الغريب( كامله )
الجزء الاول
انا حسن عمرى ٢٨ سنه اتخرجت بقالى ٥ سنين رحت الجيش سنه ما هو محسوبكم معاه ليسانس اداب قسم تاريخ 😁
كنت فاكر انى لما اتخرج المدارس هتتخانق على و مش هبطل دروس خصوصيه . و انى هعرف اعوض اهلى عن اللى صرفوه على و كمان اساعدهم فى تربيه اخواتى
ابويا راجل فلاح غلبان عنده ٨ قراريط بيزرع فيهم و بياكلنا من خيرهم بجانب شغلانه من هنا يوميه من هنا و اهى ماشيه
بسمه البنت اللى كنت بحبها و كانت معايا فى الكليه و كنت معشم نفسي انى اتجوزها بعد ما اخلص و طبعا كنت فاكر أن الحال هيتعدل لكن للاسف كل دى كانت احلام فى احلام . بسمه اتجوزت اول عريس جالها... عريس على حد قولها متريش و جاهز مش هيخليها تستنى سنين من غير ما تعرف أولها من آخرها 😔
بعد ما طلعت من الجيش بقيت ادور على اى مدرسه ادرس فيها كنت الاقي المرتبات هزيله اوى متكفيش العيش الحاف . بقيت اقدم فى المسابقات اللى بتنزلها وزارة التربيه و التعليم و للاسف كنت اسمع انها بالواسطه و المحسوبيه يعنى من الاخر كدا كوسه
طبعا انا طول الفتره دى مش قاعد فى البيت انا كنت بطلع يوميه مع اى حد عشان اجيب بس مصاريفى على الأقل
مثلا يوم اشتغل مع عمال الصبه و اشيل رمل و زلط و خرسانه، يوم اشتغل مع ممحر صبى عنده اناوله اى حاجه و اجهز له الشغل ،يوم اشتغل مع مبلط .... و هكذا لما تعبت اوى و بقيت كاره نفسي و كاره البلد كلها
و كنت دائما اكلم نفسي و ايه فايدته التعليم بقا لما انا مش عارف اكل نفسي و لا افتح بيت بشهادتى
ياريتنى بدأتها بدرى بدرى و خدتها من قصيرها و اتعلمتلى صنعه اكل منها عيش من و انا صغير كان زمانى دلوقتى متجوز و عندى عيال 😔
و فى يوم بعد ما خلصت شغلى رحت اقعد على القهوه مع جماعه اصحابى نلعب لنا دور طاوله و نشرب شويه شاى
و احنا قاعدين و عمالين نتكلم عن حال البلد و التعب اللى بنشوفه من غير لازمه
اسلام صاحبى قالى انا خلاص هاسافر السعوديه ابويا خدنى امبارح و رحنا مكتب سفريات و هنشترى فيزا و اسافر بدل القعده هنا دى
قلت له طب ما تشوفلى معاك سفريه يا اسلام
و ماله تعالى نروح للراجل نكلمه عليك يمكن تلاقيلك عقد و الا فيزا
طيب ما تقوم بينا دلوقتى نروحله
دلوقتى ؟؟ مش عارف زمانه فاتح و الا لا
طب مش معاك رقمه ما تتصل عليه ؟
ايوا استنى الرقم اهو
الو .... استاذ فواز .... انا اسلام اللى جيت لك امبارح مع ابويا
اهلا بيك ...حضرتك فى المكتب دلوقتى ؟؟
طيب انا جايلك انا وواحد صاحبى حالا مسافة السكه
مع السلامه
قمنا من على القهوه و رحنا مكتب فواز للعماله بالخارج
اول ما دخلنا لقينا راجل كبير فى الخمسينيات كدا اصلع و كرشه كبير اوى و لابس نضاره كعب كوبايه وعنده شنب زى بتاع هتلر كدا كنت عايز اضحك بس مسكت نفسي 😂
اول ما دخلنا الراجل رحب بينا اوى
و اسلام قاله دا صاحبى حسن عايز فيزا السعوديه او اى بلد تانيه
* الراجل قالى معاك مؤهل ايه يا استاذ حسن ( بصوت توفيق الدقن فى ابن حميدو الباز أفندى 😂😂 )
_ قلت له معايا ليسانس اداب قسم تاريخ يا استاذ فواز
* قال امممممم بس التخصص دا حاليا مش مطلوب عندى
_ قلت اومال ؟؟
* قالى عندى فيزا عامل زراعى ب ١٥٠٠ ريال فى الشهر
_ طب و دى ظروفها ايه ؟؟
* دى يا سيدى هتدفع لى تمن الفيزا تلات شهور يعنى حوالى ٢٠ الف و الاقامه هناك على الكفيل تذكره الطيران عليه برده بس الاكل و الشرب عليك . اه و لازم تغير بطاقتك و تكتب المهنه عامل عشان الفيزا
_ طب يعنى الالف و نص دول يعملولهم كام بالمصرى؟؟
* حوالى ٧ آلاف و نص
_ يعنى ٧ آلاف منهم اكلى و شربى طب هيفضلى ايه احوشه و ايه ابعته لاهلى ؟
* و الله هو دا المتاح حاليا و لو مش عاجبك ابقى فوت على فى وقت تانى يمكن الاقيلك حاجه افضل و الا اقولك متتعبش نفسك هات تليفونك و انا لو لقيت حاجه مناسبه هتصل بيك على طول
_ قلت له طيب يا استاذ هشور ابويا كدا و ارد عليك
* طيب و دا الكارت بتاعى فيه كل ارقام تليفوناتى
_ نستاذن احنا بقا
*طب اقعدوا اشربوا حاجه الاول
_ لا متشكرين نشرب ان شاء الله فى فرصه تانيه .
نزلت من عنده و انا متضايق اوى بقا دى اخرتها هشتغل عامل زراعى بمرتب يدوب يعيشنى و ابعت منه حاجه لاخواتى و يخلص
اسلام قعد يحاول يقنعنى و يقولى مش احسن من هنا بنشتغل يوم و عشره لا . فكر تانى كدا بس بالهداوه و انت تلاقى أن مفيش حل غير دا
لا يا اسلام انا عندى حل تانى هو صعب شويه بس احسن من دا بكتير
حل ؟ حل ايه يا حسن ؟؟؟
عايزين تعرفوا حسن بيفكر فى ايه استنونى فى الجزء التانى 🤗
يتبع ..........😊gg
الغريب
الجزء الثاني
اسلام قعد يحاول يقنعنى و يقولى مش احسن من هنا بنشتغل يوم و عشره لا . فكر تانى كدا بس بالهداوه و انت تلاقى أن مفيش حل غير دا
لا يا اسلام انا عندى حل تانى هو صعب شويه بس احسن من دا بكتير
حل ؟ حل ايه يا حسن ؟؟؟
الحل انى اروح ايطاليا
ايطاليا مين يا عم دى عايزه كوم فلوس
بس برده الفلوس اللى بتيجى من وراها كوم . انت فاكر الواد حماده الرايق ؟ سافر بقاله سنه اهو أهله هدوا بيتهم و بنوه و أبوه داير يشترى فى أراضى ما شاء الله.
بس السفر ده مش امان يا صاحبى و احنا بنسمع أن واحد بيوصل و عشره بيغرقوا و الموضوع فيه نصب كتير . و بعدين هتجيب فلوس السفر منين دا بيطلبوا بالسبعين و التمانين الف
الفلوس تتدبر يا اسلام . بس انا لازم اوصل للراجل اللى سفر حماده هو ده اللى هيوصلنى إلى انا عاوزه
انت حر يا صاحبى بس الحوار دا كبير و السكه دى مش مضمونه
متشغلش بالك انت بس يا اسلام و سبنى اعمل اللى فى دماغى
تانى يوم رحت لأبو حماده و سالته عن احوال حماده و عن مكتب الراجل اللى سفره . الراجل ادانى الكارت بتاعه و خدت بعضى على طول و رحت له
راجل طويل ابيضانى مسرح شعره على جنب مناخيره طويله لابس بدله كدا من التمنينات مخططه و تحتها قميص لمونى .
سلام عليكم استاذ سعيد
عليكم السلام يا استاذى اتفضل
كنت عاوز اسال حضرتك عن السفر لايطاليا ؟ انا لى واحد صاحبى انت سفرته من حوالى سنه كدا
_ صاحبك مين ؟؟؟
صاحبى حمادة الرايق
_ اااه افتكرته ايوه دا حاله بقا عال اوى و ربنا فتحها عليه اوى ما شاء الله
ايوه و عشان كدا كنت عايز اسافر زيه انت عارف حال البلد و حال الشباب
_ طبعا طبعا السفر دلوقتى بقا ضروره مش رفاهيه
طيب انا كنت عايز اعرف نظام السفر و مطلوب اد ايه و الورق المطلوب و كدا
_ لا كلها حاجات بسيطه اوى متقلقش
يعنى كام برده ؟
_مفيش انت هتطلع باسبور و تحضر اوراقك و احنا هناخدك لغاية ليبيا و من ليبيا هتركب مركب توصلك على إيطاليا
طب و بالنسبه للفلوس كنت عايز اعرف كام ؟
_ الفلوس مش هنختلف فيها متقلقش
انا مش قلقان بس عشان اعمل حسابى بس .
_طيب يا سيدى مطلوب مية الف
ايه مية الف ؟؟ كتير اوى انا كنت فاكرهم اقل من كدا بكتير . و بعدين انا عارف إن حماده سافر بأقل من كدا بكتير
_ منا قلت لك مش هنختلف يا سيدى ممكن اسفرك ب ٦٠ الف بس
طب و الفرق دا كله جاى منين
_ الفرق دا يا سيدى جاى من عدد اللى راكبين المركب يعنى السفر ابو مية الف بيكون العدد اللى على المركب صغير شويه لكن ابو ستين بيبقى العدد كبير شويه
طيب يا استاذ سعيد هدبر حالى و ارجع لك
_ و ماله يا استاذ بس لو مستعجل فى مركب طالعه كمان عشرين يوم
متشكر اوى هخلص الورق و اجيب لك الفلوس و اجى
_ بس لازم تقولى قبلها باسبوعين على الاقل و تدفع حاجه تحت الحساب
تمام بكرا هجيب لحضرتك خمس الاف جنيه ربط كلام
عقبال ما اجهز نفسي
_طيب تمام
سلمت على الراجل و نزلت بس دماغى كانت بتلف هجيب الفلوس دى كلها منين ؟؟؟
روحت البيت و انا شايل الهم ابويا شافنى و سالنى ايه اللى مضايقك يا ابنى حكيت له على كل حاجه
ابويا سكت شويه و قالى طب يعنى السفريه دى مضمونه يعنى ؟
قلت ايوه طبعا و اصحابى مسافرين مع الراجل دا و بقا حالهم عال
طيب يا ابنى متشلش هم انا هبيع الكام قيراط اللى حيلتى و ادبرلك الفلوس
بس يا ابا هتبيعهم ازاى ؟ طب و اخواتى ؟
ما انت هتعوضنى اكيد يا حسن
طبعا يا أبا انا و فلوسي كلى ليك .
طيب خلاص يا حسن انا هبيع الارض و اجيب لك الفلوس و انت بقا روح ودى للراجل الخمسة آلاف جنيه اللى محوشهم و خلص ورقك و ربنا يعمل اللى فيه الخير
حاضر يا ابا
تانى يوم رحت اعمل الباسبور و رحت اديت لسعيد الفلوس و ابويا كلم واحد جارنا كان نفسه يشترى ارضنا من زمان و اتفق معاه ع السعر و خد منه عربون و كتبوا عقد ابتدائى و الباقى عند التسجيل
لما دخلت على ابويا لقيته حاطط ايده على خده و قاعد زعلان . و لما سالته قالى
انا خايف عليك يا ابنى انا بسمع أن الموضوع دا مش امان بس انا محبتش احبطك و اكسر نفسك كفايه اللى انت فيه
قلت له يا أبا انا عارف انك زعلان على الأرض برده بس انا ان شاء الله هعوضك عنها و هيكون عندك بدل القيراط فدان أن شاء الله
ربنا يوفقك يا ابنى و يصلح حالك
طبعا امى و اخواتى كانوا زعلانين اوى و امى بقت تعيط و تقولى متسافرش يا ضنايا و خليك معانا دا اللى ما تصبحه و تمسيه ما تعرفش ايه جرا فيه
قلت لها بعد دا كله يا أما و بعد ما ابويا باع الارض مش هينفع ارجع فى كلامى خلاص
فعلا بعد ٢٠ يوم كنت على الحدود مع ليبيا عدينا الحدود و كل شويه ناس يوقفوا العربيه و ياخدوا مننا فلوس
بعدها الراجل خبانا فى بيت قريب من البحر يوم بليله
بعدها جه قالنا الفجر هنتحرك
قمنا الفجر خدنا شنطنا و رحنا عشان نركب السفينه لقيناه لانش صغير ميشلش ٢٠ واحد و لقينا اللى واقفين و لا مية واحد. 😔
يا خبر اسوح دول كلهم هيركبوا فين ؟؟
بقينا نزعق مع الراجل و نقوله هنركب كلنا ازاى هنا يقول اللى مش عاجبه ميركبش بس ملوش فلوس عندنا هو اللى اختار بنفسه
طبعا الكل ركب و مقدرش ينطق كل واحد مننا مبيع أهله حاجه عشان يعرف يسافر السفريه دى
ركبنا و اللانش كان ماشي مايل من كتر الحمل اللى شايله
طبعا هما مبيروحش مباشره ايطاليا لا دول بيلفوا علشان ينزلوا الناس بعيد شويه
مشينا فى الميه حوالى خمس ساعات و فجاه لقينا اللانش ابتدى يغرق من كتر الحمل اللى عليه
و لقيت الشباب اللى حولى عمال يصرخ و اللى يجرى يدور على ستره نجاه و اللى يجرى يمسك طوق نجاه و اللى يصرخ و يقول هموت مبعرفش اعوم و سادت حاله من الفزع الشديد و الهلع
و انا مفيش فى بقى غير كلمه يا رب .... يارب استر يا رب استرها عشان امى عشان ابويا عشان اخواتى
يا رب يا رب
عايزين تعرفوا حصل ايه لحسن بعد كدا استنونى الجزء الجاى
يتبع ..........😊 gg
الغريب
الجزء الثالث
لقيت الشباب اللى حولى عمال يصرخ و اللى يجرى يدور على ستره نجاه و اللى يجرى يمسك طوق نجاه و اللى يصرخ و يقول هموت مبعرفش اعوم و سادت حاله من الفزع الشديد و الهلع
و انا مفيش فى بقى غير كلمه يا رب .... يارب استر يا رب استرها عشان امى عشان ابويا عشان اخواتى
يا رب يا رب
اللانش اخد حوالى نص ساعه عقبال ما غرق خالص وسط صريخ فظيع مفيش حد سامع حد من كتر الصريخ و كان الموج عالى اوى
انا الحمد لله بعرف اعوم بس برده كنت خايف اوى لانى عمر ما شفت موج عالى بالشكل دا
بقيت اتشاهد على نفسي و استرجع شريط حياتى يا ريتنى سمعت كلام امى يا ريتنى ما بيعت ابويا أرضه يا ريتنى ما سبت بلدى انا ايه اللى عملته فى نفسي دا
طب و ابويا هيصرف على اخواتى ازاى دلوقتى ؟؟؟
يارب يا رب نجينى عشان خاطرهم بس
بقيت اشوف ناس بتغرق قدامى و انا مش عارف اساعدهم الوقت طول اوى و الليل دخل و انا لقيت خشبه معرفش جت منين زى ما يكون ربنا بعتهالى سندت عليها و من كتر تعبى اغمى على
معرفش قعدت اد ايه فى الميه لكن لما فتحت عنيا لقيت النهار طلع تانى و انا لسه عايم على وش الميه و الخشبه شايلانى
اول ما فتحت عينى لقيت نفسي لسه فى الميه و لسه الكابوس دا مخلصش قعدت اقول لنفسي انا مش هستسلم انا لازم اعوم لغايه ما اوصل الى أرض... بس انا مش شايف اى ارض خالص انا تعبان اوى و جعان خلاص مش قادر انا حاسس ان قوايا خلاص رااحت . بعد ساعات فى الميه .....
ايه دا ؟؟؟؟🥺😲😲 انا شايف شجر هناك اهو يعنى فى أرض قريبه اهى يا ما انت كريم ياااارب
لقيت نفسي ربنا ادانى قوه معرفش جت لى منين و ابتديت اعوم و اعوم لغايه ما وصلت للأرض اول ما طلعت على الشط اترميت زى القتيل من كتر التعب و نمت معرفش ازاى
قمت من النوم بعد فتره معرفش اد ايه بس الدنيا مكنتش ليلت. قمت لقيت نفسي جعان اوى قعدت ادور على اى حاجه اكلها لقيت اشجار فواكه كتير اوى قعدت اكل لما شبعت و لما لقيت خلاص الدنيا هتضلم قعدت ادور على خشب وجبته وولعت بالزلط طريقه كنت متعلمها فى الكشافه فى المدرسه
ولعت نار و قعدت افكر يا ترى انا هنا فى الجزيره لوحدى ؟؟ يا ترى همشي من هنا ازاى ؟؟
قعدت افكر لغايه ما رحت فى النوم و قمت لقيت الشمس طلعت
قمت قعدت ادور فى الجزيره دى على اى حد أو اى حاجه تساعدنى
ملقتش اى حاجه طيب انا عطشان اوى عايز اشرب هعمل ايه
بقيت الاقى الندى المتجمع على أوراق الشجر و بقيت أجمعه و اشرب منه
و ابتديت اجيب اخشاب الأشجار و قعدت أيام كتير اوى احاول اعمل زى كوخ كدا انام فيه
طبعا كان فى بعض الحيوانات على الجزيره بس كانت سريعه جدا مكنتش بعرف امسكها بسهوله فكان اكلى معظمه فواكه لغايه ما فى يوم لقيت ماعز جبلى رجله مكسوره و واقع تحت شجره و مش عارف يتحرك
و كان بالنسبالي حاجه هايله كميه من اللحم حوالى ٤٠ كيلو بقيت احافظ عليها اوى بطريقه معينه كنت قريت عنها زمان و كانوا بيعملوها سكان الصحارى اسمها اللحم المقدد . و بقيت اقتصد فيه كل يوم اكل قطعه مع شويه فاكهه و تجميع الميه .
لغايه ما فى يوم و انا ماشي لقيت عين ميه حلوه مبقتش مصدق نفسي و بقيت اسجد لربنا من كتر الفرح .
كنت ساعات انزل اصطاد سمك بحربه كنت عملتها
و بدأت أفكر انى لازم اعمل مصايد علشان اقدر اصطاد حيوانات تانيه . كمان لازم ازود لياقتى البدنيه علشان اقدر أجرى و اكون سريع
كل اللى اتعلمته فى حياتى من الشغلانات اللى اشتغلتها فى مصر فادتنى جدا و بقيت اتمنى يوم من ايامها
اكتر حاجه كانت مأثره فى انى لوحدى كنت حاسس انى هتجنن مش لاقى حد اتكلم معاه
كل يوم كان بيمر على كنت اعلم على شجره جنب الكوخ اللى بعمله علشان اقدر اعرف عدد الايام اللى قضيتها هنا
و قعدت شهور اعمل فى الكوخ لغايه ما خلصته.
الجزيره دى كان شكلها عجيب اوى عباره عن حته ارض فى وسط الميه بس كبيره جدا. لما طلعت من الميه لقيت قدامى اشجار كبيره جدا من كل صنف و لون و اشجار فواكه عمرى ما شفتها و لا سمعت عنها اشجار كثيفه متشوفش ايدك لما تدخل جواها. فى يوم قلت لنفسي انا عاوز اجيب اخر الشجر ده و فعلا مشيت جواه و لقيت نفسي طلعت الناحيه التانيه من الجزيره بعد حوالى ٣ ساعات مشي و لقيت مكان صخرى ورا الأشجار و شكل الصخور بديع جدا سبحان الخالق حاجه كدا زى سحر
دخلت بين الصخور لقيت شلال ميه حلوه رائع الجمال نزلت تحته و بقيت اصرخ من كتر الفرحه
المكان هنا جميل جدا و شكل الصخور هنا كأنها احجار كريمه عمرى ما شفت صخور بتلمع كدا
جمعت شويه احجار شكلهم عجبنى اوى و قلت اروح الكوخ قبل الدنيا ما تضلم .
روحت و حطيت الأحجار فى شنطه جلد كنت عملتها من جلد الماعز . و نمت و كل يومين تلاته اروح اجيب شويه صخور و استحمى فى الشلال
عدت شهور و مشفتش مركب معديه ناحيه الجزيره هنا. يا ترى الجزيره دى فين و ليه محدش بيقرب منها ؟
يا ترى اهلى عاملين ايه دلوقتى ؟
كل دا هتعرفوه فى الجزء الجاى باذن الله
يتبع ............. ☺️gg
الغريب
الجزء الرابع
تعالوا نشوف ايه حصل مع اهل حسن فى مصر من بعد ما سافر مع سعيد
(يوم سفر حسن )
_قومى يا ام حسن اغسلى وشك كدا و بطلى عياط
-ابطل ايه بس يا ابو حسن دى اول مره ابنى يفارق حضنى و لا عارفه هيحصل فيه ايه ؟
_هيحصل كل خير باذن الله متقلقيش بس. الواد هيكون زى الفل و بكرا يعوضنا و يساعدنا فى تربيه اخواته انتى ناسيه أن ورانا كوم لحم ... اخواته البنات اللى عاوزين نجهزهم و اخواته الولاد اللى لسه فى ابتدائى و إعدادى و لسه المشوار طويل و انا زى ما انتى شايفه كبرت و بقيت بشتغل بالعافيه و ابننا أن شاء الله ربنا هيفتح عليه و يرجع لنا الارض اللى بعناها و زياده
-بس ابنى هيوحشنى يا حج
_هيوحشنا كلنا يا ام حسن . هو انتى فاكره انى مش زعلان على سفره و قلبى بيتقطع زيك بالظبط لكن دى حاجه لابد منها هو انتى مش شايفه ظروف البلد ؟
-طب هنطمن عليه امتى ؟
_سعيد قالى أن الموضوع هياخد اسبوع و انا وصيت حسن أنه أول ما يوصل يتصل بينا متقلقيش .
بعد اسبوع ......
-بقولك ايه يا ابو حسن فات الاسبوع اللى قلت عليه و الواد و لا حس و لا خبر . حسن متصلش 😪
_اصبرى شويه يا ام حسن الغايب حجته معاه
-طب ما تتصل على سعيد تسأله
_طيب يا ستى حاضر عشان ترتاحى بس . اهو الرقم استنى ....
_سلام عليكم يا استاذ سعيد
كنت عايز اتطمن على حسن
ايه .... 😲😲 غرقت ازاى طب و ابنى ابنى حصله ايه؟؟
-فى ايه يا ابو حسن... حسن جراله ايه ؟؟؟. ...
ااااه يا ابنى .... يا ضنايا يا ابنى ..... الطف بينا يارب ... الطف بينا يارب
قولى يا حج حصل ايه متخبيش على ابنى مات ابنى مات صح 😱😰
_لا يا حجه ممتش فال الله و لا فالك. هى المركب غرقت بس فى ناس كتير نجت و السلطات الايطاليه قبضت عليهم و هيرحلوهم لمصر أن شاء الله حسن فيهم
-سعيد قالك أن حسن فيهم ؟؟؟؟ قالك صح ؟صح يا حج ؟
_لا هو مقليش لأنه ميعرفش مين نجى و مين لا بس انا قلبى حاسس ان ابنى ممتش ابنى عايش أن شاء الله
-يا ميلة بختك يا عزيزه ... انا مكنتش موافقه على السفريه دى من أصله انت اللى شجعته .. لو ابنى جراله حاجه مش هسامحك طول عمرى
_طولى بالك بس يا ام حسن أن شاء الله خير انتى ناسيه أن حسن بيعرف يعوم .أن شاء الله هيكون من الناجين
ربنا ينجى كل الشباب يارب
-طب احنا نسال فين عشان نعرف ؟ احنا مش هنفضل قاعدين حاطين ايدنا على خدنا كدا . انا لازم اتطمن على ابنى
_حاضر يا عزيزه هقوم اسافر و اروح السفاره اسال هناك
-رجلى على رجلك مش هسيبك .
_خليكى بس و اول ما اعرف حاجه هكلمك على طول
-لا بالله العظيم منا سايباك . رجلى على رجلك
_طيب تعالى و امرى لله
فى السفاره ....
_سلام عليكم يا استاذ
*و عليكم السلام يا حج
_كنت عايز اسال عن مركب كانت مسافره ايطاليا و غرقت امبارح هل عندكم خبر عنها ؟
*ايوا للاسف فى ناس كتير ماتت لان اللانش كان بعيد عن الشواطئ الايطاليه
_طب اذا سمحت يعنى لو عندك كشف باللى نجوا اصل ابنى كان على المركب دى و عايزين نطمن عليه
*طب اتفضل ارتاح يا حج ثوانى احضر الكشوف
بعد خمس دقائق مروا على ابوحسن و ام حسن كأنها دهر عنيهم معلقه على الموظف متابعين كل حركاته و مستنين اللحظه اللى ينادى عليهم و يوريهم الكشف
*اتفضل يا حج
ابو حسن اتنطر من مكانه و راح جرى مسك الكشف فى ايده و مر بعينه على الاسماء ملقاش ابنه فيهم
ابو حسن مسك دماغه و الدموع بقت تنزل من عنيه و ام حسن بصاله و مش قادره تنطق
الموظف قالهم طب بصوا فى اسماء المتوفين كدا
ابو حسن بص ملقيش اسم ابنه
رجع له الامل و مسح دموعه و قال للموظف اسم ابنى مش فيهم الحمد لله يا رب انا كنت متاكد ان ابنى حى
طب هو فين؟ راح فين ... ؟
*هو كدا يا حج مدام مش فى الكشفين دول يبقى فى كشف المفقودين يعنى احتمال يكون عايش و احتمال لا
لازم تستنوا كام يوم يمكن الموج حدفه مكان بعيد و هيظهر أن شاء الله
_متشكرين يا ابنى يعنى نيجى نسال امتى تانى
*كمان اسبوع كدا يا حج عشان بس نكون اتاكدنا
_طيب يا ابنى كتر خيرك . سلام عليكم
طبعا الاسبوع مر على أسرة حسن كأنه سنين ، البلد كلها كانت حزينه على حسن و بقوا كل يوم يجى حد يسال عن اخبار جديده
فى خلال الأسبوع دا ام حسن جت لها جلطه من كتر الحزن على ابنها .
ابو حسن بقا بين نارين مش عارف يعمل ايه بقى يصرف عليها من باقى حق الارض اللى كان معاه
و لما راح سال فى السفاره بعد الاسبوع ما خلص الموظف قاله نفس الكلام ابنك فى المفقودين و لسه منعرفش اى اخبار عنه 😔
_طب اسال تانى امتى يا ابنى؟
*متتعبش نفسك يا حج هات رقم تليفونك و لو ظهر اى حاجه هتصل عليك فورا
_كتر خيرك خد رقمى اهو... بس استاذنك ممكن رقمك عشان اتطمن كل حين كدا متخافش و الله مش هزعجك
*حاضر يا حج هرن عليك دلوقتى و احفظه عندك باسم صفوت
_ماشي يا استاذ صفوت ربنا يخليك يارب
رجع ابو حسن البلد و كان ماشي يفكر هيقول لعزيزه ايه ؟
لو قلت لها الحقيقه مش هتصدق و هتقول أن ابنها مات و ممكن تروح فيها هى كمان .. طب اعمل ايه يا ربى
انا هقولها لقوه و هو عايش و كويس بس حاجزينه عشان كان مسافر هجره غير شرعيه و لما يحققوا معاه هيرحلوه على مصر تانى
و فعلا اول ما دخل ابو حسن على عزيزه شاورت له ابنى جراله ايه ؟؟؟
_قالها لقوه متقلقيش الواد زى الفل
عزيزه فرحت و بقت تهز راسها لابوحسن بجد و الا بتضحك على ؟؟
_بجد يا ستى بس هما حاجزينه يومين كدا على ما يحققوا معاه و بعدين هيرحلوه
عزيزه رفعت أيدها للسما تحمد ربنا و تشكر فضله أنه نجالها ابنها . و ابو حسن شايفها و قلبه بيتقطع مش قادر يقولها الحقيقه
مرت الايام و الشهور و عزيزه كل يوم تسال عن ابنها و ابوحسن يكدب عليها و اخر ما زهق قالها صراحه الواد اتحبس سنتين هناك بتاع السفاره اللى قالى كدا و بعد ما يقضى العقوبه هيترحل دا القانون الايطالى
طبعا عزيزه عيطت شويه بس حمدا ربنا على أنه عايش و خلاص
ابو حسن بقا كان شايل النار جوه قلبه و مش قادر يفضفض مع اى حد لاحسن يوصل الخبر لمراته
مرت شهور و الاب بيصرف من الفلوس اللى باقيه من الأرض و خلاص فلوسه قربت تخلص .
ابو حسن بقا يخرج يدور على اى شغلانه يجيب منها قرشين و اهو ماشي الحال
فى الجزء الجاى هنعرف حسن عمل ايه و هل هيفضل فى الجزيره و الا هيخرج منها ... استنونى
يتبع ....... 😊gg
الغريب
الجزء الخامس و الأخير
حسن قضى شهور فى الجزيره جسمه خس اوى دقنه و شعره بقوا طوال جدا
كل يوم يحلم بكوابيس يحلم بالمركب و الناس الغرقانه . ايام يحلم أنه لقى مركب و ركب و رجع بلده .... اوقات يحلم أن حيوان كبير بيهاجمه و هو بيهرب منه و يقوم من النوم ريقه ناشف و بيلهث
حسن أعصابه تعبت اوى و بقا يكلم نفسه
يارب انا تعبت اوى يا رب ارحمنى من الوحده دى و الله يا رب لولا الانتحار حرام كنت انتحرت و خلصت من حياتى كلها ..
انا عايش ميت و لا حد سامع عن حاجه و لا انا سامع عن حد حاجه
اكيد اهلى زمانهم افتكرونى مت و فقدوا الأمل فى رجوعى
يا ترى يا اما عامله ايه دلوقتى؟؟ يا ترى يا ابا عملت ايه بعد ما بيعتك ارضك ؟؟؟
يا ترى اخواتى عاملين ايه ؟؟ البت سعاد وحشتنى اوى و سميره و الواد مراد مع أنه جحش صغير بس بحبه ابن الايه دا..... و الواد مهدى وحشنى راخر السنه ادى عنده ثانويه عامه يا ترى زمانه عمل ايه و بيذاكر و الا لا ؟ و يا ترى ابويا بيجيب له مصاريف الدروس منين ؟
بس الواد مهدى دا جدع و مش هيسيب أبوه اكيد هيشوف شغلانه فى الاجازات علشان يشيل مع أبوه
يااااااااا انا تعبت اوى من كتر التفكير يارب
انا حياتى سيئه جدا 😔
من اول حياتى اللى كنت عايشها فقر طول عمرى و شايف ابويا ضهره محنى علينا و بعديها حب عمرى اللى كنت بتمنى اكمل معاها حياتى و برده بسبب ظروفى راحت من ايدى
و لما حبيت أخرج من الفقر و احاول ابقى افضل و اعيش اخواتى و اهلى فى مستوى احسن من اللى عاشوا فيه و كنت بحلم انى اكون أغنى و لما اخلف ولاد ميعشوش اللى عشته ... كانت النتيجه انى لقيت نفسي راكب مركب غرقانه ... غرقانه باحلام شباب كل واحد منهم وراه حكايه و ماساه... معاناه لا يعلمها الا الله
بس انا اللى غلطان برده اللى خلانى اوفر لسعيد ٦٠ الف جنيه كان ممكن اخدهم و اعمل مشروع فى بلدى كان ممكن اشترى شويه خشب و اشتغل مقاول و انا بفهم فى الموضوع ده كويس و عارف إن فلوسه حلوه
انا عقلى كان فين يا رب
انا سئ و حياتى سيئه اوى ...... لا و الوضع اللى انا فيه دلوقتى اظن مفيش أسوأ من كدا يا رب 😔
مفيش نهايه للى انا فيه هفضل طول عمرى محبوس هنا فى الجزيره دى ...
بس انا طمعان فى كرمك يارب
زى ما نجيت سيدنا يوسف من البير و بعدها من السجن
زى ما نجيت سيدنا موسي من فرعون
زى ما نجيت سيدنا يونس من حبسته جوه الحوت
ايوه ... سيدنا يونس كان بيقول لا اله الا انت سبحانك انى كنت من الظالمين ...
حسن لما تذكر دعاء سيدنا يونس بقا ميتقطعش من على لسانه لا ليل و لا نهار ...
و فى مره كان الجو بارد جدا حسن جمع كميه كبيره من الأخشاب وولع النار فيهم علشان تكفيه تدفيه طول الليل و للاسف النار مسكت فى الكوخ كله و اتحرق الكوخ اللى كان اويه و اللى قعد يعمل فيه شهور و ايام
حسن صرخ و قال حتى الكوخ اللى عملته راااح يا رب
انا خلاص مش عاوز اعيش انا تعبت تعبت يارب
حسن جاله هستيريا عياط و بقى يخبط رجليه فى الارض و مفيش على لسانه غير ليه.... ليه دا كله.... ليه
لغايه ما وقع على الأرض من كتر التعب فرد جسمه و نام
فتح عينه تانى يوم لقى مركب صوتها واضح اوى فى ودنه
حسن مكنش مصدق نفسه بقا يجرى ع الشط و يشاور زى المجنون
و فعلا المركب قربت من الجزيره و نزل ناس الجزيره
حسن مكنش مصدق نفسه بقى يسجد لله و يقوم يحضن فى الناس .
و لما سألهم انتوا جيتوا هنا ازاى دا انا بقالى اكتر من سنه مفيش مركب مرت من هنا
قالوله أنهم شافوا نار طالعه من الجزيره دى و هما عارفين أن مفيش حد فيها فاستغربوا و ربان السفينه طلب من الناس اللى شغاله معاه أنهم يتوجهوا للجزيره يمكن يكون فيها حد طالب مساعده
و عرفت ساعتها أن الكوخ اللى اتحرق و كنت بفكر انها نقمه على و انها حاجه وحشه ..كان هو سبب نجاتى . صحيح الإنسان مبيبصش إلا تحت رجليه و ميعرفش أن ربنا دايما بيدبر له الافضل .ساعات بنفتكر الشئ أنه وحش أو حلو عشانا بس ربنا اعلم و بيدبر لنا اكيد الخير لينا
لو كل انسان فكر بالطريقه دى و عرف أن ربنا بيختار لنا الافضل دايما كانت الناس كلها استريحت .
طبعا رجعت مع المركب و نزلونى على أقرب بلد و لجأت للسفاره هناك و رجعت بلدى
اول ما نزلت على الأرض بقيت اسجد و ابوس تراب بلدى
روحت البلد اول ما ابويا و امى شافونى مكنوش مصدقين نفسهم..... امى بعد شهور من الرقده قامت و بقت تزغرط و ابويا بقى يحضن فى و يبوسنى و انا وطيت على رجليهم ابوس فيها ........
و بقيت اقول لابويا سامحنى يا أبا انا هعوضك عن الارض اللى بعتها أن شاءالله
ابويا قالى و لا يهمك يا ابنى تغور الأرض المهم انك رجعت لى بالسلامه
قعدت احكى لاهلى عن اللى شفته فى الشهور اللى فاتت دى من اول ما ركبت المركب و حكيت لهم عن الاحجار اللى كنت بلاقيها بتلمع
سعاد سالتنى ممعكش منها يا حسن نفسي أشوفها
قلت لها كل اللى جمعته منها يا سعاد كان فى شنطه جلد و لما الكوخ اتحرق مخدتش بالى ادور عليها
قالت يا خساره كان نفسي أشوفها اوى
قلت لها طب استنى يمكن الاقيلك حاجه فى جيبي كدا
و فعلا دورت فى جيوبى لقيت حته
اول ما كلهم شافوها انبهروا بيها
و ابويا قالى الحجر دا شكله حجر كريم يعنى ممكن يكون بمبلغ
قلت له معقوله ؟؟
قال انا بقول يمكن .... على العموم احنا نوريه لحد بيفهم فى الحاجات دى و نشوف
و فعلا ابويا وراه لواحد و الراجل عرض عليه ١٠٠ ألف جنيه و يشتريه منه
بعنا الحجر و انا قلت لابويا على مشروع الخشب و نجيب حته عربيه نص نقل بالتقسيط نشتغل عليها
و فعلا عملت كدا و ربنا فتحها على من وسع
و عرفت ان الرزق بيد الله يرزق من يشاء بغير حساب
اللهم لك الحمد حمدا طيبا مباركا فيه يارب
ااه نسيت اقولكم انى اشتريت لابويا فدان ارض بدل الارض اللى باعها عشانى و بنيت لاخواتى بيت كبير و عملت لكل منهم شقه و شغلتهم معايا فى شغل المقاولات و اتجوزت و خلفت ولد و بنت زى القمر ..و السنه دى أن شاء الله هطلع ابويا و امى يحجوا باذن الله 😘😘
تمت
ارجو ان تكون القصه قد نالت اعجابكم و ارجو ان كنت أدخلت عليكم شئ من السرور الدعاء لوالدى رحمة الله عليه و سائر اموات المسلمين
د. جيهان عادل 😊
 الجزء الاول انا حسن عمرى ٢٨ سنه اتخرجت بقالى ٥ سنين رحت الجيش سنه ما هو محسوبكم معاه ليسانس اداب قسم تاريخ 😁 ك…){kind=link}
حلوة قوي
ردحذف