوى و حتى صور الفرح ضاعت و متعرفش راحت فين
كنت دائما حاسس باليتم خاصة أن والدتى كانت على اد حالها
اما كنت اسالها عن أى قرايب لينا كانت تقول إن إحنا مقطوعين من شجره
احنا كنا ساكتين فى اوضه من الخشب فوق السطوح كانت فى الشتاء بتنزل علينا ميه من جميع الجهات كانت امى تحط الطباق البلاستيك بتاعه الغسيل و الحلل على السرير علشان ميغرقش ميه و كانت دائما تفشل محاولاتها المستمرة فى تغطيه سقف الاوضه بمشمع علشان مينزلش ميه علينا
امى كانت بتشتغل فى البيوت و كانت دائما ترجع البيت معاها اكل كنت فى الاول اكل و ابقى مبسوط لكن لما كبرت شويه و فهمت الأكل دا جاى ازاى كنت تضايق اوى و مرضاش اكل و أفضل انى اكل لقمه بملح أو بحته جبنه على انى اكل من الأكل دا
امى كانت تعيط و تقعد تتحايل على لكن أنا مكنتش ارضى ابدا و كنت اصمم على رايى
امى كانت ساعات تجيب لى جزم قديمه و هدوم قديمه و كنت بلبسها و انا متضرر لغايه ما فى يوم سامح زميلى فى المدرسه شاور على الجزمه اللى لابسها و قال دى جزمتى و بالإمارة محروقه من الجنب
بصيت للجزمه لقيتها فعلا محروقه من الجنب و صحابه قعدوا يضحكوا على
رحت قالع الجزمه و رمتها فى وشه و العيال قعدت تضحك عليه ، هو بقا اتغاظ جدا و بدأ يهجم على علشان يضربني
بقيت اضرب فيه كانى بطلع عليه قهر السنين لدرجه انى خليت وشه كله دم
يومها طبعا عملولى استدعاء لولى الامر و روحت لانى حافى و هدومى مقطعه
طبعا امى اول ما شافت منظرى اتخضت جدا و سالتني
ايه الى حصل يا اسامه ؟؟
مفيش يا اما عيل كدا ضايقنى ضربته و المدير عايزك بكرا فى المدرسه
ضايقك ازاى يا ابنى و فين جزمتك ؟
بصيت لها و قلتلها جزمتى ؟؟؟؟ لا دى مش جزمتى يا اما و انا معنتش هلبس شحاته تانى حتى لو مش هروح المدرسه
انت بتقول ايه يا ابنى اوعى تنطق الكلمه دى على لسانك تانى انا كل مرمتطى دى فى بيوت الناس و بهدلتى عشان خاطرك انت و عشان تبقى متعلم و تاخد اعلى شهاده اوعى اوعى اسمع منك الكلام ده
و اذا كان على الجزمه هنزل انهارده اشتري لك كاوتش من العتبه و لا تزعل نفسك
قوم يلى اتغدا و اقعد اكتب واجباتك و بكرا بقا اروح للمدير اشوف انت هببت ايه فى الواد 😟😞
عايزين تعرفوا امى عملت ايه لما راحت للمدير استنونى فى الجزء التانى 🤗🤗
يتبع .....☺️
اليتيم
الجزء التانى
تانى يوم رحت انا ووالدتى المدرسه و دخلنا على المدير
اول ما شافنى مع امى قعد يزعق لها و يقولها ابنك مش متربى ابنك بتاع مشاكل ابنك مش متفاعل مع المدرسين
و بعدين انتى مدفعتيش المصاريف ليه ؟
والدتى قالت له معلش يا استاذ هندفع بس هل ممكن نقسطها ؟
قال لا مفيش الكلام ده انتى تاخدى ملف ابنك معاكى و تمشوا من المدرسه دى انا مش ناقصكوا
و لقيت امى عماله تتحايل عليه و هو بيكلمها بمنتهى قلة الذوق 😔
امى خرجت من عنده و شفت دمعه محبوسه فى عينها و لقيتها بتطبطب على كتفى و تقولى روح يا اسامه على فصلك و بطل تعملى مشاكل يا ابنى و خد بالك من مستقبلك
هزيت راسي و مشيت و قعدت ابص على امى و هى ماشيه و لقيتها ماشيه مكسوره اوى
قررت بينى و بين نفسي ان لازم اغير الوضع دا
صحيح انا فى سته ابتدائي بس لازم ارحم امى من كسرتها اللى شفتها فى عينها
اول ما خرجت من المدرسه رحت لفيت على ورش لما رجليا ورمت لغايه ما رحت لواحد نجار شكله راجل طيب فى الاربعينات و وشه سمح كدا
سلام عليكم يا حاج
عليكم السلام يا ابنى
مافيش عندك شغل لى ؟
شغل ليك انت ؟ بس انت شايل شنطه مدرسه يعنى بتدرس
ايوا يا عمى انا فى سته ابتدائى بس عايز اشتغل علشان اصرف على نفسي و على امى
الراجل أتأثر اوى و سالنى فين ابوك ؟
قلت له أنا يتيم و مشفتش ابويا ووالدتى بتشتغل علشان تصرف على و انا عاوز اساعدها
الراجل طبطب على كتفى و قالى طب و دراستك ؟
قلت هشتغل عندك نص يوم هجيلك بدرى قبل المدرسه افتح و اكنس الورشه و ارش ميه و اخد كتبى و امشي
و هطلع من المدرسه عليك اقف طول النهار لغاية ما الورشه تقفل
بس يا ابنى دا مجهود جامد عليك و امتى هتذاكر ؟
هذاكر فى اى وقت هفضى فيه أو لما ارجع البيت
ماشي يا ابنى انا موافق انت باين عليك واد جدع و انا بحب العيال الجدعان اللى زيك
و انا هراعى برده حكايه مدرستك دى و مش هسبب لك اى ضرر فيها أن شاء الله
يلا ورينى شطارتك بقا يا اسامه
فرحت اوى و قمت كنست الورشه وضبطها و بقيت اروح اجيب له طلبات
و لما المغرب ادن عم طارق قالى انا مش هتقل عليك انهارده و هسيبك تروح بدرى لامك
قلت له ياريت دى زمانها قلقت على اوى
قال ليه يا ابنى هو انت مقلتش لها انك نازل شغل ؟
قلت له صراحه لأ لانها مكنتش هتوافق
ليه كدا يا ابنى دى زمانها قلقانه عليك اوى 😦 طب يلا روح جرى بس استنى انت عايز اديك اجرتك باليوم و الا بالاسبوع
قلت له ياريت باليوم
قام مطلع عشره جنيه و ادهالى أخدتها و فرحت اوى
و و انا ماشي جبت سندوتشين كفته و بسبوسه لامى
اول ما امى شافتنى قعدت تعيط و خدتنى فى حضنها و قالت كنت فين يا ابنى
قلبى انقطع من التدوير عليك انا قلت انى مش هشوفك تانى
لا يا اما متخافيش انا روحت اشتغلت عند راجل طيب اوى
اشتغلت ازاى طب و مدرستك؟
متخفيش يا اما اوعدك أن الشغل مش هياثر على دراستى
و خدى انا جبت لك سندوتشين كفته و بسبوسه اهو كلى و حلى و من هنا ورايح مش هخليكى عاوزه حاجه خالص
امى فرحت بى اوى و قعدت تدعيلى و انا كنت مبسوط بنفسي
قعدت كتبت واجبى و خلصت مذاكرتى
و لاول مره فى حياتى انام مرتاح كدا بالرغم انى كنت تعبان جسمانيا بس حسيت لاول مره انى راجل و مش هخلى امى تمد أيدها لحد تانى 😊
عايزين تعرفوا عملت ايه بعد كدا استنونى فى الجزء التالت
يتبع ........😊 gg
اليتيم
الجزء التالت
كل يوم بقيت اروح الورشه الصبح قبل مدرستى افتحها و اكنسها و اخد بعضى و اروح المدرسه و بقيت احس ان نفسيتى هديت خالص و بقيت محسش انى قليل زى زمان بالعكس بقيت احس انى افضل منهم لانى بكسب لقمتى بعرق جبينى
مرت الايام و اخدت الاعداديه و اتعلمت النجاره و كنت بساعد عم طارق فى كل حاجه و هو حبنى اوى و اعتبرنى زى ابنه بالظبط خاصة أنه معندوش ولاد
لما خدت الاعداديه كنت جايب مجموع كبير يدخلنى ثانويه عامه بس انا مرضتش علشان متقلش على امى و كمان حبيت النجاره اوى
امى قعدت تتحايل على أنها تدخلنى ثانوى بس قلت لها يا امى لا يكلف الله نفسا إلا وسعها و انا عارف امكانياتى
الثانوى هيحتاج مذاكره و دروس و انا مش هينفع اسيب شغلى اللى باكل منه عيش و بعدين بقا انا راسم طريقى كويس متخافيش على
و فعلا دخلت صنايع قسم نجاره و طبعا كان عندى خبره جامده افضل من زمايلى و كان المدرسين بيحبونى اوى و بيعتمدوا على فى عمل حاجات كتير كانت بتتقدم فى المعارض و تدخل مسابقات
و انا اصلا كان عندى لمسه فنيه فى تصميم القطع و دائما كان عم طارق يقولى انت فنان يا ابنى ياريتك دخلت فنون جميله
كنت اضحك أقوله دا فن بالفطره يا عمى😄
و كنت مهتم اوى بالتصاميم الحديثه و كنت ادخل على الانترنت بعد ما اخلص شغلى و اشوف الجديد
و كانت سعادتى بتزيد كل ما اقدر أشكل حته خشب و اعمل منها حاجه مفيده
ووصلت انى صممت و نفذت اول اوضه نوم فى حياتى لما كنت فى تالته ثانوى
و اد ايه كانت تحفة فنيه كل اللى كان يشوفها ينبهر بجمالها
و من ساعتها عم طارق ساب لى الورشه و إدارتها و انا كنت جدير بثقته دى
و فى يوم و انا قاعد فى الورشه بدور فى النت عن مكن و الات نجاره لقيت مكن صينى بيعمل حاجات تحفه
قلت لعم طارق ايه رايك نستورد المكن دا
قالى يا ابنى بس المكن دا غالى اوى
قلت له و ماله هى هتجيب تمنها فى سنتين
بس يا ابنى دى مجازفه كبيره
متخافش يا عمى الموضوع دا مربح جدا غير أن المكن دا هيخلينا نطلع تحف فنيه مش اى حد يقدر يعملها و دا هيميزنا عن أى حد موجود فى السوق
و فعلا عم طارق اقتنع بكلامى و بدأنا نشوف إجراءات استيراد الآلات دى
رحنا البنك و عملنا حساب بالدولار و انا راسلت الشركه عن طريق موقع اسمه علاء الدين 👌
و طبعا الموضوع مشي بالبطاقه الضريبيه للورشه و حولنا الفلوس للشركه و خلال شهر كان المكن عندنا 👌👌
ابتديت استعين بزمايلى فى المدرسه و اشغلهم معايا
و بقينا ننتج اوض نوم اللى يشوفها كان يقول دى اكيد مستورده من ايطاليا
لغايه ما فتحنا معرض كبير و عملت صفحه على الانترنت اعرض عليها شغلنا
و كمان عملت اعلانات فى التلفزيون
و بدأنا نعمل فروع للمعرض فى عدة محافظات
و الشغل زاد ووسع جدا
و فى يوم لقيت عم طارق جايب ورق و بيدهولولى
سالته ايه دا يا عم طارق
قالى دا عقد شراكه بينى و بينك يا اسامه انا كتبت لك نص المعارض كلها و الورشه😲😲
اندهشت جدا و قلت له ليه كدا يا عم طارق انت خيرك على و انا بشتغل معاك لانى فعلا بعتبرك ابويا
قال و عشان كدا يا ابنى انا كمان بعتبرك ابنى انت السبب فى الخير اللى انا فيه دا كله انت وش السعد على
ربنا يديم المعروف يا عمى
لما روحت بيتى حكيت لامى على اللى عمله عم طارق معايا و امى مكنش سايعها الفرحه و لا انا كمان
قعدت تزغرط
و انا بقا قلت لها اؤمرينى يا ست الكل اى حاجه اجيبهالك او اى حاجه اعملها لك حتى لو عايزه نجمة من السما
امى ضحكت و قالت نجمة مره واحده لا يا سيدى مش عاوزه اى نجوم انا بس عايزاك متهنى و فرحان و نفسي افرح بيك و اشيل ولادك
ياااا يا ماما دا لسه بدرى
انا بقا يا ستى حضرت لك مفاجاة 🤫🤫 😘
عايزين تعرفوا مفاجأة ايه 🤔🤔
و تعرفوا امى عملت ايه لما قلت لها كدا استنونى فى الجزء الرابع
يتبع ........☺️gg
اليتيم ( ٤ ؛ ٥ )
الجزء الرابع
انا بقا يا ستى حضرت لكى مفاجاه
مفاجاه ايه يا حبيبي ؟ و الله انا مش عاوزه حاجه غير انى اشوفك طيب و بخير بس
عارف يا امى بس اظن ان الدعوه لزيارة بيت الله الحرام دعوه متترفضش ؟؟
ايه انت بتقول ايه انا هزور بيت ربنا و أملس على الكعبه الشريفه ياااااا دا حلم مكنتش مصدقه فى يوم انى أوصله
ربنا يرضى عنك يا ابنى برضاه و يسبل عليك ستره يارب
امى حضرت نفسها للسفر و قبل ما تسافر قالت لى انا عاوزاك فى موضوع يا اسامه
قلت انا ورايا شغل مهم اوى يا امى عندنا تسليم طلبيه و لازم اكون واقف بنفسي معلش نخلى الكلام بالليل
ماشي يا اسامه و انا هستناك يا ابنى مش هنام
رحت سلمت الشغل و عديت على الورشه عشان الطلبيه الجايه و لفيت على معرضين و نسيت خالص أن امى كانت عاوزانى فى موضوع و كنت متخيل انها اكيد هتفاتحنى فى موضوع الجواز دا تانى و عشان كدا قلت لها أما اجى
لكن للاسف الموضوع كان أكبر من كدا بكتير 😔
دخلت البيت الساعه واحده صباحا لقيت امى نايمه و هى قاعده على الكرسي اول ما شفتها افتكرت انى قلت لها هنتكلم بالليل
دخلت جرى عليها و صحيتها من النوم
ايه يا امى اللى منيمك هنا بس ؟؟
يا ابنى انا ميعاد سفرى بكرا و كنت عاوزه اقولك على حاجه مهمه اوى
طب يا امى الموضوع ده مكنش ينتظر للصبح ؟
لا مش هينفع انت عارف انى رايحه احج و لازم استبرئ من ذنبى 😔 علشان ربنا يقبل حجى
انا ربيتك بما يرضى الله و طول عمرى مكفيه على تربيتك بس انا كدبت عليك فى حاجه واحده بس و عايزاك تسامحنى.
كدبتى على فى ايه يا امى ؟؟
كدبت لما قلت لك أن ابوك مات ابوك لسه عايش
ازاى ؟؟ انتى بتقولى ايه ؟؟ عايش فين ؟ و ليه كدبتى على كل السنين دى ؟ و ليه خلتينى أشعر باليتم و احس بالذل و انا لى اب على وش الدنيا
دا انا كنت بحسد اى ولد ماشي و ماسك ايد أبوه فى الشارع
دا انا كنت بتمنى أن ابويا ياخدنى فى حضنه زى اى طفل عادى
ليه يا امى عملتى فى كدا ؟ ليه ؟
يا ابنى انا كنت معذورة
ايه عذرك يا امى ؟ فهمينى مع أن مفيش حاجه فى الدنيا تبرر لكى حرمانى من ابويا و يتمى السنين دى كلها
انا هقولك يا ابنى على كل حاجه 😔
من ٢٥ سنه كنت عايشه فى بلد اسمها ابوكبير تبع محافظه الشرقيه و كنا ناس غلابه على ادنا
و فى يوم جه خالى يقول لامى أن ابوك طلب ايدى
و طبعا امى فرحت اوى لأن ابوك كان من أعيان البلد لكنه كان متجوز بس مراته مبتخلفش
و انا كمان فرحت اوى عشان هطلع من الفقر أخيرا .
انا طول عمرى عايشه مع امى و خالى
و كانت مرات خالى دايما تذلنا باللقمه اللى بناكلها فى بيتها و كانت بتشغلنى انا و امى خدامين عندها 😔
اتجوزت ابوك و كنت فاكره أن الحظ ابتسم لى لكن للاسف الوضع مفرقش كتير عن بيت خالى غير فى مستوى المعيشه بس
لكن الخدمه هى هى بقيت خدامه لمراته اللى مكنش بيكسر لها كلمه و هى كانت غيرتها نااار كانت بتتمنى تطيرنى من على وش الارض و مكنتش بتطيق اقعد شويه كانت تخلقلى اى شغلانه من تحت الارض
استحملت و قلت افضل ما ارجع عند مرات خالى و تذلنى بلقمتى تانى
و عشان حظى المنيل امى ماتت بعد حوالى شهر واحد من جوازى يعنى مبقليش حد فى الدنيا خالص
و فى يوم تعبت شويه و رحت للدكتوره قالت لى انتى حامل
طبعا جوزى فرح اوى و بقت الفرحه مش سايعاه و كنت فاكره أنه هيرحمنى من ظلم مراته لى و يخلينى اتهنى شويه و يدلعنى لكن للاسف كان بيعمل نفسه مش واخد باله من اللى بيحصل . كانت بتتفنن فى تعذيبى
و فى يوم كانت شايطه كعادتها و عماله تزعق قام هو واخدها فى حضنه و طبطب عليها و دخل معاها الاوضه قمت عشان ادخل انا كمان اوضتى
سمعته بيقولها:
مالك بس يا ست الكل مش احنا متفقين انك هتصبري عليها لغايه ما تولد و ناخد العيل نكتبه باسمك و أطلقها
قالت ايوه بس انا مش طايقاها و لا طايقه اشوفها
خلاص يا ستى كلها شهر واحد بس و يكون ابنك و الا بنتك بين اديكى
انا سمعت كدا و كنت هقع من طولى ازاى عايزين يعملوا فى كدا
دخلت اوضتى و قعدت اعيط و مش عارفه اتصرف ازاى
لغايه ما هدانى تفكيرى انى اخد قسيمه الزواج و اهرب
و لما اولدك ابقى اسجلك بس فى مكان بعيد
و فعلا قمت الفجر اخدت هدومى و القسيمه و نزلت بشويش لغايه ما طلعت من الدار
و ركبت و نزلت على القاهره و انا معرفش هروح فين
قعدت الف لغايه ما اولاد الحلال ساعدوني و سكنونى فى اوضه فوق السطح وولدتك و ايدتك فى الشهاده بقسيمه الجواز و عشت معاك علشان متبعدش عنى يا ضنايا
يااااااااا يا امى كل دا
سامحنى يا ابنى اللى عملته دا من حبى ليك
مسامحك يا امى مسامحك بس عايز اعرف مكان ابويا بالظبط انا لازم اروح و اشوفه .
عايزين تعرفوا انا عملت ايه بعد كدا استنونى فى الجزء الخامس
يتبع ...........☺️gg
اليتيم
الجزء الخامس و الاخير
سامحنى يا ابنى اللى عملته دا من حبى ليك
مسامحك يا امى مسامحك بس عايز اعرف مكان ابويا بالظبط انا لازم اروح و اشوفه .
طيب انا هقولك على العنوان بالظبط و روح له و خليه يسامحنى برده انا كنت صغيره و جاهله و مكنتش اعرف اتصرف غير كدا .
حاضر يا امى بعد ما تسافرى بالسلامه و اوصلك للمطار و اتطمن عليكى هروح له
تانى يوم وصلت امى و ودعتها و قررت انى اخد عربيتى و على البلد اللى امى قالت لى عليها على طول
قعدت اسال لغايه ما وصلت البلد
اول ما وصلت سالت عن اسم ابويا (السيد عبدالمقصود سعاده ) لقيت الناس كلها عارفاه ووصفولى البيت
وصلت البيت ملقتوش بيت دا فيلا كبيره مكنتش مصدق نفسي ان دا بيت ابويا و انا طول عمرى عايش فى الفقر
خبطت على الباب طلع لى راجل سالته :
الحج السيد موجود ؟
قال ايوه اتفضل أقوله مين ؟
لا هو ميعرفنيش بس قوله اسامه
دخلت و قعدت جوه الفيلا
الفيلا مكيفه تكييف مركزى السجاجيد من الغاليه و الاثاث من الغالى الصاله فيها تلات انتريهات و السلم الداخلى من الرخام كل حاجه من الغاليه الستاير و السجاجيد و كل شئ
بعد حوالى خمس دقائق لقيت راجل كبير حوالى ٦٠ سنه داخل على شعره ابيض ناعم عنيه عسليه زى عنيا مش طويل اوى لابس جلابيه غاليه و عبايه فوقها وشه مبتسم و هادى
اول ما دخل قالى سلام عليكم و سلم على
اول ما شفته كان نفسي اترمى فى حضنه
قلت له عليكم السلام يا حاج ،
اتفضل يا ابنى خير بيقولوا انك بتسأل على اؤمرنى
انا انا ...
معلش انا اسف نسيت اسالك تشرب ايه ؟
لا يا حاج انا مش عايز اشرب حاجه انا كنت عايزك فى موضوع مهم
ماشي يا ابنى بس تشرب برده و نادى على واحده شغاله عنده و طلب منها تعملنا قهوه
و بص لى و قال
اتفضل يا ابنى انا تحت امرك
قلت له انا جاى اسالك عن واحده كنت اتجوزتها زمان اسمها زينب ؟؟
اه ايوه زينب ايوه مالها
كنت عايز اعرف هى خلفت منك ؟؟
و الله يا ابنى انا بقالى حوالى ٢٥ سنه معرفش عنها حاجه بس هى هربت و هى حامل فى ابنى أو بنتى الله اعلم
الله يسامحها بقا مطرح ما راحت
دورت عليها كتير علشان خاطر ابنى اللى كنت مستنيه لكن للاسف طفشت و معرفتش لها طريق و معرفش ابنى و الا بنتى دا فين . بس انت بتسال ليه يا ابنى ؟؟
اصل انا جاى لك من طرفها
ايه من طرفها ؟؟؟ هى فين ؟ و فين ابنى ؟
انا ... انا ابنك اسامه و دى شهاده ميلادى
اسامه 😲😳😳 يا حبيبي يا ابنى يا حبيبي
تعالى فى حضنى يا حبيبي ياااااا انا طول عمرى بحلم باللحظه اللى اخدك فيها فى حضنى يااا يا ابنى
انا كمان قعدت اعيط فى حضن ابويا و حكيت له ليه امى هربت بى و انا فى بطنها
ابويا هز دماغه و قالى فعلا انا كنت هرتكب الغلطه دى و اظلم زينب علشان خاطر مراتى الاولى بس خلاص هى ماتت من خمس سنين و انا بصراحه اتعقدت و محبتش اكرر غلطه زينب مرة تانيه
بس انا عايزك تسامح امى
انا مسامحها كفايه انها ربت لى راجل محترم زيك يا حبيبي
قعدت مع ابويا و حكيت له على كل حاجه حصلت معانا من اول ما امى هربت و هى حامل لغايه ما سافرت انهارده تحج
المفاجاه بقا أن ابويا مطلقش امى و لسه على ذمته و لما استغربت اوى من كدا و سالته ليه مطلقتهاش و هى هربت منك و اخدت ابنك
قال يا ابنى امك كانت بنت غلبانه و بنت حلال و انا كنت عارف كدا كويس اوى و كنت شايف مراتى الاولى بتظلمها كتير اوى و انا علشان مزعلهاش كنت بسكت و اعمل نفسي انى مش واخد بالى . و لما هربت بيك كان عندى امل انى هلاقيها و هعوضها عن اللى عملناه فيها
انا لازم اعوضك و اعوض والدتك عن كل اللى شفتوه فى حياتكم.
بعد شهر كان ميعاد رجوع امى من الحج ابويا صمم يستقبلها فى المطار معايا
اول ما شافها قالها حمدالله على السلامه يا حاجه
امى قالت له الله يسلمك يا حاج سيد سامحنى
قالها مسامحك و الله يا حاجه انتى مراتى ام ابنى
امى بصت كدا و استغربت اوى !!! 🥺 مراتك ؟؟؟
قلت لها ماهو مطلقيش يا اما
ابويا قال ايوه يا حاجه مطلقتكيش كنت عارف ان اليوم ده هيجى فى يوم من الايام
امى فرحت اوى و روحنا كلنا على بيت ابويا و لاول مره احس انى بقيت شخص طبيعى عايش بين اب و ام مبقتش يتيم خلاص
اه نسيت اقولكم انى فتحت معرض كبير اوى فى ابو كبير للاثاث و سكينه معرض اسامه سعاده و ابويا جوزنى من هناك بنت عمتي ثريا بنت زى القمر 😍😍😍عقبالكم جميعا 😘😘
تمت
ارجو أن تكون القصه نالت اعجابكم و لو عجبتكم أو أدخلت عليكم شئ من السعاده ارجو الدعاء لوالدى رحمه الله
اشكركم
د. جيهان عادل 😊
🌹 الجزء الاول انا اسامه جيت انهارده علشان احكيلكم حكايتى انا دلوقتى عندى ٢٧ سنه عايش مع والدتى بس مشفتش …){kind=link}
تعليقات
إرسال تعليق